2011年10月30日星期日

凡城

校長話佢有地震緣,去過嘅地方都會成為地震高危區。真係好得人驚呀,竟然有個計時炸彈近在咫尺!為咗全港市民嘅福祉,我強力建議校長移民去日本!唔使質疑我嘅動機嘞,我擺明係有私心,想靠害蘿蔔國啦!

話時話,其實我自己嘅腳頭都唔好得幾多。去過土耳其兩次,返到香港冇耐當地都發生強烈地震。1999年去土耳其中西部玩,途經首都安哥拉。返嚟大約兩個禮拜,安哥拉地區就發生7.4級地震。今年去土耳其東部,7月底仲喺凡城玩緊。事隔唔夠三個月,凡城地區又發生7.2級地震。都算好彩喇,兩次都俾我避過咗!

講開凡城,印象最深嘅唔係嗰度啲景點,而係當地嘅特產凡貓。呢種貓特別之處在於兩隻眼唔同色,一隻藍色,一隻黃色。不過又唔係所有凡貓都有鴛鴦眼,有時一竇貓仔裏面都未必有一隻。嚴格上嚟講,鴛鴦眼係屬於一種遺傳缺陷。不過物以罕為貴,就係有缺陷先值錢。專做遊客生意嘅商店都會養番一兩隻凡貓看門口,吸引啲人入去睇吓,咁當然係鴛鴦眼嘅先有吸引力啦。

話時話,我就覺得嗰啲做生招牌嘅凡貓好慘囉。成日俾一大班人圍住,當怪獸咁睇,真係唔嚇死都煩死。有啲唔生性嘅遊客仲用閃光燈影相,隨時凡貓都會變成盲貓。都唔明點解啲人硬係有鋪閃光癮,喺暗少少嘅環境就一定要閃。其實一般相機嘅內置閃燈只係可以用嚟補吓光,如果作為主要光源根本就唔係好掂,不如校高啲ISO好過啦。

睇番啲凡貓相,真係令人有啲懸念,唔知佢地而家點呢?天災無情,我自己都算執番身彩喇,希望喺凡城接觸過嘅人同凡貓都冇事啦!





2011年10月28日星期五

肥胖是福?

如果我話「肥胖是福」,相信一定會俾人當黐線。以現代人嘅觀念,肥胖絕對唔係福氣,因為會同一啲惡疾扯上關係,例如心血管疾病同糖尿病。不過中大嘅一項研究就有驚人發現,原來對於長者嚟講,越肥竟然會越長命!

嗰個研究以四千名六十五歲以上嘅長者為對象,男女各佔一半,統計佢地喺2001至2008年嘅死亡率。結果發現,越肥嘅男性長者,死亡率越低。而死亡率最低嘅組別,平均腰圍有成三十八吋。至於女性長者,肥瘦就同死亡率冇明顯關係。

越肥反而越長命,肯定同一般人嘅理解有好大出入。據研究人員推測,脂肪有助增強抵抗力,亦可以睇成係身體嘅儲備,幫到長者捱過大病。有關人員仲建議六十五歲以上長者食多啲高營養嘅嘢增肥,例如蛋、奶、雪糕等。至於點解女性長者又唔係咁,就仍然係個不解之謎。

呢個研究完全顛覆咗我對健康生活嘅理解,搞到而家有啲不知所措添。自從幾年前發覺自己多咗條士啤胎,我已經搣甩咗掃街嘅惡習,同最鍾意食嘅炸大腸、牛雜、八爪魚鬚等等講拜拜。連即食麵都係揀非油炸嗰啲,至愛嘅滿漢大餐牛肉大碗麵就掂都唔敢掂。晏晝嗰餐就淨係食粟米同生果,簡直健康到無倫。雖然一直都去唔番我目標嘅廿八吋腰,不過條士啤胎亦冇繼續發大。點知原來三十八吋腰先係最健康,咁點算呢,係咪唔使再忍口呢?

不過咁,三十八吋腰真係諗起都得人驚,第二啲唔講,淨係著褲已經夠煩。通常啲肥佬著褲只係得兩個情況,一係褲頭跌到落私處,行兩步都驚會甩。一係就要將褲頭掹到上心口,核突到冇人有。而且有個三十八吋肚腩都好大鑊啫,仲辛苦過女人陀仔,就算有得執都執輸過人啦。所以呢個最健康嘅體型,都係咪搞我嘞。

其實對於我呢啲準長者嚟講,呢個問題可以唔使考慮住,過到六十五歲先諗都未遲。是福不是禍,是禍躲不過,就當唔知有個咁嘅研究,費事煩!

2011年10月26日星期三

野人教你惜飲惜食惜生活

之前有個「向地產商說不」嘅光頭仔,話由舊年十月中開始,一年內唔幫襯地產商有份經營嘅所有項目。計吓條數,到而家啱啱夠一年,唔知佢嘅反地產霸權創舉有乜成果呢,真係希望是但台可以跟進吓。正當我對呢位奇人充滿懸念之際,又出現咗另一位更離奇嘅光頭仔,只可以驚嘆一句:香江代有奇人出,各領瘋騷鬥騎呢!

早兩日喺日月報副刊(Sunday Workshop)睇到一篇名為「野人教你惜飲惜食惜生活」嘅專訪,講一個從事自然教育嘅29歲光頭仔點樣將環保理念融入生活,真係令人嘆為觀止!文章用「家徒四壁」嚟形容佢屋企,「廳中全部用品加起來不超過十件」。至於光頭仔嘅生活細節,常人睇起嚟簡直同苦行僧冇乜分別。以下係佢自己講述嘅綠色生活秘技(藍色粗體字)同我嘅評語:

不用電飯煲,柴火煮食好吃得多
屋企以前都燒過柴,但係就完全唔覺得煮出嚟嘅嘢比用其能源好食,我懷疑覺得比較好食只係佢自己嘅心理作用。而燒柴亦有碳排放,係唔係環保啲我就唔知嘞。至於柴從何來,文章裏面冇提到,會唔會係上山斬樹呢?如果想真正環保,啲嘢應該全部生食。當然啦,點樣先可以將生米整得好食,咁就要光頭仔自己諗喇。

不用洗衣機,改為手洗。污糟衫日日清,不要囤積
洗底洗襪洗T都尚可,但係牛仔褲同床單點手洗呀?我開始懷疑光頭仔身上同屋企會唔會都有陣異味!

不用即棄餐具,自備筷子膠盒
呢樣難度唔算高,不過我自己就怕麻煩,絕對唔會咁做!

不買新衣,收集朋友二手衫,只買內衣褲和襪
如果係為咗慳錢都仲可以理解,因為而家啲潮衫真係好貴。如果係為環保,光頭仔應該做嘅係向佢班朋友曉以大義,叫佢地唔好製造咁多舊衫。以我自己嚟講,啲衫褲閒閒地著十年以上,超過二十年嘅都仲有,爛到唔著得先會買,都不知幾環保!當然啦,想環保就冇得追潮流架喇!

