2011年12月20日星期二

Chok相

根據「香港網絡大典」,「Chok」嘅定義係咁樣:

「Chok」,或稱「Chok樣」,是一個香港潮語,原字為「擢」,解作使人窒息,常用於o靚模、偶像拍照時擺出懶可愛動作或懶型動作,及形容人們在影相時嘗試令自己看似漂亮一點。此潮語於2009年開始流行,由於Chok樣經常被雜誌廣泛引用,導致坊間開始流行及使用。

其實chok樣根本唔係乜嘢新鮮事物,更唔係模或偶像嘅專利,我幾十年前就已經影過不知幾多chok相嘞。都唔明點解後生時咁鍾意影相,喺公司可以無啦啦影一餐,放假又會特登走去中環影,連行山都會帶埋部相機。嗰時影相,神態同姿勢都chok到嚇死人,而家睇番真係覺得勁搞笑!

都係唔講咁多嘞,大家睇相啦!

海心公園

大東山, 大嶼山

大東山, 大嶼山

大嶼山

大嶼山

大嶼山

神樂院, 大嶼山

都爹利街

中環

沙田

沙田

南丫島

蘆鬚城海灘, 南丫島

南灣

城門水塘

城門水塘

八仙嶺

2011年12月18日星期日

髮型進化史

早兩日去剪髮,個飛髮佬又向我猛噴口水。都幫襯咗佢幾年,冇理由唔知我唔鍾意吹水啫,真係俾佢吹脹!

剪髮係我其中一樣好討厭但係又定期要做嘅嘢,所以我盡量會等頭髮長到忍無可忍先去剪,通常都係個半至兩個月先剪一次。除咗怕啲飛髮佬煩,我又好憎佢地喺我釣緊魚嘅時候,用一陽指篤我額頭。不過我咁討厭剪髮,亦可能係因為有啲童年陰影。

小學嗰陣對自己嘅髮型完全冇自主權,點剪法由老豆話晒事。嗰時好羨慕啲同學仔嘅蛋撻頭,而我就剪親都係短到同皮頭(skinhead)差唔多嘅陸軍裝或者紅毛裝。更甚嘅係要幫襯啲後巷飛髮鋪,雖然有公仔書睇,不過飛髮過程就俾啲路人甲乙丙到晒。剪到個頭咁肉酸,仲要一啲私隱都冇,感覺上就好似當眾凌遲咁,想冇陰影都難啦!

後來上到中學,老豆開放髮禁,喺髮型方面開始有少少自由度。雖然唔使再做光頭仔,不過亦唔係想點剪都得,所以嗰幾年基本上都係保持住個薯頭look。到入咗大學,真正嘅解放先至出現。可能係出於反叛心態,有段時間學人留長頭髮,留咗幾耐已經冇印象,淨係記得頭髮長到可以掂到膊頭。話時話,長毛飛唔係個個都適合做,長髮留得好睇嘅男人其實唔係咁多囉。而且大三嗰年開始做兼職,所以就轉番薯仔頭,仲一直維持到出咗嚟做嘢。

一來靜極思變,而且個薯仔頭又真係太薯,所以做咗嘢冇耐就學人玩電髮。啱啱電完髮感覺真係唔錯,型仔(當時覺得啦)之餘仲好易打理添。但係過得一個月就知大鑊嘞,頭髮長咗,鬆到成個波咁,十足Medusa重現人間,都咪話唔嚇人!所以電咗幾次之後,最終都係決定放棄。

雖然唔再電髮,但係亦冇回歸薯頭look,而係開始玩gel頭。嗰陣gel頭同而家有好大分別,唔會特登摷亂啲頭髮,而係將個頭蠟到變頭盔。而家睇番啲相都覺得恐怖,個頭蠟到高過ICC,而且仲有個向前凸出嘅大騎樓添,真係唔明點解嗰時會覺得好睇。講到呢個頭盔look,而家諗番起都怕怕,因為搞一次肯定要超過半粒鐘。首先要洗頭,用風筒吹到半乾,然後落mousse吹乾定型。跟住落gel再吹,直至個頭硬到鋼盔咁先大功告成,就算打風都吹唔散。其實我都唔想咁麻煩架,不過我啲頭髮天生企得好硬,唔用咁嘅程序唔掂囉。都唔知點解嗰時可以咁有恆心,朝朝返工前都搞啲咁麻煩嘅嘢。

後來個人越嚟越懶,亦覺得鋼盔頭太誇張,所以就放棄咗落mousse嗰個步驟,淨係用gel。而頭髮亦唔會留得太長,gel起嚟有啲海膽feel,其實感覺都唔錯。Gel頭嘅習慣維持咗十幾年,直至後來連嗰個簡化咗嘅程序都嫌太麻煩,就轉咗剪天天頭。

唔知天天頭係乜?其實好簡單,基本上係平頭,但係最前嗰一執仔就留到超長,而且要整到向上翹。呢個髮型易打理好多,就算落gel都係兩三下手勢就搞掂,而且唔用gel亦冇問題。不過自從冇喺中還返工,轉咗喺屋企附近剪髮,就冇再剪天天頭嘞。唔係唔想剪,而係轉過好多個師傅,竟然冇一個識剪天天頭。冇所謂啦,而家還原基本步,轉番剪平頭。人老咗就係咁架喇,對外觀已經唔會再咁執著囉。

不過咁,唔再執著並唔表示乜都冇所謂,有啲嘢到而家都仍然好堅持,例如我肯定唔會瞓醒覺未洗頭就走落街。又好似我接受唔到染到個頭五顏六色,以前唔得,而家唔得,將來亦唔得。我覺得,每個人都會有啲不可踰越嘅底線囉!






















