2011年2月28日星期一

喪屍Facial

成日收到討厭嘅冷叫電話,唔係叫你借錢,就係話有超值美食會籍益你,真係煩到想掟電話。友呢排又有新搞作,最近就有幾個垃圾電話都係美容中心打嚟嘅。有冇搞錯,男人老狗做乜美容啫。第一次接到呢電話,我第開始就講明自己係男人,美容呢唔啱我。對方當然唔會就咁收線啦,佢話其實而家好多男人都做美容架喇。我跟住就話我係一個老人家,根本就唔需要做美容。佢仲係唔肯放棄,話美容無分性別,年紀大就更加需要。真係俾佢吹到啤一聲,唯有使出我嘅殺手鐧,即刻收佢線。以後收親呢電話,都費事講咁多,直頭話冇興趣就算。

其實何止冇興趣呀,簡直覺得係虐待添啦。無無聊聊瞓喺度任人擺布,我就會聯想到人體解剖嘞。聽講話做mask嘅時候唔可以笑,又唔可以講,真係比死更難受。不過又唔好以為我冇做過facial喎,其實我仲做過兩次添。

第一次係喺約旦,做死海泥facial。話時話,嗰次全身搽晒死海泥,唔知仲可唔可以叫做facial呢?我當然唔會無聊到特登走去約旦做facial啦,只不過係去約旦旅行,有一日住喺死海邊,有得做又唔使錢,咁唔做咪好嘥?

死海泥我一早就聽過,淨係知道好貴,有乜功效就唔係太清楚嘞。個日去到死海邊,其實都想見識吓死海泥,不過海邊只有沙灘,根本就見唔到黑掹掹嘅死海泥。後來見人喺沙灘度挖吓挖吓,居然挖到死海泥出嚟,於是又學人挖埋一份。原來真係禾稈冚珍珠,沙灘下面幾吋就係成個黑色寶藏。咁貴嘅,自己買梗係唔捨得啦,而家唔使錢,唔搽到成身都係就蝕底喇。不過搽完就知道大鑊嘞,死海泥唔止黑掹掹,仲勁臭嘅添。拿拿林影完張相,就落水洗白白。都話貪心實有報應架啦,結果就俾超鹹嘅死海水嗱到對眼鬼死咁痛。其實又黑又臭嘅泥,城門河大把啦,使鬼去死海咩!

第二次做facial係喺冰島,不過事前就完全唔知有咁嘅。話說有一日去到藍湖(Blue Lagoon),聽女團友講話嗰度白泥好正,簡直有起死回生嘅功效。有冇咁誇張我就唔知,不過對於好多女人嚟講,塊面有條皺紋都想死咁滯,梗係當美容產品係至寶啦。

藍湖其實係一個人工溫泉,白泥係咪嗰度出產嘅我都唔係太清楚,不過就擺咗喺度任人搽。咁我梗係冇蝕底,搏命撻晒上塊面度啦。同死海黑泥唔一樣,冰島白泥冇乜黏性,黐唔實皮膚,結果就流晒入眼同口,真係攞苦嚟辛!後尾喺紀念品商店見到,白泥美容產品原來貴到無倫,咁辛苦吓都算值得喇。

做咗兩次facial,事後都冇對比過皮膚係咪靚咗。不過成面搽晒泥個樣就好核突吓,點睇都係似隻喪屍多過似個人!



2011年2月26日星期六

基督城

豆腐渣學校、毒奶粉、一黨專政獨裁統治,呢紐西蘭一樣都冇,咁點解又會遭到天譴呢?

基督城早幾日發生6.3級地震,造成廣泛破壞同嚴重傷亡。基於前兩年發表嘅地震天譴論,有理由相信紐西蘭政府或者人民梗係做咗傷天害理嘅事,先會受到咁嘅懲罰。不過紐西蘭又真係冇乜把柄俾人捉到喎,咁地震天譴論咪要破產?咪住,好似話遇難者當中有中國公民喎,會唔會係佢地累街坊呢?各位地震天譴論嘅支持者,你地又有得發揮喇!

廢話講完。據我推測,地震可能係同紐西蘭嘅地理位置有關。紐西蘭位於火環上面,地殼活動比較活躍,發生地震嘅機會自然大。其實我地都算好幸運架喇,香港基本上冇乜特大天災,最多都係打吓風。

呢幾年唔知點解,全世界天災頻仍,睇新聞都睇到麻木晒。不過早幾日喺電視睇到基督城地震,就覺得有震撼,主要係因為一個畫面。喺電視睇到,Christchurch Cathedral個尖塔冧咗一半。基督城冇乜景點,雖然間教堂其實好屎吓,不過就已經係當地嘅地標。連地標都冧埋,都咪話唔得人驚!