不用洗頭水沐浴露,改用清水和鹽,一樣乾淨。他慶幸自己不是女人
其實浴鹽有美容功效,啲女人都唔知幾鍾意,不過聽講話唔可以日日用,呢樣我就冇乜研究嘞。至於光頭仔,相信佢用嘅唔係浴鹽,而係普通食鹽或者粗鹽。係咪有洗頭水同浴露一樣嘅清潔效果,咁就無從蹊考嘞。不過睇吓光頭仔,廿九幾歲人就已經有個超高M字額,都唔知會唔會同佢嘅洗頭秘方有關,我就建議佢揾個護髮專家諮詢吓好啲。

不買書本雜誌,改為上網或到圖書館借書
上網睇書同雜誌唔係唔好,不過長時間對住個芒,對眼會好傷。而且捧住本書睇,始終感覺好啲。去圖書館借書就太麻煩,千祈咪預我!

不開冷氣,改用風扇,夏天用蚊帳
減少開冷氣我都贊成,不過風扇都要用電,唔合乎光頭仔嘅環保理念,佢似乎做得未夠徹底。所謂心靜自然涼,佢冇理由唔知啫!

不用廁紙,用水洗!
恕我冒犯講一句,真係WTF!我年年驗身,最怕就係驗便便,鑊鑊都要搞到嘔晒先至攞到sample。光頭仔竟然可以用手善後,真係服得佢好緊要!佢唔用洗頭水同浴露,睇怕屋企都唔會有梘液,善後完對手洗唔洗得乾淨就真係天曉得喇。佢對手乾唔乾淨當然唔關我事,不過我覺得佢應該提高透明度,俾同佢有接觸嘅人知道自己用邊隻手善後,等人地有啲心理準備囉。

不看電視或花錢娛樂,他的興趣是行山、種植,一年可能會看兩三齣電影
我都唔會花錢娛樂,電視亦好少睇,電影更加戒咗好多年。不過對於光頭仔嚟講,睇戲都唔係好啱佢啫。一來拍戲其實會嘥好多資源,而且啲戲院又開行冷氣,凍到殮房咁,都不知幾唔環保。

不吃藥,病時吃橙。有中醫師教他吃山草藥,有時會進行斷食療法排毒
嗱,呢啲就係教壞細路嘞,有病就梗係要睇醫生啦!斷食療法排毒喎,我估飲符水會有效啲囉!

不買家俬,到垃圾站撿拾或收取朋友轉贈
搞到成屋犀利feel,呢啲係佢嘅個人品味問題,我就不予置評嘞。

哈哈,睇完光頭仔嘅綠色秘技,大家有冇諗住學吓呢?好老實講,我就覺得佢已經中晒毒嘞,簡直環保到冇朋友。不過原來我估錯咗,佢唔止有朋友,而且就快結婚添,仲籌備緊一個綠色婚宴喎。真係有啲好奇,條女點會頂得佢順呢,尤其是用手善後呢家嘢!佢話自己好少買嘢,最近難得嘅消費係買咗個銅缽(和尚化緣嗰隻,連埋一枝用作敲擊嘅木棍),原因係「一半為工作,一半為靜心」。為靜心都仲可以理解,為工作就點都諗唔通嘞。如果佢係出家人,又冇理由會娶老婆啫,如果唔係出家人,咁銅缽又同工作有乜關係呢?真係神化到冇人有!

光頭仔呢篇專訪,我完全係當做花邊新聞嚟睇,因為講嘅只係一啲奇人怪事。同嗰啲留到把頭髮或者手指甲十幾呎長嘅人,又或者玻璃鐵釘當飯食嘅人,根本冇乜分別。而家竟然當成環保教育咁出街,我就真係好想同日月報嘅副刊主編講:唔該你收皮啦!

2011年10月24日星期一

阿美阿美

阿美阿美幾時辦嫁妝,我急得快發狂;
今天今天妳要老實講,我是否有希望。
雖然我是個窮光蛋,人又長得不怎麼樣;
但是妳要想一想,看看自己的長相。
阿美阿美不要再徬徨,少女的青春短;
今天今天妳不要倔強,快做我的新娘。
雖然我沒有汽車洋房,吃得粗茶又淡飯;
只要妳陪我作伴,包妳白白又胖胖。

唔知仲有冇人記得「阿美阿美」呢首歌呢?如果你有印象以前聽過,絕對唔係一件好事,因為咁就證明你已經一大把年紀!

早幾日無啦啦摷番隻台灣校園民歌CD出嚟聽,又重溫咗呢首歌,彷彿返到去幾十年前。隻歌其實唔算好好聽,但係就幾輕鬆得意,應該算係一個男人嘅求婚宣言。不過如果有男人真係咁樣求婚,條友實注定一世要做寡佬,因為佢對女人完全唔了解。

首先,爆晒自己嘅缺點出嚟,已經係策略上嘅重大失誤。咁都算嘞,最大鑊係居然誠實到連對方嘅短處都講埋,叫人地「看看自己的長相」。大家都知啦,批評女人個樣絕對係大忌。唔會有女人覺得自己唔靚,就算有唔滿意,都只係因為仲未夠完美啫。而且,講到對方再唔嫁就實聽攝灶罅,呢種恐嚇式口吻,莫講話女人,就算男人都唔會接受啦。最後話「包妳白白又胖胖」,又係犯咗死罪。「白白」當然冇問題,不過提到「胖胖」就死得人啦。當然,啲歌詞只係為咗搞笑,相信現實中絕對唔會有人咁樣求婚。但係呢個世界乜人都有,我就遇過類似嘅嘢,不過唔係求婚,而係箍煲。

話說九十幾年前,有次同人喺屋企小聚,佢竟然要求我配多條鎖匙俾佢。只係識咗兩三個禮拜就想入宮,佢都算進取喇,其實嗰陣同佢都未算正式拍拖。當然啦,呢個只係我自己嘅睇法,或者佢覺得已經係老夫老妻都唔定。我亦冇求證過佢點諗,因為第一時間已經決定要飛佢。呢種人肯定好黐身,唔飛佢第日實有排受。所謂合則來,不合則去,只係兩三個禮貨仔啫,對於雙方都應該唔會係乜嘢重大打擊。點知佢反應大到超乎想像,竟然晒地,捉住我對腳唔肯放。咁大個人仲玩地,再拖落去都唔知會搞埋啲乜嘢大龍鳳出嚟。呢種人絕對招惹唔過,真係唔飛佢都冇天理啦。我都知佢冇咁易放棄架喇,但係點都估唔到佢會發表一番令人啼笑皆非嘅箍煲宣言。佢竟然狂數我七宗罪,話我有咁多缺點佢都唔介意,問我有乜理由飛佢喎。至於嗰七宗罪係乜,咁私人嘅嘢,梗係唔方便講啦。

真係唔講都唔知,原來我一直咁委屈咗佢。呢番箍煲宣言更加堅定咗我要叮佢走嘅決心,因為只有放手,佢先有機會揾過個完美嘅男人,我咁做都係為佢好咋!都唔明點解啲人會咁自我中心,明明想箍煲,都要講成係偉大嘅自我犧牲,想唔俾人掃出街都幾難啦!


2011年10月22日星期六

我冷血之天安門母親

注意:如果有人睇完想鬧我冷血嘅就可以慳番嘞,因為我一早已經自插咗!

