2011年9月30日星期五

竊鉤者誅

竊鉤者誅,竊國者侯!古人二千幾年前嘅說話,到今日睇番都仲係咁有道理,一啲都冇同時代脫節!

最近睇到個電視廣告,話賄選猶如踩鋼線,叫人唔好行差踏錯。請人食餐飯,或者派個月餅,都隨時有賄選之嫌,咁又真係要步步為營喎。早排民主肥女神就搞到周身蟻,睇怕佢以後見到鋼線都會腳軟。不過咁,我又唔信佢仲會有機會踩鋼線攞。

講真,要賄就賄得光明正大,要踩就踩條康莊(或骯髒)大道,又使乜搞埋晒啲咁細眉細眼嘅高危動作啫。踩鋼線?留番俾啲雜技藝人表演啦!

選舉根本就係一個鬥賄賂選民嘅遊戲,邊個面皮夠厚、吹得夠大就可以跑出。可能有人會認為我係侮辱緊神聖嘅民主選舉,話唔定仲會有人覺得我黐線添。我又唔解釋住,睇吓兩個經典例子先啦。

泰國前總理他信嘅福利政策向農民嚴重傾斜,派糖絕不手軟。有農民嘅鐵票,他信自然穩坐佢嘅鐵桶江山,而農民亦唔理佢有冇從中抽水。雖然他信被迫落台,但係公認為佢代理人嘅他信妹仍然喺最近嘅大選勝出,可見派糖政策係永遠立於不敗之地。至於所引致嘅紅黃兩軍街頭惡鬥,究竟係民主嘅表現,定係派糖式選舉嘅禍害,就等大家自由解讀嘞。

至於希臘,就更係派糖式政治嘅示範單位。啲政客已經進化到唔需要以特定群組為目標,總之人人有糖派,邊個出手夠豪就邊個贏。全國上下都只睇眼前利益,根本冇人會理亂咁派糖嘅後遺症。當然唔係話啲人唔知道遲早會爆煲,而係佢地一於好少理啫。當政者就用卡冚卡嘅方法嚟處理,到爆煲嘅時候,班友可能已經唔在位,甚至去埋賣鹹鴨蛋添,咁又使乜杞人憂天呢?至於啲百姓,有著數就梗係攞咗先啦。就算爆煲都冇有怕,因為佢地仲有最後嘅必殺技,就係發爛渣!

政客用派糖嚟爭取選票,其實性質上同賄選冇任何分別。選民得到嘅福利,根本就係延後報酬。啲政客計過條數,夠票當選就掂,完全唔會考慮啲糖派得合唔合理。而「行賄」同「受賄」雙方都係明正言順,絕對唔會好似踩鋼線咁,隨時有撻到攤攤腰之虞。咁你話係咪「竊鉤者誅,竊國者侯」呢?

要澄清一點,我並唔係反對民主選舉。我只係想話喺一啲民智未開嘅社會,民主選舉其實同賄選冇乜分別啫!

2011年9月29日星期四

怪獸家長之學海肥花

上次講到我朋友(以下用X代表)間學校有個成日揾仔嘅怪獸家長,琴日再收到料,原來呢位師奶仲牽涉入另一單怪獸事件。

話說除咗阿仔之外,怪獸師奶個大女都係喺X間學校讀。而且兩姊弟都係品學兼差,堪稱一門雙杰(杰撻撻嗰個杰)!有一日怪獸師奶帶埋阿女揾X,話要投訴佢個班主任。X一早就聽過呢位師奶嘅事蹟,不過就未見過佢嘅真人。嗰次見佢兩母女一齊出現,X雖然自問閱歷豐富,亦不禁倒抽一口涼氣,暗自讚嘆一聲:好一對人形河馬!(聽到呢度,我忍唔住打斷X,問佢嗰兩母女係咪恐怖得咁緊要。佢都承認講得誇張咗少少,跟住問我記唔記得當年轟動全港嘅慾海肥花,佢話就係咁嘅樣嘞。)

佢地一坐低,老花亦唔講乜嘢客套話,就單刀直入投訴小花個班主任想溝佢個女。X用眼角瞄一瞄小花,見佢身形豐膩到極點,BMI肯定過30,再睇真啲佢副花容,就即時出現生理反應,胃部有啲翻騰嘅感覺。X唔敢多望,怕會引起大噴發。佢跟住諗到小花嘅班主任,一個典型嘅中文sir,份人木獨到冇朋友,絕對係擔屎唔偷食嗰隻,斷估都唔會咁重口味。佢就問小花:「Ysir有冇對你做過啲乜嘢,例如摸你?」小花:「冇」X:「咁佢有冇同你講過啲乜嘢,例如暗示鍾意你?」小花:「冇」X:「咁點解你會覺得佢對你有意思呢?」小花:「佢成日要我放學後留低喺課室,單對單同佢傾嘢。」X:「咁佢同你傾咗啲乜嘢呢?」小花:「傾咗咁多嘢,點記得喎!」完全問唔到有用嘅嘢,X同小花嘅對話就到此為止。X跟住同老花講:「暫時冇證據顯示Ysir對令嬡有乜嘢企圖,不過我地都會揾佢了解吓,遲啲一定會俾到個答覆你。」

X事後揾Y了解過,原來佢真係有喺放學後單獨同小花傾嘢。Y話見小花無心向學,成日掛住周圍溝仔,而會考又嚟緊,驚佢一分都攞唔到,所以就輔導吓佢。作為班主任,輔導啲品學兼差嘅學生絕對正常。而且X亦相信Y唔會咁重口味,所以認為呢單嘢已經解決咗,就打電話俾老花,講佢知個調查結果。

喺電話度,X複述咗Y講嘅嘢,對面就傳嚟老花刺耳嘅聲音:「而家你地算乜嘢態度呀,分明係幫番自己人啦,信唔信我去爛生果投訴你地吖嗱!話我個女會考零分?就算真係咁,都係因為你地教得差咋,都唔知乜嘢學校嚟架!」跟住仲掟埋電話,搞到X想回敬番兩句都冇機會,激到佢爆炸咁滯!

過咗幾個月,會考終於放榜,小花居然攞到一分,真係令所有人跌晒眼鏡!雖然將學校嘅成績拖低晒,但係都值得慶幸,因為卒之可以送呢件小花走喇!不過咁,佢細佬仲喺度讀緊,安樂日子仍然係遙不可及!


2011年9月28日星期三

完美三維登機法

搭飛機真係好麻煩,乜都要等。安檢要等,入閘要等,就算係上咗飛機,都成日要塞死喺走廊,等前面啲乘客搞掂先可以埋到位。早排喺日月報第到單花邊新聞,話有個美國學者發明咗一種新嘅登機方法,可以慳番一半時間。如果係就正喇,唔使「等到花兒也謝了」!

最快登機法 省時一半
明報 – 2011年9月2日星期五上午5:33

【明報專訊】美國天文物理學家斯特芬(Jason Steffen)研究出最具效率的登機方法,經實地測試後,證明可比傳統登機方式節省50%時間。

由機尾至頭 輪流隔行入座

斯特芬2008年乘飛機時被困在長長的登機人龍裏,於是萌生研究最快登機方法的念頭。他以電腦模擬數種登機方法,包括最常見的機尾至機頭分段入座登機法;第二種是由坐在窗戶旁的乘客先登機,中間座位乘客次之,通道旁座位乘客最後登機的威爾馬登機法(Wilma method);第三種是他自創的斯特芬登機法。

斯特芬登機法按窗戶座位乘客優先登機、通道座位乘客最後登機的原則,由機尾至機頭輪流隔行入座(如12A、10A、8A等先入座,然後到9A、7A、5A等,餘此類推)。模擬結果發現,斯特芬登機法可避免乘客同時使用行李架等空間而拖慢速度,效率最高。

英國電視節目《This v That》與斯特芬實地測試,以72名帶手提行李的志願者,模擬以不同方法登上一架757客機,其中家長和小童的乘客組合可優先登機。測試結果發現,傳統登機法需時7分鐘;威爾馬登機法需時約4分鐘;而使用斯特芬登機法僅需時3.5分鐘。

睇玩之後,只可以話得啖笑。都唔明點解有學會者諗到呢啲屎坑橋,而又有電視台會無聊到同佢癲埋一份!

當然啦,呢個屎上最具效率嘅登機法,理論上真係無懈可擊,但係實際上又行唔行得通呢?難度在於點樣安排乘客喺入閘前排好條隊,行數要跟降序排,又要隔行,仲要分埋窗口位中間位同走廊位,簡直煩到冇人有。又當上機後可以慳到幾分鐘,不過乘客就要預早兩粒鐘去到閘口排隊,真係唔暴動先奇啦!