2011年12月15日星期四

天下烏鴉一樣黑?

凸首選委選舉已經塵埃落定,本來都冇乜好講,因為我又冇份投票。不過有部分賽果又真係幾出人意表吓,實在令人懷疑有關界別嘅選民係根據乜嘢標準投票。

民望最高嘅凸首候選人震鷹哥,竟然喺政協界別低票當選,連被傳致力唱衰佢嘅另一位政協都多佢一票。以震鷹哥嘅資深政協身分,又挾強大民意支持,居然打唔響頭炮。難怪連某口水多多嘅建制派人士都公然質疑有關賽果,話咁係拂逆民意,更凸顯小圈子選舉嘅唔公平。

震鷹哥無疑係人緣比較差,不過而家係代表全港市民選凸首,似乎唔應該只講私人交情囉。當然啦,班政協會唔會有另外一啲不為人知嘅考慮,咁我就真係唔清楚嘞。點都好啦,咁嘅賽果實在難免令一般小市民對建制派嘅信心大打折扣。事實上,某政協連挺糖都講成係蒙主感召,又真係好難令人對班友有信心囉!

又咪以為淨係建制派先咁騎呢,其實正義嘅民主陣營都係一擔擔。法律界選委嘅票王,竟然係先前牽涉入疑似區選種票事件嘅張X明教授。雖然條友力證自己冇犯法,不過公道自在人心囉。就算冇違法,都唔表示佢走番去舊居嗰區投票係適當行為。叫得做區議員,當然只係處理自己區嘅事務,咁有乜理由選民唔係住喺嗰區都可以投票呢?雖然張教授強調佢仍然擁有舊居嘅業權,不過我並唔認為咁就可以將跨區投票合理化。事實上,張教授嘅理據,正正就說明咗有錢人可以擁有更多嘅權利。而嗰班開口埋口就人權公義嘅尊貴大狀,亦正正用選票話俾全港市民知佢地有幾虛偽!

所謂天下烏鴉一樣黑,掂得政治呢樣咁污穢嘅嘢,根本就冇一個係好人。建制烏鴉,黑就預咗架啦!不過相對嚟講,喺民主光環襯托下,民主烏鴉俾人嘅感覺就更加黑囉!

講開又講,早排提到某界別候選人喺政綱擺明車馬話要投白票,真係好想知佢有冇跑出,等我得閒打聽吓先!


2011年12月13日星期二

邊爐怪再戰江湖

蟄伏咗接近一年,邊爐怪終於又再出動喇!呢排咁凍,烚吓烚吓都咪話唔盞,今晚已經係連續第四日喺屋企打邊爐。其實今日已經暖番好多,睇嚟今年都應該可以收工嘞。

我習慣一個鍋底打兩次,四晚啱啱好整咗兩個鍋底。頭兩日係用我最拿手嘅秘製花雕鍋底(之前已經介紹過),配料就以海鮮做主打。琴晚轉吓口味,整咗個比較冷門嘅番茄蘑菇豬骨湯底,效果亦相當理想。呢個鍋底唔算難整,不過材料就比較多,計有番茄、蘑菇、薯仔、紅蘿蔔、洋蔥、西芹、火腿、蜜棗、蒜片、Bay Laurel。淨係湯底材料已經ut實晒成個煲,都咪話唔震撼。不過大家有冇覺得奇怪,點解我反而冇提到主角之一嘅豬骨呢?好簡單,因為我用咗家落牌豬骨膿湯寶囉。如果用埋豬骨熬湯,睇怕要好似啲火鍋鋪咁,擺隻大鑊上檯先掂嘞。講開又講,有時我都會用同樣嘅材料煲湯,不過就唔會落蘑菇。當然啦,我煲湯唔會好似芝芝嬸咁用膿湯寶,而係會落牛骨或者牛腩。

至於火鍋料方面,我嘅原則係盡量唔重複,所以連續打四晚邊爐都諗到幾頭痕吓。以下就係呢幾次用咗嘅火鍋料:

今晚:龍躉、桶蠔、鮑魚仔、油麥菜、大蘑菇、番薯、粟米。

琴晚:手切急凍肥牛、鮮蝦滑、芝士腸、貢丸、墨魚丸、炸海鮮丸、魚肉釀豆卜、豆苗、番薯、響鈴卷。

前晚:扇貝、象拔蚌、大蜆、娃娃菜、豆苗、番薯、響鈴卷。

大前晚:虎蝦、膏蟹、墨魚滑、象拔蚌仔、西洋菜、茼蒿、豆腐、生根、炸芋頭。

雖然話火鍋料盡量唔想翻兜,不過豆苗、番薯、響鈴卷始終都係重複出現咗,因為呢幾樣嘢係我嘅至愛。其中響鈴卷係近來新寵,同生根係二揀一嘅火鍋最佳配角。響鈴卷有好濃嘅豆香,稍為淥一陣,口感就非常正。不過亦同生根一樣,都係好唔健康嘅食品,因為勁多油。冇辦法啦,鬼叫好食嘅嘢多數都唔健康咩!