第一次去基督城,住嗰間酒店就喺教堂隔籬,間房仲係對到正添。雖然嗰時枝鏡唔夠闊,影唔晒成間教堂,不過都勉強影咗兩張,估唔到而家已經成為絕響。

第二次去基督城係兩年之後嘅事,嗰次係同兩個舊同事自己揸車玩南島。自己玩就梗係住平價旅館啦,不過位置就好偏僻吓。同個老闆傾開,問佢基督城有冇得夜遊。佢竟然話有喎,仲離旅館唔遠,行路只係大約十五分鐘。原來基督城真係咁細,由一個山卡啦區去夜遊區行路都搞得掂。既然咁近就梗係要去見識吓啦,不過越行越唔對路,行咗超過十分鐘都仲係靜英英,都唔知係行錯路定係個老闆老點。好彩雖然係靜,但係感覺上都幾安全,始終都係紐西蘭南島,如果係南美或者南非就唔同咁講喇。再行多幾分鐘,卒之到咗夜遊區嘞,不過就靜到鬼影都冇隻,真係勁冇癮。咁都算夜遊區,簡直同Am屎爭天共地,就算同香港都爭九條街啦!

人成日彈香港呢樣唔好,嗰樣唔好,又話空氣污染嚴重,住喺度隨時命都短幾年。咁紐西蘭夠正啦,風景靚,空氣又好,不過要我移民去嗰度就真係咪搞嘞。就算地震震唔死,悶都悶到死啦!



2011年2月25日星期五

有樓萬事足?

77歲嘅阿婆,獨居980呎美孚單位,層樓市值500萬,唔使做按揭。美孚雖然唔算乜豪宅,不過勝在夠方便。阿婆咁嘅生活應該算唔錯啦,我自己就好羨慕吓嘞。但係阿婆竟然要靠執紙皮幫補生計,係咪覺得好奇怪呢?上個禮拜六嘅新聞透視就講咗個咁嘅崎屎嘞,等我又攞嚟分析吓先。

原來阿婆雖然有層500萬嘅樓,但係就冇乜其他資產,所以要執紙皮,每月賺一千蚊幫補。大家梗係以為阿婆冇人冇物,所以先搞到咁淒涼啦。如果咁諗就錯嘞,阿婆有仔有女,不過已經搬開咗住,冇返嚟探佢,亦都冇俾錢佢使。問仔女知唔知佢嘅情況,阿婆唔肯講,似乎有難言之隱。阿婆只係話錢咁好用,邊個願意俾你丫,你俾佢就得啫,仲話而家冇「知恩莫望報」架喇,真係喊都無謂。「知恩莫望報」當然講唔通,我諗阿婆係想講「感恩圖報」。

節目咗個財務策劃師幫阿婆諗計,睇吓層樓可以點樣幫到佢。財務策劃師提供咗以下四個方案:
1. 賣樓套現500萬
2. 大樓換係樓,套現200萬
3. 將層樓租出,自己租番層細樓,差價做生活費
4. 攞層樓做逆按揭

不過阿婆一個都唔buy,佢話佢老公(已經過咗身)叫佢要保住層樓,寧願租出去都唔好賣。阿婆又話有層樓好唔容易,所以一定要留番佢。最後,阿婆認為政府應該俾多生果金,因為佢對社會有貢獻咁話。

睇番阿婆個崎屎,真係可悲又可笑。可悲嘅係佢仔女竟然可以唔理佢,而可笑嘅係佢對身外物又會咁執著。唔明佢點解係都唔肯賣咗層樓,一個阿婆根本就冇需要住到成千呎咁大,而且第日去嘅時候層樓又帶唔走嘅。雖然話佢老公講過要保住層樓,但係死人嘅一句說話緊要,定係在生嘅人嘅生活緊要呢?又當佢好重視對亡夫嘅承諾,又或者層樓俾到佢好多回憶,不過既然係自己揀嘅就冇得怨啦。而家又唔係冇其他選擇,其實財務策劃師建議嘅任何一個方案都行得通,起碼好過要日日執紙皮。講到尾,我都係傾向相信阿婆想將層樓留番俾仔女。而佢個死鬼老公當初要佢死都唔好賣層樓,可能都係咁嘅原因。好多老人家都係咁架,雖然仔女對佢地唔好,但係就仍然想喺身後留番財產俾仔女,或者呢就係中國人嘅承傳觀念啦。

阿婆揸住500萬資產,但係就搞到臨老唔過得世。無論係乜原因都好,都可以話係自己攞嚟嘅,真係冇人幫得到佢。但係阿婆就唔認為係自己嘅問題,反而覺得係政府刻薄佢,生果金俾得太少。

記得之前垃圾會議員同壓力團體爭取加生果金,所用嘅理據就同阿婆如出一轍嘞。班友話要加生果金,係因為老人家對社會有貢獻。而佢地又反對資產審查,認為咁係唔敬老。對於班友嘅貢獻論,我就唔想講咁多嘞,如果唔係又隨時要打多一千字。總之認為生存就等如有貢獻,我就有保留嘞。講到敬老,其實係係心意嚟嘅啫,點解一定要用金錢嚟衡量呢?社會資源係應該用喺最有需要嘅人身上架!仲有,兩任凸首都算係老人家啦,班友對佢地嘅攻擊可謂無所不用其極,又學乜人講敬老呢?!


2011年2月23日星期三

戒煙宣言

人地話戒煙好難,我就唔係好同意嘞。我話戒煙好簡單就真,直頭話戒就戒,鍾意幾時戒就幾時戒!所以呢兩年來,我都大大話話戒咗十幾次煙!