實際上,就算有充份時間,要乘客依足指示排隊亦幾乎冇可能。首先,飛機嘅乘客就好似一個小型聯合國,可能大部分人都只係識少少英文,太複雜嘅登機指示只會令人無所適從。事實上,好多乘客一聽到嗌咪,就唔理三七廿一衝埋閘口,根本唔會理你啲乜嘢登機指示。而且多數乘客都會有人同行,要夾硬分開嚟排隊,真係睬你都有味啦!

所以,呢位學者嘅完美三維登機法,永遠都只可以停留喺意淫階段,根本冇可能付諸實行。有人話「百無一用是書生」,又有人話「書生造反,三年不成」,睇嚟真係有啲道理!

當然,以上提到嘅只係同經濟艙有關,如果有錢搭頭等或者商務客位,咁就一啲問題都唔會有架喇!

2011年9月26日星期一

怪獸家長之奪命追魂call

早排講開怪獸家長,搞到有啲欲罷不能添。卒之問我個教書朋友攞咗啲料,一於再添食。

朋友間學校有個幾曳吓嘅細路,咁又唔係大奸大惡嗰隻,而係比較唔聽話。以我朋友咁老忽忽,呢啲細路當然難唔到佢,惡頂嘅係佢阿媽。

呢位師奶有鋪揾仔癮,一心血來潮就會打電話去學校揾仔,據保守估計,一個禮拜起碼都會揾兩次。要揾人上課室叫阿仔嚟校務處聽電話,鬼死咁麻煩,接電話嗰位妹妹當然唔係咁願意應酬佢啦。咁妹妹就同佢講:「X同學而家上緊堂,唔係咁方便聽電話喎。」本來咁答好正常,點知個師奶刻發爛渣:「我個仔喺你地學校讀書,點解我唔揾得佢,而家仲有冇人權呀!你唔肯叫就揾你地校長同我講啦!」估唔到妹妹又幾硬淨,竟然冇即刻就範:「校長而家開緊會,唔方便聽電話。或者你講低揾X同學有乜嘢事,落堂之後我地轉達俾佢知啦。」呢啲咁嘅太極花招,師奶真係睬你都有味啦:「我而家有好緊急嘅嘢要揾阿仔,如果出咗事,你擔唔擔當得起先!你叫乜嘢名?!」講到咁大鑊,妹妹想唔屈服都唔得啦,唯有揾人叫阿仔落嚟聽電話。

師奶講到咁大鑊,妹妹又想八卦吓,就留心聽住阿仔嘅對答。點知原來係叫阿仔放學順便買枝豉油返屋企,真係激到妹妹彈吓彈吓。以後師奶打親嚟揾仔,妹妹都唔敢逆佢意,一來係唔想俾佢鬧,而且又唔知佢係咪真係有啲死人冧樓嘅嘢,費事自己孭鑊啦。不過以妹妹聽到嘅,次次都係啲雞毛蒜皮嘅小事,最多嘅係師奶話去打牌,叫阿仔夜晚嗰餐自己搞掂。

其實唔止妹妹覺得呢位師奶討厭,連啲老師都好唔高興,因為成日上緊堂都俾佢打斷。不過冇辦法啦,鬼叫而家啲家長大晒咩!

後來師奶仲變本加厲,連放咗學都打嚟揾仔。妹妹就同佢講:「而家放咗學,X同學可能已經走咗,我地揾唔到佢架喇。」咁嘅回應,師奶當然唔會接受啦:「你唔識開咪嗌嘅咩,使唔使呢啲嘢都要我教呀!」妹妹雖然俾佢吹到啤一聲,不過都係照做。結果又真係俾佢揾到仔喎,原來阿仔仲同啲同學仔喺操場玩緊。如是者連續幾次放咗學之後揾仔,搞到連阿仔都頂佢唔順,就喺電話鬧佢:「你好煩呀!以後唔好再打電話嚟學校揾我呀!」跟住就掟佢電話。妹妹聽到都不知幾開心,仲差啲忍唔住笑咗出嚟添。

呢個師奶,橫蠻無理唔在講,仲蠢到冇人有添,竟然一啲都唔知細路嘅心理。啲細路上到中學,就以為自己已經大個仔,根本就唔鍾意阿媽打電話嚟學校揾佢地。上緊堂都算嘞,始終只係同班同學知道。後來仲要搞到嗌埋咪,你話個細路幾瘀呢!

我父母嗰輩,好多都冇受過乜嘢教育。仔女可以有書讀,佢地已經覺得好開心,所以對學校好尊重。除非真係死人冧樓,否則絕對唔會走去麻煩學校。而家唔同晒喇,啲家長只係將學校當成托兒所,自己就係至高無上嘅顧客。既然「顧客永遠是對的」,咁又使乜尊重學校呢?啲細路耳濡目染,自然唔會知道乜嘢係尊師重道啦!

以上面個師奶為例,斷估佢都唔會教阿仔乜嘢叫做禮貌、誠信、同責任,阿仔唔曳先至奇啦!而且萬大事都有阿媽出頭,阿仔喺學校又使乜聽教聽話呢?當然啦,既種惡因,必得惡果,第日臨老唔過得世,同傳媒哭訴話有仔等如冇仔嘅,就係呢啲人嘞!

2011年9月25日星期日

我冷血!

注意:如果有人睇完想鬧我冷血嘅就可以慳番嘞,因為我一早已經自插咗!

17歲中學生(以下用W代表)喺學校早會跳樓單嘢嘅死因聆訊有咗結果嘞,陪審團一致裁定W係死於自殺。對於呢個裁決,死者父母表示極度不滿,堅稱係學校迫死阿仔,仲話會繼續去平機會告間學校。而代表死者家長嘅律師,禽流黨嘅何俊男就話會將事件帶上垃圾會討論。單嘢搞到沒完沒了,萬一涉事校長或者老師受唔住壓力又走去跳樓,咁係咪又要開多次死因庭,輪到死者家長同俊男律師做被告?

我就覺得個裁決好合理,因為根本唔可能有其他判法。要聲明一點,我話個裁決合理,並唔係要同俊男律師唱反調,事實上我都唔算太憎佢。

呢單嘢嘅裁決,可能性只有幾個:謀殺、誤殺、教唆自殺、或者自殺。好明顯,單嘅由頭到尾都係一個悲劇,根本唔會有人想佢發生。既然冇人有意圖或預謀想W死,「謀殺」當然可以剔除。喺事件中又冇人對W講過話叫佢去死之類嘅嘢,所以「教唆自殺」亦講唔通。至於會唔會係「誤殺」,咁就要慢慢分析吓嘞。

事件始末係咁嘅,患有思覺失調嘅W喺敬師日代表佢嗰班致詞,點知無啦啦臨場爆肚,當眾點名批評一位老師,質問佢「有無反省做人態度」。事後W被記大過,仲要向有關老師道歉。因為W嘅家長透露過佢唔肯食藥,而校方亦懷疑佢喺敬師日嘅不當行為同呢樣有關,所以要求W改喺學校由老師監督食藥。結果W第一日喺學校食完藥,就走上6樓跳落嚟。W嘅父母話校方記阿仔大過同埋唔理佢嘅意願迫佢食藥係害死阿仔嘅主因,誓要為佢討回公道。

事實上係學校(而唔係家長)首先發現W患有思覺失調,然後轉介佢接受精神科治療,要每日定時食藥。主診醫生作供話,曾經喺W覆診時知道佢私自減藥。而根據驗屍報告,W胃部殘留嘅藥碎只係普通感冒藥。即係話W喺出事前由老師睇住佢食嘅,根本就唔係思覺失調藥。至於W係咪一直都冇食藥就不得而知,不過都好有可能。如果W有定時食藥,慘劇仲會唔會發生呢?而W嘅父母又有冇認真咁監督住佢食藥呢?呢兩個問題當然唔會有確實答案,肯定嘅係W根本就唔想食藥,但係咁只會令佢嘅病情惡化。我就相信確保佢有定時食藥,先至係救到佢嘅關鍵,而唔係順晒佢自己嘅意願去做。而且改喺學校食藥,亦得到主診醫生同意,如果話呢樣係害死W嘅主因,睇怕主診醫生嘅責任仲大啲囉。

至於校方對W嘅懲處係咪導致佢尋死嘅主因,呢點我就唔敢拗嘞。不過而家講緊嘅只係一個可能性,我就唔信有權威人士敢企出嚟講,話記一個思覺失調嘅人大過就一定會令佢自殺。如果因為一個可能性,就判校方有關人等刑事罪,咁就點都講唔通啩。事實上,一個人要自殺,好多時真係估佢唔到架。的確有人會因為一啲小事,例如同人嗌兩句交,就死俾你睇。如果做咗一啲嘢令人地自殺係刑事罪,咁就大鑊喇,以後撇仔撇女、搞婚外情、炒人魷、追債全部變晒高危動作,都咪話唔得人驚!所以話呢,單案裁定自殺係唯一嘅選擇!