范婦人喺一個公開場合被問及對六四嘅睇法,佢就以「不幸事件」嚟形容。其實呢個講法完全冇新意,不過以佢嘅身分,亦唔可能會發表乜嘢出位言論。點知講到咁四平八穩都出事,俾天安門母親發起人丁子霖鬧到狗血淋頭。丁女士痛斥范婦人冷血,要求佢公開道歉,仲話佢冇資格選特首添。

對於丁女士嘅言論,本人實在不敢苟同。首先,話六四係不幸事件,真係睇唔出錯喺邊度。丁女士可以話佢講咗等如冇講,但係咁就鬧人冷血,點都講唔通啩。喺自由社會,每個人都有發表意見嘅權利,但係唔表態反而唔得,呢個又係乜嘢道理呢?講到尾,丁女士只係不滿范婦人答得唔合佢心意啫。至於話范婦人冇資格選特首,問題就更大。作為極具知名度嘅內地人,丁女士咁講已經有干涉香港內部事務之嫌。又奇怪嘞,點解嗰啲成日批評大陸「河水侵犯井水」嘅民主先鋒唔企出嚟講兩句呢?

呢單嘢令我諗起之前發生嘅兩件事,李娜贏咗法網之後被記者問及對六四嘅睇法,郎朗喺音樂會被要求演奏一曲悼念六四。擺明會踩屎嘅嘢,佢兩位當然唔會做啦,結果就俾人鬧到飛起。唔明點解啲人硬係鍾意強人所難,迫人喺公開場合表態。鬧人嗰班友都有問題,佢地自己可能年年六四去靜坐、七一去遊行,對於佢地嚟講,咁當然唔會有任何影響。不過佢地冇理由唔知如果當事人講錯嘢,隨時會前途盡毀。而且當事人唔表態,亦唔代表佢地認同六四鎮壓,都唔知班友有乜好鬧。如果易地而處,唔知班友又會點做呢?如果班友敢喺天安門廣場大嗌平反六四,我就話佢地夠薑嘞。就算有人真係咁夠薑,亦唔表示佢地可以要求個個都同佢地一樣啫。

好似我夠憎死啲蘿蔔頭啦,唔通我又可以鬧嗰啲年年都去日本玩幾次嘅人咩?當然啦,我私底下的確對嗰啲哈日嘅中國人冇乜好感。相對於六四事件,日本侵華對中國人造成嘅傷害肯定大得多。日本仔唔止冇認真道歉,更離譜到否認南京大屠殺添。點解有啲人又可以當乜事都冇,哈日哈到連阿媽係邊個都唔記得呢?呢啲咪個人選擇囉,雖然我唔認同,但係亦唔會反對。嗰班日日高呼平反六四嘅890後,相信當中有部分都係哈日一族,其實佢地係咪應該檢討吓呢?

啲人成日大嗌「人民不會忘記」,唔知佢地明唔明白,冇忘記都唔一定要每日將呢句嘢掛喺嘴邊。就算有人選擇忘記,係咪都應該尊重人地嘅意願呢?正如日本侵華歷史咁,咪一樣有好多人已經忘記咗!

可能對於丁女士嚟講,平反六四已經係佢生命嘅唯一目標。我尊重佢嘅堅持,但係就唔認同佢霸道嘅做法,一定要人人都好似佢咁諗。畢竟,其他人唔係為平反六四而活,生命中仲有好多要照顧嘅嘢,冇理由要冒住前途盡毀嘅風險表態啫!范婦人拒絕道歉係正確做法,同丁女士繼續糾纏落去只會嘥時間,因為佢根本唔識得尊重他人嘅選擇!


2011年10月20日星期四

獻金風雲

政治獻金單嘢,我真係好鄙視肥佬黎!我鄙視條友,唔係因為佢搞風搞雨,而係佢洩密都洩得低能過人,竟然係因為Foxy!仲連累埋班盟友,成日俾記者追問有冇收過錢,搞到認又唔係,唔認又唔係。都係神人最夠薑,承認收過肥佬黎錢。咁又係喎,佢老人家以個人名義收錢,又冇犯法,你地咬佢食呀!

所有涉嫌收過錢嘅政黨或個人都異口同聲話,就算有收過任何捐獻,都唔會有附帶條件,即係唔會影響佢地嘅政治立場。對於呢個講法,其實冇乜好懷疑,捐得錢俾對方嘅話,當然係同聲同氣啦。不過就有建制派人士質疑,香港主要民主政團嘅捐獻都係來自同一個人,可能會出現政治操控。咁諗就未免杞人憂天喇,就算幕後真係有人操控又點,啲政客要晉身議會,最後仍然要過選舉呢關,咪當香港嘅選民係Lulu先得格。我份人好公正嘅,絕對唔會因為睇肥佬黎唔順眼而抹黑佢。

琴日睇到日月報嘅社評,又係講呢單嘢,標題係「商界杯葛民主派 不利民主也不利和諧」。內容話民主派係一股重要政治力量,但係收到嘅捐獻都係來自肥佬黎,而少獲商界人士關照。商界對民主派嘅財力封殺,不但不利香港嘅民主發展,亦不利社會和諧。文章又提到民主派同建制派得票率嘅六四黃金比例,認為民主派得到咁廣泛嘅民意支持,反而遭到商界杯葛,質疑背後係咪有人政治施壓。最後仲辣埋保皇黨,話佢地嘅政治獻金比民主派多一大截,「其來源與利益關係,使人充滿懸念」。

之前我已經鬧過日月報立場偏頗,今次又整篇咁嘅社評出嚟,真係想唔鬧多次都唔得。

首先,商界杯葛民主派,絕對係正常不過,根本就冇需要同政治施壓扯上關係。民主派處處針對商界,郁啲就話官商勾結、地產霸權,全無理性可言。俾著你係李+X,你都唔會捐錢俾民主派啦。唔通好似香港政府咁,出糧俾香港電台班友搞對抗咩。要養隻狗咬自己,班商家佬絕對唔會咁蠢囉。如果佢地真係咁蠢,就唔會發到達啦。仲有,邊啲人嘅所作所為至係不利社會和諧,唔該日月報搞清楚先講啦!

至於六四黃金比例,唔提都冇咁嬲,一提就把幾火。如果日月報真係重視呢個黃金比例,點解佢地嘅報導又會咁偏頗呢?尤其是副刊,直頭變咗淪陷區,一面倒傾向民主派。而且,根據日月報嘅論點,肥佬黎嘅捐獻係咪都應該按六四比例分配呢?點解肥佬黎可以淨係捐錢俾民主派,而其他商人就要顧及整體民意呢?日月報都好雙重標準吓啫!

講到保皇黨,人地嘅政治捐獻多一大截有乜咁出奇。肥佬黎雖然係有錢,不過同城中嘅超級富豪相比,仍然有好大距離。佢一條友都可以照起晒香港嘅民主派,保皇黨又有乜理由會揾唔到多幾倍嘅捐助呢?唔通真係只許肥佬黎放火,不准李+X點燈?!

最後,唔好質疑我點解覺得日月報咁唔掂,仲要一路鬧一路睇。之前都講過,我一向唔鍾意嗰啲有預設政治立場嘅報紙,日月報雖然係立場偏頗,不過已經算係最中立架喇。冇辦法啦,鬼叫而家嘅傳媒生態係咁咩!