2011年12月10日星期六

茶匙問題

早排講開成年人每日唔應該攝取超過6克鹽,不過6克鹽究竟有幾多呢,相信好多人都未必會有呢個概念。本來想用比較形象化嘅方式講出嚟,所以就上網摷過,睇吓一茶匙鹽有幾多克。結果都係莫衷一是,因為人言人殊。而且再諗深一層,一茶匙即係幾多亦唔係人人都知,因為茶匙係一種標準容量(或體積)單位,絕對唔等同一般用嚟攪奶茶咖啡嗰啲匙羹。最後都係冇得偷懶,要用電子磅秤吓6克鹽有幾多。

雖然無功而回,不過就有意外收穫,俾我喺網上發現咗啲好有趣嘅嘢。有人喺「百度知道」問咗一條咁嘅問題:

二分之一、四分之一茶匙分别等于多少克?
一大勺、一小勺分别等于多少克?
问题补充:
上面提到的茶匙、大勺、小勺都是做西点时的标准用具


據我推測,提問者係喺食譜見到某啲以克計嘅材料用量,想知到點樣轉番做茶匙。不過咁樣問法,就真係好白痴囉。首先,茶匙係容量單位,根本就唔可以直接轉換成重量單位。如果我問一年有幾多呎,又會唔會有人識答呢?而且問完二分一茶匙等於幾多克,又再問埋四分一茶匙,根本就多此一舉。好似我問完你今年幾歲,又再問你舊年幾歲,你話係咪除褲放屁呢?

如果要條問題變得有意義,就一定要講明想量度嘅材料係乜。事實上,一茶匙粟粉同一茶匙白糖嘅重量已經爭好遠,唔講明根本冇得答。不過咁,網上能人異士多如天上繁星,再難答嘅問題都一樣會有人答得出。以下就係被推選嘅「最佳答案」:

1茶匙=6克
二分之一、四分之一茶匙分别等于3、1.5克
一大勺=30~40克
一小勺=15~20克

而另外亦有兩位網民提供咗答案:

1) 10克左右

2) 二分一茶匙大概2-3克左右
要看你茶匙有多大

睇完以上答案,真係令人啞然失笑。明明係唔合邏輯嘅問題,居然有人可以正經八百咁回答,都唔到你唔服囉。咪以為上述例子只係單一事件,事實上,類似嘅問題同回覆喺網上簡直多不勝數。又咪以為淨係大陸人先會咁白痴,其實台灣網站一樣有啲咁嘅嘢。更甚嘅係,連英語人都有呢啲白痴嘢,簡直顛覆晒一般東方人對西方人嘅睇法。唔信?以下係喺「Yahoo! Answers」揾到嘅:

How many grams = 1 tea spoon?

Best Answer - Chosen by Voters
a little bit under 5

Other Answers (8)

1) depends on the substance. Grams are weight, a teaspoon is volume.
A teaspoon of lead would weigh more than a teaspoon of baking soda, so the figures below are debunked.

2) Yeah it depends what you're measuring :)

3) well, not everything weights the same......

4) 1 teaspoon = about 5 millilitre ( ml ) = 5 grams ( g )

5) it is 5mls or 5grams

6) 5grms=1tsp

7) more precisely, 4.745 grams in a teaspoon

8) 1 teaspoon = 4.74 grams

真係好奇怪,我地嗰代就話有文盲啫,而家呢代教育普及,有乜理由連啲咁基本嘅概念都搞唔清呢?!講真,識得上網嘅都冇可能係文盲啦。當然啦,單憑呢啲網上發現就話而家嘅人好白痴,又似乎係武斷咗啲。其實今次提到嘅只係一啲佐證啫,而家啲人有幾白痴,以前都講過好多啦。最近就喺拙blog提到某專欄作家(陳X姿)同某法律達人(張X明),指出佢地欠缺邏輯思維,理據處處犯駁,連基本概念都混淆不清。講真,以上述人士嘅社會地位同學養,我都唔相信佢地會白痴得咁緊要。據我估計,佢地發表啲咁反智嘅言論,都係為咗遷就啲target audience嘅水平啫。又好似「就係唔幫襯地產商」嗰個光頭仔,竟然都會有大把粉屎,咁就證明咗呢個世界有幾反智啦!話時話,呢件就絕對冇花冇假,真係白痴嘞!

2011年12月8日星期四

白的疑惑

見到一條呈波浪形嘅不明白色毛髮,大家會有乜反應呢?等我估吓先,最大可能性係衝口而出爆咗句咁嘅嘢:「啋,真係大吉利是,以後仲使賭錢?!」

哈哈,大家可以放心,我絕對唔會衰格到摷啲污穢嘢出嚟害人嘅!其實呢條係頭髮,只不過形狀特別啲,比較似某啲部位嘅毛髮啫!

話說琴晚對鏡自憐,檢視吓有幾多白頭髮,竟然俾我發現部分白髮發生不尋常異變,呈現波浪形。搞吓搞吓,有一條仲甩咗添。

本來頭髮有少少弧度好正常,相信唔會有人嘅頭髮係完全直嘅囉。事實上,我一直知道自己有部分頭髮(主要係黑髮)弧度比較大,不過都只係單方向捲曲。而琴晚就發覺啲弧度大嘅黑髮唔見晒,代之而起嘅竟然係呈波浪形嘅白髮,感覺真係好怪異。

睇番條白頭髮,髮尾係尖嘅,好明顯係新生出嚟架啦。咁就有個疑問嘞,以後再生出嚟嘅白頭髮會唔會都係咁嘅呢?如果過多幾年,到時成頭白晒,咁咪好大鑊?!隨時會俾人以為我玩植髮,而且植到冇得再植,連某啲部位嘅毛髮都用埋添。

其實我都唔清楚自己幾時開始有白頭髮,淨係記得若干年前有一次剪髮,竟然發現啲頭髮碎幾乎係黑白參半。當時心情好難形容,話震撼又未至於,而係有啲異樣嘅感覺。自此以後,我都不時會留意吓啲白髮有冇多到,所以間中會對鏡自憐囉。