不過咁,其實我都覺得校方可能犯咗專業判斷上嘅錯誤。首先,點解要俾W代表佢嗰班致詞呢?咁做有一定危險性,可免則免。另外,懲處W之前應該問吓主診醫生嘅意見,就算出咗事都起碼有人墊底。當然啦,如果問主診醫生,佢肯定會反對處罰W,試問又有邊個會做啲有機會令自己孭鑊嘅嘢呢?校方亦可能對W嘅病情掌握得唔係好準,因而低估咗其中風險。我相信呢個係兩難嘅抉擇,如果當眾鬧老師都唔處理,睇怕以後都好難搞得掂班細路。最弊係校方又唔可以公開W有病,為咗唔想班細路有樣學樣,懲處都係迫於無奈嘅做法。如果真係要怪嘅,就應該怪呢個教育制度,點解要俾呢類學生入讀主流學校呢?究竟學校有冇足夠嘅人力資源同專業知識應付呢啲特殊需要呢?就算勉強應付到,學校都肯定要投放比較多資源喺呢類特殊學生身上,咁對其他學生又係咪公平呢?

要澄清一點,我絕對無意向死者家屬嘅傷口撒鹽。之前講過,單嘢係唔會有人想見到嘅悲劇,事實上我都好同情死者同佢嘅家人。當輿論一致狂插校方嘅時候,我只係想講吓自己嘅睇法。其實校方都有佢嘅難處,而責任亦唔一定係單方面嘅。香港人愛心爆棚,但係就稍欠理性思維,有時冷血吓都未嘗唔係好事架!

最後,希望死者父母可以早日走出喪子嘅陰霾,再糾纏不休恐怕都唔會有乜嘢結果,只會令傷痛延續落去!

2011年9月23日星期五

山姆叔叔三事

琴日睇到幾單同山姆叔叔有關嘅新聞,對呢個喺民主、人權、法治幾方面都傲視全球嘅國度,又有更深一層嘅認識。

有民間組織喺網上發起名為「佔領華爾街」嘅示威行動,雖然參與者堅稱示威係和平進行,不過紐約警方就拘捕咗十幾人。警察拉人嘅名目可謂千奇百趣,絕對唔係我地呢啲化外之民可以想像。有個男人喺遊行中俾前面嘅人塞住,冇辦法依照警察命令向前行,結果俾人拉咗,理由係佢「擾亂秩序」。有個女人喺行人路用粉筆寫字,之後以塗鴉罪被捕。有用大聲公嘅示威者俾人拉咗,罪名係「未經許可使用擴音器」。又有人用防水布保護攝影器材,結果俾人拉埋,因為佢「違反公共衛生條例豎立帳篷」。最搞嘢係警方仲引用百幾年前嘅舊例,「公眾場所舉行集會時禁止兩人或以上戴上面具」,拉咗幾件V煞。香港啲廢青成日大嗌「警權無限大」,真係未見過大蛇疴尿!當然啦,井底蛙始終係井底蛙,冇得講!

爹親娘親不及山姆叔叔親嘅民主聖鬥士,你地以後仲敢唔敢要香港同美國睇齊?

喬治亞州啱啱處決咗一個黑人死囚,引起國內外人權組織極度不滿。個黑人係因為22年前一單槍殺警員案被判死刑,但係佢自己就堅稱無辜,不斷要求翻案。事實上單案又真係疑點重重,警方一直都揾唔到涉案兇器,有多名證人改口話供詞係受警方壓力影響,更有陪審團成員表示自己當時嘅判斷犯咗錯。事件引起國內外人權組織關注,強烈要求翻案,連教宗都開口聲援。不過有關當局睬你都有味,堅決拒絕翻案,仲如期執行死刑。美國仲未廢除死刑,一向為人權組織所咎病。而家仲搞單咁嘅嘢,更加俾世人睇到美國佬有幾剛愎自用。事實上,又真係好難令人唔懷疑單嘢當中有冇種族歧視。如果個疑犯係白人,結果會唔會都係一樣呢?

爹親娘親不及山姆叔叔親嘅人權戰士,唔知你地又點睇呢?

審計報告揭發,美國司法部開會大花筒,會場要揀高級酒店,茶點更係天價極品。當美國納稅人要勒緊褲頭過日子,司法部嘅公職人員就連開會都要享用$130(港紙)一件嘅鬆餅同$40一罐嘅可樂,真係唔嬲就有鬼啦!算唔算浪費公帑我唔知,不過就肯定係官門酒肉臭!

爹親娘親不及山姆叔叔親嘅尊貴大狀同司法人員,你地又有冇乜嘢高見呢?

哈哈,呢條問題我就識幫佢地答嘞。從事司法界嘅都係社會上嘅精英,待遇自然唔可以同一般人相提並論,唔通要人地食啲茶餐廳貨色咩!想要法治,社會當然要付出代價啦!百零蚊一件鬆餅都喺度阿吱阿咗,香港人真係唔會咁小家!


2011年9月22日星期四

怪獸家長之銀人劫

報復學弟 塗漆生殖器 港惡少﹕我爸是大老闆
明報 – 2011年9月20日星期二上午5:13

【明報專訊】一名在深圳讀高中的港人子弟,與低年級同學衝突,日前在路上毆打對方、潑油漆報復,甚至還拿刷子反覆在其臉上和生殖器上塗抹油漆,令其有毁容風險。該惡少還揚言「我爸是香港大老闆,你們死定了!」其父事後交出2500元(人民幣,下同)賠償金後揚長而去,警方稱肇事者未滿18歲,難以刑事處罰。

洗漆洗爛皮膚 臉部無法清理

《南方都市報》報道,寶安西鄉11歲男童鍾榮興,上周六(17日)下午3時途經西鄉街時,遭16歲的蔡姓高中生攔截。鍾表示,他3個月前曾在打籃球時碰碎蔡的眼鏡,經警方協調賠償350元,但蔡認為眼鏡要700元,就一直記恨在心。當天蔡向他被勒索,當時他身上無帶錢,結果被蔡拖到旁邊停車場毆打。

蔡毆打後仍不解恨,提來一桶銀灰色油漆,將鍾的衣服全部脫光,用油漆將他從頭淋到腳,甚至還拿起刷子,反覆在其臉上、眼睛、鼻子、嘴巴和生殖器上塗抹油漆,時間長達半小時。

鍾榮興赤裸身體返家,家人帶他跑遍市內多間醫院求醫。但由於洗掉油漆需用有機溶劑,有毁容風險,多間醫院都不敢接診。最後家長無奈報警,由派出所安排入院治療。但醫院表示,其臉部、眼睛等處油漆無法清理,只能先打消炎針。

據鍾榮興的父親表示,兒子滿臉都是銀灰色的油漆,連牙齒縫隙亦有。他只好為兒子清洗,在洗的過程中,兒子皮膚全都洗爛了。

在派出所,蔡姓學生的港人父親則威脅記者說﹕「你們不要問,適可而止,我告訴你,等我發威的時候你們上級……就滅了你們!」而蔡姓學生亦對鏡頭豎中指,大叫「不能拿老子怎樣,老子馬上就回家,哈哈」。蔡家人還說﹕「派出所就是我家開的,我們想怎麽樣就怎樣,我認識省、市、區大領導,你們愛報道不報道……」

擲2500元離去﹕派出所是我家開的

警方透露,蔡姓學生的爸爸是香港人,媽媽是四川人。由於他未滿18歲,還達不到處理條件,只能先放他回家,再組織雙方協調。

之前講過話啲細路頑劣,家長其實難辭其咎。不過喺大部份情況,我地都只係見到啲細路嘅惡劣行為,而啲家長究竟係點教仔,第三者根本無從得知。上面單新聞就彌補咗呢一點,俾我地睇到每個PK細路背後都極可能有啲PK家長。

阿仔點解會咁PK,我諗有兩個可能性。第一,係遺傳咗個PK老豆嘅劣質基因。第二,係耳濡目染,學晒佢老豆啲衰嘢。無論係邊樣都好,總之就臭罌出臭草啦!

古語有云,大蝦細俾屎餵,我就話俾屎餵完仲要拉個PK仔去勞改先啱。點知公安話佢未夠18歲,所以冇得處理。唔係啩,咁都得?!而家個PK仔犯嘅非法禁錮同嚴重傷害他人身體,竟然拍吓籮柚就走得,咁仲有天理嘅!即係話,如果佢唔係淋銀油,而係淋通渠水,都一樣奈佢唔何?