2011年10月19日星期三

神馬都是浮雲

如果話曾凸首一無是處,相信好多人會贊同。但係大家有冇諗過,其實佢都有一個優點。佢起碼言行一致,都算係一個端人,好過嗰啲口蜜腹劍、口是心非嘅扮民政棍多多聲。佢話自己視民望如浮雲,做出嚟嘅嘢又真係貫徹晒呢個宗旨架。

早兩日喺一個公開場合,凸首提到深層次矛盾,就話係永遠解決唔到嘅問題,仲舉咗人口老化同貧富懸殊做例子。佢咁講嘢,民望想唔低都幾難啦。

就算佢講嘅係事實,市民都肯定唔會接受。乜都話解決唔到,咁使鬼佢做凸首咩,我做都得啦,橫掂我都唔識點解決嗰啲問題。事實上,相信好多人都會咁諗,搞唔掂就請佢退位讓賢,揾個搞得掂嘅人坐佢個位。

凸首嘅問題已經唔係喺說話技巧方面,而係佢根本就缺乏政治智慧,枉佢仲話自己係政治家。最經典莫過於之前喺一個電台節目,竟然將極端民主同文革相提並論。結果當然係俾班扮民政棍瘋狂抽插,扑到佢體無完膚啦。咁都冇所謂嘞,最多瘀吓啫,其實佢講乜嘢,班友都一樣會照插架啦。

話佢冇政治智慧,係因為佢唔知文革唔講得。阿爺根本就唔想人提起文革,之所以將文革定性為動亂,就係要一槌定音,等啲人唔好再糾纏不休。我當然唔知事後有冇人打佢小報告,不過連咁基本嘅嘢都唔識,都唔知佢點做凸首!

有個視民望如浮雲嘅凸首,又有班視港人福祉如浮雲嘅政棍,你話香港會點呢?當然係「神馬都是浮雲」啦!

話時話,對於上面提到嘅深層次問題,我又真係有解決辦法喎。只要大幅削減公營醫療資源,啲人就唔會咁長命,人口老化問題自然會迎刃而解。要解決貧富懸殊問題亦好簡單,即刻炒晒班問責局長,揾而家喺中環露緊營嗰班廢青頂上,嚇走晒啲有錢佬,咁堅尼係數想唔跌到接近零都唔得啦!


2011年10月18日星期二

百年光影

根據維基大帝的資料,第一個永久攝影影像早在1826年就出現了,距今一百八十多年。今天隨便拿個手機也能拍照,自然很難想像百多年前的攝影是怎麼一回事。然而兩年前到古巴旅遊,在一個偶然的機會,竟讓我窺見了「古代」攝影的奧秘!

在夏灣拿的舊國會大樓前,有一對黑人老夫婦為遊客提供即影即有服務。不過他們用的不是最新的數碼攝影和打印科技,也不是曾經流行一時的Polaroid相機,而是一台1913年生產的古董。相機已經殘破不堪,得用膠布東粘西補。因為要提供即影即有服務,相機還得充當小型暗房。不僅攝影器材夠特別,拍攝過程也十分有趣,無異時光倒流百年!

首先,老人讓我們坐在台階上,最多只能分三行,而且要坐得親密一點,因為1913年的相機沒有ZOOM的功能。折騰了好一會,拍攝終於開始了。只見老人輕輕的拿開鏡頭蓋,大約過了三四秒,又輕輕的把鏡頭蓋上了。他沒用測光器,只是憑經驗判斷曝光時間。然後是一陣的埋頭苦幹,把照片洗了出來。只見濕漉漉的相紙上,影像卻是黑白顛倒了,原來是直接曝光在相紙上。老人仔細看了一會,只見他搖搖頭,便讓我們坐好再拍,應該是曝光不準確吧。直拍到了第三張,他才滿意。老人把相片稍為裁剪,和一早準備好的國會大樓的反轉照片拼貼在一起,然後放在鏡頭前再拍一次,洗出來就是一張正常的照片。我們十三個人,他就重複了十三次,續一拍攝和沖洗。整個過程花了一個多小時,以行程緊密的鴨仔團來說,已經是大型景點的標準遊覽時間。不過大家並沒有埋怨,因為能把一張極具紀念價值的照片帶回家,總比把時間花在逛商店來得有意義。

說實話,照片的質素真有點不堪入目。但質素已不再重要,這可是百年前的攝影技術啊!每張照片的收費大約折合港幣十元。對於像我這樣無甚攝影理論基礎的人來說,實是上了寶貴的一課,這十塊錢的學費真的很便宜!


2011年10月16日星期日

雙重雙重標準

聲明:本人絕對無意批評任何宗教,所針對者只某神人而已!

我當然唔係老到懵咗,連重複打咗「雙重」兩次都唔知。其實係早兩晚睇電視新聞,有啲人竟然重複示範乜嘢叫做雙重標準!

凸首第一次喺新垃圾會大樓開會,就俾癲狗破口大罵,咬住唔肯放。又真係估佢唔到,凸首竟然高姿態還擊,發展成對罵局面。跟住長毛又加入戰團,結果同癲狗一齊俾主席憎肉成逐出議事廳。後來有扮民議員不滿凸首冒犯議員同主席處事不公,集體拉隊離場抗議。

單嘢真係令人失笑,凸首同癲狗簡直就係潑婦式對罵,絕對有失兩人嘅身分。尤其是凸首,明知自己口齒唔伶俐,鬧人都鬧到口窒窒,就獻醜不如藏拙啦。如果真係想還拖,唔該佢一早諗定想鬧乜嘢,喺屋企背熟啲台詞先。至於癲狗長毛,齋鬧梗係滿足唔到佢地嘅獸性啦。長毛喺俾人拖出議事廳之前,就把握住最後機會掟咗隻雞蛋上台。被趕離場之後,兩條友又合演一場馬騮戲,除咗憎肉成張相落嚟,再向張相掟番茄。最搞笑嘅係佢地掟番茄竟然就住就住,一啲激情都冇,驚死掟大力啲會整爛張相。其實整污糟會議廳幅牆同憎主席張相,係咪已經算刑事毀壞呢,我就冇研究過嘞。

以上提到嘅只係凸首同某啲議員當眾出醜,其實冇乜大不了。不過扮民議員嘅反應就唔同嘞,完全暴露晒佢地嘅醜惡本質。多位扮民議員事後指摘凸首,批評佢侮辱議員。梁渣傑話就算議員講嘅嘢唔合官員心意,亦應該受到尊重。而李乜人就話憎肉成擦凸首鞋,令到議員俾人踩到上心口。呢啲分明係雙重標準啦,癲狗媽叉凸首就係講嘢唔合佢心意,凸首回敬番就係侮辱議員。如果話議員俾人踩到上心口,咁凸首簡直係俾人喺頭頂疴咗篤屎添啦!仲有嗰件逃緊生,佢都有份批評凸首。之前一哥俾癲狗用件衫兜頭掟,事後揾逃議員投訴,佢就扮晒盲人,話乜都睇唔到。上次就發晒雞盲,今次又突然變番耳聰目明,睇嚟條友連生理上都有雙重標準!

真係唔明投票選呢啲扮民議員出嚟嘅選民係乜嘢心態。癲狗長毛大舊鑊鑊都搞事,俾人趕出議事廳,都唔知佢地有幾多次可以正正經經開完個會。而其他扮民議員又成日玩集體離場抗議,垃圾會嘅議事效率想唔低都幾難啦。唔通呢啲就係選民想見到嘅嘢?如果真係咁,啲選民究竟係熱愛民主,定係想搞無政府主義呢?

差啲講漏咗添,癲狗鬧凸首其中一句係「公然與全香港市民為敵」。我根本從來都冇投過票俾癲狗,未得我授權就公然代表埋我,呢條友都算無恥喇!