其實我都算係一個老煙民,自從出嚟做就開始食煙,煙齡有九十幾年喇。開始食煙係因為覺得自己大個仔嘞,可以做大個仔先做得嘅。其實嗰時只係貪得意,食得唔多,一包煙可以食成幾日。後來愛上咗打牌就大鑊嘞,打親牌就煙駁煙,一晚可以煲成三包煙。有一次打完牌,發覺個喉嚨損晒,於是就的起心肝戒煙。嗰次都算成功架,足足有幾年冇食,直至轉咗工。

新公司同事個個都係煙鏟,而且又又鍾意飲酒,一個禮拜幾晚歡樂時光。大家都知啦,煙同酒根本係分唔開嘅,所以咪食番囉。除咗飲酒,班同事仲鍾意打牌,結果就越食越犀利。

以前好好架,喺office都可以食煙,當然只可以喺自己房食啦。後來公司搬咗,改晒做open office,而且仲全面禁煙,就唯有出後樓梯食。喺後樓梯食煙都有好處架,通常都係埋幾個煙鏟同事一齊去,順便講吓是非,都不知幾過癮!

到後來政府推行不吸煙運動,室內全面禁煙,就開始覺得好冇癮嘞。飲酒唔食得、唱K唔食得、連打牌都唔食得,咁仲有乜人生樂趣?於是兩年前又的起心肝戒煙,不過為咗留番條後路,只係戒買唔戒食。最初嗰兩個禮拜真係好難頂,成日心思思。後來堅持咗兩個月,都係頂唔順,就約咗個煙鏟朋友出嚟,我請佢食飯,佢請我食煙。戒咗兩個月再食番,嗰種感覺真係正,直頭係「久旱逢甘雨,他鄉遇故知」!

自從再食番之後,心裏面一直有條刺,硬係覺得自己冇理由戒唔到嘅,跟住就開始咗一連串嘅戒煙行動嘞。我會定一個特別嘅日子俾自己戒煙,好似元旦咁。元旦衰咗就定喺農曆新年,再衰咗就情人節,情人節都衰埋就清明節。如是者,勞動節,端午節、七一回歸、中秋節、十一國慶、重陽節,次次都衰晒,結果兩年內咪戒咗十幾次煙囉。最長嗰次戒咗兩日,最短就只係兩粒鍾。你地知啦,而家周街都係便利店,梗有一間喺左近,要買煙真係話咁易,結果一心思思咪走落街買囉。

啱啱做咗個統計,2010年買煙就用咗萬幾蚊。財爺又就嚟公布財政預算案嘞,煙草稅肯定會勁加。如果一包煙賣到成五十蚊,你話有乜可能再食得起?今次冇得傾,一定要戒架嘞,總之不成功便成仁!

話時話,其實呢篇係一路食住煙寫架!哈哈,加價前梗係要入定貨做儲備啦!


2011年2月22日星期二

魔鏡,鏡魔

魔鏡魔鏡,唔該你話俾我聽,我今日係咪好省鏡?

唉,已經好多年冇問過魔鏡呢個問題喇。我係驚聽完個答案之後,塊魔鏡會即刻變成玻璃碎!

唔知係邊個最先提出魔鏡呢樣嘅呢?條友真係好有見地,因為對於好多人嚟講,鏡嘅魔力絕對係無可抗拒。大家都可能見過呢類人,佢地無論喺任何地方、任何場合,只要見到可以反光嘅,就會照餐飽,仲會不時搔首弄姿,再加埋貓步轉身添。有時鏡癡照得興起,直頭可以到達物我兩忘嘅至高境界!早兩日就見識過一個咁嘅極品嘞。

屋企座大廈有三部,門係拋光金屬面,不過就有磨沙花紋,要當鏡照都勉強可以。而裏面最埋邊嗰幅牆(即係對正門嗰幅)就直頭係塊玻璃鏡,絕對係鏡癡嘅恩物。話說早兩日返屋企,入到電梯大堂已經見到一個長髮少女。睇真,原來係個大約十六七歲嘅學生妹,企咗喺最右邊嗰部前面。佢企得好貼部,個鼻差掂到門咁滯。門當然冇乜好聞,所以我相信佢係照緊鏡,雖然我絕對唔明白黐到咁埋有乜可能會照到鏡。

等咗一陣,結果中間部到先。我一向都好禮讓嘅,所以就等其他人入晒,自己最後先入。到我入嘅時候,個學生妹都仲係全無反應。我同佢三九唔識七,當然唔會提醒佢啦,費事俾佢以為我係金魚阿伯。入之後,我企咗埋最裏面,背脊貼住塊玻璃鏡。點知門開始關嘅時候,學生妹就一個箭步閃咗入嚟,動作相當敏捷吓。佢㩒完之後,竟然向住我迎面飛撲,速度仲快到無倫。我唔慣同陌生人有肌膚之親,條件反射令到我即刻避開佢。好在我身手都算唔錯,一個錯步就閃咗埋另一邊牆。跟住睇清楚,原來佢已經黐咗埋塊鏡度,仲開始撥弄自己把秀髮。佢動作好大,撥到把秀髮飛起晒,間中又夾雜幾吓fing水髮,仲誇張過洗頭水廣告。當時真係好驚佢把秀髮會掂到我,點知佢會唔會有頭蝨架。最弊部咁細,根本就冇乜位走盞。好彩我企個位距離佢嘅攻擊半徑都仲有幾吋,算係有驚無險啦。

講開又講,比起身體接觸,我更怕掂到其他人嘅頭髮。次次搭親巴士地鐵,見到車窗上面頭油印,就連毛管都棟埋,想嘔咁滯。

言歸正傳,喺學生妹fing到興高采烈嘅時候,我嗰層就到咗嘞。門仲未打開晒,我已經施展凌波微步,極速飄咗出去。驚魂未定,我就衝口而出爆咗兩個字:有病!