本來我一向唔認同啲網民濫用人肉搜索,不過既然法律制裁唔到個PK仔,我都好希望有人可以起到佢底,等大家公審呢對人渣父子!

2011年9月20日星期二

昨日三事

召喚獸
唔記得幾時開始,有隻蒙面wowo會間中走入嚟吠兩嘢。其實我又唔係好介意喎,因為佢只係隻狗仔,冇乜殺傷力,得閒攞佢嚟消遣吓都不知幾過癮!不過隻wowo成日都揀我唔係咁方便嘅日子先入嚟搞搞震,有時真係冇乜心情應酬佢。琴日終於俾我知道佢嘅秘密喇,原來鬧親癲狗,佢就會第一時間撲出嚟護主,真係請神都冇咁易呀!哈哈,以後我識得點召喚佢出嚟玩喇!

多謝拉登
琴日上新攝影(大陸攝影網站),見到一位國內網友喺其他人嘅作品留言,講佢喺中秋嗰幾日嘅感受。當佢提到中秋前一日,即係911,竟然話多謝拉登!呢啲簡直係冷戰思維,總之敵人嘅敵人就係朋友!我當然明白好多國內人都憎死美國佬,不過唔知嗰位網友有冇諗過,其實阿爾蓋達一樣會支援啲疆獨份子喺中國搞恐襲架!講真我都好憎美國佬,不過我絕對唔會覺得911襲擊係好事,因為呢個係大是大非嘅問題,恐怖主義一定唔可以支持!其實都唔使講到咁遠,就睇番香港,好多人投票俾癲狗長毛都唔係因為認同佢地嘅理念,而只係想選啲同政府作對嘅人出嚟。唉,都唔知邊啲人先至係土共心態!順便一提,我喺新攝影嗰邊都放咗啲相,有興趣嘅話可以去睇吓,好多相喺呢邊冇出現過架!

垃圾會爆大鑊
琴晚一早擔定櫈仔,實部電視,等睇良家榮上垃圾會爆大鑊。點知佢竟然前言不對後語,完全冇解釋乜嘢叫做阻止唔到誤報江總死訊單新聞出街,結果字母台班高層可以暫時甩難。條友喺是但台嗰陣真係唔錯架,估唔到過咗字母台會變成咁,墮落呀!當然啦,佢可能有啲不足為外人道嘅苦衷都唔定呢。咪住,隨時係甜衷都話唔埋喎!電視台事後仲訪問咗記協嗰隻肥豬乸,佢話條友都九唔搭八,完全唔可以接受。今次隻肥豬乸竟然識得講番人話,我都係第一次認同佢嘅言論咋!我份人冇乜優點,唯一可取嘅係是非黑白分得好清楚,絕對唔會因人廢言!弊嘞,又講錯嘢添,應該係唔會因豬廢言先啱!



2011年9月19日星期一

落山落水

琴日提到「衣錦夜行」,意思係夜媽媽著到鬼火咁靚有乜用,前後deep V加透視又點,唔通揾鬼睇咩!另外亦有「衣錦還鄉」,意思都係差唔多。對於我呢啲酸葡萄當飯食嘅人嚟講,咁嘅態度其實都幾膚淺吓。不過中國人鄉土觀念比較重,發咗達唔返鄉下威吓,點都係覺得有啲美中不足。算啦,貪威識食係人嘅天性,講真都無可厚非嘅。不過如果要威,喺邊度威都係一樣啫,點解一定要返鄉下呢?哈哈,講咗一大堆廢話都未入到正題添,其實我係想講個「衣」字應該點讀。

「衣」喺呢度係動詞,解作穿著,應該讀做「意」。小學係咁教,中學又係咁教,粵語殘片都係咁讀,基本上以前係唔會有人讀錯。唔知點解,近年好多人都將「衣錦還鄉」讀成「醫錦還鄉」,其中又以後生一輩居多。

又好似「鳥為食亡」,正確讀音係「鳥為痔亡」。不過喺印象中,除咗中文先生,好似未聽過有人讀得啱。

仲有「春風風人」,第二個風字應該讀成「諷」。呢個詞比較少人用,我就完全冇聽人讀過。不過相信會讀成「春風瘋人」嘅,應該佔咗絕大部分。

至於「仁者樂山,智者樂水」就更加唔使講,個個都讀成「仁者落山,智者落水」。當然啦,既然喜愛山水之勝,自然會登山涉水,咁「落山落水」都講得通嘅。其實正確讀音係「仁者咬山,智者咬水」,不過「咬」要讀第六聲。特別提一提普通話讀音,個「樂」字應該讀成「要」(yao4),即係「仁者要山,智者要水」。哈哈,真係至理名言,智者梗係要水啦,不過係「水為財」個「水」囉。當然啦,呢句只係題外話,其實我係想講陳雲林。佢舊年喺重慶舉行嘅陳江會,就引述過「仁者樂山,智者樂水」做開場白,不過竟然讀成「仁者勒山,智者勒水」,真係咪以為淨係香港人先會讀錯音!

語文嘅嘢係薪火相傳,由我嘅小學年代到而家,只不過係短短幾十年,點解有啲正確讀音會咁快就失傳咗呢?究竟係而家啲中文老師冇教,定係年輕一輩嘅老師連自己都搞錯呢?抑或係呢一代嘅學生根本就唔聽先生教,話知你講一百次都唔會記得?

我當然知道語文係有機體,會不斷自我演化,而約定俗成更係其中規律。不過咁係咪代表我地要對啲語文上嘅基因突變視若無睹?如果對呢啲「自我演化」採取放任態度,又會唔會變成冇標準可循呢?

當然啦,正音的確有需要,不過我亦唔贊成矯枉過正。就好係之前嘅正音運動,夾硬摷番千幾年前嘅「正音」出嚟,我就認為過咗火嘞。如果有啲字嘅「正音」,根本已經冇任何在世嘅人知道,而當代嘅字典又冇收錄,我就覺得冇必要「為正而正」啫。講開正音,有啲字「正」完之後真係令人好唔習慣。如果我講「音衡」,你地又知唔知我噏緊乜呢?




2011年9月18日星期日

人渣!又見人渣!

人渣度度有,香港特別多!只要打開報紙港聞版,就會睇到一個又一個嘅人渣故事,而且日日有嚟,鑊鑊新鮮!

中秋夜玩燒巴士,實在令人懷疑係童黨所為。不過既冇目擊證人,巴士站嘅攝錄機又擺空城計,諗住單案就算係神探L都破唔到啦。點知事隔兩日,打開報紙已經見到警方破咗案,拉咗幾件十三四歲嘅塞豆窿。初初仲以為香港警隊真係有讀心神探,而且識得隔空發功添,如果唔係點會咁快破到案。睇埋落去,原來係班童黨自己攞嚟衰,竟然沙膽(或白痴)到喺網上公布自己嘅威水屎,仲提供埋第一手獨家圖片,一張巴士起火嘅相。咪以為呢啲犯法嘢冇人敢搭嘴,竟然有個女粉屎讚班童黨叻仔!

人渣真係冇年齡同性別界限,十三四歲嘅仔妹已經沙膽到燒巴士,再過多幾年仲有乜嘢唔敢死呢?!香港咁多善心人,實會有人幫班小人渣辯護,話佢地只係年少無知,一時貪玩。當然啦,十幾歲人話大唔大,話細唔細,可能有好多複雜嘅是非概念都未必識分。莫講班豆,就算好多接近三張嘅80後都唔識分啦。不過燒巴士係犯法,會俾差人拉,相信連小學一年級都應該知啩。好,又當班小人渣係一時衝動,但係事後將啲威水屎放上網俾同道中人(渣)分享,就足以證明佢地唔覺得自己有錯啦。呢種正正就係「富貴不還鄉,如衣錦夜行」嘅心態,其實班PK仔都不知覺得幾光榮!燒咗三架巴士咁大件事,當然係全香港人人都知啦,不過最弊就冇人知係佢地做呢。如果唔放上網威俾啲鄉親父老睇吓,肯定仲辛苦過谷精上腦,實會幾晚瞓唔著。哈哈,竟然將項羽同班小人渣扯上關係添,罪過罪過!