嗰晚仲有另一單新聞,擾攘多年嘅校本條例司法覆核終於有定案,天主教教區終審敗訴。

講到校本條例,其實我嘅態度好中立吓。究竟學校管理係咪要增加民主成分同透明度,我真係冇乜意見。不過對於單司法覆核官司,我就好睇唔過眼嘞。

單官司係某神人堅持要打嘅,理由係校本條例會削弱辦學團體(教會)嘅辦學理念同自主權。如果呢個理由係由第二啲人講出口,我都唔會有乜嘢反應。不過由神人提出,我就真係好唔順氣。

根據校本條例,由教師、家長、校友出任嘅校董只會佔四成,影響力其實好有限。極其量只可以俾啲意見,對於一啲重大決策,根本就冇能力否決。所謂民主成分,恐怕係裝飾性多於實用性。

大家都知,神人瞓晒身為港人爭取民主,甚至不惜發動教徒上街遊行,都可謂不遺餘力。但係點解喺自己嘅地頭,佢會連少少裝飾性嘅民主都容納唔到呢?神人堅信香港人有足夠智慧普選特首同垃圾會,點解又會咁信唔過嗰啲有機會成為校董嘅教師、家長、同校友呢?佢明明反對功能組別呢啲小圈子選舉,點解喺自己嘅學校又奉行絕對委任制呢?以上問題有兩個可能答案。一係神人當咗自己係神,咁佢做嘅一切當然冇人可以質疑啦。一係佢持雙重標準,只許州官放火,不許百姓點燈。

我自己就傾向相信後者,而且會從陰謀論嘅角度諗,會唔會係佢轄下嘅學校有啲黑箱作業唔想俾外人知呢?本來教會嘅嘢,黑唔黑箱都與人無關,不過學校嘅運作係由公帑資助,提高少少透明度都好應該啫。事實上,教會學校又真係有啲嘢好特別。聽聞有虔誠教徒,大學畢業就喺某教會學校任教,兩年已經升咗主任,五年仲做埋校長添。睇怕只有教會學校先會出到呢啲神童。不過呢,如果係非教徒,就算教足一世都未必可以做到校長。講真,教會學校有又好似未試過有非教徒出任校長喎。話時話,唔知有冇宗教歧視呢樣嘢嘅呢,得閒問吓平機會先。當然啦,非教徒無啦啦入教會學校教書,升唔到職都係自己攞嚟嘅!

講番單官司,神人話過輸咗就可能會放棄辦學權,唔知佢嘅繼任人會唔會尊重佢呢個意願呢?

2011年10月15日星期六

不文燈謎&白痴IQ題

之前講開不文集,裏面除咗有不文對聯,仲有一條不文燈謎添。謎面係「曹操屁股痕」,射一位十七世紀法國思想家。

法國思想家我一個都唔識,當然係第一時間揭開最尾嗰頁揾答案啦。唔睇由自可,一睇就不得了,直頭笑到趴街,因為實在太絕喇!

不過咁,我都係覺得不文才子太斯文咗啲,如果將謎面改成「曹操屎忽痕」,就肯定傳神好多嘞!

提到曹操,我又有條IQ題考吓大家,絕對係原創架!喺曹操、劉備、關羽、張飛呢幾位三國人物裏面,有邊個係無德之人呢?條問題咁簡單,五秒內答唔出就當棄權!

夠鐘嘞!除咗棄權嗰啲,其他全部都答錯!而家呢條係IQ題,唔係歷史題呀,正確答案係「關羽」!

咪鬧住,聽我講埋先啦。我當然唔敢大膽到侮辱關二哥啦,唔驚橫屍街頭咩!講開又講,黑白兩道都拜關二哥,咁佢應該保佑邊便呢?萬一協調唔到,又會唔會搞到神格分裂呢?

哈哈,廢話講完!睇真啲佢地幾位嘅名先啦,曹孟德、劉玄德、關雲長、張翼德,咁你地話邊個先係無「德」之人呢?

係咁架喇,而家啲IQ題,智力正常嘅人係唔識答架!

2011年10月13日星期四

不文對

警告:本文內容粗鄙不文,閱後或會對幼兒腦部發育造成不良影響,敬請未成年人士(例如某蒙面常客)立即離開!

前言:連續寫咗兩篇嘢鬧班狀棍,本來仲意猶未盡,打算再插多班友三五七鑊。點知某蒙面人入嚟留言,話我咁寫隨時會俾人告,當堂嚇到我腳仔都軟埋,褲浪仲好似濕咗少少添,所以決定即時腰斬呢個狗屎狀棍系列。今日寫番啲比較軟性嘅嘢,應該唔會俾人告喇啩!

早排講過屎坑對,事後摷番黃老霑本名著「不文集」睇吓,果然都收錄咗兩副。再睇真啲,原來仲有幾副不文對添,今日就攞兩副嚟講吓。

屎忽掛牌撞X板,
裙頭插令出Y旗!

相傳呢副對係出自廣東才子何淡如嘅手筆,屬於歇後語形式。其中X同Y分別係男女性器官嘅粗口單字,講得明白啲即係「卵」同「西」嘅諧音字。將粗口用喺對聯而又不失趣味,雖然未必係空前絕後,不過就足以證明呢位廣東才子真係好有料到。其實佢嘅無情對仲正,但係今日就唔講住嘞。

不過呢,我就懷疑原對係咪咁樣,問題出喺「屎忽」度,實在同「裙頭」對得唔算好工整。除咗字義上唔係太匹配,「屎忽」亦粗俗咗啲,同「裙頭」嘅中性唔多夾。網上有另一版本用「褲浪」(或「褲襠」)代替「屎忽」,個人就覺得比較適合嘞。而且「屎忽掛牌」要「撞X」,只有喺從後進攻嘅體位先會發生,要預設咁嘅限制其實唔係咁適當。至於「褲浪」版本,只要用喺男方就絕對冇問題。而上聯指男方,下聯指女方,亦係非常合理。

至於「不文集」提到嘅另一副不文對,香港人肯定熟悉得多,我自己就讀緊小學嗰陣已經知道。

上水居民居水上,
長洲賓客XYZ。

書中只係提供咗下聯嘅頭四個字,據不文才子講,係唔想寫得太露骨喎。係含蓄收斂又好,係故弄玄虛都好,總之就欲蓋彌彰。唔緊要啦,相信冇人會唔知最尾嗰三個係乜嘢字。

嚴格上嚟講,用「XYZ」對「居水上」並唔工整,不過下聯勝在夠搞嘢,都無謂深究咁多啦。網上仲揾到唔同嘅下聯版本,例如「大圍三姑三圍大」同「昆明擺檔擺明昆」。呢兩句下聯都各有可挑剔之處,特別係「大圍三姑」嗰句,如果上下聯一齊讀就會發覺好唔順口,就算好似我咁唔識分平仄,都知道對得好有問題。

我自己都擬咗兩句下聯,分別係:

不文版本:倫敦教授教敦倫
正常版本:中山獵戶獵山中

尤其是正常版本嗰句,個人就覺得相當唔錯,同上聯基本上可以逐字對到,而平仄應該亦冇大問題。不過受到悼念蘋果教主標誌嘅雙胞胎事件啟發,都係上網摷吓先好啲,費事俾人話抄襲啦。點知呢兩個版本喺網上都已經有人對出咗,真係吹脹!明明係原創,不過因為唔係首創,唯有再諗過啦。以下版本喺網上都揾唔到,應該用得喇啩:

不文版本:倫敦教會教敦倫、倫敦學者學敦倫、倫敦考試考敦倫
正常版本:西湖訪客訪湖西、周莊教授教莊周、周莊記者記莊周

其實要再對都唔係好難,只要用膽拖嘅形式,以「倫敦」做膽,其實拖好多嘢都得。咁仍然仲會有抄襲之嫌,不過話明「天下文章一大抄」,冇所謂啦!忽然又諗到另一個不文版本,雖然字詞對得唔係好工整,但係都想同大家分享吓:

長毛狗賊狗毛長

說明一下,第一個「毛」字要讀第一聲,而叫得做不文版本,第二個「狗」字當然係另有所指啦!

