2012年5月24日星期四

反簡廢柴

呢排鼻敏感發作,要攬住卷廁紙過日辰,搞到連鬧人都冇mood添。不過早幾日俾人踩到上心口,條氣頂住頂住,唔鏟到條友反艇真係難洩心頭之憤!

話說上個禮拜,飯桶威條廢柴帶埋班嘍囉去咗旺角佐丹奴搞事,喺人地門口舉牌抗議,叫人唔好入去買嘢。事緣係條PK發現佐丹奴店裏面所有宣傳標示牌都淨係用英文同簡體字,「一個繁體中文字都睇唔到」喎。佢話咁係向大陸客獻媚,唔尊重本地消費者,所以要抗議佐丹奴「見錢開眼、以簡代繁」。

首先,條友正一白痴,連簡體字係點簡法都唔知就喺度亂噏。事實上,有好多中文字根本冇簡化到,淨係「佐丹奴」三個字都已經係繁體啦,又點會「一個繁體中文字都睇唔到」呢?就算用簡體字又點,唔通咁都有罪?飯生冇理由唔知啩,香港嘅全名係「中華人民共和國香港特別行政區」。而簡體字係中國嘅法定文字,咁喺香港用又何錯之有呢?條友無啦啦搞埋晒啲文字獄,而家當香港係極權國家咩!

話時話,唔知飯生有冇間中蒲吓老蘭呢?我去開嗰間pub,個酒牌就淨係得英文,連一隻中文字都冇。我又知有啲所謂高級西餐廳,個餐牌都只係得雞腸,咁又算唔算歧視我地呢啲A至Z都未識齊嘅本土華人呢?如果飯生咁得閒,不如去掃蕩吓呢啲視中文如無物嘅酒吧食肆啦。係喎,可能條友以為自己仲係大英子民,咁當然覺得淨係用英文冇問題啦。

仲有樣好搞笑,條友竟然鬧佐丹奴「見錢開眼」。人地打開門口做生意,梗係為咗賺錢啦,見錢開眼根本就係理所當然。為目標顧客提供方便,我就睇唔到有乜問題嘞,連咁都做唔到就聽執啦。如果有人硬要將好客之道講成係獻媚,咁分明係指鹿為馬,居心叵測。至於話佐丹奴可以喺簡體字以外再加埋繁體字,我都覺得呢個唔係問題。不過人地係商業機構,喺策略上犯錯自然會受到市場懲罰。你唔鍾意可以唔幫襯,呼籲其他人杯葛佢都冇問題。但係喺鋪頭門口搞事,阻住人地做生意,咁就係唔可以接受嘅滋擾行為囉。

條友又話「我唔贊成呢啲盲目嘅中港融合,只會摧毀香港嘅核心價值,旅客應該入鄉隨俗,呢啲行為會令本土文化逐步受到侵蝕、影響。」真係俾佢笑死,話呢啲係「盲目嘅中港融合」,條友就真係盲嘞。認識自己國家嘅語言文字係國民嘅本份,根本唔算乜嘢融合,更加唔可以話係盲目。條友都唔知乜嘢心態,玩自閉只有死路一條囉。至於「入鄉隨俗」,咁啲鬼佬嚟香港玩之前,係咪應該學定中文先呢?事實上,好多英國鬼喺香港住咗幾十年,除咗粗口之外就一句中文都唔識,唔知飯生又點睇呢?講到「核心價值」,眼前就有一單真正破壞香港核心價值嘅嘢嘞,又唔見條友敢開句聲。如果飯生敢拖齊馬去龍眼山莊聲討班土皇帝,我就即刻寫個服字俾佢,仲會喺屋企供奉住佢嘅長生祿位,早晚焚香參拜添!

講到尾,條友喺度無限上綱,搞埋晒啲文革式批鬥,當然係有佢嘅政治目的啦。挑起中港矛盾,乘機混水摸魚,爭取政治本錢,自然係因為覬覦垃圾會議員嘅寶座。講真,條友咪一樣係見錢開眼。以佢咁嘅質素,如果唔喺政界呃飯食,最多咪只可以做跟車或者看更之類嘅嘢。垃圾會議員高薪厚祿,條友自然係恨到留晒口水啦。不過呢條咁嘅廢柴,我就睇死佢選唔到嘞。如果佢今年選到,我俾個頭佢坐!