究竟啲仔點解會變成人渣嘅呢,唔通又係社會嘅錯?當然啦,同社會風氣唔多唔少都有啲關係。就睇吓班80後廢青,圍垃圾會、強佔馬路、胸襲凸首、狙擊政府高官,有邊樣唔係暴力行為?你又唔好理,呢啲暴力行為直頭叫好又叫座,除咗少數愛國報紙,其他傳媒竟然係讚多彈少,都不知幾多民鼠打手走出嚟護航。啲仔自然係有樣學樣啦,話唔定仲嚟個青出於藍添。早排班V煞廢青搗亂遞補機制諮詢會場,又拆屋又打人,班仔梗係覺得好威格,睇完豈有唔學之理呢?而且佢地會以為戴咗面具冇人認到,就好似喺網上唔會有人知道佢地嘅真正身分一樣,所以先會大膽到將自己嘅威水屎公諸同好。其實班廢青所做嘅,唔止係破壞緊呢一刻嘅社會秩序,更係荼毒緊香港嘅下一代!

當然啦,班仔嘅家長亦難辭其咎,有乜理由屋企有件小人渣,佢地竟然會懵然不知!有個教書嘅朋友同我講過,話佢學校有啲仔不知幾頑劣,都唔明點解有細路可以曳成咁。不過當佢見到啲仔嘅家長,一切謎團就解開晒,講得難聽啲,咪臭罌出臭草囉!對於啲細路嚟講,成年人嘅身教肯定最具影響力,如果家長冇做到好嘅示範,就算學校點教都唔會有用!

講到壞嘅示範,就一定要提吓癲狗嘞。條友喺議會嘅暴力作風當然唔使多講,大家都好清楚。啱啱喺譴責V煞廢青暴力行為嘅動議辯論當中,條友竟然無恥到話係官迫民反,簡直係將暴力行為正義化!咁唔係教壞細路係乜!呢條友,人渣兩個字絕對受之無愧啦!唔得,要更正,既然係癲狗,咁當然係狗渣啦!

2011年9月15日星期四

唔死一身潺

警告:本文內容含有恐怖及不雅成份,敬請讀者留意!閱後如出現上吐下瀉、氣促心悸等不適徵狀,本人概不負責!

早兩日喺日月報睇到段花邊新聞,笑到我趴咗喺度!哈哈,好彩唔係喺街啫!

話說湖北有個五十幾歲嘅男人,喺網上睇到有溫泉提供啲魚仔幫顧客食咗身上嘅死皮,佢就照辦煮碗,喺屋企自製黃鱔浴,話要「給身體美美容」。條友走去街市買咗十幾條黃鱔,放落浴缸一齊浸浴。點知浸浸吓突然感到下體一陣刺痛,耷低頭睇吓,先發現原來有條黃鱔捐緊入佢條啫啫!佢想掹番出嚟,不過因為條鱔太滑,結果徒勞無功。眨吓眼條鱔就捐晒入去,佢仲話感覺到條鱔喺裏面掙扎添。佢想疴番條鱔出嚟,不過條鱔硬係賴死唔肯走。結果等到第二日,實在冇晒辦法嘞,條友先至去醫院求助。醫生原本想用膀胱鏡攞番條鱔出嚟,但係因為條鱔太滑而唔成功。最後都係要開刀,搞咗半粒鐘先攞到嗰條直徑1cm長15cm嘅黃鱔出嚟。醫生仲話男性尿道口一般只有0.8cm,條鱔入到去係因為身體有黏液,起到潤滑作用。

哈哈,一百歲唔死都有新聞聽!條友今次真係「黃鱔入膀胱,唔死一身潺」!

不過咁,條鱔竟然可以捐到入啫啫,大家係咪覺得好不可思議呢?我諗我都唔會信架,如果唔係睇過BBC一套叫做Amazon Abyss嘅紀錄片。

話說喺亞馬遜河有一種叫做candiru嘅魚仔,就真係有捐過入男人啫啫嘅紀錄。呢種魚仔係不折不扣嘅吸血鬼,專寄居喺啲大魚嘅腮部,吸食寄主嘅血液。佢地會襲擊人類,其實只係出於誤會啫。佢地之可以揾到大魚嘅腮部,完全係因為追蹤到魚腮排出嚟嘅化學物質,簡單啲講就係尿味。而啲男人之所以中招,就係因為佢地喺水裏面疴尿。如果俾呢種魚捐咗入啫啫,都咪使旨意掹得番出嚟,因為佢地身上有倒刺。而且捐咗入啫啫之後,仲會喺裏面爬呀爬,拮到條尿道損晒,嗰種痛法真係難以想像,只可以話係男人最痛!如果想知多啲,可以睇吓呢條片,或者呢條片

雖然有先例可援,不過我就覺得黃鱔男單嘢好有問題嘞。我唔信嘅係黃鱔男自述嘅事發經過,因為實在疑點重重。

大陸有溫泉用魚仔幫人去死皮,我喺電視都睇過,不過人地啲魚仔成千上萬,場面都不知幾壯觀。條友用嗰區區十幾條黃鱔仔,又起到幾大作用呢?而且嗰啲其實係鱔苗,相信一定比魚仔難揾,佢又點解要捨易而取難呢?仲有,黃鱔鬼死咁核突,周身潺兼夾其腥無比,去過街市買餸嘅都一定見知道,萬鱔攢動嘅場面究竟有幾恐怖!好難想像一個鍾意美容嘅人會諗到與鱔共浴呢個主意。

更令人懷疑嘅係條鱔點解會捐到入佢條啫啫。雖然話捐窿捐罅係黃鱔嘅天性,不過啫啫明明係突出物,條鱔根本冇可能諗到嗰度會有個桃源秘洞,要捐都捐後面個蓬萊仙洞啦,咪當條鱔冇腦先得格。而且叫得做秘洞,個洞口自然係隱蔽異常,就算知道嗰度有個洞,如果唔係有人引路,條鱔肯定揾成世都揾唔到個入口啦。Candiru之所以能夠直搗黃龍,都完全係因為有尿味導航咋。仲有,同新政府總部啱啱相反,桃源秘洞嘅狀態係「門常關」,如果條鱔要入去,唯一嘅方法就係硬闖。講真,要硬闖都唔係咁容易,個洞口又唔係豆腐渣工程,絕對唔會一攻即破。條友亦冇理由感覺唔到下面俾人強攻,要等到淪陷咗先至知道。事發後仲要拖咗大半日先去醫院,好明顯係有啲難以啟齒嘅嘢唔想同人講。不過咁,唔使一日就諗到呢條「黃鱔浴美容」嘅極品絕橋,其實佢都算好醒架喇!

基於以上種種唔合理嘅地方,我可以好肯定黃鱔男係講大話,其實係佢自己捉鱔入啫啫!搞到一膀胱都係潺,絕對係咎由自取!最慘都係條小黃鱔,無啦啦做咗情趣玩具,俾人蹂躪完仲要葬身膀胱!雖然話生為黃鱔就注定要遭人毒手,最後歸宿係大腸抑或膀胱其實冇乜分別。不過今次慘遭淫辱嘅只係一條鱔苗,都未有機會溝女(或仔)就死於非命,真係天理何在!我喺度向呢條英年早逝嘅黃鱔致以最深切嘅同情,希望佢喺天國可以得到安息!弊嘞,用咗「英年早逝」添,會唔會無意中得罪咗下任凸首呢?

唔知國內有冇愛護動物協會呢類組織呢?如果有嘅話,佢地好應該查吓呢單畸屎,唔好俾啲強姦黃鱔嘅人逍遙法外!咪住,照正嚟講應該係條鱔強姦個男人喎,咁點算呢?黃鱔男被強姦,而條鱔就被迫強姦,兩個都係受害者,原來呢單畸屎係冇得搞架!

後記:
為咗做資料蒐集,喺網上摷吓「黃鱔男」,結果俾我揾到另一單嘢。呢單嘢仲過癮,直頭笑到我癲咗咁滯!案中男主角玩到冇嘢好玩,竟然捉鱔入忽忽!不過情節上同上面單嘢如出一轍,我就唔講咁多嘞,有興趣嘅就自己去呢度睇啦!


2011年9月13日星期二

黑暗一天

擾攘多時嘅廣播處長遴選終於揭盅,政府台將會由政務官空降接管。政府台件白頭婆即刻走出嚟發炮,佢批評咁係外行領導內行,又話係嚴重挑戰港人言論自由嘅核心價值,係政府台「最黑暗一天」。記協隻肥豬乸當然唔會執輸,話咁做係要將政府台變成「官媒」。哈哈,雙醜合璧,肯定天下無敵!喺電視見到呢兩隻嘢,通常都會令我有啲食慾不振嘅感覺架!

講真,白頭婆咁嬲,無非係因為佢地班自己友上唔到台長呢個筍位啫!其實喺政府架構裏面,啲首長級崗位成日亂咁調,所謂空降根本就司空見慣。而外行領導內行,亦唔係乜嘢新鮮事物,唔需要大驚小怪。現任財爺讀建築出身,喺政府做過嘅瓣數就極其唔啦更,包括海關、規劃地政局、工商及科技局、同埋特首辦。而孫公呢個老油條,原本做開房屋及規劃地政局,又無啦啦走咗去搞教育。如果話咁做有問題,要怪就怪英國佬啦,留番啲咁優良嘅傳統!不過我都反對政府台由政務官掌管,因為呢個台一早就應該私有化,如果冇人肯買嘅就乾脆摺埋佢!