上面提到「天下文章一大抄」,為咗避免抄襲之嫌,最佳方法當然係自擬全副對聯,我就諗咗呢句上聯:

釣泥過海

以下係不同版本嘅下聯:

不文版本:仲未諗到,因為下聯應該係另一句廣為人知嘅諧音粗口,而且又要符合對聯嘅基本要求。以我嘅文字根底,真係想唔投降都唔得。如果勉強要對,就用「引黑狗入窿」啦。

正常版本:放猛虎歸山
正氣版本:誅妖孽祭天
輓聯版本:賀X棍歸天

要解釋吓個輓聯版本,X係一個variable,喺唔同情況可以代入唔同嘅單字。如果有棍類人物(例如惡棍、淫棍、政棍、狀棍、神棍等)橫死街頭,送呢副輓聯俾佢地就最適合不過嘞!

2011年10月12日星期三

淫人妻女笑呵呵

聲明:圖中人物只係一位旅遊車司機,本人絕對無意將佢同淫人妻女嘅無恥行為扯上關係!

之前提到有人惡搞狀棍黨,參照佢地用開嘅宣傳品式樣,製作咗一啲橫額,揶揄班友喺外傭居留權同港珠澳大橋事件中損害港人利益。跟住又有人發起反狀棍黨大遊行,聲討班友嘅惡行。狀棍黨黨灰梁渣傑就走出嚟反駁,話咁做係政治抹黑,會分化社會同破壞公平選舉。又話啲橫額係冒認佢地嘅身分,已經報警跟進。至於嗰個反狀棍黨大遊行,佢就質疑係政敵嘅所為,話遊行支出應該計埋入有關政黨嘅競選經費。粱黨灰嘅一番言論,真係令人心寒齒冷,就等我逐點駁斥呢位自以為係鐵齒銅牙嘅無恥狀棍啦!

首先講啲橫額,唔知粱黨灰認為有邊忽觸犯咗香港法例呢?睇番有關橫額,其實式樣好簡單,一啲特色都冇,點解只有狀棍黨先用得呢,唔通佢地已經將個設計註冊咗專利?至於冒認云云,呢個係嚴重嘅指控,要有確實證據先可以咁講。啲橫額上面又冇寫住係狀棍黨製作,只係用咗佢地嘅慣常式樣,咁就話人地冒用身分,粱黨灰會唔會惡咗啲呢?而且睇番啲內容,只要識字嘅人都知道係串緊班狀棍啦,根本就唔會引起混淆,真係想冒都冒唔到啦。好明顯,狀棍黨只係俾人惡搞啫。講到惡搞技倆,用得最多嘅當然係班民鼠派啦,簡直係樂此不疲,搞到出神入化添。班友就成日用啲電影海報嚟惡搞凸首同一眾高官,林D9就啱啱先俾人搞緊。而保皇黨亦喺被搞之列,個logo俾人玩到殘晒。當全港市民被迫接受咗呢種惡搞文化,粱黨灰竟然走出嚟話唔准搞佢個黨,你話咁仲有冇公理呢?

講到外傭居留權單嘢俾人抹黑,粱黨灰就糾纏喺「獲得申請權」同「擁有居港權」嘅分別,大玩文字遊戲。粱大狀棍嘅滔滔雄辯都係留番喺法庭用啦,市民只係會睇班狀棍嘅動機同單嘢嘅客觀後果。單嘢搞到呢個地步,有兩點幾乎可以肯定。第一,法庭嘅裁決根本就唔合乎立法原意。第二,單嘢最終會以人大釋法擺平。班狀棍當然唔會諗唔到呢兩點,佢地只係利用基本法寫得唔清晰嘅地方,喺度鑽空子搞事啫。到政府提請人大釋法,班友就會講乜嘢損害司法獨立,挑撥市民嘅對抗情緒,從而大撈政治本錢。俾佢地咁搞法,香港想唔分化都幾難啦!

至於社會分化,當然唔係今日先開始。不過由粱黨灰把口講出嚟,就不得不佩服佢面皮之厚。而家香港分化得咁緊要,完全係因為民鼠派唔肯接受社會上有不同聲音,堅持走佢地嘅非理性抗爭路線,拒絕用協商方式解決問題。之所以會有人搞反狀棍黨大遊行,根本就係社會極度分化嘅結果,令到原本沉默嘅一群都忍唔住要走出嚟發聲。而粱黨灰竟然倒果為因,話人地喺度搞分化。條友分明係賊喊捉賊,真係服得佢好緊要囉!

粱黨灰仲要屈人,話個遊行係敵對政黨喺背後策劃。言下之意,就係只有支持佢地嘅先係真正民意,持反對意見嘅通通都係五毛黨,係俾阿爺收買嘅。就算個遊行真係有政黨策劃又點,民鼠派又有邊次遊行或者抗爭唔係有政團參與呢?自己友搞就得,人地搞就唔得,仲要出埋法律觀點嚟嚇人,條友都算惡得交關喇!如果我喺度呼籲大家投票俾狀棍黨,咁我嘅上網費用又係咪要計埋落佢地嘅競選開支呢?有呢班狀棍喺度,法律竟然淪為爭取政治本錢同翦除異己嘅工具,真係香港嘅悲哀!

哈哈,忽然諗起,原來狀棍同淫棍都有個共通點,就係「淫人妻女笑呵呵」!

2011年10月11日星期二

抹黑

有咁耐風流就有咁耐折墮,平時高高在上嘅一班民鼠法律精英,終於都有機會試吓做過街老鼠嘅滋味嘞!

話說琴日有人搞咗個名為「聲討狀棍黨,還港人65億,反對外傭擁有居港權」嘅大遊行,據聞有超過二千人參加。而且唔同地區仲出現咗一啲參照狀棍黨宣傳品一貫式樣製作嘅橫額,內容包括「熱烈慶賀 狀棍黨資深大律師李志喜 成功爭取外傭永久居港權」同「透過司法覆核 成功阻大橋 阻沙中 令700萬港人受惠」。

對於被惡搞,一向牙尖嘴利、鬧人唔使本、有佢講冇你講嘅狀棍黨黨灰梁渣傑就開腔回應,表示「針對公民黨的抹黑行動已明顯升級,假冒橫額以圖擾亂視聽,手法鬼祟,企圖分化社會及妄顧選舉條例,以不正當手法意圖影響區議會選舉選情」,仲話已經報咗警添。佢又重申:「外傭擁有申請權並不代表他們自然獲得居港權,如果硬將『獲得申請權』變作『擁有居港權』,根本就是誤導市民,意圖分化社會,煽動群眾情緒。」

真係「聽棍一夕話,勝讀十年書」,簡直令我茅塞頓開,即刻對千百年來好多歷史人物有咗革命性嘅全新理解。原來吳三桂一直都被誤解咗,話佢係漢奸賣國賊,其實只係一小撮人針對佢嘅抹黑行為。

冇錯,吳三桂係放咗清兵入關,不過咁並唔係導致明朝覆亡嘅原因。吳三桂只係開咗道門,而清兵識行識走,入唔入關完全係佢地自己嘅決定,絕對唔關第三者事。就算清兵入咗關,亦唔表示佢地可以輕易霸佔漢人嘅花花江山,唔通明朝軍隊唔識抵抗外敵?講到尾,明朝覆亡完全係因為啲軍隊冇用啫。吳三桂一直背負住漢奸嘅惡名,都算係千古奇冤喇!

