2011年11月29日星期二

無鹽煮食

今日又考吓大家嘅智慧,俾條低能IQ題你地估吓。謎面係「麥燕停開鑊」,估一種四個字嘅健康烹調方式。俾些少提示,謎面中嘅「麥燕停」其實唔一定要係「麥燕停」,用「何獸蘭」、「魚若微」、「陳惜吱」、甚至任何一個你地睇唔順眼嘅女子代替都可以,但係用麻甩佬就唔得。要聲明一點,我絕對唔係性別歧視,因為咁係劇情需要啫。仲有,唔好質疑個謎面合唔合理,究竟上述奇女子會唔會有鑊開囉!

相信大家都已經有答案,而且全部答中晒添。話係低能IQ題,並唔係表示謎面出得有問題,更加唔係低估大家嘅智慧。而係謎底已經出現咗喺文章標題,根本就唔使估。至於點解謎底會係咁,相信唔使多講啦,我絕對信得過大家嘅國學常識囉!

講到無鹽煮食,我已經奉行咗幾年,絕對稱得上忠實信徒。不過我唔好似啲營養師提倡嗰隻,用天然香料代替鹽囉,而係轉咗用雞粉調味。諗起都覺得搞笑,唔知啲人點解會覺得可以用青檸汁、黑胡椒、或者香草之類嘅嘢代替鹽做調味料呢?如果要我將「雞汁炒菜心」轉成「黑椒檸汁迷迭香炒菜心」,睇怕想唔得到厭食症都幾難囉!

而家除咗煲湯,我煮嘢根本就唔落鹽,淨係會用雞粉同其他醬料。轉用雞粉係因為幾年前喺報紙睇到一單花邊新聞,某米芝蓮星級餐廳主廚爆料,話佢煮嘢咁好食嘅秘訣係用咗雞粉,仲要指定係家落牌嗰隻添。我當然知單嘢好鱔吓,不過試吓都冇壞啫,結果之後就同鹽講咗拜拜囉。

近排成日喺電視睇到某雞粉廣告,話雞粉比鹽健康。呢個廣告有冇誤導消費者,我就唔敢講嘞,費事俾人告啦。當然,如果同等體積嘅雞粉,含鈉量一定比鹽少。不過如果要達到同樣嘅鹹味效果,雞粉肯定要用多啲。而且雞粉仲含有其他添加物(例如色素)添,係咪健康啲就自己諗嘞。我用雞粉代替鹽嘅唯一原因,就係煮出嚟嘅嘢好味啲。可能有人會覺得我好cheap,唔識得欣賞食材嘅真味。我只係覺得,味覺係一種好個人化嘅原始感官,冇必要向人學習,亦唔需要其他人認同。

提到調味,我都知食得太鹹唔健康,世衛就建議成人每日唔可以攝取超過6克鹽(或2300mg鈉)。究竟6克鹽有幾多?我都唔識形容喎,所以就影咗張相俾大家參考吓。總之好肯定,我每日攝取嘅鈉都爆硬燈啦。事實上,想唔爆燈幾乎係冇可能。一包即食麵嘅鈉含量,已經達到每日攝取量嘅上限。而且我煮親即食麵,都會加埋啲鹹到出汁嘅配料,例如泡菜、魚片、牛丸。不過咁,我都已經好克制架喇,啲湯就一定唔會飲埋,雖然真係好好味囉。

講開即食麵,呢排我食緊嗰兩隻(膿心石鍋拉麵同三癢泡菜風味拉麵)都好正,多多鹹,少少辣,啱晒我口味!不過三癢嗰隻就要扣少少分,因為營養標籤有誤導消費者之嫌。驟眼一睇,鈉含量只係佔每日攝取上限47%,即係一日可以食兩包。不過再睇清楚啲,原來數字係以per serving計,而一包麵就有兩個servings。真係有冇搞錯,咁嘅nutrition facts有乜意義呢,唔通預咗人一包麵分兩次食?抑或係,即食麵應該同至愛分享,你一啖,我一啖?其實玩埋晒呢啲陰招有乜用啫,而家啲消費者好精明架喇,點會唔知即食麵係高鹽食品喎!

我自己就唔係「又要威又要戴頭盔」嗰隻,總之鍾意食就食,話知佢鹽份高到爆晒燈啦。好彩我本身唔係太好動物內臟,又唔係咁鍾意食肥膩嘢,只係口味偏濃啫,所以先敢講得咁口響。我只係覺得,任何嘢都要攞個平衡,所以唔會為咗健康而放棄晒鍾意食嘅嘢。如果食而不喜其味,就算有一百歲命又有乜意思呢?!



2011年11月28日星期一

種票疑雲

呢排報紙日日講種票單嘢,睇到人都悶晒。本來我都唔想講埋一份,始終單嘅仲係查緊,未可以蓋棺定論。不過今日睇日月報副刊(其實係星期六嘅),竟然見到個我好討厭嘅婆娘大發謬論,如果唔鏟吓佢,條氣實chok住chok住,搞到失眠都有之!

陳X姿呢個婆娘,我想鬧佢好耐架喇,寫嘢一啲邏輯思維都冇,淨係識得亂咁吠。雖然種票謎團仲未完全解開,條八婆已經急不及待,喺日月報副刊寫咗篇名為「種票醜聞」嘅文章,試圖為泛民區選失利開脫。佢咁嘅做法,正正反映咗啲所謂熱愛民主嘅人士,有幾不思進取同欠缺自省!以下幾段係節錄自佢篇鴻文:

我最初看著出人意表的區選結果,只是驚嘆建制派的動員能力。人家的地區工作做得好,組織工作做得綿密。雖然我曾經懷疑,明明是中產區,難道居民也貪圖蛇齋餅粽?中產選區的鐵票到底如何種出來?但輸就是輸,我那時仍相信選票和居民是真,相信民主就要相信選舉結果,輸掉的泛民有甚麼話可說呢?

直至傳媒翻查選民登記資料,發現美孚有某單位「一屋七姓十三人」。華富邨一座樓明明只有21層,卻有選民登記住32樓。各區被「種」上不明來歷選民的單位,不計其數。幾十人擠在一個郵政信箱裏,選舉事務處照樣收貨,整個選民登記冊爛透了,摧毀了公平選舉。證據確鑿,無可推諉。

選民登記不用住址證明,可以亂填、空降;投票時不用出示投票通知書,拿身分證便可取選票,讓人為所欲為,種幾多選票都可以。最叫人反感的,是曾特首事後的反應,作為政府最高領導,說這是敗者的必然反擊,他見怪不怪云云,態度輕蔑。我怎能相信聲言與建制派「親疏有別」的人,由他領導的政府會秉公辦理?