事後分析,有一樣我點都諗唔通,學生妹冇可能見唔到我企咗喺塊鏡前面,點解仲要直撲埋嚟呢?如果我唔係閃得夠快,好可能已經被迫同佢打咗個車輪!當然啦,我嘅精神狀態仲好正常吓,絕對唔會認為係因為異性相吸呢個自然定律。比較合理嘅猜想係佢睇我唔到,唔係話佢蓄意當我透明,而係根本視而不見。相信佢眼中只有鏡同埋鏡中嘅自己,其他一切事物都不過係過眼雲煙。有理由相信,學生妹已經修練成玉女鏡經第九層,人鏡合一嘅至高境界,級別亦由高手級嘅鏡癡提升到絕頂級嘅鏡魔!環顧當世,可能已經難有敵手!

補充:
好多時搭落樓,當落到地下,門打開嘅時候,都會發現有人企正喺門口,阻住我出。我以前會覺得人好冇公德心,做埋晒損人不利己嘅。人地未出,就算俾你入到去都冇用啦。自從見識過鏡魔之後,我又有新嘅想法嘞。可能人唔係驚死執輸,而係抗拒唔到門嘅吸引力!



2011年2月21日星期一

選擇性聾啞盲

一場突如其來嘅茉莉花革命,迅速席捲北非同中東,簡直睇到人眼花撩亂。同時亦令人驚嘆,呢類民主運動嘅傳染性,比瘟疫更有過之而無不及。今日睇報紙,話內地都加強咗防疫措施添。

講番呢場茉莉花革命,到而家為止,突尼西亞同埃及已經變咗天。話就話係人民力量嘅勝利,不過呢個結果係好係壞,都仲要放長雙眼睇清楚。總之軍人掌權都唔會係乜好事,因為班友個個都係屎坑三姑,易請難送。

有一樣好奇怪,就係疫區國家之中,竟然有幾個係美國嘅盟友。眾所周知,美國係民主、自由、人權嘅超級典範。所謂物以類聚,照計佢嘅盟友冇理由會搞到俾人民唾棄格。以美國佬勇於伸張正義嘅作風,如果見到呢國家有違反民主人權嘅情況,亦都冇理由唔出聲啫。而且嗰係盟友,美國一定可以運用到佢嘅影響力。唔通真係老虎瞌眼瞓,一時睇漏眼?但係又講唔通啫,穆巴拉克上台三十年,冇理由咁耐都睇唔到格。而且佢對其他國家嘅民主人權狀況,都不知睇得幾仔細,簡直好似出動埋顯微鏡咁。唯一嘅解釋係,美國佬選擇性咁視而不見、聽而不聞!

嗰所謂盟友,其實只係美國扶植出嚟幫佢做嘅政權,講得難聽就係馬仔。美國要執行佢嘅中東政策、要控制中東石油資源,冇咗呢班馬仔又點得呢?作為龍頭大佬,美國當然唔會阻住馬仔著數啦。總之就你幫我辦事,我替你撐腰。

早幾日就輪到巴林爆大鑊,軍警開槍鎮壓示威,造成平民傷亡。美國佬當然唔可以再扮啞啦,不過都只係好溫和(或溫柔)咁呼籲當局要克制同埋以對話解決問題。欺拉里就曾經讚揚過巴林政府「步向民主改革的承諾」,仲話民主改革「需要時間」。 點解美國佬嘅講法會同姜瑜小姐嘅一貫口吻咁不謀而合嘅?分明係執人口水尾啦,難為佢地竟然唔面紅。又睇番08年西藏騷亂,美國佬選擇性咁睇唔到藏獨份子打砸搶燒嘅行為,朝野一致強烈譴責中國暴力鎮壓。對比番今次事件,係咪覺得美國佬好雙重標準呢?

持雙重標準,係因為出發點唔同。對於中國,美國採取嘅係圍堵政策。至於巴林,美國當然唔想冇咗呢隻馬仔,所以一定唔會迫死佢。而美國佬一向掛喺嘴邊嘅民主、人權、公義,根本就從來都冇考慮過。所謂人不為己,天誅地滅,站喺自己國家嘅立場嚟講,美國並冇做錯。不過如果有人以為美國係主持公道嘅正義朋友,我就只可以話佢地係盲毛!

好不幸,香港嘅盲毛真係多如天上繁星。人地選擇性聾啞盲,係為咗自己嘅利益。班盲毛對明顯嘅事實視而不見,跟住班為求私利不擇手段嘅政棍搞風搞雨,究竟又對自己有冇任何好處呢?