不過咁,將梁黨灰同呢位權傾天下嘅野心家相提並論,又未免太抬舉咗佢。人地話歷史會不斷重複,要揾另外一個歷史人物同佢比較,其實一啲都唔難,我就即刻諗起黃婆嘞。

黃婆雖然係同西門慶搭咗條瓦坑路,不過潘金蓮紅杏出牆、武大郎死於非命都完全唔怪得佢。西門慶會唔會上潘金蓮,只係取決於小西門慶嘅態度,黃婆根本控制唔到。而潘金蓮勾佬,都係因為武大郎冇實個老婆。至於武大郎慘死,雖然值得可憐,不過鬼叫佢唔夠西門慶打咩,要怨就怨自己太無能囉。講到尾,最無辜都係黃婆,無啦啦俾武松打死,好彩今日終於沉冤得雪喇!

話時話,近排喺電視見親梁黨灰,都覺得佢好八婆嘴臉。攞佢同黃婆呢個淫媒比較,相信唔會有人反對喇啩!

2011年10月9日星期日

屎坑對

話吟詩作對係風雅之事,相信唔會有人異議。但係呢個世界乜人都有,當人地喺度吟風弄月,有人就反其道而行,以廁所做題材,用對聯談屎說尿。叫得做屎坑對,當然難登大雅之堂,不過作為遊戲文字嚟睇,其實有啲都幾有趣味架。以下就係一啲喺網上揾到嘅屎坑對:

天下英雄豪傑到此俯首稱臣,
世間貞烈女子進來寬衣解裙 。

腳踏黃河兩岸手拿機密文件,
前面機槍掃射後面炮火連天。

大開方便之門,
解決後股之憂 。

有小便,宜;
得大解,脫 。

暢通上下,
雅集東西 。

來前百步緊,
出後一身鬆。

靜坐覓詩句,
放鬆聽清泉。

最適低吟淺唱,
不宜濫炸狂轟。

小坐片刻,便會放鬆意念,
清閒一會,即成造化神仙。

前頭蛟龍施甘露 ,
後面鳳凰下金蛋 。

板斜尿流急,
坑深糞落遲。

嚴格嚟講,有部分連對聯嘅基本要求都未做到,好似字詞性質對唔上,平仄亦有問題。不過話明係遊戲文字,只求得啖笑,都唔使咁認真啦。但係最尾嗰副直接用到屎尿呢啲字,就未免落於下乘嘞。

睇見人地吟屎詠尿,我又有啲技癢添,雖然墨水有限,都膽粗粗試吓。以下係我自擬嘅一副屎坑對:

細味風起雲湧,
靜聽水落石出。


喺呢度解釋一下:「風起」指「break wind」,「雲湧」指「吞雲吐霧」,「水落」指「揸水」,「石出」指「爆石」,即係有齊晒廁所嘅四大元素(屎尿屁煙)。

當然,我都知道平仄唔啱,而且趣味欠奉,不過玩吓啫,冇所謂啦!總之我嘅宗旨就係:不作無聊之事,何遣有涯之生?!

2011年10月6日星期四

黌宮孽史

哈哈,今日再追打豺大媽!都未開始寫已經遇到一個難題,就係標題應該用「艷史」、「秘史」、定「孽史」呢?

對於男歡女愛,我嘅態度(或者講睇法會貼切啲)一向好開放。只要雙方係成年人(指心智而言),而當中又冇強迫成份,其實喺邊度玩同點玩法都唔係問題。好明顯,當年喺北大學生會辦公室發生嘅係一件好香豔嘅事,用「艷史」嚟形容應該最貼切。不過要將豺大媽同個「艷」字扯上關係,就點都過唔到自己嗰關囉。

「秘史」就比較中性,又可以勾起讀者嘅好奇心,其實用嚟做標題都唔錯。但係呢啲嘢有幾「秘」,我就完全確定唔到。我自己冇試過喺大學圖書館、實驗室、學生會呢啲地方搞嘢啫,不過話唔定大部分大學生都試過呢。所以「秘史」都係不用為妙,費事俾人話我無知啦。

至於「孽史」,當然係負面詞啦,本來唔應該用嚟形容男女之事。但係搞嘢不設防,中咗招就走去落仔,而且仲要係三番四次,咁唔係造孽係乜?!

其實做咗就做咗,豺大媽自己有冇檢討過,根本就唔關人事。不過佢硬係不甘寂寞,係都要挖番自己嘅臭屎出嚟講,仲要將責任推卸落其他人身上。一時話自己少不更事,一時話買唔到避孕用品,一時又話係迫於社會壓力先至墮胎,總之就唔好怪佢。咁都算嘞,佢要懺悔就懺到夠,有冇誠意其實無關痛癢。最頂唔順係佢講到自己不知幾偉大,忍痛自揭臭屎係為咗拯救受一孩政策迫害嘅中國婦女同嬰兒。佢咁做已經超越咗喺自己面上貼金嘅程度,直頭係將成塊金條塞埋入私處添啦!

冇錯,一孩政策的確帶嚟咗好多社會問題,遲啲有機會不妨講吓。不過豺大媽落仔,根本就唔關一孩政策嘅事,完全係佢自己不負責任啫。只係貪圖一夕歡愉,唔通佢地(包括埋封蟲德)事前冇諗過會有中招嘅風險?到中咗招嘞,又係咪一定要落仔呢,斷估生出嚟都唔使拉去打靶啩?講到尾,佢地只係唔想為自己所做嘅嘢承擔責任啫。如果只係一對普通少男少女,我最多都係話佢地無知識淺。不過佢地係領導89學運嘅靈魂人物,主宰住中華民族嘅民主發展,理應有足夠嘅智慧同承擔去處理呢啲私人事務。如果連修身齊家都搞唔掂,仲學乜人講民主大業呢?!佢地領導89學運,會唔會都係抱住同搞嘢一樣嘅心態呢?總之想搞就搞,事前唔使評估風險同計算後果,過程中唔使考慮應變,事後就一走了之。要澄清一點,我絕對無意侮辱89民運,呢個係死罪,隨時會株連九族,我擔當唔起!我講緊嘅只係作為學生領袖嘅嗰一對夫婦啫!

忽然諗起一單咸豐往事,可以攞嚟做個對比。以前有個同級嘅中學女同學,我諗佢應該比同級平均年齡大一兩歲,而且發育得表較早,由中一開始已經係一個巨人大姐姐。因為唔同班,其實我同佢唔係好熟,不過就覺得佢有啲嘢好與眾不同。究竟係點特別法又講唔出,因為嗰時細個,有啲概念仲未好清晰,只係覺得佢同其他女同學有好大分別。而家講番當然冇難度啦,就係風情萬種囉。澄清吓先,我係指佢嘅意態,而唔係講佢個樣。

去到中四嗰年,忽然冇見佢喺學校再出現。後來聽同學講,先知道佢原來退咗學,因為俾人搞大咗個肚,據聞經手人唔係同校學生。咁都合理嘅,我地係第一屆,最大嘅男生都只係讀緊中四,邊有本事搞大佢個肚喎。咪笑呀,嗰陣嘅中四男生真係好純情,隨時連打飛機都唔識架!