不過,回頭一想,若選舉不能代表民意,代價是甚麼?我們對選舉失去信心,還爭取甚麼民主?若大家不再相信手上的一票,得益的又是誰?這一刻,我彷彿看見誰躲在暗角裏偷笑。


首先,條八婆簡直冇腦,連梁渣傑條poor guy都唔敢再提「蛇齋餅粽」,佢竟然蠢到挖番出嚟講。個婆娘又秉承咗民主派一向誇張失實嘅作風,將啲嘢無限放大。「不明來歷選民的單位,不計其數」、「整個選民登記冊爛透了,摧毀了公平選舉」、「讓人為所欲為,種幾多選票都可以」,有冇咁嚴重呀?呢種口吻,直頭同梁渣傑為區選失利辯護嘅偉論如出一轍。明明前人已經證明咗呢種態度只會招人反感,條八婆仲要有樣學樣,你話佢係咪白痴?

最離譜係成篇嘢充滿陰謀論,以一啲帶有主觀偏見而又未得到證實嘅假設為出發點,將種票矛頭暗指建制派。我唔係要幫建制派辯護,事實上我都講唔上對佢地有乜好感。不過喺調查未有結果之前就罔下結論,根本同未審先判冇分別,呢啲又算係乜嘢倫理呢?

講番單嘢,到目前為止,其實只可以叫做涉嫌誤報或虛報住址事件。咁快就同種票扯上關係,根本就係無限上綱。就算一定要咁講,極其量都只可以話係疑似種票事件。要定性為種票,一定要證實到有人教唆他人虛報住址,以圖影響投票結果。而家單嘢仲查緊,唔知條八婆點解可以咁肯定呢?

就算真係有人種票,亦唔可以就話係導致泛民敗陣嘅原因。究竟喺嗰啲誤報或虛報住址個案當中,有幾多人係唔屬於所報選區,又有幾多人投咗票呢?未搞清楚呢啲嘢之前,所有講法都只係憑空猜測。就算查出當中有人投咗票,但係投咗俾邊個亦永遠唔會有人知道。除非證實到有人賄選啦,否則都唔可以確定到單嘢對賽果係咪有影響。

條八婆鬧爆選舉事務處,我一啲都唔反對,因為佢地真係苟且得緊要。佢狂插凸首,我亦冇異議,因為條友根本就係政治白痴。不過對於佢嘅陰謀論講法,我就十分睇唔過眼嘞。單嘢會發生,係因為制度上有漏洞。至於呢個漏洞,人人都可以利用,絕對唔係建制派嘅尊利。條八婆未有真憑實據就肆意發炮攻擊,可謂無所不用其極,都算用心狼虎喇。

講真,如果真係有人種票,我都認為要嚴正查辦。呢啲破壞遊戲規則嘅嘢,無論係乜嘢人做咗,都絕對唔應該姑息。種票毫無疑問係不當行為,不過實際影響並唔係好似個婆娘講得咁誇張,會嚴重到扭曲晒成個選舉。涉嫌違規嘅選民根本就有投票資格,就算佢地喺其他區投票,一樣只會投番俾自己心儀嘅政黨,對泛民同建制派嘅整體得票率應該唔會造成太大影響。當然啦,或者有啲涉嫌被種嘅票源係來自一啲有人自動當選嘅選區都話唔埋,但係我相信應該唔會多到可以左右大局囉。不過咁,如果話對於某一兩個戰情緊湊嘅選區,可能足以影響賽果,我就真係唔敢包喇。點都好,事實並非好似條八婆所講,啲票係無中生有,可以喺石頭種出嚟囉。都係嗰句,除非證實到有人賄選啦,否則講多都無謂!

個婆娘執到條水草就當係救生圈,絕對非一個蠢字可以形容!佢話「彷彿看見誰躲在暗角裏偷笑」喎,哈哈,唔知佢又見唔見到有人恥笑緊佢呢?聽講話佢竟然係大學講師添,唔怪得咁多人話而家啲大學生讀屎片啦!話時話,其實我真係想所有民主派人士都好似條八婆一樣,唔肯反躬自省,只識諉過於人。老實講,我都不知幾期待見到泛民喺出年垃圾會選舉再大敗一次!

2011年11月27日星期日

我會做好呢份工?

近排啲新聞冇厘新意,唔係區選種票疑雲,就係嗰兩位疑似凸首候選人嘅疑似競選活動,真係睇到悶出鳥來!好彩早兩日終於有突破,睇到單令人笑得出嘅新聞,就係吳X森俾人豉椒炒魷。

條友俾人叮走,本來係大快人心嘅事,不過竟然爆出咗兩個截然不同陰謀論講法。有人話政府台高層想郁吳X森,因為唔想俾人捉到把柄,唯有犧牲埋同時被炒嘅周X。又有另一種講法,話要郁嘅人係周X至真,吳X森其實只係陪葬啫。不過好似冇乜人相信,吳某被炒係因為佢冇做好份工。事件曝光後,有聽眾打電話上烽煙節目,表示支持政府台嘅決定,因為吳某主持節目,有佢講冇人講,覺得意見唔啱聽就cut人線。亦有聽眾話吳某抵死,最慘係周某無辜受累。

無論單嘢背後有冇政治動機都好,吳某俾人炒都係罪有應得,因為佢的確冇做好佢份工。條友所做嘅,根本就唔係引導聽眾討論,而係主導節目嘅言論取向。如果喺一個私營廣播機構,咁做當然冇問題,因為主持人要為節目嘅收聽率負責。不過政府台靠公帑營運,所有聽眾都係持份者,應該享有同等發言權利,作為節目主持人,剝奪異見者嘅發言機會就肯定係失職!而且條友仲有寫啲不知所謂嘅時評政評,佢喺節目裏面猛咁吹噓自己嘅觀點,亦有公器私用之嫌囉!條友話唔明白點解要炒佢喎,睇嚟佢真係要向曾凸首學習吓,以「我會做好呢份工」為目標。

講到「我會做好呢份工」,吳某當然唔會認同啦,曾凸首用呢句名言做競選口號,條友仲揶揄過人地添。講開又講,嗰位用肛門代替把口講嘢嘅「時事評論員」李X玲,亦好似因為呢樣嘢取笑過曾凸首,不過我都唔係記得好清楚,今日就唔插佢住啦。而廣大市民似乎亦唔多受落,惡搞版本多如雨後春筍,例如「我會鑽好呢個窿」、「我會發好呢次功」、「我會爆好呢碟蔥」。其實立志要做好份工有乜唔妥呢,睇嚟因人廢言喺香港真係一個普遍現象。又或者,根本就係我理解錯咗,其實好多香港人從來都唔覺得要做好份工。

究竟係咪咁,我就唔多清楚嘞。如果呢度有啲四五六七十後嘅朋友,你地又有冇覺得啲新入職嘅年輕人好高騖遠、工作態度散漫、責任感闕如呢?唔好屈我,我唔係話所有年輕人都係咁。事實上,如果社會上有啲咁嘅人,真係一個都嫌多囉!

