2011年11月10日星期四

藍血式民主

泛民區選失利,各大黨灰(包括禽流黨嘅何俊男、淫民力量嘅癲狗、瀉民連嘅桃君痕、狀棍黨嘅梁渣傑)事後都走出嚟解畫,有人積極進取、有人負隅死守、有人真情流露,仲精彩過區選前嘅無聊口水戰。

淫民力量嘅「票債票償」行動失敗收場,禽流黨乘機反守為攻,將所有責任推晒落對方度,誓要踢班友出泛民陣營。而一向牙斬斬嘅癲狗竟然冇死撐,坦然承認失敗。桃君痕就做得更徹底,仲引咎辭職添。不過咁,呢兩條友都表示唔會因為今次失利而改變佢地抗爭路線。辜勿論班友嘅激進路線值唔值得支持,起碼佢地都算有骨氣,呢樣我都幾欣賞。至於梁狀棍,就真係出人意表嘞。我一向以為佢好虛偽,點知佢竟然真情流露,喺記招盡吐心底話。

梁狀棍冇承認失敗,而係將失利歸咎於阿爺喺背後操控,透過中聯辦組織動員,啲鐵票要幾多有幾多。佢仲質疑建制派嘅票源來路不明,話唔知啲票喺邊度嚟喎。跟住又揶揄啲選民貪小便宜,投票俾建制派係為咗啲「蛇齋餅糉」。最後仲表示區議員寶座其實完全唔吸引,要啲專業人士落區踎十粒鐘為街坊服務,根本就係委屈咗佢地。

條友貴為大狀,自然係滔滔雄辯,死都拗得番生,不過呢番話就真係破綻百出嘞。首先,話阿爺透過中聯辦喺背後發功,如果係有真憑實據嘅,唔該即刻攞出嚟。空口講白話,又點能夠令人入信呢?就算背後確實有人動員又點,選民最終都係按照自己嘅意願投票啫。唔通中聯辦真係把炮到用人盯人政策,跟埋啲選民入票站,監督住佢地投票?而且講到組織動員,泛民一樣有呢家嘢。有朋友話俾我知,有泛民支持者喺facebook瘋傳一段信息,叫人一定要去投票,如果嗰區冇泛民人士出選就投白票。動員能力唔夠人地強,只可以話係自己冇料到,又或者係不得民心,有乜理由人地叫到啲選民去投票反而係錯呢?話唔知啲票喺邊度嚟就仲搞笑,去得投票,當然係登記咗嘅選民啦。唔通梁大狀棍又懷疑有不法之徒冒用其他選民嘅身分去投票?又當班選民係傻嘅,俾中聯辦呃咗去投票。不過人地始終係香港公民,享有選擇議會代表嘅權利,又冇法例規定傻人唔投得票啫。講到開拓票源,狀棍黨嘅手段仲犀利啦。如果佢地成功幫啲外傭爭取到居留權,咁就真係票源滾滾來嘞。至於話「蛇齋餅糉」呢啲細眉細眼嘢都會影響選情,如果真有其事,只係表示香港嘅選民仲味夠成熟,要檢討嘅反而係普選時間表有冇需要推遲囉。而且以陳熟莊落敗嘅山頂選區為例,「蛇齋餅糉」又有乜可能起到作用呢?仲有,話做社區服務係委屈咗班專業人士,簡直就係自打嘴巴,咁唔願意就唔好派幾十人參選啦,唔通真係「我不入地獄,誰入地獄」?

不過咁,梁大狀棍嘅一番偉論都有可取之處,就係夠晒真。我絕對相信佢講嘅都係出自真心,狀棍黨班藍血貴族一直當自己高高在上,出嚟參政係為咗打救天下蒼生。佢地有學識、有理念,講嘅嘢當然係絕對真理啦,普通蟻民根本就冇質疑嘅餘地,總之佢地講嘅你班友就要信。而家梁黨灰派佢班仔仔女女出嚟參選,其實係本住偉大嘅犧牲精神,希望萬民可以得到救贖。不過你地班蟻民竟然唔領情,為咗啲蠅頭小利而投向魔鬼嗰邊,真係唔嬲就瓦燒啦!由此可以證明,一般平民百姓有幾咁愚昧!所以對於班藍血貴族嚟講,「民主」絕對唔係「人民當家作主」,而係「人民要信佢地係救世主」!