係人都知,全世界嘅政府運作,都係貫徹住高成本低效益呢個方針。早前審計署就插過政府台行政混亂,製作效率奇低。事實上,政府台嘅員工貴為公務員,又點可以期望佢地有商業機構一樣嘅效率呢?問題係,究竟點解香港會需要一個公營廣播機構。

政府台係香港第一間廣播機構,為市民提供免費嘅資訊性同娛樂性廣播節目,可以話係造福百姓。不過隨住免費嘅商營廣播同電視頻道陸續出現,政府台嘅角色已經變得冇乜重要性。冇錯市民係多個選擇,不過唔好忘記,呢個選擇其實係要大家夾錢架。政府台嘅解說係,佢地唔受市場導向影響,因而可以製作一啲照顧小眾口味嘅高質素節目。

首先,要大多數人夾錢照顧少數人嘅口味,咁算唔算公平先。而且,就算冇咗政府台,亦唔表示呢類節目會就此消失,啲商營廣播機構都唔係話一定要有超過五成人鍾意先會製作嘅。冇咗政府台就正正可以釋放呢啲空間出嚟,俾私營廣播機構有機會製作更多元化嘅節目。如果小眾到全港只得幾丁友鍾意嘅嘢,又係咪應該用公帑嚟做呢?

講到節目質素,收音機我好少聽,不過政府台電視部嘅製作就成日都有睇,的確拍得唔錯。鬼咩,班友根本唔使理成本效益,如果咁都拍得唔好,我只可以講一句:即刻同我拖出午門斬首!我話拍得好嘅,主要係啲軟性節目。如果涉及時事或者政治嘅節目,我就覺得好有問題嘞。凡係有關社會問題嘅嘢,政府台都拍得鬼死咁感性,富有電影感嘅畫面同配樂,好容易令觀眾產生代入感。純以觀賞角度嚟講,絕對唔可以話拍得唔好。就好似電視劇咁,啲煽情嘅師奶劇梗係最受觀眾歡迎啦。但係政府台嘅時事節目,好多時都只係將一啲社會現象以感性方式呈現觀眾眼前,而背後嘅成因同解決問題要負出嘅代價就好少觸及。以資訊性節目嚟講,一味追求表達方式嘅可觀性,而忽略資訊嘅全面性,究竟係咪捨本逐末呢?又或者,只係提供片面資訊,會唔會根本就係政府台高層嘅意圖呢?

睇番政府台嘅論政節目,立場可以話係一面倒傾向民主陣營,總之就凡係政府嘅嘢都插。埋晒啲無厘頭嘅人嚟大放厥詞,根本就冇諗過要容納多元化嘅聲音。好似嗰件吳X森咁,淨係聽到佢把聲都已經令人唔耐煩,點知條友仲要搞嘢到喺電視扮埋女人,真係睇到眼火爆!又好似嗰件喺各大小保衛(或反對)乜乜物物嘅示威場合都出現嘅光頭仔林X,都埋嚟主持健康資訊節目。話政府台喺編採上冇政治取向,我就打死都唔信嘞!

徐大炮就曾經炮轟政府台,話佢地食碗底,反碗面。當然啦,好係白頭婆之流,自然會走出嚟用乜嘢編採自主做擋箭牌。講真,究竟乜嘢係編採自主呢?其實好簡單,咪依決策層嘅取向行事囉。作為公營廣播機構,政府台唔使理市場方向,又拒絕政府監管,自然係想做乜都得啦。所謂自主云云,其實同佔山為王冇乜分別!究竟香港係咪需要一班咁嘅廣播山大王呢?既然政府台係用公帑營運,佢地理應為所有港人服務,不過事實又係咪咁呢?

根據一般認知,香港支持民主陣營同支持建制陣營嘅人數,大概係六四之比。咁點解政府台嘅立場只係顧及支持民主陣營嗰六成人,唔通支持建制陣營嗰四成人唔使納稅?我都有納稅架,點解喺政府台裏面竟然冇一個代表我發聲嘅人呢?所以我話政府台應該私有化,由市場決定嗰四成觀眾或聽眾係咪需要照顧埋。當然啦,白頭婆之流一定會反對,嗰啲乜乜理念云云,其實只係晃子,真正原因係要保住佢地公務員嘅金飯碗。以班友慢工出細貨嘅作風,喺商營傳媒又點生存到呢?如果話是但台係大股東俱樂部,咁政府台就肯定係公務員嘅冇王管遊樂場!

由政務官接掌政府台,我就覺得唔會有乜嘢大作為,想撥亂反正睇怕都係無能為力。但係啲記者都不知幾興奮,向嗰位候任台長窮追猛打,一於要打到佢露出原形。據日月報報導,記者問咗11個問題,候任台長都係以「政府台約章」作答,結果記者就封咗佢做「人肉錄音機」。最後記者問佢有冇聽過「一切從音樂開始」同「左右大局」,佢嘅答案係「我有聽過很多港台節目」。記者就喺報導裏面話佢當堂露底,以為嗰兩個節目係政府台嘅製作。

香港記者嘅質素有幾高,睇吓呢篇報導就知嘞。報導裏面冇列出嗰11個問題,讀者又點知嗰啲問題係咪來來去去三幅被,明明係同一樣嘢都要分開11次問呢?咁就話人係「人肉錄音機」,真係冇乜說服力囉。而且候任台長話佢有聽過好多政府台嘅節目,根本就唔代表佢以為記者問及嗰兩個節目都係政府台嘅製作,記者嘅推論係犯咗邏輯上嘅謬誤。例如有人問我對六四嘅睇法,我答話今日天氣唔錯。如果話我答得九唔搭八,我唔會辯駁。不過如果話我懵到連日子都唔知,以為今日係六月四號,咁就分明係老屈啦!早排記協隻肥豬乸投訴話香港記者人工偏低,驚住會影響新聞質素喎。不過睇吓啲記者嘅水平,唔通真係值得用十萬九千七請佢地?

講起隻肥豬乸就火都嚟埋,就算已經寫咗兩千幾字都欲罷不能,一定要鬧埋佢先安樂!條八婆成日講乜嘢社會公義、編採自主、新聞自由,但係做嘅就係另一套,雙重標準到冇人有。佢又話要監察政府,不過就永遠對傳媒啲衰嘢視而不見。啲狗仔隊侵犯他人私隱,偷拍藝人家居裸照,唔通條八婆覺得可以接受?愛國報女記者採訪時俾長毛鬧係狗,走去佢出頭,佢居然唔理人地。唔通淨係民主陣營傳媒嘅記者先應該受到尊重,愛國報嘅記者就豬狗不如?

講到尾,白頭婆同肥豬乸其實係一 丘之貉。佢地用新聞自由同編採自主做包裝,掩飾自己嘅私心。有佢地喺度也文也武,香港就真係每一日都係黑暗嘞!


2011年9月11日星期日

今日一分鐘

奧巴馬都算叻仔喇,趕得到喺911事件十周年之前做低拉登。佢話嗰次行動係反恐戰嘅重大勝利,令公義得到彰顯。啲美國佬仲興奮到上街慶祝,喺時代廣場載歌載舞,直頭開心過巴西嘉年華。不過佢地係咪開心得太早呢,學陳姣文話齋,辣低咗一個拉登,伊斯蘭世界仲有千千萬萬個拉登!題外話,其實阿蕉應該考慮去美國發展,因為嗰度啲人都好天真好傻,實唔會有人歧視佢架!

喺高呼公義得到彰顯嘅同時,啲上街慶祝嘅美國佬又有冇認真諗過點解會有911事件呢?佢地可能唔會明白,對於好多伊斯蘭世界世界嘅人嚟講,911正係伸張公義嘅一日!美國佬嘅中東政策、用國際公義嚟做掩飾嘅霸權主義,先至係導致911事件嘅主因!

對於美國佬嘅強權欺壓,中東佬豈會有唔嬲之理?面對美國佬嘅強大軍力,連號稱世界唔知第幾大軍事強國嘅伊拉克都不堪一擊,啲中東佬梗係唔會硬撼啦。恐怖襲擊正正就係一種低成本高效益嘅報復手段,試問人地又點會唔用呢?