當然啦,任何嘢都唔會無緣無故咁發生,背後一定有啲原因。如果普遍人都唔理客觀條件,只憑主觀意願,覺得想要嘅就不顧一切去爭取,咁又真係唔使腳踏實地慢慢捱喎。覺得唔夠使就爭取最低工資,認為做得辛苦就要制定法定工時,所有嘢都係理所當然。競爭力?唔知係乜嘢喎,喺民主社會都有啲咁嘅嘢咩!尤其是啲工運人士,根本就唔使理工作表現,因為老闆點都唔敢炒佢地。總之唔like就罷工,話知你死人冧摟。覺得唔好撈就劈砲,東家唔打打西家?Sorry,冇諗過喎!至於啲佔據道德高地嘅民主鬥士亦一樣,做成點都唔怕俾人炒,因為佢地有聖光氣(幽遊白書裏面仙水嘅護體神功)護身。就好似吳X森單嘢咁,一曝光就不知幾多人飛身撐佢,連日月報社評都要幫佢討回公道。好心啲人就做得好睇啲啦,當係搭單幫周X爭取埋都冇乜所謂啫!

咁究竟喺啲乜嘢社會,「我會做好呢份工」係冇市場嘅呢?答案有兩個:一,共產主義社會,因為做又三十六,唔做又三十六。二,福利主義社會,因為做就三十六,唔做就三十八。唔到你唔信,香港正正就係朝住呢兩個方向發展!要澄清一點,其實我都好buy共產主義架,如果人人都可以做到大公無私嘅話。只可惜貪婪、自私、怠惰係人性嘅三大支柱,共產主義根本就存在住不可彌補嘅先天缺陷!

又講番吳X森,被炒之後,佢話覺得有啲徬徨喎,真係喚起我緊餘嘅惻隱之心添,聽講話佢仔細老婆嫩呀!不過諗深一層,又使乜替佢擔心喎。如果佢真係有料到,又本住「我會做好呢份工」嘅宗旨做嘢,咁就東家唔打打西家,簡直係海闊天空任鳥飛,一啲都唔使愁啦!



2011年11月25日星期五

裸(3)

警告:文末照片或會引致部分讀者不適,敬請對男性裸體有過敏性反應之人士從速離開!

天下奇女子真係多不勝數,之前先提過兩位賣肉益街坊嘅光豬姐姐,今日。。。咪住,又講錯嘢嘞!嗰兩位光豬姐姐係本住無私奉獻精神,將啲肉照同廣大網民分享,絕對分文不收。咁又點可以話係「賣肉」呢,我要喺度為上面嘅不當用詞嚴正道歉!

其實今日要講嘅係另一位奇女子,不過大家有冇覺得奇怪,點解今次用嘅相都係以裸男做主角呢?而且以本人一向寬鬆嘅尺度,又點解要喺啲裸男嘅兩點打星星呢?答案好搞笑,因為講嘅雖然係奇女子,但係就同裸男有莫大關係。而我又怕有啲類似本文女主角嘅人盲舂舂入咗嚟,睇到啲相會覺得唔舒服,走去告我性騷擾。係咪覺得難以置信呢?我只可以話,天下之大,真係無奇不有囉!

可能大家都仲會有啲印象,曾經有位奇女子告一個賣菜佬性騷擾佢,原因係對方竟然喺街市唔著上衫,打出兩點。呢位阿嬸又告埋某物業管理公司,因為佢地容許啲男人喺屋苑球場赤膊打波。佢仲離譜到用爆樽方式,懲罰一個打大赤肋晨運嘅阿伯添。雖然啲訴訟全部被判敗訴,不過有關當事人就已經俾佢煩到想死咁滯。至於個阿伯,好彩人地唔追究啫,否則佢監都隨時有得坐。

如果佢係住喺我對面樓就大鑊喇,我實俾佢告到甩褲啫。雖然我唔會打大赤肋落街,不過喺屋企就慣咗唔著上衫(冬天當然除外啦),對面樓應該會見到,不過如果要睇到兩點就要出動望遠鏡囉。不過阿嬸話:「市容整潔,由我做起」,佢會出動埋望遠鏡監察住附近有冇男人露兩點,真係一啲都唔出奇。

其實阿嬸都好辛苦啫,佢咁易俾人性騷擾,莫講話沙灘泳池球場呢啲地方唔去得,就算係睇電視報紙雜誌都隨時會中招啦。唔知佢有冇諗過呢,既然改變唔到周圍嘅環境,不如就改變自己去適應環境,咁樣日子會好過啲囉。

講真,我就覺得根本係佢自己有問題。如果唔係心裏面有淫邪之念,又點會見到男人兩點就聯想到性方面呢?事實上,人人都會有唔同嘅性趣,有人會被美腿吸引,有人會為媚眼著迷。如果見親可以勾起性趣嘅嘢都興奮,咁就真係要日日閉關唔出街先得嘞。

其實只要心無邪念,就算坐懷都可以不亂。話說啱啱出嚟做嘢冇幾耐,撞啱「蜜桃成熟時」番做,就同幾個同事走去睇。之前已經聽人講過,呢套唔係一般鹹片。果然,睇完之後完全唔覺得鹹,根本就係一套豆芽夢式嘅青春片,都不知幾純情。女主角嘅肉體就好似過眼雲煙咁,一啲印象都冇留低,記得嘅就只有愛琴海。當然啦,如果抱住嘢嘅心態去睇,呢套戲又真係一部鹹片嚟囉。

講開又講,其實有好多嘢都係咁。如果心裏面存在住某啲主觀偏見,眼中睇到嘅嘢,每一樣都會變成支持自己想法嘅有力佐證。舉個例,而家唔可以立亂講「阿差」同「賓賓」,因為會俾人話種族歧視。事實係,如果有人覺得被歧視,就算人地點講,佢地都會認為帶有歧視成分。甚至你望一眼,都話係歧視嘅目光。唔望咩,啲人又會話你當佢地透明,都係歧視。但係睇吓啲鬼,人地又邊有覺得「gweilo」係帶有歧視嘅叫法呢?!