本來有白頭髮都好平常,我就識得有人喺中學時代已經成頭白髮。呢啲應該係遺傳因素,就算白了少年頭,都係等閒事,唔需要空悲切。不過對於啲波浪形白髮嘅出現,就令人有啲唔安樂,都唔知會唔會係踏入暮年嘅訊號。

仲記得先父晚年脫髮,甩咗再生番出嚟嘅,就係好似BB仔頭髮咁,柔軟而稀疏,仲有啲捲曲添。真係好奇怪,人生路去到尾段,竟然會出現番人之初嘅光景。究竟嗰啲波浪形白髮,會唔會係老人家當中嘅普遍現象呢?試過上網摷資料,不過就冇乜發現。

話時話,大家可能會覺得我小題大做,只係一條白頭髮啫,根本唔需要咁緊張。其實令我產生疑惑嘅,並唔係嗰條白頭髮,而係當中暗示嘅一個避無可避但係又唔想面對嘅事實:老之將至。而箇中感受亦好複雜,連自己都分唔清係好奇、迷惘、抑或恐懼。

記得細個時成日想快啲大個仔,到而家大個仔嘞,又想時光可以倒流,去番以前無憂無慮嘅日子。借用錢鐘書喺「圍城」嘅講法,人生就好似一座被圍困嘅城堡咁,城外嘅人想衝入去,城裏嘅人想逃出嚟。唉,究竟係邊個同我地開個咁大嘅玩笑呢?

2011年12月6日星期二

揾笨

琴日去咗P街超市,本來係想買樽芝士粉,結果揾極都揾唔到,真冇癮!去開呢間,係因為佢最近屋企。不過自從幾個月前翻新過,啲嘢全部執晒位,到而家都仲未適應到。雖然揾唔到芝士粉,但係就另有收穫,喺條巷仔見到食開嗰隻賤格牌燕麥飯做緊特價,600g賣$23。咪講笑,即刻掃番幾包先!不過真係好白痴囉,食咗燕麥飯兩年幾,P街一直都係做緊特價$25,從來未見過佢賣正價$30,都唔知個特價有乜意義!話佢賤格亦有原因,煮一次飯大約要用50g,一包只係用到十二次,都唔明點解唔出大啲嘅包裝,方便吓消費者都好啫。我承認懶架,連開包都覺得麻煩囉!

跟住行番出大街,竟然又有重大發現,喺當眼位置見到隻新出嘅一公斤優惠裝。睇吓價錢,原來冇做特價,賣$48。雖然我係懶,不過喺呢種情況,做少少心算就點都唔慳得架喇。點知一計之下,唔止貴過600g裝啱啱做緊嘅特特價,連長期做開嘅特價都仲抵啲。真係可怒也,將貴啲嘅「優惠裝」擺出大街,P街分明係想誤導顧客啦,好彩我喺巷仔發現咗啲筍貨啫!

自問唔算一個好精明嘅消費者,因為我唔會周圍格價。而對於唔同嘥屎嘅同一產品,亦唔會計吓邊隻抵啲,因為常識話俾我知,嘥屎越大,單位價格應該會越低。點知原來貨品定價可以咁騎呢,真係隨時做咗傻仔都唔知囉。不過都係自己懶,咁又怪得邊個呢?!

講到買得多反而仲蝕底咗,最近有單嘢就真係好激氣。一直幫襯開一個相熟嘅街市豆腐檔,其中鳳尾蝦(見圖)同牛丸都係每次買一斤,雪喺冰格慢慢食。講開又講,鳳尾蝦真係幾好食架,就算急凍過都仍然爽口彈牙,魚蛋魚片之類就唔得嘞。而且仲好方便,唔使解凍就煮得,我主要攞嚟煮麵。話說早排啲鳳尾蝦食晒,就去豆腐檔入貨。我啱啱講完要買一斤,隔籬有個師奶就無啦啦插嘴,同豆腐婆講唔知道鳳尾蝦可以斷斤買,仲問一斤賣幾錢。佢又話平時喺度買開十蚊四條,唔知係咪買貴咗喎。呢位師奶都算幾冇禮貌,係問都等人地秤完俾我先啦。點知豆腐婆竟然停晒手,應酬咗個師奶先,話鳳尾蝦賣$40一斤,散買十蚊四條肯定抵啲。師奶似乎好滿意呢個答案,即刻買咗四條。

俾個師奶打尖,其實我已經有少少不滿,不過聽完豆腐婆同佢嘅對答,就更加唔舒服,唔通豆腐婆一直揾緊我笨?返到屋企數一數,一斤得十五條,果然係散買抵啲!真係把幾火,揾笨都唔緊要嘞,最㷫係豆腐婆竟然當住我面講出嚟,等同兜口兜面話我係傻仔囉!喺呢單畸屎,豆腐婆直頭犯咗三宗罪。一,俾師奶打尖,違反咗公平購物原則。二,定價策略荒謬絕倫,散賣竟然平過斷斤賣。三,喺客面前講出佢做咗傻仔嘅事實,完全冇顧及對方嘅自尊心。

其實我都算係熟客啦,每個禮拜起碼會幫襯呢個豆腐檔一兩次,估唔到咁都揾笨。我而家仲考慮緊,以後應唔應該再幫襯佢囉。抑或下次買嘅時候,講明$40要有16條,當係分四次散買呢?最衰我係一個面皮薄嘅麻甩佬,買嘢從來唔會講價,覺得價錢啱就買,唔啱就唔買。唉,睇嚟都係要做硬傻仔架喇,不過留番啲餘地,唔好當面插爆我囉!

