2011年11月23日星期三

裸(2)

上一篇講到有個光豬姐姐,鍾意剝晒衫影相,仲將啲裸照放上自己個blog,可謂造福香港宅男界。原來有好嘢唔藏私,擺上網益街坊嘅唔止佢一個。早兩日睇報紙,話埃及有個女博客,都係一樣喺blog度將自己嘅光豬相公諸於世。呢位埃及光豬女博客同我地位陀地姐姐一樣,都係露得好徹底,啲相三點畢現。唔同嘅係,相對於我地光豬姐姐嘅無私奉獻,埃及嗰位就顯然有啲私心,情操高下立見!

原來埃及光豬姐姐嘅目的係要宣示主權,作為女性對自己身體行使嘅主權。佢接受訪問時話:「我不為我的女性身分感到害羞,埃及的女士只被看成性物,每天被騷擾,而埃及男人並不承認女士的地位。」

喺回教社會,女性嘅地位係點,相信大家都好明白,根本唔使多講。女人出街一定要著得好密實,唔可以露出手腳,而且要戴頭巾、面紗、甚至面罩。就算去游水,一樣要著到成隻粽咁。好明顯,咁係因為啲男人當咗自己嘅女人係私有財產,梗係唔想俾人睇蝕啦。

事實上,邊會有女人唔貪靚,而男人亦一樣,都想自己嘅女人靚。上次去土耳其旅行,聽一位去過伊朗嘅團友講,啲伊朗女人嘅黑袍下面,原來係款式花俏、顏色鮮豔嘅內衣。嗰位團友係男人,當然唔會係親眼所見啦。如果係佢自己睇到就大鑊喇,隨時俾人挖眼都有份。其實係佢太太喺女廁見到嘅。我一向以為伊朗好保守,估唔到原來女人嘅黑袍底下竟然暗藏春色!

由此可見,就算係最保守回教社會,都喺度暗中改變緊。而且喺全球化呢個大趨勢底下,要一成不變根本就冇可能,只係改變唔會一夜發生啫。如果有人想用激烈嘅方式加速改變,後果隨時會適得其反。中國人一早就知道呢個道理,所以有「揠苗助長」同「欲速則不達」呢啲講法。

講番嗰位埃及光豬姐姐,佢張裸照都不知幾受歡迎,短短時間已經有百幾萬點擊率。連敵對陣營嘅以色列,都有幾十個女子聲援,用光豬大合照形式撐佢。有咁大回響,自然會激起國內保守勢力嘅對抗情緒,以致大力打擊啦。佢就收到大量辱罵留言,其中仲不乏死亡恐嚇添。至於班以色列光豬嘅聲援,亦極有可能引起反效果,隨時會令佢俾人入多一條通番賣國罪。事實上,連埃及國內嘅改革派都唔敢撐佢,要同佢劃清界線。

我絕對理解光豬姐姐嘅訴求,不過就唔認同佢嘅做法。客觀事實係,佢咁做除咗可以宣洩情緒,對要爭取嘅嘢根本就冇幫助。一方面加劇社會分化,堵塞異見陣營嘅溝通渠道,亦令當權嘅保守派覺得受到威脅,因而收緊控制。咁只會扼殺咗社會自然蛻變嘅機會。

想一夜變天?的確係好浪漫,不過絕唔實際!「茉莉花革命」當初人人叫好,但係睇吓而家埃及同利比亞變成點先再講啦!



5 則留言:

  1. 黑袍下面,原來係款式花俏、顏色鮮豔嘅內衣...

    人性無可抗拒!

    ***

    裸(2),我仲以為今次又有你嘅裸照睇添!

    回覆刪除
  2. 你點解今次又唔post番張裸照,宣示下主權咁呢?

    回覆刪除
  3. laulong,
    真正裸照已經用晒喇,淨係得番啲露兩點嘅沙灘半裸照咋!冇理由特登喺屋企影寫真放上嚟啫,既唔養眼又冇意義!

    Ebenezer,
    對於任何嘢都一樣,要用行動宣示主權嘅,都係因為實際上行使唔到主權,所以我冇需要咁做囉!

    回覆刪除
  4. 雖然剩係見得到佢哋對眼,但唔知點解,覺得佢哋對眼特別靚!

    回覆刪除
  5. Coffee,
    其實呢啲係錯覺,因為我地平常睇人唔會淨係見到對眼。又試吓揾張自己嘅相,用嘢遮住一隻眼,你都會覺得靚咗架!

    回覆刪除