不過人就係咁架喇,硬係鍾意同自己過唔去。一句講晒:天下本無事,庸人自擾之!



2011年11月23日星期三

裸(2)

上一篇講到有個光豬姐姐,鍾意剝晒衫影相,仲將啲裸照放上自己個blog,可謂造福香港宅男界。原來有好嘢唔藏私,擺上網益街坊嘅唔止佢一個。早兩日睇報紙,話埃及有個女博客,都係一樣喺blog度將自己嘅光豬相公諸於世。呢位埃及光豬女博客同我地位陀地姐姐一樣,都係露得好徹底,啲相三點畢現。唔同嘅係,相對於我地光豬姐姐嘅無私奉獻,埃及嗰位就顯然有啲私心,情操高下立見!

原來埃及光豬姐姐嘅目的係要宣示主權,作為女性對自己身體行使嘅主權。佢接受訪問時話:「我不為我的女性身分感到害羞,埃及的女士只被看成性物,每天被騷擾,而埃及男人並不承認女士的地位。」

喺回教社會,女性嘅地位係點,相信大家都好明白,根本唔使多講。女人出街一定要著得好密實,唔可以露出手腳,而且要戴頭巾、面紗、甚至面罩。就算去游水,一樣要著到成隻粽咁。好明顯,咁係因為啲男人當咗自己嘅女人係私有財產,梗係唔想俾人睇蝕啦。

事實上,邊會有女人唔貪靚,而男人亦一樣,都想自己嘅女人靚。上次去土耳其旅行,聽一位去過伊朗嘅團友講,啲伊朗女人嘅黑袍下面,原來係款式花俏、顏色鮮豔嘅內衣。嗰位團友係男人,當然唔會係親眼所見啦。如果係佢自己睇到就大鑊喇,隨時俾人挖眼都有份。其實係佢太太喺女廁見到嘅。我一向以為伊朗好保守,估唔到原來女人嘅黑袍底下竟然暗藏春色!

由此可見,就算係最保守回教社會,都喺度暗中改變緊。而且喺全球化呢個大趨勢底下,要一成不變根本就冇可能,只係改變唔會一夜發生啫。如果有人想用激烈嘅方式加速改變,後果隨時會適得其反。中國人一早就知道呢個道理,所以有「揠苗助長」同「欲速則不達」呢啲講法。

講番嗰位埃及光豬姐姐,佢張裸照都不知幾受歡迎,短短時間已經有百幾萬點擊率。連敵對陣營嘅以色列,都有幾十個女子聲援,用光豬大合照形式撐佢。有咁大回響,自然會激起國內保守勢力嘅對抗情緒,以致大力打擊啦。佢就收到大量辱罵留言,其中仲不乏死亡恐嚇添。至於班以色列光豬嘅聲援,亦極有可能引起反效果,隨時會令佢俾人入多一條通番賣國罪。事實上,連埃及國內嘅改革派都唔敢撐佢,要同佢劃清界線。

我絕對理解光豬姐姐嘅訴求,不過就唔認同佢嘅做法。客觀事實係,佢咁做除咗可以宣洩情緒,對要爭取嘅嘢根本就冇幫助。一方面加劇社會分化,堵塞異見陣營嘅溝通渠道,亦令當權嘅保守派覺得受到威脅,因而收緊控制。咁只會扼殺咗社會自然蛻變嘅機會。

想一夜變天?的確係好浪漫,不過絕唔實際!「茉莉花革命」當初人人叫好,但係睇吓而家埃及同利比亞變成點先再講啦!



2011年11月20日星期日

早幾日喺壹仔睇到篇專訪,講有個姐姐鍾意剝光豬影相,仲將啲裸照放上自己嘅blog添。呢個blog我都睇過,個姐姐真係相當大膽。話佢大膽,唔止因為啲相露得好徹底,亦因為裏面完全冇警告字句,如果俾人告喺上嚟,真係吟詩都吟吾甩。將裸露等同淫褻,其實我一向好反對。不過香港人唔係咁諗,淫審處更加唔係咁諗囉!

雖然裸露唔等同淫褻,不過亦唔一定係藝術。好似內地知名藝術家艾未未,早前就創作咗裸體攝影作品「十八裸漢」同「一虎八奶圖」,據聞內裏包含深意,暗諷中國時弊。睇完啲相,我不得不承認自己係老粗一名,完全冇藝術細胞。一大堆三尖八角嘅裸男裸女,全無美感可言,我淨係覺得嘔心囉!至於嗰啲所謂暗諷,就算著番衫都一樣表達到出嚟,咁做乜硬係要請觀眾嘅眼睛食屎呢?!上面提到嘅女露體狂(佢自己係咁講)仲好啲,雖然我都係唔識欣賞佢嘅文章同啲相,起碼人地冇以人體藝術做招徠先啦。總之鍾意露就露,都費事理啲觀眾係知音人定鹹濕佬。

咪插住,我唔係話去光豬姐姐個blog睇相嘅都係鹹濕佬。如果真係鹹濕佬,使鬼去佢度睇咩,鹹網啲貨色正九千幾倍啦!聽講話光豬姐姐都不知幾紅,究竟點解佢會有咁多捧場客呢?我諗就係好似走地雞同打針雞嘅分別嘞。打針雞夠晒肥美,當然好多人喜歡,不過亦會有人鍾意走地雞嘅農家風味囉。唔好屈我呀,我絕對無意貶低任何女性,我只係打咗個好貼切嘅比喻啫!