班友而家仲話要聲援國內嘅茉莉花革命,真係唔知佢地個腦生咗喺邊度。首先,就憑幾條盲毛喺香港叫囂,又可以搞得乜出嚟?好,又當革命成功,中國好似巴林咁,成為美國嘅盟友(或馬仔)。不過到時都係民主欠奉,最終得益嘅又係邊個呢?講真,我絕對相信呢個所謂革命連開始嘅機會都冇。中國吸取咗六四嘅教訓,自然識得防範於未然。就算喺好唔可能嘅情況下,單搞到一發不可收拾,最終結果只會係六四嘅翻版。喺咁混亂嘅情況,如果有軍方野心家乘機奪權,中國仲可能會再度鎖國添。如果係咁,又有邊個會得益呢?

中國改革開放衍生出嚟嘅社會問題,絕對唔係一朝一夕可以解決。過激嘅對抗行為只會令中國政府產生戒心,收緊控制,結果拖慢改革步伐。事實上,喺大部分國民未有足夠民主同公民意識嘅情況下,所謂革命只會造就新一批嘅貪官。要有真正民主,先要將民主意識滲透入社會每一個階層,包括建制,絕對冇其他捷徑。一夜變天只係個美麗嘅神話,淨係嗰不食人間煙火嘅人先會相信。睇吓菲律賓,人民力量趕咗馬可斯落台,到而家已經廿幾年,咪一樣個個總統都醜聞纏身!

又講番香港,淨係睇吓有咁多盲毛,已經知道推行西式民主會係一場大災難!我都打定輸架喇,不過相信阿爺點都唔會見死不救嘅。我最唔想見到嘅係中國搞到亂晒龍,到時阿爺自顧不暇,香港就真係PK嘞!

2011年2月19日星期六

頤和園

最近唔知抽起邊條筋,忽然好有興致摷番九十幾年前嘅舊相睇。隨手抽本相簿出嚟,原來係頤和園。淨係計旅行,北京都去過三次。頤和園就去過兩次,一次夏天,一次冬天。

老實講,對頤和園嘅印象真係麻麻地,淨係覺得人多。雖然頤和園有山有水,又話係模仿西湖建造,不過橫睇掂睇,都係西湖靚好多。講真,其實西湖一樣係人頭湧湧,乜意境都破壞晒。冇計啦,中國有十幾億人口,想個少人嘅景點真係難過登天。

每次見到頤和園相,都會諗起一個人。唔知大家會唔會都係諗起佢呢?冇錯,就係慈禧嘞。以前會諗,如果唔係有慈禧呢個老虔婆,中國嘅近代史會唔會改寫呢?類似嘅問題,喺杭州都諗過。如果唔係有秦檜呢個奸臣,中國究竟又會係點樣嘅一番景象呢?當然啦,呢咁無聊嘅問題,已經冇諗好耐喇。冇秦檜,仲有高宗,就算連高宗都冇埋,岳爺爺亦未必一定可以直搗黃龍。同樣道理,就算冇慈禧,光緒都唔一定可以發圍。總之發生咗就係發生咗,「如果」根本就完全冇意義。

所謂天理循環,作惡多端嘅人遲早會有報應。秦檜受後世唾罵,喺杭州岳墳就有個供人吐口水嘅秦檜跪像。不過如果咁都算報應,就真係著數咗喇。而慈禧死後就俾人盜墓,折墮到連衫都俾人剝埋。不過盜墓賊只係求財,竟然冇將佢毀屍,都算益咗佢喇。所以話呢,報應呢家,只係呃到善良嘅人架咋。

揭吓揭吓,又見到嗰隻怪雞船嘞。隻船有個好文雅嘅名,叫做清晏舫,不過一般人都叫佢做石舫。清晏呢兩個字,我諗係嚟自海晏河清,有天下太平嘅意思。慈禧挪用海軍軍費修建頤和園,寧願要隻石舫,而唔要北洋艦隊。石舫當然唔會沉,不過北洋艦隊就梗係做咗砲灰啦。真係好諷刺,連國家都冇能力保衛,仲講乜天下太平呢?都唔知慈禧個老虔婆係乜心態,當時嘅中國已經係佢一個人嘅私產,而佢竟然完全冇諗過要保護自己嘅財產!

話隻船怪雞,除咗因為個名之外,仲係因為佢嘅型態。石舫係西式設計,根本就唔夾頤和園呢個中式園林。而且起喺岸邊,水淺到露晒底,睇嚟睇去都係似閣淺咗。慈禧嘅品味真係非一般平民老百姓所能理解。

又再揭吓揭吓,咁就去到一個比較冷門嘅景點,多寶塔。個塔起喺後山,而且唔算宏偉,根本就冇乜遊客會到。當時多寶塔仲維修緊,周圍搭晒棚。咁辛苦先到,真係好冇癮吓,唯有客串做住搭棚工友先啦。個塔雖然係細,不過睇真,其實都幾靚吓。塔身鋪晒琉璃磚,每塊磚上面都有個佛像,雕工仲好精細添。再睇真就發現咗一樣好怪嘅,每個佛像都係爛面嘅。根據園方嘅說明,破壞係八國聯軍嘅惡行。我都知道八國聯軍有幾衰格,佢地搶掠頤和園,珍寶攞得走嘅都攞走晒,搬唔郁嘅就打爛晒,絕對唔會留低益人。不過我又真係好懷疑,班友會唔會得閒到逐個佛像扑爛塊面呢?事隔九十幾年,相信爛面佛像都已經修復好,八國聯軍嘅一項罪證咁就湮沒咗嘞!