恐怖主義恐怖之處在於防不勝防,任何一個老弱婦孺都可能係人肉炸彈,隨時可以將附近嘅人炸到血肉橫飛。咪以為恐襲一定要需要靠乜嘢高科技或者強大嘅組織力,其實只要有人唔怕死就有得搞。一個炸彈、一枝槍、一把刀、甚至一樽汽油,一樣可以好攞命,總之一個夠本,兩個有賺。對於啲恐怖分子嚟講,肯定係賺多蝕少!

我當然理解啲人因乜要搞恐襲,不過明白還明白,我點都係堅決反對呢種行徑,無論背後有乜嘢原因都好。首先,恐怖主義令人人自危,施襲者絕對唔會得到第三者嘅認同,只會令自己被孤立,對要爭取嘅嘢一啲幫助都冇。對於施襲者嚟講,所做嘅只係一種發洩,除咗臨死前嘅一刻快感,根本就別無得著。而且,恐襲會禍及無辜,炸彈冇眼,連自己友都會炸到粉身碎骨。好似911死難者當中,其實有好多都係伊斯蘭教徒。當然啦,啲恐怖分子會話爭取公義梗要負出代價,一定會有人犧牲。又係題外話時間嘞,其實班V煞廢青嘅思維真係同啲恐怖分子好相似喎。唔知佢地有冇諗過去阿富汗或者伊拉克朝吓聖呢,跟塔利班或者阿爾蓋達學吓嘢,肯定會對佢地嘅實戰技巧大有裨益架!

講到尾,拉登都只係一個人,絕對係恐怖主義嘅全部。如果以為對冧咗佢就可以天下太平,咁就未免太天真喇!只要呢個世界仲有霸權主義,只要有人唔識得尊重生命,恐怖主義自然唔會消失!

講到呢度,就等我用以下一分鐘為所有911死難者默哀!


2011年9月9日星期五

丈八金剛

警告:本文內容涉及不良用語,或會引起讀者反感,敬希留意!

早排喺校長嗰邊提過「LP」呢個縮寫,話喺台灣有特別含義。時下網上充斥住好多類似嘅縮寫或替代用語,成日睇到人莫名其妙,真係「丈八金剛,摸不著頭腦」!

就以「LP」為例,原來係「卵葩」英文拼音嘅縮寫,而「卵葩」喺閩南話就解作陰囊。如果唔係台灣人,或者唔識閩南語,真係隨時唔知啲友講緊乜春!

有理由相信,網上縮寫嘅興起同上世紀嘅online chatting有好大關係。嗰時用modem上網,速度好似蟻躝咁慢唔在講,而且仲秒秒鐘都係錢,當然係打得越簡短越好啦,結果啲語句就搞到成串密碼咁。雖然係咁,但係就唔算好大問題,因為要解密一啲都唔難。好似「IC」、「CU」、「U2」、同「B4」,就分別係「I SEE」、「SEE YOU」、「YOU TOO」、同「BEFORE」嘅縮寫,其實都相當STR8 4WARD吓。不過後來又出現咗一啲冇咁簡單直接嘅縮寫,要解密就需要更多想像力。例如「LOL」同「LMAO」咁,就諗極都諗唔到係代表啲乜。當然啦,睇番上文下理,其實都知道係好好笑咁解,但係就點都估唔到原來全寫係「LAUGH OUT LOUD」同「LAUGH MY ASS OFF」。

另外縮寫亦有用作禁忌語句(主要係粗口)嘅替代詞,可以避免直接寫出一啲帶有冒犯性嘅嘢。例如「WTF」,相信大家都知道即係「WHAT THE FUCK」。有樣嘢好搞笑,原來世界跆拳道聯盟(World Taekwondo Federation)嘅官方縮寫都係WTF!哈哈,真係what the fuck!

隨住網絡高速發展,呢股縮寫風氣亦好快就蔓延到用中文嘅網上族群。尤其是大陸,啲人主要用拼音輸入法,咁用英文字母縮寫嚟代表某啲字詞就變得好理所當然。喺啲網上論壇,最常出現嘅縮寫都睇怕都應該係「LZ」同「LS」,即係「樓主」同「樓上」。但係好奇怪,「版主」就比較少用「BZ」代替,反而用「斑竹」仲多啲。又好似「MM」同「GG」,就係「妹妹」同「哥哥」,如果知道呢啲縮寫嘅規律,其實一啲都唔難理解。反而台灣常用嘅「美眉」同「葛格」,我自己就覺得好難估嘞。「美眉」都好啲,起碼比較形象化。「葛格」就真係點都估唔到,因為粵語人睇中文,點都唔會用普通話(或國語)嚟思考。

早排大陸嘅網上論壇出現咗一種變種返祖現象,啲人又開始唔打英文縮寫,改打番中文,最具代表性嘅係「蘭州」同「蘭州燒餅」。最初真係睇到一頭霧水,要跟番上文下理,經再三推敲先諗到,原來係「LZ」同「LZSB」咁解。啲人搞嘢到將呢兩個英文縮寫轉番做完全唔啦更嘅中文,直頭係阿茂整餅!無啦啦將「樓主傻逼」變成「蘭州燒餅」,真係無聊到冇朋友!至於個「逼」字點解,相信都唔使多講嘞。呢個字嘅經典用法仲有「牛逼」,縮寫就係「NB」。

講開「逼」呢個字,又順便提吓「雞雞」,即係香港人講嘅「啫啫」。喺華文社會,相信有上過網嘅人都知道「JJ」已經成為「雞雞」(或「啫啫」)嘅代名詞,不過就有某鼻屎國男歌星同香港性感小花都不約而同用呢個縮寫做自己嘅暱稱,都咪話唔搞嘢!

用英文縮寫代替中文禁忌字詞亦係自古有之,相信最早出現嘅可能係用「TMD」代替國罵「他媽的」。除咗唔使講得咁直接,另一個作用係可以避開國內嘅網上過濾。呢類禁忌縮寫國內仲有好多,例如「CNN」(操你娘)、「CNNN」(操你奶奶)、「GNN」(幹你娘)、同「GNNN」(幹你奶奶)。哈哈,講開又講,國內真係有好多人向CNN講「CNN」架!

有時喺一啲網上群組,啲人會有自己嘅一套替代用語,如果唔係圍內人,根本就唔會知佢地噏乜。好似喺啲師奶論壇,「C6」、「C9」、「62」、同「99」就分別代表「死佬」、「師奶」、「老爺」、同「奶奶」,試問一個路過嘅麻甩佬又點會睇得明呢?我就覺得裏面隱含住一啲排外心態嘞。

另一個經典例子就係班高登仔,佢地唔止思維與眾不同,連啲網上用語都別樹一幟。有啲已經發揚光大,傳遍網絡,係粵語人都識,例如「ON9」(戇鳩)同「9UP」(鳩噏)。我就曾經俾個蒙面人留言話「9UP」嘞,不過估計呢條友並唔係高登仔。而另外一啲就更加無厘頭,雖然暫時仲未係咁多人知,不過蔓延開去都係遲早嘅事。好似「Hi」代表「屌」、「Hi Hi」代表「仆街」、「向左走向右走」代表「撚」、而「Hi Auntie」就代表嗰句問候人娘親嘅四字真言,真係佩服班友嘅想像力!

其他嘅都算嘞,用「向左走向右走」代替「撚」先搞嘢。原本只係打一個字,而家變成要打六個字,而且嗰六個字又另有字面意思,令人好難一眼就睇得明成句講乜。例如我咁講:「Hi,班Hi Hi真係ON向左走向右走79到冇朋友!」,大家又知唔知道我噏緊乜?當然啦,係我自己覺得有問題啫,可能啲高登仔腦部發育異於常人,理解能力與眾不同呢!

補充:
「ON9」同「9UP」唔一定係源自高登,不過啲高登仔就成日都有講。事實上,佢地差唔多句句都有粗口架啦!

2011年9月7日星期三

斷指故事

警告:本文內容涉及血腥情節,可能引起讀者不適,敬請留意!

前日喺日月報睇到單花邊新聞,血腥之餘仲幾搞笑添。話說長沙有一對80後小夫妻,半夜三更因為啲瑣事嗌大交。男嘅激動起上嚟居然攞刀斬咗自己隻手指尾,而女嘅亦不甘示弱,即刻用刀切咗自己隻食指,一於大番個死佬。跟住佢地齊齊送咗去醫院做接駁手術,仲住喺同一間病房,瞓喺隔籬床,不過就互不理睬。事後佢地竟然冇為自己做嘅傻事感到後悔,女方仲落力數臭男方呃佢添。

家暴事件香港日日都有,本來冇乜特別,不過多數都係攞刀斬對方,自殘就比較少見。就算有自殘事件,對方嘅反應通常都係報警或者叫白車,用同樣方式嚟鬥大,真係少之又少。好玩唔玩,竟然玩斬手指,唔知嗰對男女有冇諗過,冇咗隻手指有幾大鑊。其他唔講,淨係打字已經夠麻煩。冇咗左手尾指,AQZ呢三個字母就打唔到嘞!冇咗左手食指仲大鑊,FGRTV都打唔到,比冇咗尾指多兩個添!