11 則留言:

  1. 公市黨幫吓D外傭打官司啫,佢地都冇破壞香港法治!

    政府基本上已經設左關卡唔俾外傭有居港權,好似明朝政府基本上亦已經設左關卡唔俾清兵入關啦。

    公民黨只係幫外傭爭取居港權,最終外傭爭取成功與否,在於外傭是否成功挑戰到香港嘅法律,公民黨只係參與有關嘅官司,冇破壞過香港嘅法制喎。

    好似吳三桂只係幫清兵爭取入關,最終清兵爭取成功與否,在於清兵是否成功挑戰到大明嘅防衛力量,吳三桂只係打開入關嘅大門啫,都冇破壞過大明帝國嘅城門。

    不過咁,嘅然公民黨對法理精神咁堅定維護,佢地就應該堅決維護埋23條先算合情合理喎!

    回覆刪除
  2. Ebenezer,
    除咗23條之外,人大釋法都係寫咗喺基本法裏面,但係班友就視之為毒蛇猛獸,可見佢地嘅法治精神其實係好有選擇性囉!總之乜都係佢地講晒,對自己有利嘅先係法治,先至值得維護!

    回覆刪除
  3. 條梁渣傑終於道歉喇,個死蠢讀枉書,哩啲食 c 大狀嘅質素真係嚇壞人!

    至於癲狗,選完後我就諗哩條友係咪北京派黎嘅無間道哩?點知今日 730 施老闆都係咁懷疑,哈哈,我係咪要鬧少佢兩句,甚至請佢飲茶呢?

    回覆刪除
  4. laulong,
    呸,條粉腸道歉都道得假過人,而家呃細路咩!至於癲狗,客觀上嚟睇,佢真係幫咗建制派,不過當然係為咗一己私利啦!咁都好,起碼可以俾人睇清楚所謂民主派嘅醜惡真面目!

    回覆刪除
  5. 我都係咁話,佢嗰樣真係好可憎!

    回覆刪除
  6. Coffee,
    係囉,條友皮笑肉不笑,直頭假到出晒面,睇見佢就無名火起!

    回覆刪除
  7. 校長話齋,真係想兜巴星佢兩嘢先再講。。。至於癲狗,我覺得呢條友真係有D唔妥,照計佢係一個絕頂聰明嘅政治家,冇理由好似特登死都要輸咁款,而且佢個仔冇耐前先喺大陸藏毒被人拉咗,竟然可以乜事都冇就放咗出嚟,一定有D嘢嘅。。。
    Derek

    回覆刪除
  8. 最開心係兩家傑條傻佬終於轉呔啦﹐又道歉又話反對大批外傭來港...
    唉﹐講過的說話如潑出的水﹐連果堆“派當紮律師落區玩蛇齋餅粽﹐連我都覺得委屈佢地”的說話都講得出﹐條友實在應該提早辭職啦
    否則公民黨真係死得gala

    回覆刪除
  9. Derek,
    所謂多行不義必自斃,就算唔星條狀棍,佢遲早都會自己仆街架啦!至於癲狗,條友當然唔會理得乜嘢係以大局為重,總之唔出位嗰樣唔做啦!我覺得奇怪嘅,反而係佢公開承認行動失敗,咁樣絕對唔係佢嘅行事作風,亦唔合乎佢班粉屎嘅喜好囉!

    文少:
    條友冇厘誠意,唔知咁嘅所謂道歉會有幾多人buy囉!而且個道歉亦嚟得太遲,條友已經徹底形象破產,唯一止血嘅方法就係辭任黨灰!人地白膠敦都係無意中得罪咗個老太婆啫,都要搞到人頭落地啦!

    回覆刪除
  10. 果條梁渣傑,叫人落台叫人辭職就叻,燒到佢果疊咪一樣賴死唔走,不知所謂。。。
    Derek

    回覆刪除
  11. Derek,
    其實唔止條狀棍,根本成個扮民陣營都係咁雙重標準架啦!好似甘奶威單嘢咁,咪又係不了了之!

    回覆刪除