事實上,麻甩佬去街市買餸,真係難逃俾人揾笨嘅命運,就算幫襯相熟檔販都係咁話。俾人呃秤唔在講,仲成日會買到次貨。啲魚佬菜婆次次都話幫你揀啲正嘢,其實只係想清咗啲籮底貨,因為嗰啲貨色根本就逃唔過精明師奶嘅法眼。例如有一個相熟魚佬,成日推介佢啲海青斑,不過次次食落都係好普通,搞到我對青斑冇乜好感。有次喺另一個魚檔,魚佬又係極力推薦一條海青,咁我當然係耍手擰頭啦。魚佬就話真正海青其實少之又少,平時喺街市買到嗰啲,十條有十一條都係養嘅。見佢講得咁實在,就買條試吓啦,不過價錢真係貴好多。試過之後,先知道原來一直都俾人呃,呢條青斑同以前食開嗰啲比較,簡直係判若雲泥。我話俾人呃,唔係指價錢方面,而係魚佬唔應該將養斑講成海斑囉!

忽然又諗起「就係唔幫襯地產商」嗰個光頭仔添,佢話自己淨係幫襯啲鋪頭仔,因為人地有人情味,唔會揾熟客笨喎。唔通佢真係咁好彩,未試過俾啲鋪頭仔揾笨?咁當然冇可能啦,以佢咁簡單嘅頭腦,就算俾人揾咗笨都永遠唔會發覺囉。就嚟四十歲人,竟然唔知乜嘢叫做唔熟唔食,條友都算係天生異稟喇!

話時話,其實我覺得啲思想單純嘅人都幾幸福架。佢地嘅世界黑白分明,判辨忠奸完全冇難度,因為奸人額頭都會鑿住個「奸」字!佢地唔使處處提防俾人暗算,生活壓力自然少好多啦!不過咁,我又唔會羨慕佢地喎,俾人呃吓秤就冇所謂啫,如果俾人跣鋪大大鑊嘅,隨時永世翻唔到身架!





2011年12月3日星期六

兩個爛蘋果,你會點揀?

有人話下屆凸首選舉係豬狼對決,真係極盡戲謔之能事,夠晒抵死。雖然呢個講法體現咗香港人自嘲嘅黑色幽默,不過就似乎悲觀咗啲。對於一啲避無可避嘅嘢,與其消極自嘲,不如樂觀面對。日子開心又係咁過,唔開心又係咁過,做乜硬係要難為自己呢?如果參考唐唐嘅金句,將凸首選戰睇成係龍馬之爭,咁都未嘗不可啫,因為震鷹哥係屬馬囉。車水馬龍同龍馬精神都係好嘢,寓意社會繁榮昌盛,人人精神奕奕,係咪正面好多呢?

不過咁,對於好多人嚟講,唔理係豬狼抑或龍馬,嗰兩位凸首候選人其實都只係爛蘋果,都揀唔落手。當然啦,絕大部分香港人都唔係選委,根本冇權揀。有部分人就好彩啲,可以揀選委,都叫做有間接嘅選擇權。而家就當你係選委,咁究竟兩個爛蘋果,你會點揀呢?

我當然唔係選委,亦冇權揀選委,要解答上述問題就只可以憑空想像。作為選委,投票取向不外乎基於兩個原則。一,根據界別選民意願去揀,扮演純粹代表嘅角色。二,按照主觀取向作選擇,咁係建基於選民嘅信任。熟優熟劣好難講,不過如果係後者,就應該清楚俾界別選民知道自己嘅理念,對下任凸首有乜要求。

正當兩位凸首候選人各出奇招,鬥個你死我活,另一邊廂嘅選委爭奪戰亦不惶多讓,進行得如火如荼。因為有朋友係某界別選民,我對該界別選委候選人嘅競選綱領都略知一二。大部分候選人嘅政綱都係由爭取業界權益出發,不過咁唔代表佢地冇政治取向,因為從佢地所屬政團或組織已經可以睇到。另外有三幾個就淨係表明自己嘅政治立場,並冇提及有關業界嘅議題。咁當然冇問題,其實都只係從一個較為宏觀嘅角度出發啫。不過其中有一位就比較特別,可以攞嚟講吓。

呢位候選人嘅政綱好簡單,重點只有兩個。一,只會提名同投票俾泛民嘅凸首參選人。二,如果凸首候選人之中冇泛民代表就會投白票。佢嘅理念係:等待中央祝福嘅參選人都係爛蘋果,與其用選票提高爛蘋果嘅認受性,不如以白票嚟表達無權者嘅不滿。

首先,我欣賞佢夠坦白,毫無保留咁表明自己嘅取向。不過對於佢嘅理念,我就不敢苟同。所謂「甲之蜜糖,乙之砒霜」,得到中央祝福嘅係咪就係爛蘋果,咁就見仁見智嘞。我只知道,基於客觀條件,得唔到中央祝福嘅凸首,對於絕大多數香港人嚟講,肯定係毒蘋果囉!相對於爛蘋果,毒蘋果可能好睇好多、好味好多,不過食咗會死人架!

仲有,如果凸首候選人當中冇泛民代表,係咪就應該頭白票呢?以白票表達不滿,只會喺一種情況下有意義,就係投票俾任何候選人都唔會起到正面作用。究竟實情係咪咁呢,投票俾爛蘋果真係一啲好處都冇?

就算兩位凸首候選人都係爛蘋果,都實會有一個比較爛,一個冇咁爛啫。如果想未來幾年,香港相對上會好啲,咪揀冇咁爛嗰個囉。如果想元旦七一遊行墟撼啲,就要揀比較爛嗰個嘞。咁點會話冇得揀呢,主要係睇你想要點嘅效果啫。話投票會提高爛蘋果嘅認受性,咁都講唔通,因為根本冇乜人會覺得呢個凸首選舉遊戲有認受性囉。而且以投白票表達不滿,亦冇任何意義。再下屆嘅凸首已經係由普選產生,以非理性行動嚟表達對一個即將被淘汰嘅制度嘅不滿,根本就係除褲放屁!講到尾,嗰位候選人只係想宣洩不滿情緒,態度非常消極囉!

