2010年5月6日星期四

白姐姐

繼癲狗之後,白姐姐又寄咗份補選宣傳單張嚟。但係佢出手就比較低,得8.4g重,只可以換到23粒泰國香米。不過我都係覺得佢嘅策略好,份單張一張過,硬卡紙兩面印刷,字又大大隻,唔使打開就一眼睇晒,喺傳遞信息嘅功能方面略勝一籌。好似癲狗嗰份咁,直頭都費事打開,一就掟咗落回收箱。

不過白姐姐又真係幾騎呢吓,到依家仲喺度sell緊盡訴心中情。仲有,佢個女超人形象先搞笑,不如放多幾張後生時嘅靚女相好過啦。話時話,盡訴心中情都係聽過幾次咁多,次次都係叫人飛咗條仔,全無新意。所以話,嗰所謂電台名嘴,真係冇一個有建設性。如果話白姐姐入咗立法會會有乜建樹,真係打死都唔信。

呢次立法會補選,原本冇諗過投票,因為由頭到尾都係一場鬧劇。不過如果白姐姐有機會砌低癲狗,又可以諗吓喎。兩個都係爛橙,唯有揀個冇咁爛嘅囉。有人成日以為有咗雙普選就乜問題都可以解決,真係天真得可憐,你要睇吓參選人同選民係乜質素先得架!"有普選,冇矛盾"?我覺得"有東方,冇窮人"比較可信!


2010年5月5日星期三

癲狗

早兩日收到癲狗嘅立法會補選宣傳單張,睇都冇睇就掟咗落廚房個廢紙回收箱度。不過諗諗吓又覺得有對癲狗唔住,話晒佢今次都有些小貢獻。點解?咁就要講吓屋苑喺環保方面嘅搞作喇。呢度會定期舉辦廢物回收活動,廢紙鋁罐都可以換,好似40kg廢紙就可以換到一包2kg嘅泰國香米。嗱嗱聲喺回收箱度摷返癲狗嘅宣傳單張出嚟,用我個高科技電子磅秤下。嘩,足足有15.2g咁重!經過一輪複雜計算,原來可以換到42粒泰國香米。咁無端端屋企又多咗幾粒米。癲狗,真係多謝晒!不過,如果紙唔係攞嚟印宣傳單張,又會唔會有更有意義嘅用途呢?我諗癲狗自己根本冇諗過。