事實上,對裸體好奇係人嘅天性,想睇亦好正常,唔一定代表鹹濕。就算同性之間都會有咁嘅情況,好多時喺更衣室或者廁所,都會有啲人有意無意間吓其他人。相信除咗少數真係想嘢之外,大部分人都係出於好奇,想同其他人比較吓啫。諷刺嘅係,啲人一方面對他人嘅裸體好奇,但係要裸露人前又好避忌。有啲人喺更衣室換泳褲都要圍住條毛巾,都唔知有乜好怕,其實人有我有啫。學光豬姐姐話齋,俾人睇吓又唔會少咗忽肉嘅。

話時話,對於喺其他人面前赤身露體,香港人真係保守得緊要。呢方面嘅開放程度,唔止同外國冇得比,甚至連大陸同台灣都不如。其實我細個時都好怕醜,喺學校更衣室換衫都要匿埋一二角。至於點解會咁我都唔知,嗰時政府仲未有教啲細路要保護自己嘅身體。到後來返大陸旅行,先至訓練到唔再怕醜。嗰時國內嘅廁所同浴室,好多都係冇間隔,就算有間隔,都唔會有門或者帘。如果唔想同人肉帛相見,除非唔使開大或者沖涼啦!不過喺廁所同浴室見到嘅都係同性,正所謂人有我有,根本冇乜大不了,真正嘅突破要喺幾年後先出現。

話說有一次跟團去希臘玩,行程包括愛琴海小島Mykonos。嗰度除咗藍天碧海白屋仔,仲有一樣嘢好出名,就係天體灘。咁遠去到,當然要見識吓啦,所以就約埋一個男團友,趁住自由活動時間去威吓。點知走漏咗風聲,我地個領隊(麻甩佬一名)又要跟埋嚟。想撇甩佢又唔好意思,唯有勉為其難帶埋佢去啦。團友帶領隊遊景點,都算空前絕後喇啩。領隊都算嘞,好彩班女團友冇話要跟埋嚟啫,佢地肯定吾會除衫,咁我地幾條麻甩佬咪蝕底晒?!講真啦,雖然話一定要去見識吓,不過其實我都有少少擔心架。我當然唔係擔心俾人睇蝕啦,至於係乜就唔使講到明喇啩。

去到天體灘(Super Paradise),第一感覺係有啲失望。本來諗住會見到人山人海、人肉橫流、肉體橫陳、肉香四溢呢啲震撼場面,點知原來得嗰小貓幾十隻。而且仲唔係個個都除晒衫,光豬大約只佔一半。講真,如果唔剝光豬,去天體灘托咩!

行吓睇吓,卒之揾到個有利位置,鋪好條沙灘巾就二話不說,除到一件都冇剩。最初都係有少少矜持架,所以就趴喺度清楚周圍環境先。過一陣以經習慣咗嗰種喺公共場所身無寸縷嘅感覺,咁就即刻轉身,擺咗個大字型(其實係太字型)鋪屎繼續晒太陽。希臘小島真係正,海同天都特別藍,嗰種海闊天空任鳥飛嘅感覺直頭爽到無倫!有樣嘢連我自己都諗唔到,雖然附近都有啲零散嘅肉蟲,但係我竟然可以心無雜念,幾乎到達天人合一嘅境界,之前擔心嘅嘢當然唔會發生啦!

喺天體灘裸晒可能係一生只有一次嘅機會,咁梗係要拍照留念啦,仲要影埋啲肉蟲做背景添,不過就要轉番個趴街鋪屎先得。唔係話唔想以大字型鋪屎上鏡,不過嗰時用緊菲林機,要攞去晒就唔係咁方便囉。而且啲晒相鋪嘅格局通常都好變態,出相位對住條街,影咗啲乜隨時會俾路人甲乙丙睇到。如果連何B仔都入埋鏡,咁就真係會俾人睇到蝕晒嘞。話時話,我自己就試過無聊到企喺條街睇人出相囉。

影完相,下一個指定動作就係投奔愛琴海。雖然我唔識游水,不過落海浸吓都算還咗個心願。自從睇咗「蜜桃成熟時」(唔係33D,亦唔係李麗珍嗰套),對愛琴海都不知幾嚮往,希望有生之年可以一親芳澤。不過落咗水唔夠五分鐘,就頂唔順要爬番上岸。希臘嘅夏天熱到人都融,估唔到啲海水會好似冰咁凍。冇所謂啦,點都叫做試過投入愛琴海嘅懷抱。

返到香港,第一時間就攞啲菲林去晒,特別想知道天體灘啲相影成點,因為係領隊幫我揸機。老實講,我對佢真係冇乜信心囉。一攞到啲相已經急不及待喺晒相鋪睇,摷咗一陣就揾到天體灘嗰幾張。一睇之下,簡直係晴天霹靂,總之此地不宜久留,速速俾錢走人為上。原來啲相裏面竟然有一張影住我正面,仲係啱啱上水嗰陣影嘅添,今次真係俾人睇到蝕晒喇!本來俾人睇吓都冇乜大不了,最弊係啲水冰咁凍,基於某種物理現象,會令某啲真實情況嚴重扭曲,啱啱上水根本就應該影。條友影咗又唔話俾我知,分明係靠害啦,真係P佢個K!講開又講,嗰張正面裸照竟然摷唔番,真係有啲可惜,因為始終都係生命中某一刻嘅紀錄。

至於去天體灘裸晒,而且仲影埋相,當然唔代表我係露體狂或者天體愛好者(話時話,就算香港有天體灘,我諗我都唔會去囉),因為呢啲只係旅遊嘅體驗。我完全唔介意將喺天體灘嘅相俾人睇(當然除咗正面嗰張啦),對於我嚟講,嗰幾張相喺性質上同其他旅行相根本冇分別。而且以今日嘅尺度嚟講,呢啲所謂裸照簡直小兒科到唔恨啦!事實上,我帶啲相返公司俾同事睇,都冇抽起嗰幾張。至於有一兩個女同事睇到呱呱嘈,其實只係佢地少見多怪啫!

最後,希望呢幾張相冇令大家反感。當然啦,啲相只係旅行紀錄,一不養眼,二無內涵,不過都應該唔算核突到令人作嘔嘅,呢一點就肯定比艾未未嘅人體藝術作品優勝!奉勸呢位藝術家,玩暗諷之餘都要照顧吓觀眾嘅視覺神經,搞人體藝術就揾番啲企理少少嘅模特,尤其唔好親自粉墨登場!




2011年11月18日星期五

又落雨

琴日又落雨嘞,真討厭!落雨點解討厭,相信冇需要多講,就算唔使淋到變落湯雞,淨係要帶多樣嘢出街已經煩到嘔啦!

