2011年11月18日星期五

又落雨

琴日又落雨嘞,真討厭!落雨點解討厭,相信冇需要多講,就算唔使淋到變落湯雞,淨係要帶多樣嘢出街已經煩到嘔啦!

我個人勁怕麻煩,除非落緊雨,否則一定吾會帶遮,就算個天黑過墨斗都係咁話。試過兩次趴街,就係因為冇帶遮,要走快兩步揾地方避雨。其中一次仲扭傷腳眼,跛咗成幾個月添。

當然啦,如果真係落雨,我又唔會瀟灑到唔帶遮,不過最弊係成日都勁黑仔囉。明明落街前伸手出窗試過冇雨,望落條街又唔見有人擔遮,但係好多時都係落到樓下先開始落雨,要即刻上樓攞遮。咁都好啲喇,更弊嘅係行咗三幾分鐘先開始落,發生得最多係喺買餸嘅時候。講開買餸,又真係谷鬼氣,好多時明明成日都冇落過雨,偏偏就係喺我去買餸嗰半粒鐘落,你話係咪黑仔呢!

仲有一樣嘢討厭,落親雨啲自私同冇公德心嘅人就浮晒出嚟。啲友開遮永遠唔會睇清楚隔籬有冇人,尤其是用彈弓遮嗰啲,真係隨時會俾佢地彈到。如果把遮係濕嘅,啲水珠仲會周圍飛,方圓三呎都係射程範圍。收遮都係一樣,fing水嘅時候完全唔會理附近有冇人,我就試過俾人fing到一身都係。

香港嘅街道已經夠迫架啦,落雨個個都擔遮,每人所需空間無形中大咗幾倍,啲遮成日搞到打晒交。我自己就盡量同其他人保持距離,避免發生碰撞。但係香港人又唔多識禮讓,完全唔介意整到人,啲唔方便嘅情況真係想避都冇得避。試過等緊過馬路,後面嘅人又黐到貼一貼,啲水就順住把遮流晒落我條頸。又有次俾人擔住遮從後追撞,搞到成個背脊濕晒。回頭睇吓,淨係見到一把遮同一個女子嘅下半身。我都明白如果橫風橫雨,擔住遮係會阻擋視線,但係點都唔會見唔到前面路人甲對腳啩。咁都會撞埋嚟,個女子簡直係發雞盲!我冇理佢,只係睇咗一眼就繼續行,點知隔咗冇幾耐佢又撞我背脊。我又再忍,諗住行快兩步避咗佢就算。最弊係條街咁多人,想行快啲都唔係容易。跟住個女子竟然第三次撞埋嚟,我真係忍無可忍嘞,咪擰轉頭話佢囉。點知佢完全冇反應,搞到我好似同空氣講緊嘢咁,真係俾佢吹脹!所謂好男不與女鬥,我唯有企埋一邊俾佢行先,就當我買佢怕算嘞。

提起唔識禮讓,有一個情況真係成日發生。凡係落雨,啲人都鍾意行騎樓底,無論有冇擔遮嘅人都會咁做。但係講到實際需要,咁就梗係冇遮嘅人比較需要啦。不過以我所見,好多擔住遮嘅人,如果喺騎樓底同啲冇遮嘅人狹路相逢,都唔會主動讓人地。更甚嘅係,佢地連舉高啲把遮都費事,完全唔會為人設想。真係唔明,橫掂自己有遮,行出兩步讓吓人又有乜咁難呢?!

雖然落雨好討厭,不過都有可取之處。落雨嘅時候,尤其是落到狗屎咁大,仲要係雷電交加嗰隻,瞓覺真係好舒服,直頭想一睡不起呀!

10 則留言:

  1. 落雨其實都可以好浪漫個喎!?

    回覆刪除
  2. 哈哈,同條女兩個人一把遮喺雨中漫步就係囉!想像吓一隻手擔遮,一隻手抽住幾袋餸,又點可以同浪漫扯上關係呢?!

    回覆刪除
  3. 係咯, raindrops keep falling on my head ...

    或者, laughter in the rain !

    至於嗰個撞你三次嘅女子,擺明 dap 你糖喇 !

    回覆刪除
  4. laulong,
    呢兩首歌都勁好聽呀!至於嗰個女子,當然唔係dap我糖啦!如果淨係見到對腳就dap人糖,咁都dap得好濫啫!

    回覆刪除
  5. 你對腳超正咯,kakaka!

    話時話,我會因女生的腳而情迷架,當然個樣唔可以太差咯 XDD

    回覆刪除
  6. 哈哈,戀腳僻?其實我都有少少架,不過就只係覺得小腿吸引,腳趾就咪搞嘞!

    回覆刪除
  7. 嘩!吓吓出街都落雨,証明你係貴人啦!哈哈哈。。。
    Derek

    回覆刪除
  8. 啲人攞住把遮係咁撞埋我把,試過整到我成面雨水,好乞人憎!

    回覆刪除
  9. 性學家研究過,好多男子漢,真係睇見女生雙腿而著迷!兼有高潮!

    所以,校長同你,都係屬於 99%!你可以去佔領砵蘭街喇!嘻嘻!

    回覆刪除
  10. Derek,
    哈哈,如果以「水為財」呢個角度嚟睇,咁我就真係「貴人」囉!

    Coffee,
    係囉,都唔明點解會有咁多人唔識禮讓,可能呢啲就係香港民主化嘅後果嘞!

    佛爺:
    嘩,如果睇吓都有高潮咪好唔掂?!咁鑊鑊出街都肯定會搞到一褲都係啦!

    回覆刪除