又過咗好多年,聽啲舊同學講嗰位女同學已經抱埋孫添,嗰時佢都只係三十幾歲。原來佢嗰時冇返深圳落仔,而佢個女又步佢後塵,一早俾人搞掂咗。話時話,唔知佢而家係咪已經四代同堂呢?

當然啦,太早生仔未必係好事,除咗要承受各方面嘅壓力,仲要放棄好多嘢,包括學業同前途。好似嗰位女同學咁,十幾歲就開始做師奶,都咪話唔攞命。不過佢肯承擔責任,自然可以心安理得,無論日子過得如唔如意,起碼都有覺好瞓先啦!


2011年10月5日星期三

豺大媽,你好嘢!

飽暖思淫慾,真係千古不易嘅定理!豺大媽喺美國過住富足嘅生活,又有個幸福嘅家庭(老公同三個女),本來已經算係人上人,絕對羨慕死香港啲師奶仔。不過咁,既然溫飽無憂,自然要揾啲嘢搞吓,否則何以遣有涯之生?啱啱睇咗壹仔嘅專訪,話豺大媽下禮拜會出一本自傳,大爆自己墮過四次胎。本來出書意淫一番亦無可厚非,不過又使唔使爆到咁大鑊呀,真係服晒佢!

話說豺大媽啱啱入北大就搭上咗一個男生,當時佢兩個都係學生會成員。佢地兩度翻雲覆雨,其中一次仲係喺學生會辦公室添,點知咁就有咗嘞。佢話當年大陸冇性教育,又唔准售賣避孕用品俾未婚男女,中招都係迫於無奈喎。嗰時未婚懷孕好大鑊,一定會趕出校,所以就墮咗第一次胎。佢地食過番尋味,第二年又中多一鑊,結果當然係落埋啦。

後來佢地分咗手,豺大媽就搭上咗封蟲德。佢仲話封蟲德「風流倜儻」、「健碩性感」,好受女生歡迎添。呢點我就冇辦法認同嘞,條友頭尖額窄、奀挑鬼命,咁都話「風流倜儻」、「健碩性感」,豺大媽嘅口味真係特別到無倫!有一次探完封蟲德嘅家人,佢地就順便搞嘢,結果又中咗,跟住又落埋。

八八年佢地結埋婚,後來仲拍住拖參與天安門學運。不過封蟲德竟然藉機拈花惹草,令豺大媽好唔高興。八九事件之後,佢地齊齊著草,先到法國,再到美國巡迴演講,其實嗰時佢地嘅感情已經破裂咗。都係「月亮惹的禍」,只不過一次「月夜的翻騰」,咁又中招嘞。豺大媽係返到法國先知道有咗,本來封蟲德話佢同法籍女友願意撫養個仔,不過豺大媽就選擇咗墮胎。

豺大媽話:「前三次實在中國不允許生育,最後一次在自由國土,是我對神有罪」。爆大鑊係要對神懺悔:「是要完成神的意願,解救他在中國受不幸的女兒和孩子們」。佢強烈批評中國嘅一孩政策,話係導致中國婦女墮胎嘅原因。佢仲提供埋數據:「80%的中國婦女至少墮胎一次,51%至少兩次」。

嗱,呢啲就係抽水嘞!佢墮四次胎,根本就同中國嘅一孩政策完全冇關係。最起碼,第一胎絕對可以生出嚟,我就唔相信中國政府會夾硬捉佢去落仔囉。當然啦,未婚媽媽要承受好大壓力,呢點冇人會否認。總之喺中國人嘅社會就係咁,就算香港都唔例外。又要扑嘢又唔做預防措施,中咗招就怪政府,佢抽水都算抽得離譜喇。就算冇避孕用品,起碼都應該識得計安全期啩。雖然話呢樣嘢唔係好可靠,但係點都好過不設防,斷估唔會一扑即中囉。哈哈,唔通佢日日都係發春期,所以根本就冇安全期?!

所謂食得鹹魚抵得渴,做得出就要承擔後果。乜都賴晒落人地度,而家當全世界傻嘅咩!其實豺大媽已經有個幸福家庭,做乜仲要自揚臭屎呢,唔通佢唔驚會影響到佢嗰三個女?要懺悔嘅就同神父告解啦,根本就冇必要話晒俾全世界知,我話佢係姣婆唔守得寡就真!

講咗咁耐都仲未入到主題添,其實我係想講豺大媽有乜咁好嘢。根據佢自己所講,鑊鑊都係一扑即掂,命中率接近百分百。如果佢可以分享吓自己嘅獨門秘方(或秘技),咁就造福全世界嘅不育婦女啦,真係功德無量呀!

2011年10月3日星期一

半世瓜

苦瓜又叫涼瓜,相信冇人會唔知。不過苦瓜原來仲有一個好奇怪嘅別號,叫做半世瓜,可能就唔係個個都知嘞。

叫做半世瓜,係因為人到中年先會開始鍾意食苦瓜。事實上,我又真係未見過有細路喜歡食呢樣嘢。人生難免有高低起落,經歷得多,自然唔會將一時嘅逆境當成世界末日,甚至會覺得苦日子值得回味,因為咁至更能體會苦盡甘來嘅可貴。所謂少年不識愁滋味,啲細路當然唔會懂得欣賞乜嘢叫做苦後回甘。

其實我都唔算好鍾意食苦瓜,只可以話係唔抗拒。不過近排就食多咗,因為據聞苦瓜有降血壓同降膽固醇嘅功效。今年驗身竟然發現血壓偏高,而膽固醇就更唔使講,多年嚟都徘徊喺爆燈邊緣,食多啲苦瓜應該會有幫助。

苦瓜味道青澀,唔適宜清炒,用豆豉調味就最夾。配料方面,我會揀濃味嘅肉類或海鮮,整得最多嘅係豉汁涼瓜炒牛肉。另外又會用嚟炆燒鴨,但係就唔使落豆豉。啲苦瓜索咗香濃嘅燒鴨汁,送飯絕對一流。不過燒鴨勁多飽和脂肪,就算配埋苦瓜都唔會係健康嘅菜式。至於海鮮,可以配魷魚、墨魚、帶子、或者蜆,總之可以用豉椒炒嘅海產都得。我就最鍾意豉汁涼瓜炒蟹,蟹嘅鮮味滲晒入苦瓜裏面,真係好正架。不過要注意一點,苦瓜同蟹都係極度寒涼之物,寒底嘅人就唔好試嘞。話時話,其實我都唔係好知自己係寒底定燥底添。

人地話苦瓜炒之前要先飛水,咁可以去除苦味,不過我就從來都係生炒。一來係因為懶,費事搞咁多嘢。而且苦瓜冇晒苦味,仲算唔算係苦瓜呢?如果真係咁怕苦,不如食絲瓜、節瓜、翠玉瓜算啦。但係有一種整法我一定唔會試,就係搾汁飲,真係諗吓都會打冷震!