我個人勁怕麻煩,除非落緊雨,否則一定吾會帶遮,就算個天黑過墨斗都係咁話。試過兩次趴街,就係因為冇帶遮,要走快兩步揾地方避雨。其中一次仲扭傷腳眼,跛咗成幾個月添。

當然啦,如果真係落雨,我又唔會瀟灑到唔帶遮,不過最弊係成日都勁黑仔囉。明明落街前伸手出窗試過冇雨,望落條街又唔見有人擔遮,但係好多時都係落到樓下先開始落雨,要即刻上樓攞遮。咁都好啲喇,更弊嘅係行咗三幾分鐘先開始落,發生得最多係喺買餸嘅時候。講開買餸,又真係谷鬼氣,好多時明明成日都冇落過雨,偏偏就係喺我去買餸嗰半粒鐘落,你話係咪黑仔呢!

仲有一樣嘢討厭,落親雨啲自私同冇公德心嘅人就浮晒出嚟。啲友開遮永遠唔會睇清楚隔籬有冇人,尤其是用彈弓遮嗰啲,真係隨時會俾佢地彈到。如果把遮係濕嘅,啲水珠仲會周圍飛,方圓三呎都係射程範圍。收遮都係一樣,fing水嘅時候完全唔會理附近有冇人,我就試過俾人fing到一身都係。

香港嘅街道已經夠迫架啦,落雨個個都擔遮,每人所需空間無形中大咗幾倍,啲遮成日搞到打晒交。我自己就盡量同其他人保持距離,避免發生碰撞。但係香港人又唔多識禮讓,完全唔介意整到人,啲唔方便嘅情況真係想避都冇得避。試過等緊過馬路,後面嘅人又黐到貼一貼,啲水就順住把遮流晒落我條頸。又有次俾人擔住遮從後追撞,搞到成個背脊濕晒。回頭睇吓,淨係見到一把遮同一個女子嘅下半身。我都明白如果橫風橫雨,擔住遮係會阻擋視線,但係點都唔會見唔到前面路人甲對腳啩。咁都會撞埋嚟,個女子簡直係發雞盲!我冇理佢,只係睇咗一眼就繼續行,點知隔咗冇幾耐佢又撞我背脊。我又再忍,諗住行快兩步避咗佢就算。最弊係條街咁多人,想行快啲都唔係容易。跟住個女子竟然第三次撞埋嚟,我真係忍無可忍嘞,咪擰轉頭話佢囉。點知佢完全冇反應,搞到我好似同空氣講緊嘢咁,真係俾佢吹脹!所謂好男不與女鬥,我唯有企埋一邊俾佢行先,就當我買佢怕算嘞。

提起唔識禮讓,有一個情況真係成日發生。凡係落雨,啲人都鍾意行騎樓底,無論有冇擔遮嘅人都會咁做。但係講到實際需要,咁就梗係冇遮嘅人比較需要啦。不過以我所見,好多擔住遮嘅人,如果喺騎樓底同啲冇遮嘅人狹路相逢,都唔會主動讓人地。更甚嘅係,佢地連舉高啲把遮都費事,完全唔會為人設想。真係唔明,橫掂自己有遮,行出兩步讓吓人又有乜咁難呢?!

雖然落雨好討厭,不過都有可取之處。落雨嘅時候,尤其是落到狗屎咁大,仲要係雷電交加嗰隻,瞓覺真係好舒服,直頭想一睡不起呀!

2011年11月15日星期二

戀花

鬧人鬧到悶晒,今日不如睇吓相啦!

咪以為「戀花」係蝴蝶嘅專利,喺呢輯相裏面,除咗蝴蝶之外,「戀花」嘅仲有蜜蜂、飛蛾、烏蠅、草蜢、毛蟲、蜂鳥、珍珠雞、同埋人類。

影呢類相話易又得,話難又得。難處在於焦點要放喺主角對眼度,通常十張裏面會有七八張對焦唔準確。如果拍攝對象係啲冇時停嘅小動物就更難,好似飛蛾同蜂鳥咁,都係一路飛一路採花,莫講話唔容易到對焦,淨係用鏡頭追蹤已經有難度。

特別講吓最尾嗰張,主角當然係我自己啦,而且仲係用腳架自拍嘅添。其實我從來都唔用腳架,因為怕麻煩。不過嗰次一條友返大陸玩,又想影番啲到此一遊相,冇辦法啦。事實上,嗰次係我唯一嘅一次帶腳架,因為除咗嗰次,我都未試過一個人去旅行。

話時話,其實我都唔係咁鍾意啲花花草草。男人老狗,邊會有咁嘅雅興喎,嫖賭飲吹我就啱啫。不過我對啲漫山遍野嘅小花就硬係有啲情意結,見親都要走埋去影番張相。唔理啲花靚唔靚,只要夠大堆頭就得。我諗呢啲係性格問題,我影相都係咁架,總之就貴多不貴精啦!









2011年11月13日星期日

垃圾排行榜

點解阿Sir係阿Sir?我唔知,因為一集都冇睇過。點解垃圾會係垃圾會?呢樣我就知嘞,因為啲議員有幾垃圾,日日喺報紙電視都有得睇。咁樣,我又唔係話所有垃圾會議員都係垃圾,不過要喺其中揀十件出嚟,就完全冇難度。以下係我嘅垃圾排行榜(以討厭程度降序排列),並附上榜原因:

第一位 梁渣傑(樣衰、口臭、自大、假到出汁)
第二位 何獸蘭(樣衰、口臭、倀雞)
第三位 李乜人(樣衰、口臭、無恥、冇料)
第四位 吳靄姨(樣衰、口臭、假正義)
第五位 甘奶威(樣衰、口臭、淫賤、冇料)
第六位 魚若微(樣衰、口臭、偽善、戲屎)
第七位 大舊衰(樣衰、口臭、暴力、冇料)
第八位 長毛賊(樣衰、口臭、暴力)
第九位 黃癲狗(樣衰、口臭、暴力)
第十位 霍震停(冇料、尸位素餐)

喺呢個垃圾排行榜裏面,十中有九都係扮民政客,揀佢地上榜並唔係因為我嘅政治立場,而係班友實在太討厭。事實上,喺建制陣營裏面,乞人憎嘅議員一樣有,只係程度上唔及得扮民班友啫。

話時話,唔知你地心目中又有冇類似嘅垃圾排行榜呢?