大家係咪有啲奇怪,點解我對呢單嘢會咁大反應呢?哈哈,因為佐丹奴我都有份架,話晒都揸住佢幾手股票。而家條友喺度搞事,唔嬲就有鬼啦!如果再嚟搗亂,我連佢祖宗十八代都鏟埋呀!


Ghorepani, Nepal

2012年5月12日星期六

布與屎

警告:本文內容及圖片含有疑似粗鄙成分,閱後或會引起不適,敬請讀者留意!

究竟乜嘢先係你最貼身嘅良伴呢?如果你嘅答案係枕邊人,咁就錯嘞。就算你嘅另一半係超級黐身膏藥,都冇可能會二十四小時黐實你嘅私處。所以正確答案係布,只有用布製成嘅底衫褲先會絕無間斷咁貼身黐住你。

話布係人類不可或缺嘅物資,相信冇人會反對。如果冇咗布,根本冇人可以落街,日日夜夜匿喺屋企都唔知做乜好。除咗係生活上嘅必需品,布仲可以滿足你貪靚嘅慾望,等你可以日日變身成為彩雀。所以人類應該對布懷有感恩嘅心,絕對唔可以肆意侮辱!

另外,又有乜嘢係你最厭惡,一定要屏諸門外而後快嘅呢?相信IQ爆棚嘅你已經估到嘞,冇錯,就係屎!

屎係人類嘅廢物,唔止又臭又污糟,仲會引起急屎或肚痛等不適感覺添。所以人人都要施盡混身解數,將呢啲廢物屏諸肛門之外,呢個動作就叫做拉屎嘞。雖然有人會好享受拉屎嘅過程,不過呢樣始終係非常私人嘅嘢。正常人都唔會希望解決嘅時候有人見到,更莫講話眾目睽睽下公開拉俾人睇。會公開拉俾人睇嘅,當然係啲極度無恥嘅人啦。另一方面,因為過程臭氣薰天,亦唔會有正常人鍾意欣賞其他人拉屎。睇人拉屎睇到眉飛色舞嘅,唔使講梗係啲心理有問題嘅逐臭之夫(或婦)啦。

一連兩日睇是但台新聞,都有報導喺垃圾會展開嘅所謂拉布戰。不過從電視畫面所見,三條hi hi拉出嚟嘅並唔係一幅幅五彩繽紛嘅花布,而係一篤篤中人欲嘔嘅臭屎,仲要係爆到開晒花嘅爛屎添!

三條hi hi嘅屎招有幾爛,喺電視新聞播咗出嚟,全港市民都睇到晒。都唔知是但台係咪有心搞嘢,特登剪輯晒啲最精彩嘅片段嚟播。癲狗喺「為」字同「作」字嘅分別大做文章,仲引經據典(包括詩經、論語、易經等等)拖延時間。大舊更加搞笑,連性經都引埋添。如果淨係識用啲咁低能嘅招數就可以躋身議會,咁任何一個地踎流氓都可以做垃圾會議員啦,引吓龍虎門同小流氓就當開咗會,簡直完全冇難度。又或者啲用電視劇送飯嘅師奶大嬸都得,引述韓日台劇經典對白,絕對係佢地嘅強項。

好心幾條hi hi俾啲誠意,要拉都拉啲有內容嘅嘢出嚟啦。而家搞到仲兒戲過細路仔玩泥沙,班友都唔識個醜字點寫。仲話乜嘢拉布戰,簡直係對布嘅侮辱,叫做拉屎戰就差唔多。

講到呢場拉屎戰,根本就係輸打贏要嘅議會恐襲行為,唔止浪費公帑、嚴重影響議事效率、破壞議會公信力,更向社會傳達一個極其不良嘅信息:為求達到目的可以不擇手段。如果今次俾班友得逞,睇怕香港唔亂上加亂都唔得囉。難為日月報今日嘅社評,竟然一方面批評班友唔顧社會成本,而另一方面又認為政府應該中止審議出缺法案。挑,好一條兩頭蛇!居然以為咁寫就可以左右逢源,我就覺得會係兩面不討好囉。