2011年2月17日星期四

國民身分

新聞話公民教育委員會做咗個意見調查,發現國歌短片可以增加香港人嘅國民身分認同。其實都幾荒謬吓,國民身分認同有乜好調查?自從回歸以後,香港已經再冇主權爭議,亦唔存在要求獨立嘅聲音。香港公民自然都係中國人,呢個係毫無疑問嘅事實。

撇開無政府主義者唔講,每個人都需要有個國籍。當然,未必每一個人都會認同自己嘅實際國籍,例如藏獨疆獨份子就唔會承認自己係中國人,但係呢個情況喺香港根本就唔存在。照理對於香港人嘅中國籍身分,認唔認同或者有幾認同都係毫無意義嘅問題。不過就真係有部分香港人唔肯承認自己係中國人,你都咪話唔荒謬。咁如果佢地唔係中國人,又可以係乜人呢?

有人好搞笑,淨係肯認自己係香港人。雖然我地有本特區護照,不過香港係中國嘅一部分,並唔係一個獨立國家,所以喺國籍上嚟講,我地都只可以係中國籍。話自己係香港人而唔係中國人,根本就唔合邏輯,我只可以話呢人係自欺欺人。

另外有人攞住本BNO,就當正自己有英國籍,呢人唔止可笑,仲好可悲添。人地大英帝國根本就從來都冇當過你係子民,你又試吓攞住本BNO返祖家,入唔入到境都未知。難為人仲日夜掛念住事頭婆,以大英遺民自居。哈哈,係遺民呀,不過係遺棄個遺囉。

我當然明白有好多人不滿中國政府或者鄙視國內同胞,因而唔想做中國人。不過唔認自己係中國人,只係一種心靈上嘅自慰,唔會起到任何實質作用。夠薑就搞革命,推翻中國政府,呢個係積極嘅做法。不過我就打死都唔信香港有人夠膽咁做。嗰班所謂民主鬥士,其實同門口狗冇乜分別,淨係識得喺屋企吠。搞革命呢預咗要犧牲嘅,當然係冇佢地份啦。消極嘅就學吓古人風骨,隱居深山,採薇而食。如果班友真係做到不食共粟、不飲共水,我都會欣賞佢地有吉屎。講到尾,最可行嘅辦法都係搞移民。香港勝在夠自由,要走嘅話絕對唔會有人阻止你。移民去英美加澳紐呢民主國家自然就一天都光晒啦,成日匿埋喺屋企自慰有鬼用咩,咪盞搞到自己腎虧!

唔認自己係中國人都算嘞,友仲要喺度指手畫腳,成日話中國要點要點,呢樣我就最睇唔過眼。如果唔係中國人,中國點衰都唔關你事啦。再講,既然唔係中國人,根本就冇資格干涉中國嘅內政。呢班友真係有病,準確嚟講係思覺失調。一方面認為自己唔係中國人,而另一方面又要盡中國人嘅義務去促進中國民主,咁唔係思覺失調係乜?

最後,我想俾個忠告呢班人,有病就要即刻睇醫生,唔好俾個病惡化成為妄想症。如果思覺失調變成妄想症,後果真係可大可小架。以為自己係救世主都仲好,最多係俾人笑吓啫。萬一妄想自己係超人,以為披住張床單就識飛,隨時會連命仔都冇埋架!




2011年2月16日星期三

追打光頭仔

早排「星期日檔案」講過一個「向地產商說不」嘅光頭仔,唔知大家仲有冇印象?條友戇居到冇朋友,我就連續寫咗佢兩日,都仲有意猶未盡。光頭仔話對大型連鎖商店冇信心,反而覺得舖頭仔先可靠。所以佢鍾意幫襯街坊藥房,而唔會去屈神屎或者慢寧買。琴晚睇到無線新聞話有街坊藥房賣假藥,忍唔住又要執多個光頭仔一劑!

條友真係戇QQ,成個溫室小王子咁,完全唔知世途險惡。佢淨係識得話地產商無良,而唔知道奸商根本無分大小。正所謂大有大奸,小有小奸,舖頭仔一樣會你老襯。好似光頭仔呢咁嘅老襯,真係唔佢笨都驚俾雷公劈啦。事實上,大型連鎖商店可以頂死舖頭仔,一個主因係佢地嘅貨源唔會來路不明,質素較有保證。而舖頭仔嘅貨源,就只有天知地知佢地自己知,但係你同我都唔知。大型連鎖商店重視商譽,而舖頭仔就冇呢樣顧忌嘞,衰咗咪執咗佢再開過間囉,琴晚新聞講嗰賣假藥嘅街坊藥房就係咁嘞。就算藥房老闆唔係存心賣假藥都一樣會衰,因為佢地自己一樣會中招,入咗假貨返嚟,琴晚新聞就有個咁嘅崎屎嘞。