要積極爭取一個選委席位,目的淨然係代表業界放棄爭取,咁嘅做法唔止消極,仲好矛盾添。與其採取放棄態度,不如積極啲為自己著想,用對腳投票啦!我指嘅唔係去遊行,而係移民囉!

如果呢位候選人成功當選,我對有關界別真係無話可說,對香港嘅未來亦會冇晒信心!至於呢個係乜嘢界別,我就唔講嘞,你地自己估吓啦!

2011年12月2日星期五

雲端種票

鄙人喺拙文「種票疑雲」回覆中提過,如果有泛民中人被揭發有份種票,我實會笑爆嘴。估唔到早兩日明報真係爆單咁嘅嘢出嚟,不過各方好友唔使替我擔心,我個嘴仲未爆,因為現階段只係懷疑有人種票啫。以下引述明報2011-11-30嘅報導:

搬屋未改地址 張達明﹕種票指控無厘頭

【明報專訊】有報道指港大法律學院助理教授張達明由港島南區遷往九龍後,仍在今屆區議會選舉返回南區投票,有「種票」予該區候選人、公民黨郭榮鏗之嫌,張達明昨日回覆本報查詢時形容指控「無厘頭」,指現行法例沒要求選民搬屋後,須於一定時限內更新選民登記,故不存在「知法犯法」。

張達明表示,他雖於去年尾由屬於南區的鴨脷洲海怡半島遷往九龍嘉樂閣,但他仍是舊居的業主,沒有放盤。

更新選民地址沒時限

張又說,選舉事務處今年8月截止更新選民登記冊,但區選在10月舉行,當時他並無意識到要更新選民登記,加上搬屋「有幾十件事要處理,改選民地址不是priority (優先)」。他指由於選民登記屬自願性質,選民沒有法律責任於搬屋後立即更新地址。他又指若修例,亦可能窒礙市民登記成為選民。對於被指在區選替同為法律界選委候選人的郭榮鏗「種票」,他澄清,對方沒有找他做提名,無更新地址與「種票」完全無關。


涉嫌種票嘅竟然係張達明教授,真係累我跌爛晒九副眼鏡,最初睇到標題,仲以為係鬚根嗰件添。要聲明一點,本人絕對無意歧視從事演藝行業之人士!只係張教授穩佔道德高地,冇可能會做出呢啲不法行為啫,所以點都估唔到會係佢囉。弊嘞,又講錯嘢添!以張教授咁德高望重,又係法律界翹楚,而且仲喺香港至尊學府佔有崇高地位,話佢穩佔道德高地,恐怕仍有不敬之嫌,應該話傲立道德雲端先啱!事實上,而家只係提起張教授個名啫,就彷彿見到佢公正不阿、大義凜然嘅風采,景仰之情油然而生!真係音容宛在,浩氣長存!

張教授不愧係法律達人,佢對選舉條例一番詮釋,簡直令鄙人茅塞頓開。等我仲以為搬咗屋但係唔記得(或趕唔切)通知選舉事務處更改住址,原則上係唔應該去投票添。弊嘞,之前Coffee問過呢樣嘢,等我仲膽粗粗答咗佢添。自己唔識嘢又亂咁噏,結果誤導埋人地,真係好過意唔去,喺度要同Coffee講聲sorry!

不過我又有啲唔明嘞,人地明明質疑緊張教授搬咗屋仲要返舊居嗰區投票,而佢就話法例冇規定選民要喺一定時限內更新資料,咁係咪有啲牛頭唔搭馬嘴呢?究竟點解唔係住嗰區,都可以或應該(據另一篇報導,張教授話去投票係要盡公民責任喎)喺嗰區投票呢,張教授似乎冇解釋到呢一點囉。咪恥笑我呀,我自認對法律一竅不通架,唔明都好正常啫。等我估吓先,如果搬咗屋又冇更新選民登記,咁就唔俾人去投票,會唔會係同人權法有抵觸呢?相信好多香港人都好似我咁係法律盲,希望張教授可以解釋清楚啲,等我地認識多啲自己嘅權利啦。

咪住,張教授又強調佢仲擁有舊居嘅業權喎,會唔會業權就等同投票權呢?如果真係咁,又引發更多疑問嘞。如果啲人喺多區都有物業,咁係咪揀任何一區投票都得呢?如果啲物業係車位或者骨灰龕位,咁又算唔算呢?仲有,如果擁有多個物業,但係就只得一個投票權,又係咪唔多公平呢?

弊嘞,變咗問題阿伯添,不過我仲有一樣唔明喎,點都要問埋架嘞。張教授話佢返舊區投票,並唔係幫喺該區出選嘅公民黨友好種票,因為對方冇揾佢做提名人喎。咁我又真係一頭霧水嘞,有冇種票同係咪提名人,究竟有乜關係呢?而且,就算並非蓄意唔更新住址,係咪就冇種票之嫌呢?會唔會係橫掂未改地址,所以將錯就錯,順便幫朋友一把呢?

對於張教授嘅解畫,我就覺得啲法律觀點詮釋得好高深莫測嘞,相信唔係一般草根階層可以聽得明囉。希望呢單嘢唔好就咁不了了之,要查個水落石出,釐清有關疑問。等廣大市民知道點至算係種票,以免誤墮法網都唔知啦!