當然啦,我都明白啲hi hi發動拉屎戰,其實完全係為咗向佢地嘅選民負責啫,所以我唔會怪晒佢地。民主制度就係咁架喇,如果你交唔到貨,啲選民就會離棄你。不過喺民智成熟嘅社會,做埋晒啲損害社會利益嘅嘢當然唔會有好結果,因為選民會用選票懲罰你。好遺憾,就係因為香港有班逐臭之徒,啲政治小丑先可以肆無忌憚咁喺議會表演拉屎。而一幫只顧自身政治利益嘅犯民政棍,為咗要同政府過唔去,竟然為虎作倀,處處維護幾條hi hi。又有部分傳媒人睇到反政府有市場,就不斷喺度推波助瀾、煽風點火。好似嗰件吳X森,就公然力撐幾條hi hi嘅拉屎戰,話好期待佢地嘅精彩表演喎。如果條友連咁低能嘅嘢都覺得精彩,我就真係無話可說嘞,除咗呢句:hi你個hi啦!

唉,點算呢,香港人最鍾意趁熱鬧,睇嚟呢股拉屎之風好快會蔓延開去。到時香港變成臭港,大家都hi hi呀!

El Jem, Tunisia

Pokhara, Nepal

2012年5月9日星期三

一年一鑊

星期六飲完茶返屋企,無啦啦喺樓下大堂俾管理員芳姐截住,心諗唔慌會有好嘢啦。果然係濕滯嘢,原來樓上又塞坑渠,要約時間俾師傅入屋通渠。我都知唔關芳姐事,不過又要煩到我,忍唔住要表達吓不滿:「又冇搞錯呀,又通渠!舊年先啱啱通完,而家又嚟一鑊,樓上真係變態!」其實我都唔預芳姐會有乜嘢睇法架喇,點知佢竟然又回應喎。佢話一年通一次都好正常,仲話有啲住戶甚至半年嚟一鑊添。咁我當然唔信啦,估計佢都係想幫樓上講句好話啫。

我喺呢度住咗超過十年,從來未塞過坑渠。樓上以前上幾手都係日本租客,亦冇試過話需要通渠。自從兩年前搬咗家香港人嚟,已經係第二次塞坑渠,咁當然係佢地有問題啦。舊年通渠嗰鑊,樓上戶主曾經講過大概情況。佢話每次洗衫,當洗衣機去水嘅時候,啲水連埋污糟嘢(例如飯粒)就喺渠口谷番出嚟。連飯粒都有,咁當然係個賓賓懶,洗碗之前冇處理好啲剩飯剩菜,乜都沖晒落星盤,先會搞到塞坑渠啦。當時我已經同樓上講,要求佢叫個賓賓小心啲,唔好再乜都沖晒落星盤,費事大家麻煩啦。點知事隔一年,而家又嚟多鑊,真係俾佢激爆!

不過激氣還激氣,始終都要俾佢搞囉。師傅上到嚟,我就順便問吓一年塞一次係咪好過份。點知佢嘅答案竟然同芳姐一模一樣,真係懷疑佢地係咪夾過口供。佢話如果晚晚煮飯,真係好易會塞渠,尤其是印度人,可能煮嘢用油比較多,大約半年就要通一次。咁講法,我咪要酬謝神恩,好彩樓上嗰家唔係印度人?!都唔知真定假,我夠差唔多晚晚煮飯啦,又唔見我塞渠?我又再八吓通一次渠收幾錢,原來都唔平,要成三千幾蚊。真係唔明樓上點諗,就算唔介意麻煩到樓下,搞到自己破財都唔好啦,如果個賓賓唔聽話咪炒咗佢囉。