光頭仔咁鍾意幫襯街坊藥房,真係好希望佢會買到假藥。你地又唔好以為我咁黑心,想條友死。光頭仔雖然係蠢,但係都罪不至死嘅。其實啱啱相反,我就係唔想佢搞出人命。新聞話假藥多數係有心無力嘅男人當係寶嗰隻,不過就冇發現有害成份,當然藥效亦都冇啦。光頭仔嘅腦部發育仲停留喺幼兒階段,睇怕某方面嘅機能都未必可以控制自如,想造人就好可能要靠嗰男人聖藥。俾佢製造到腦部有缺陷嘅後代,簡直係貽禍人間!如果佢買到假藥,自然就造唔到人啦,咁仲唔係香港之福?!

2011年2月14日星期一

兩個轉一條線

一轉人,二轉鬼,三轉馬騮仔,四轉閻羅王個仔。以上呢幾句,相信有番咁上下年紀嘅都會聽過,但係有冇根據就好有疑問嘞。事實上,我真係未見過頭頂有三四個轉嘅人。

一個轉好正常,相信大部分人都係架啦。兩個轉雖然少,不過都唔算罕見,起碼我自己就係嘞。但係好奇怪,唔知點解見親兩個轉嘅都係細路,而且多數係男仔。

其實兩個轉都幾麻煩吓,因為喺中間嘅頭髮會相衝,撐起變成一個雞冠頭。話時話,雞冠頭都幾型吓架。不過如果唔想咁punk,都有辦法嘅,一係就剪個平頭,一係就留到把頭髮好似長毛咁。我自己就冇呢個問題嘞,因為我頭髮生得唔貼,根本就條條都係棟起晒。當然啦,海膽頭又係另一個煩惱,頭髮長少少就撐到成個波咁。以前成日有人問我點解頭髮會豎起晒,係咪落咗gel。真係激死,你估我想嘅咩!

至於點解會話二轉鬼,我就唔知嘞。其實除咗個髮型難搞之外,咪又係人一個!

講到一條線,相信好多人都會即刻諗起事業線,當然係指心口嗰條啦。咪以為呢條事業線係女人嘅專利,其實如果男人有嘅話,都一樣咁殺食。睇吓某位有「童顏巨乳」之稱嘅男藝員,就係因為谷咗條事業線出嚟而忽然爆紅。講開又講,我以前用力夾,都夾到少少出嚟架。唉,俱往矣,而家冇喇。

都係廢話少講,費事趕客啦。我想講嘅係掌紋,本來係兩條線(智慧線同感情線),不過有人會黐埋,變成一條線,就係所謂嘅斷掌嘞。據聞斷掌好罕見,一千人先有一個。呢個講法我就真係好懷疑,冇理由得咁少嘅。我屋企四姐弟都係斷掌,以前班酒友之中又有兩個係。當然啦,如果唔係太熟嘅朋友,根本就唔會無啦啦叫人攞隻手掌嚟睇吓,所以我嘅統計唔一定好準,不過感覺上點都唔會係千份之一咁少。

喺性格方面,網上話斷掌人有以下特點:
(一)利己心重,好貪小利,喜弄權勢;
(二)主觀極強,不肯聽取別人的意見;
(三)適應能力和應變能力較差;
(四)愛惡分明;
(五)做事有責任感,不達成功不停止。

咁嘅講法我基本上唔係太認同,「主觀極強」有少少啦,只有「愛惡分明」先係中晒。

網上又話斷掌男人容易會有以下健康問題:
【1】支氣管炎或其他呼吸系統疾病
【2】神經過敏或神經衰弱
【3】高血壓
【4】膽固醇或中性脂肪過高
【5】肝炎
【6】便秘或下痢

又係中得少少,淨係得「膽固醇過高」講得準。話時話,「神經過敏」好似都有喎。

講到尾,掌相嘅,茶餘飯後吹吓水就可以,絕對唔可以當真。而家人整容整到連阿媽都唔認得,唔通整完之後連性格同命運都可以改變?


2011年2月12日星期六

新年伊始,梗係要寫吓同兔有關嘅啦。不過摷番舊相睇,先知道原來一張兔仔都冇影過,唯有求其隻Playboy兔頂住先,真失敗!

講到兔仔,印象中細個時好似養過,不過就唔係記得好清楚。後來唔記得係死咗定係劏嚟食咗,總之就係唔長命啦。哈哈,新年流流講埋咁嘅,真係大吉利是!

其實兔仔真係好可愛,不過就可望而不可即。我係講緊讀幼稚園嘅時候,如果功課做得好,先生就會俾隻兔仔做獎勵。雖然只係揼個兔仔印喺功課上面,都已經不知幾開心。不過好慚愧,我功課上面多數都係黑豬仔。唔知而家幼稚園仲有冇呢樣,照理咁白痴嘅,𡃁仔冇可能會受。

自從大個仔之後,兔仔就只係一種肉類,而且多數係去旅行先會食。講真,兔肉又真係麻麻地好食,主要係嫌佢鞋。忽然諗起一套法國片,叫做「戀戀山城」(Jean de Florette),個男主角無啦啦走去山區養兔,結果搞到命都冇埋,真慘情!