寫到呢度有啲擔心添,我又唔識法律,都唔知咁嘅廢噏係咪已經構成匪蚌,萬一俾人告咪大鑊!你話識法律幾好呢,只有你告人,永冇人告你!

2011年12月1日星期四

就係唔幫襯地產商

冇幾耐之前提起過嗰位好唔like地產商嘅光頭仔,因為佢嘅「向地產商說不」行動就快夠一年,希望是但台可以跟進吓。是但台雖然是是但但,不過今次都算做得唔錯,早兩日出街嘅「星期二檔案」就揾咗光頭仔交代番單嘢。

對於一年來嘅反地產霸權行動,光頭仔話感覺良好,社會迴響超越預期。街上嘅路人甲乙丙會同佢握手打氣,而且每個禮拜都最少一次接受傳媒訪問。我唔敢肯定一夜成名係咪喺佢預期之內,不過睇嚟佢就好受落,個樣都不知幾冧囉。

佢要抵制地產商經營嘅各種項目,包括公共交通工具、商場、超市、連鎖商店、同寬頻服務等等,其實只係個人選擇,根本就唔關人事。不過佢要高調上電視宣傳,我就忍唔住要插吓,指出佢有幾荒謬。

佢話一年來唔搭巴士,淨係踩單車,咁唔止係抵制地產商,仲係為咗環保添。只有一次破戒,因為佢要去台灣體驗吓單車環島遊,但係又踩唔到單車去機場,咁唯有搭機場巴士喎。佢鍾意去台灣踩單車,我絕唔會講乜嘢,不過條友硬係要攞環保嚟過橋,我就睇唔過眼嘞。佢知唔知道,飛機嘅碳排放係地球暖化嘅元兇之一。用唔環保嘅方式嚟體驗環保生活,係咪有啲矛盾呢?!仲有,踩唔到單車去機場,都唔一定要搭巴士啫,搭的士唔得咩?想慳錢就認咗佢啦,揾埋晒啲白痴藉口,真係又要做老舉,又要立貞節牌坊!佢話台北連市區都有單車路,質疑點解香港做唔到,仲批評政府唔重視環保。台北嘅單車路係點我唔知,所以冇得講。不過香港市區嘅道路係咪適宜踩單車,大家都應該心裏有數啦。節目其中一段就係影住佢喺繁忙嘅馬路踩單車,危唔危險我就唔講嘞,就算有乜意外都係佢自己攞嚟嘅。但係因為一條友踩單車,就拖慢晒成條馬路嘅交通,大家又覺唔覺得係損人利己嘅行為呢?如果多幾個佢啲咁嘅人,睇怕廣大嘅地面交通公具使用者朝早返工都要提前半粒鐘出門口囉!

佢屋企冇裝寬頻,想上網就要攞部機落街,去啲有提供免費WIFI嘅地方。咁就覺得可以抵制到地產商,條友嘅思維真係難以理解。唔通啲coffee shop嘅WIFI服務,就唔係由地產商提供嘅?我不殺伯仁,咁係咪對伯仁之死就可以心安理得呢?係唔係都好啦,總之最緊要係唔使自己俾錢囉。最搞笑係佢話有時唔想落街,就攞住部機通屋走,睇吓可唔可以黐到鄰居嘅WIFI用。難為條友仲係笑住咁講添,唔通佢唔知咁做係等同盜竊行為?!

咁又咪以為條友膠到冇朋友喎,原來佢都不知幾多粉屎。班友仲組成咗一個名為「良心消費聯盟」嘅組織添,宗旨係抗拒地產霸權,大力提倡幫襯鋪頭仔。第樣唔講住,淨係個名已經令人好反感嘞。我幫襯+X哥旗下嘅連鎖商店,係因為人地夠方便、貨品質素有保證、價錢又合理,有乜唔啱先,咁就話我無良,你班友有冇病呀!呢種唯我獨尊嘅態度,直頭同嗰班瞓街廢青一模一樣,叫做「狼心消費聯盟」就差唔多!

講到條友班粉屎,就有一個叫做笨神嘅室內設計公司老闆。唔知佢係嫌衣食無憂嘅生活太悶,定係坐得太多搞到忽忽痕,竟然無聊到響應光頭仔嘅號召。佢話去啲鋪頭仔買嘢,唔記得帶錢都可以賒住先喎。真係唔明啲人乜嘢心態,一手交錢一手交貨,簡直係天經地義啦。唔檢討吓點解自己成日唔記得帶錢,反而批評人地冇人情味,完全服晒佢囉。而且佢都冇理由唔知啫,喺啲大型商店,帶唔夠錢一樣買到嘢,因為可以碌卡或者嘟八達通,使鬼賒咩!條友除咗重視人情味,仲好有愛心添。佢同班兄弟喺鋪頭仔買咗啲食物,派俾無家可歸嘅露宿者。本來關懷弱勢社群係好事,絕對值得支持。不過佢地派嘅竟然係罐頭豆豉鯪魚,真係隨時愛你變成害你囉。呢隻罐頭雖然勁好食,不過就非常唔健康,淨係見到啲油都嚇死啦!講開又講,豆豉鯪魚油麥菜唔知係邊個發明嘅呢,真係絕配呀!