雖然唔使我落手做啲乜嘢,不過搞足兩粒幾鐘,霸佔咗廚房同客廁,部通渠機又轟轟聲嘈住晒,都咪話唔煩。卒之等到師傅話搞掂,檢查過廚房同客廁嘅牆身地板都尚算乾淨,先叫做一天光晒。點知師傅啱啱走咗,入客廁一睇先發覺大鑊,馬桶底竟然多咗一大堆類似沙石嘅黑色污糟嘢。咁就即刻試吓沖水啦,點知完全沖唔走。雖然呢啲嘢我都搞得掂,不過冇理由要自己落手啫。拿拿林打電話落樓下叫芳姐截住個通渠佬,叫佢上嚟搞番掂篤蘇州屎。條友上到嚟,睇完之後竟然若無其事咁話:「鐵銹嚟啫,唔會塞廁所嘅。」真係俾佢吹脹,我都知道唔會啦,沖得走自然唔會塞,沖唔走亦冇機會塞囉。問題係嗰堆嘢沖唔走,好似成日都有篤屎喺個馬桶度咁,個廁所以後仲點見得人呢?!而且清理埋嗰堆嘢,根本就係佢嘅責任,呢啲人真係唔鏟都冇天理啦!本來諗住又要有排搞,點知條友二話不說,即刻踎低伸手入馬桶。挖吓挖吓,竟然挖咗好大堆出嚟,要兩隻手掌拼埋先兜得住。睇見佢嘅專業精神,我都無話可說,真係唔好意思再鏟嘞。

今次叫做煩完,但係唔知樓上幾時又會整多鑊,我都覺得好無奈吓。點解樓上做咗啲唔合理嘅嘢,樓下竟然要一齊承擔後果呢?我絕對同意候任凸首嘅講法,香港真係有住屋問題。如果人人都有house住,就唔使再俾樓上煩啦,咁至係真正嘅安居樂業囉!

2012年5月7日星期一

奢華

琴日經過屈神屎,見到櫥窗有句雞乸咁大隻字嘅宣傳口號,寫住「世上最奢華修護」。上網摷吓,原來係某牌子嘅「極致純膠原蛋白眼霜」廣告。究竟點解護膚品廣告嘅著眼點會係「奢華」,而唔係產品嘅功效呢,真係諗到頭都爆!

其實廣告裏面出現「奢華」,已經唔係新鮮嘢,幾年前開始,啲「豪宅」樓盤廣告就好鍾意用到呢兩個字。住得起豪宅,自然係非富則貴,可能啲人覺得豪華都未夠尊貴,要奢華先夠面子。而護膚呢家嘢,咁啱屬於面子工程,咁喺廣告標榜「奢華」,似乎又講得通喎。

不過我又唔明嘞,「奢華」明明帶有負面意義,點解啲人反而攞嚟做商品嘅賣點呢?我唔係亂噏當秘笈架,根據我本中華新字典,「奢」字嘅意思係「用錢沒有節制,過份享受」,例如用喺「奢侈」同「奢華」。見到「奢華」呢兩個字,我就會聯想到啲揮霍無度嘅生活方式,好似紂王嘅酒池肉林。咁點解啲廣告人有比較中性嘅「豪華」唔用,而要用咁重口味嘅「奢華」呢?

搜索枯腸,諗嚟諗去都只係得三個原因。第一,啲廣告人唔係咁識中文,唔知道「奢華」帶有負面意義。第二,有部分港人覺得揮霍得起先至有面,基於「顧客永遠是對的」嘅原則,啲廣告人唯有投其所好。第三,經過文字嘅自然演化,「奢華」已經唔帶任何負面意義,只有「比豪華更豪華」嘅意思。

究竟係邊個原因,我都唔敢確定。首先,啲廣告人中文掂唔掂,我自問冇資格評論。話時話,我都喺廣告公司做過,對於啲創作部同事嘅出品,我又真係好多時都唔識欣賞囉。當然,咁係因為鄙人程度未夠,如果我係掂嘅,一早就轉咗做copywriter啦。至於話有人認為浪費同浮誇唔係問題,最緊要係揮霍得起,我就覺得有啲似嘞。年中都唔知有幾多人碌爆卡買名牌消費品,還唔起咪玩破產囉,真係一啲問題都冇。試問呢類人又點會覺得奢華係壞事呢?最後,當人人都笑貧不笑娼,當所有媒體都大肆宣揚浮誇嘅生活方式,咁「奢華」呢兩個字自然會演化成正面嘅詞語啦。

弊嘞,真係莫衷一是添。咪住,諗吓諗吓,會唔會係我自己一直理解錯咗字典嘅解釋,其實「奢華」從來都冇帶負面意義嘅呢?

Exhibition Hall of Economic Achievements, Moscow, Russia

Summer Palace, St. Petersburg, Russia

Summer Palace, St. Petersburg, Russia