2011年11月10日星期四

藍血式民主

泛民區選失利,各大黨灰(包括禽流黨嘅何俊男、淫民力量嘅癲狗、瀉民連嘅桃君痕、狀棍黨嘅梁渣傑)事後都走出嚟解畫,有人積極進取、有人負隅死守、有人真情流露,仲精彩過區選前嘅無聊口水戰。

淫民力量嘅「票債票償」行動失敗收場,禽流黨乘機反守為攻,將所有責任推晒落對方度,誓要踢班友出泛民陣營。而一向牙斬斬嘅癲狗竟然冇死撐,坦然承認失敗。桃君痕就做得更徹底,仲引咎辭職添。不過咁,呢兩條友都表示唔會因為今次失利而改變佢地抗爭路線。辜勿論班友嘅激進路線值唔值得支持,起碼佢地都算有骨氣,呢樣我都幾欣賞。至於梁狀棍,就真係出人意表嘞。我一向以為佢好虛偽,點知佢竟然真情流露,喺記招盡吐心底話。

梁狀棍冇承認失敗,而係將失利歸咎於阿爺喺背後操控,透過中聯辦組織動員,啲鐵票要幾多有幾多。佢仲質疑建制派嘅票源來路不明,話唔知啲票喺邊度嚟喎。跟住又揶揄啲選民貪小便宜,投票俾建制派係為咗啲「蛇齋餅糉」。最後仲表示區議員寶座其實完全唔吸引,要啲專業人士落區踎十粒鐘為街坊服務,根本就係委屈咗佢地。

條友貴為大狀,自然係滔滔雄辯,死都拗得番生,不過呢番話就真係破綻百出嘞。首先,話阿爺透過中聯辦喺背後發功,如果係有真憑實據嘅,唔該即刻攞出嚟。空口講白話,又點能夠令人入信呢?就算背後確實有人動員又點,選民最終都係按照自己嘅意願投票啫。唔通中聯辦真係把炮到用人盯人政策,跟埋啲選民入票站,監督住佢地投票?而且講到組織動員,泛民一樣有呢家嘢。有朋友話俾我知,有泛民支持者喺facebook瘋傳一段信息,叫人一定要去投票,如果嗰區冇泛民人士出選就投白票。動員能力唔夠人地強,只可以話係自己冇料到,又或者係不得民心,有乜理由人地叫到啲選民去投票反而係錯呢?話唔知啲票喺邊度嚟就仲搞笑,去得投票,當然係登記咗嘅選民啦。唔通梁大狀棍又懷疑有不法之徒冒用其他選民嘅身分去投票?又當班選民係傻嘅,俾中聯辦呃咗去投票。不過人地始終係香港公民,享有選擇議會代表嘅權利,又冇法例規定傻人唔投得票啫。講到開拓票源,狀棍黨嘅手段仲犀利啦。如果佢地成功幫啲外傭爭取到居留權,咁就真係票源滾滾來嘞。至於話「蛇齋餅糉」呢啲細眉細眼嘢都會影響選情,如果真有其事,只係表示香港嘅選民仲味夠成熟,要檢討嘅反而係普選時間表有冇需要推遲囉。而且以陳熟莊落敗嘅山頂選區為例,「蛇齋餅糉」又有乜可能起到作用呢?仲有,話做社區服務係委屈咗班專業人士,簡直就係自打嘴巴,咁唔願意就唔好派幾十人參選啦,唔通真係「我不入地獄,誰入地獄」?

不過咁,梁大狀棍嘅一番偉論都有可取之處,就係夠晒真。我絕對相信佢講嘅都係出自真心,狀棍黨班藍血貴族一直當自己高高在上,出嚟參政係為咗打救天下蒼生。佢地有學識、有理念,講嘅嘢當然係絕對真理啦,普通蟻民根本就冇質疑嘅餘地,總之佢地講嘅你班友就要信。而家梁黨灰派佢班仔仔女女出嚟參選,其實係本住偉大嘅犧牲精神,希望萬民可以得到救贖。不過你地班蟻民竟然唔領情,為咗啲蠅頭小利而投向魔鬼嗰邊,真係唔嬲就瓦燒啦!由此可以證明,一般平民百姓有幾咁愚昧!所以對於班藍血貴族嚟講,「民主」絕對唔係「人民當家作主」,而係「人民要信佢地係救世主」!

2011年11月7日星期一

自嚐惡果

今屆區選真搞笑,癲狗長毛班友話要狙擊禽流黨,結果自己幾乎全軍覆沒,淨係得淫民力量攞到一席。連佢地幾個重量級人馬,包括長毛、大舊衰、同桃君痕,都以大比數輸俾對手。學阿姐話齋,真係「超低能,超搞搞震」!

最核突都係件大舊衰,點名話要狙擊何俊男,點知反而輸對方九條街。原來癲狗講「票債票償」都好有道理,因為真係有人俾選民用選票懲罰,不過要償嘅佢地自己啫。其實班友嘅狙擊行動,根本就係一敗塗地。正如高達所講,佢自己同狙擊手嘅得票加埋,都仍然要輸俾建制派對手。咁嘅所謂「票債票償」行動,完全係得啖笑囉!

當然啦,班友嘅狙擊行動,根本就唔係為咗乜嘢民主理念,其實佢地係想搶禽流黨客啫。搞到泛民一鑊泡,對班友絕對係好事,因為實會有一啲燒壞腦嘅廢青轉投佢地陣營。至於會唔會對泛民整體形勢有不利影響,咁就真係話知你喇,橫掂班友從來都冇諗過要做執政黨。癲狗長毛嗰幾隻嘢,喺垃圾會議員當中民望長期包尾。咁又點啫,喺比例代表制,其實要當選都唔一定要好多票。只要班友箍得實少數嘅激進廢青,佢地嘅尊貴議員就肯定長做長有啦。

癲狗長毛嘅思維,其實一啲都唔難理解。反而狀棍黨呢,我就完全唔知佢地諗乜。一個以專業人士為骨幹嘅政黨,走嘅竟然會走激進路線。如果要爭廢青客,佢地根本唔係癲狗長毛嗰皮。最近嗰兩單嘢又連基層都得罪埋,真係唔知佢地想點。所以就即刻現眼報嘞,三個核心成員都齊齊出局,真正體現咗乜嘢叫做「票債票償」。

嗰件劏家驊,喺狀棍黨裏面都算比較正派,本來我都唔算太憎佢。不過佢今次就真係做得好肉酸喇,一陣話人抹黑佢,輸咗又賴對手嘅動員能力強。其實佢一早就應該退黨啦,話退又唔退,都抵佢有今日。至於嗰件陳熟莊,又發揮佢嘅演藝潛質嘞,輸咗就扮喊博同情。佢話今次輸得好意外喎,都唔知佢係咪真係咁白痴,其實佢上次跑出先至係意外囉。不過有一點值得注意,佢今次得票仲多過上次,但係就仍然比豉油黨嘅對手遠遠拋離,都唔知無啦啦喺邊度走咁多選票出嚟。