光頭仔仲有一個叫做阿零嘅粉屎,又係勁搞笑。呢位姐姐話世界上嘅人只得兩類,就係自私同好自私。加入良心消費行列,係因為佢認為啲大地產商唔應該賺到盡喎。其實佢都唔算細架啦,都唔知點解會有啲咁嘅思維。喺一個制度健全嘅自由經濟社會,賺到盡又有乜唔啱呢?唔通啲大財團有錢,想分散投資,搞多幾瓣都有罪?人地吸引到顧客,係因為掌握到現代人嘅消費模式,提供方便舒適嘅購物環境,而且管理制度化,貨品質量有保證。仲有,人地賺到錢,都要以繳稅方式回饋社會架。如果認為人地賺得多回饋少,咁要檢討嘅應該係稅率,而唔係鬧人點解要賺到盡囉。班友寧願買貴啲都要幫襯鋪頭仔,呢啲係佢地嘅自由,冇人可以干涉。不過硬係要將啲大型連鎖店妖魔化,咁就唔啱啦。你估啲鋪頭仔唔想賺到盡咩,其實係「非不為也,實不能也」!相對於鋪頭仔,其實班友更加要撐嘅係善堂囉。至於位姐姐對人嘅睇法,我亦有啲補充,除咗自私同好自私,另外仲有兩種,就係好天真同好傻,睇吓班良心消費者就知啦!

話時話,如果喺街撞到光頭仔,我都會主動同佢打招呼架,仲會同佢講:「傻仔,你今日食咗藥未呀?!」

2011年11月29日星期二

無鹽煮食

今日又考吓大家嘅智慧,俾條低能IQ題你地估吓。謎面係「麥燕停開鑊」,估一種四個字嘅健康烹調方式。俾些少提示,謎面中嘅「麥燕停」其實唔一定要係「麥燕停」,用「何獸蘭」、「魚若微」、「陳惜吱」、甚至任何一個你地睇唔順眼嘅女子代替都可以,但係用麻甩佬就唔得。要聲明一點,我絕對唔係性別歧視,因為咁係劇情需要啫。仲有,唔好質疑個謎面合唔合理,究竟上述奇女子會唔會有鑊開囉!

相信大家都已經有答案,而且全部答中晒添。話係低能IQ題,並唔係表示謎面出得有問題,更加唔係低估大家嘅智慧。而係謎底已經出現咗喺文章標題,根本就唔使估。至於點解謎底會係咁,相信唔使多講啦,我絕對信得過大家嘅國學常識囉!

講到無鹽煮食,我已經奉行咗幾年,絕對稱得上忠實信徒。不過我唔好似啲營養師提倡嗰隻,用天然香料代替鹽囉,而係轉咗用雞粉調味。諗起都覺得搞笑,唔知啲人點解會覺得可以用青檸汁、黑胡椒、或者香草之類嘅嘢代替鹽做調味料呢?如果要我將「雞汁炒菜心」轉成「黑椒檸汁迷迭香炒菜心」,睇怕想唔得到厭食症都幾難囉!

而家除咗煲湯,我煮嘢根本就唔落鹽,淨係會用雞粉同其他醬料。轉用雞粉係因為幾年前喺報紙睇到一單花邊新聞,某米芝蓮星級餐廳主廚爆料,話佢煮嘢咁好食嘅秘訣係用咗雞粉,仲要指定係家落牌嗰隻添。我當然知單嘢好鱔吓,不過試吓都冇壞啫,結果之後就同鹽講咗拜拜囉。

近排成日喺電視睇到某雞粉廣告,話雞粉比鹽健康。呢個廣告有冇誤導消費者,我就唔敢講嘞,費事俾人告啦。當然,如果同等體積嘅雞粉,含鈉量一定比鹽少。不過如果要達到同樣嘅鹹味效果,雞粉肯定要用多啲。而且雞粉仲含有其他添加物(例如色素)添,係咪健康啲就自己諗嘞。我用雞粉代替鹽嘅唯一原因,就係煮出嚟嘅嘢好味啲。可能有人會覺得我好cheap,唔識得欣賞食材嘅真味。我只係覺得,味覺係一種好個人化嘅原始感官,冇必要向人學習,亦唔需要其他人認同。

提到調味,我都知食得太鹹唔健康,世衛就建議成人每日唔可以攝取超過6克鹽(或2300mg鈉)。究竟6克鹽有幾多?我都唔識形容喎,所以就影咗張相俾大家參考吓。總之好肯定,我每日攝取嘅鈉都爆硬燈啦。事實上,想唔爆燈幾乎係冇可能。一包即食麵嘅鈉含量,已經達到每日攝取量嘅上限。而且我煮親即食麵,都會加埋啲鹹到出汁嘅配料,例如泡菜、魚片、牛丸。不過咁,我都已經好克制架喇,啲湯就一定唔會飲埋,雖然真係好好味囉。

講開即食麵,呢排我食緊嗰兩隻(膿心石鍋拉麵同三癢泡菜風味拉麵)都好正,多多鹹,少少辣,啱晒我口味!不過三癢嗰隻就要扣少少分,因為營養標籤有誤導消費者之嫌。驟眼一睇,鈉含量只係佔每日攝取上限47%,即係一日可以食兩包。不過再睇清楚啲,原來數字係以per serving計,而一包麵就有兩個servings。真係有冇搞錯,咁嘅nutrition facts有乜意義呢,唔通預咗人一包麵分兩次食?抑或係,即食麵應該同至愛分享,你一啖,我一啖?其實玩埋晒呢啲陰招有乜用啫,而家啲消費者好精明架喇,點會唔知即食麵係高鹽食品喎!

我自己就唔係「又要威又要戴頭盔」嗰隻,總之鍾意食就食,話知佢鹽份高到爆晒燈啦。好彩我本身唔係太好動物內臟,又唔係咁鍾意食肥膩嘢,只係口味偏濃啫,所以先敢講得咁口響。我只係覺得,任何嘢都要攞個平衡,所以唔會為咗健康而放棄晒鍾意食嘅嘢。如果食而不喜其味,就算有一百歲命又有乜意思呢?!