唔知點解,雖然兔仔人見人愛,但係就成日俾人抹黑。好似龜兔賽跑咁,直頭係明屈隻兔仔啦。仲有,用親個兔字嘅都唔係好,例如兔崽子、兔子、兔兒爺。

點都好啦,新年流流一定要講番好意頭嘅,我就恭祝大家:

兔氣羊眉 - 其實我都唔知羊究竟有冇眼眉,總之就食住兔年嘅旺氣,一路威到羊年啦
兔起骨落 - 即係由年頭開始,餐餐大魚大肉,有骨落地
守豬待兔 - 一句講晒,不勞而獲,錢無啦啦自己飛埋嚟
狡兔三窟 - 已婚男士包完二奶包三奶,未婚嘅就一腳踏三船,齊人都冇咁過癮

講開又講,我以前成日搞錯個兔字同免字,自從有咗電腦打字就一天都光晒。當然啦,以我呢半文盲,倉頡根本冇可能會用到。好彩呢兩個字我仲識讀,用拼音輸入雖然係慢,起碼唔會搞錯先。哈哈,電腦真係好偉大嘅發明!

2011年2月1日星期二

山寨版夢露

有時睇番舊相都係一種樂趣,因為每張相背後都有一個故事。一路睇一路想當年,點都好過無無聊聊對住部電視。又真係奇怪,只要睇住張相,就算係九十幾年前嘅舊事都會浮番上嚟,連細節都記得好清楚。近期發生嘅反而冇乜印象,有時連前一日做過乜都記唔起。都唔知係咪腦退化症嘅先兆,有驚添!

啱啱睇番希臘相,其中有張係同一個金髮女郎嘅合照。不過隔籬仲有一個唔識嘅女人,究竟係乜水嚟嘅呢?即刻開罐啤酒,點番枝煙,故事情節就浮晒出嚟嘞。哈哈,原來情節同Coffee早排爭取加餸嗰篇有類似,咁就要寫喇!

話說九十幾年前跟團去到希臘,喺一個陽光燦爛嘅日子,上到雅典Acropolis對面嘅一個小山頭。離遠見到一班女團友圍住一個金髮女郎影相,咪行埋去睇吓囉。題外話,唔知點解跟親團都係陰盛陽衰(泰國團除外),影相比較麻煩。女士鍾意影人,又較為姿整,本來呢都唔關我事,最弊係有時要等個位影相,真係等得嚟都夠鐘上車啦。

言歸正傳,原來個金髮女郎係麻豆,喺個廢墟前面影緊輯相。睇真,真係成個山寨版夢露咁樣喎,不過係健碩版嚟架,而且仲有埋腹肌添!班女團友見到佢就好似執到寶咁,個個都要同佢影合照。不過到我行到埋去,「夢露」已經嫌班團友阻住佢開工,唔肯再影合照。嗰陣雖然已經幾十歲人,不過就未試過同金絲貓合照,如果錯過咗呢個機會就實在太可惜喇。冇錯,為咗我嘅幸福,一定要努力爭取!咁咪行埋去同佢講囉,就算佢唔肯,最多都係食個大檸檬啫,又唔使打一身嘅。

哈哈,唔知靚仔係咪著數呢,佢居然肯喎。嗱,我一向唔敢自認靚仔架,係Coffee話架咋。都已經企好晒位,準備影架嘞,點知有個女團友走過嚟,話佢都未影,問可唔可以一齊影喎。都行到埋嚟嘞,唔通我話唔得咩,咁冇風度嘅我又真係做唔出。咁佢就企咗喺「夢露」另一邊,好彩唔使我左右逢源啫。真係嬲佢又唔知,話佢又唔好意思。佢為咗爭取自己嘅幸福,竟然要犧牲我嘅幸福。本來係浪漫嘅二人世界,而家變成不倫不類嘅三人行!

好彩,有個物理定律叫做異性相吸,「夢露」忽然主動黐咗埋嚟,都算有番少少補償啦。不過張相出嚟嘅效果就好怪,明明我同「夢露」係一對,無啦啦隔籬多咗個第三者,破壞晒意境!而且個團友另外有人幫佢揸機,佢係望咗去另一邊嘅。同樣道理,喺佢自己嗰張相裏面,我同「夢露」都唔係望住鏡頭,咁嘅合照影嚟又有乜意思呢?當然,我唔係記仇記到而家,我真係冇咁小器,只係睇到張相就記番起啫。

以前用菲林機,影出嚟嘅相都覺得珍貴,背後嘅回憶都多。呢幾年轉咗用數碼機,去旅行一影就幾千張,返到嚟都係睇一次就算,根本就唔會得閒再摷番出嚟睇。不過咁,如果要我轉番用菲林機,我又打死都唔制喎。人就係咁奇怪架喇,成日講乜集體回憶,話嗰至係真正嘅財富喎。如果可以時光倒流,又睇吓佢地願唔願意返去嗰個集體回憶嘅年代?

後記:
本來呢篇嘅標題係叫做「A貨夢露」,但係個「A」字可能會令人聯想到成人情節,容易引起誤導,所以改為「山寨版夢露」。