事實上,今次區選真係令好多學者跌晒眼鏡。個個都估今次嘅投票率會低過上次,結果投票人數反而創埋新高添。啲學者又認為高投票率對泛民有利,咁咪估錯晒囉。啲學者同傳媒硬係要將民意量化,「量」係指音量,總之邊啲人嗌得最大聲就最能夠代表民意。其實沉默嘅一群絕對唔係少數,而且唔一定係傾向泛民陣營。我相信好多人係睇過眼泛民嘅所作所為,忍唔住走出嚟,用選票懲罰佢地。

泛民一向堅持偏激路線,將和諧等同河蟹、妥協等同出賣,拒絕用協商方式解決問題。班友搞到香港七國咁亂,我就唔信咁係大部分市民想見到嘅嘢。可能而家已經去到一個臨界點,令到原本沉默嘅一群覺得忍唔可忍,要用選票表態。事實上,最近又真係有網民自發組織遊行,同泛民打對台。咁係代表社會已經嚴重分裂,連只求安穩嘅一群都覺得唔可以坐以待斃!

以今次區選為例,有四成人投咗票,而另外嗰六成人嘅取向就根本冇人知。如果連從來唔投票嘅人都走出嚟投票,變數可以好大,話唔定六四黃金比例都會逆轉。奉勸泛民見好就收,否則遲早會自嚐惡果!


2011年11月4日星期五

淫棍末路

上帝要你滅亡,必先使你瘋狂!

我一向覺得西人講嘅嘢都唔係多可信,不過上面嘅名言就真係唔到你唔信,因為啱啱就有嗰咁嘅真人騷。弊嘞,又講錯嘢添,開騷嗰個都唔係人,又點叫得做真人騷呢!其實我係講緊淫棍蔥,就算佢唔係死物或者植物,極其量都只可以係一隻鴨,點都唔講唔上係人!

淫棍蔥簡直係貪錢貪到癲咗,滾咗老甜甜廿幾億,本來下半世打跛腳都唔使憂,但係佢竟然大貪到想謀埋人地成副家產。最近佢單爭產官司終極敗訴,睇嚟好快會被起訴偽造遺矚。我都批死佢要入冊架啦,真係大快人心。本來佢應該洗乾淨個八月十五,做定啲通櫃嘅心理同生理準備,點知條友居然黐線到上電台嘅烽煙節目接受訪問,企圖爭取輿論支持。都話人蠢冇藥醫架啦,結果咪俾啲聽眾鬧到狗血淋頭囉,仲封埋做面懵膏代言人添。

條友都算懵到上心口喇,唔通佢真係以為大話講咗一百次就會變成真理?可能佢已經自我催眠咗,根本就唔覺得自己講緊大話,但係我地呢啲睇熱鬧嘅觀眾又點會受佢呢套呢。佢話自己唔貪錢,係真心鍾意老甜甜喎,真係揾鬼信咩。如果條友係對老甜甜真心,就唔會爆晒佢地啲不倫嘢出嚟啦。連老甜甜條姨媽底褲都要留番嚟做愛的證據,話佢唔係早有預謀就打死都唔信囉。如果佢真係懷念老甜甜,條姨媽底褲就唔應該攞嚟做呈堂證據。咁有紀念價值嘅驅風極品,梗係要留番嚟做私人珍藏啦,得閒攞出嚟索吓都不知幾爽!

雖然佢講大話當食生菜,幾乎乜嘢都係假,但係我傾向相信有一樣係真嘅,就係嗰份遺矚嘞。條友嘥咁多錢打官司,輸咗又上訴再上訴,睇嚟佢真係好有信心。當然啦,咁可以話佢係洗濕咗個頭,點都要頂硬上。不過佢喺單官司開始之前,竟然用咗十幾億買架豪華版嘅空中巴士A350,一定係諗住實食冇黐牙先會咁做啦。不過咁,我又唔係話相信老甜甜自願俾晒成副身家佢。嗰份可能係風水遺矚,亦有可能係老甜甜病到懵咗,根本唔知自己做緊乜。

點都好啦,而家呢個結果絕對係人人最樂意見到嘅。除咗告佢偽造遺矚,仲要追佢稅,等佢破埋產先入冊。就算證明唔到佢收老甜甜嗰廿幾億係風水費,咁係做鴨嘅肉金就一定走唔甩,總之都係要納稅啦。

唔好質疑我點解咁憎條友,我承認我係妒忌。其實阿茂慈善基金贏咗,我都唔會有任何得益。我就係唔抵得條友,以佢咁嘅劣等質素,竟然可以淘到個超級古井。如果佢有蠱天樂咁靚仔,又或者郭褲城咁好身材,我都唔會咁唔順。除非佢證明到自己真係有啲過人之長啦,否則我相信全港男士都會好似我一樣咁憎佢!

2011年11月2日星期三

7000000000

全球人口已經突破咗七十億!

對於一般人嚟講,七十億係一個天文數字。就算好似李加乘咁有錢,如果要同佢分身家,每人分到嘅都只係夠買一個飯盒。不過換個角度嚟睇,呢個數字又冇乜大不了,只係大約五個中國、六個印度、或者一千個香港嘅人口。

世界人口係咪太多我唔知,不過分布得好唔平均就係事實,淨係中國加埋印度已經佔咗超過三分一。本來咁都唔係乜嘢大問題,如果一個國家擁有嘅資源係同人口成正比。就以中國同印度為例,整體財富同影響力,絕對唔會有全世界嘅三分一。所以從宏觀角度嚟睇,地球村肯定唔係一個公義同民主嘅地方。

當發達國家不停掠奪地球上嘅資源,但係人口增長反而集中落後國家,人均資源差距只有越拉越闊。咁當然係好唔公平,不過啲發達國家根本就諗過要改善呢個情況。佢地做嘅一切都係為咗喺啲落後國家建立自己嘅勢力,從而搶奪更多資源。我當然唔係話咁做有錯,因為想生存,就無可避免要拼個你死我活。

香港人真係太幸福喇,衣食無憂之餘仲有時間去幫人爭取公義。不過正正因為有啲咁天真無邪嘅人,犧牲自己嘅競爭力去追求一啲虛無縹緲嘅嘢,啲貪得無厭嘅人先可以如取如攜!都係嗰句,人不為己天誅地滅,啲人要死唔通唔俾佢地死咩!