斷手指呢家我都試過,唔止唔好玩,更唔止係一時之痛,影響可以係一世咁長架!當然啦,我隻手指唔係自己切,更唔係俾人斬,其實係喺廿幾年前一次單車意外撞斷嘅。斷嘅地方係左手食指指尖嗰節中間,基本上係半隻指尖甩晒咁滯,只得一邊有少少皮肉連住。人地話十指痛歸心,不過好奇怪,撞嗰刻竟然唔覺得痛。之後去到急症室,都只係有啲隱隱痛,而啲血又冇吧吧聲咁流,相信同一般人對於斷手指嘅想像有好大出入。姑娘幫我檢查傷口嘅時候掂到喺斷口凸咗出嚟嘅指骨,就問我痛唔痛。咁我唔覺得特別痛咪話唔痛囉,點知佢細細聲同隔籬個姑娘講話我梗係痛到short咗,真係俾佢激死!

真正痛嘅係做手術嗰時,唔係,應該話之前。手術前要先喺手指兩側根部各打一枝麻醉針,要拮到入骨裏面,真係痛到入心入肺!仲有,醫生喺麻醉藥未完全生效之前就開始搞我隻手指,嗰時先體會到乜叫做十指痛歸心!

因為指尖嘅骨碎開咗幾塊,要打枝鋼針入去固定,等啲骨慢慢生番埋。枝鋼針一直打到指根嗰節,搞到成隻手指唔可以屈曲。而喺指尖就凸咗兩三mm出嚟,真係鬼死咁唔方便,一來驚碰到會痛,又驚會拮親自己。後來過咗一排先發覺原來枝針碰到係唔會痛架,咁就開始用枝針四圍拮人,隻手指無啦啦變成攻擊性武器添!

除咗枝鋼針,煩嘅仲有其他。傷口唔濕得水,醫生又話盡量唔好垂低隻手,真係勁唔方便!而且頭嗰幾日隻手指隱隱作痛,好難瞓得著。不過咁,好彩瞓著咗又唔會痛醒。

過咗幾個月,啲骨已經生番埋,可以掹針嘞。初初我仲驚會痛,正喺胡思亂想之際,醫生已經掹咗枝針出嚟,完全睇唔到佢點出手。只見指尖有個無底深洞,感覺好怪異,再過幾秒啲血先湧出嚟。再睇清楚啲,指尖嗰節短咗成四分一,而且出現明顯變形添。因為甲床受損,新生出嚟嘅指甲變成凹凸不平,相當肉酸吓。仲有,從側邊睇,指尖竟然成45度角上翹,令到我之後成日俾人笑蘭花手!不過咁,我都冇去諗係咪個手術做得唔好,其實駁得番隻手指已經好好架喇!做完手術醫生已經同我講,雖然節手指係駁番,但係如果供唔到血去指尖,啲組織就會壞死,到時就要切咗佢。

之後再去覆診,醫生見新生出嚟嘅指甲咁肉酸,竟然建議我切咗節指尖。呢個黃綠,講都唔知經唔經大腦架!煩咗幾個月隻手指先生番好,有乜理由又走去切咗佢喎,而且諗起嗰兩枝麻醉針都怕怕啦!最重要嘅係,節指尖喺度,起碼可以保住隻手指嘅功能,肉酸啲又有乜所謂啫!個黃綠都唔知係咪嫌公立醫院啲醫生唔夠忙!

雖然話隻手指嘅基本功能保得住,不過指尖嘅感覺就差唔多冇晒,因為大部分神經線都斷咗。神經線可以再生,但係速度就好慢。就算過咗幾年,指尖都仍然感覺唔到尖同鈍嘅分別。雖然掂到冇乜感覺,但係如果大力撞到硬物就特別痛,而且痛得特別耐,都唔知點解。一直要到大約二十年後,指尖嘅感覺先大致恢復。其實到今日,嗰隻手指嘅感覺仍然同正常嘅手指有些微分別,可能永遠都係咁架喇。

又講番嗰對鬥大夫妻,我當然唔知佢地因乜嗌交,不過點都好,用自殘嚟鬥大就肯定蠢到無倫!就算佢地嘅手指生得番(呢樣其實唔一定),功能上嘅損害唔多唔少都實會有。仲有,手指上嘅疤痕,手指嘅遲鈍感覺,會一世跟住佢地,令佢地日日都記番起發生過一件咁唔開心嘅事,永遠冇辦法忘記!咁又何苦呢!

2011年9月5日星期一

外傭變港人

2011.09.03 - 外傭變港人

播出日期: 2011.09.03 (六)

根據現行入境條例,外傭在港工作及居住滿七年或以上,是不會獲得居港權,及成為香港永久居民。不過,有外傭根據基本法第二十四條,在港居住七年以上,可成為香港居民,向法庭提出司法覆核,挑戰入境條例。有政黨及市民擔心,案件一旦勝訴,會令超過十萬名在港工作滿七年的外傭,也有資格申請居港權,對香港社會的住屋及福利造成沉重負擔。

香港外傭政策自七十年代開始,至今約有近三十萬菲傭及印傭在港工作,令到本港家庭的女性勞動力獲得釋放,對香港經濟發展和生活水平有一定貢獻。不過,由於基本法條文的含糊,倘若司法覆核敗訴,政府會否促請人大釋法?社會各方對外傭變港人,又有甚麼看法?

記者:李賢哲

以上係是但台最新一集「新聞透視」嘅內容撮要,講嘅係近日港人最關心嘅外傭居留權問題。呢個題目之前已經寫過,本來冇乜番炒嘅必要。不過節目裏面有啲好白痴嘅,又訪問咗個好討厭嘅人,唔攞嚟笑吓同鬧吓硬係覺得唔舒服!

節目咗個大三學生試吓做五粒鐘家庭傭工,體驗吓佢地嘅生活。呢位小妹妹竟然唔知蒸氣燙斗係乜,搞到雞手鴨腳,連燙衫板都整燶埋。佢事後大叫辛苦,試過先知道原來家傭唔易做。真係好搞笑,講真做乜都辛苦架啦,警察、消防、掃地、企街、侍應、看更、廚師,有邊樣唔辛苦先!體驗家傭生活呢部份,反映嘅其實係另一樣,就係啲港孩有幾白痴!成廿歲人,唔使樣樣都要親身試過先知啩。睇呢位溫室小公主改個英文名就知啦,竟然叫自己做Bugs(其實係Bux,不過聽起嚟就同Bugs一樣),真係同嗰啲叫自己做Pussy嘅女人有得揮!

外傭辛苦我都知,而且唔單係工作性質方面,更係因為佢地要孤身飄洋過海,擔起成頭家。佢地對香港嘅貢獻亦無可否認,呢點相信唔使多講。不過如果因為咁話係香港欠咗佢地,就點都講唔通。首先,雖然佢地喺香港只係廉價勞工,不過匯番鄉下嘅錢就足夠佢地買田買地,俾到啲家人過住相對富足嘅生活。香港需要佢地嘅廉價勞動力,佢地亦因而改善到家人嘅生活,正係各取所需,互無拖欠。而且住滿七年都唔會有居留權,呢個係入境條件,佢地一早就知,覺得唔公平嘅可以唔嚟。呢啲係你情我願,從來冇人迫過佢地,千祈唔好當香港係奴隸社會。事實上,如果唔係有特別限制,政府根本冇可能會批個工作簽證俾佢地。連工作簽證都冇,又何來有機會住滿七年呢?

如果外傭成功爭取到居留權,對香港會有幾大影響,而家都好難講,但係就已經令到部份港人好擔心。早前狀棍黨班政棍就企圖淡化單對香港嘅影響,話仲有乜四大關卡,叫啲人唔使咁驚。呢班友明知自己踩咗屎,就求其噏住啲氹吓人,真係無恥到無倫!班友唔係一向最痛恨政府用行政手段打壓佢地堅持嘅法理原則嘅咩?!而家竟然提到乜四大關卡呢啲行政手段,究竟佢地係講緊人話定狗話?!講真,如果外傭勝訴,四大關卡嘅防禦能力亦好成疑,仲會觸發無窮無盡嘅司法覆核。係喎,到時咪又益晒班狀棍囉!

啲政棍又話,就算外傭真係有居留權,都唔表示佢地嘅家人會湧晒嚟香港,仲批評某政黨估計嘅數字係靠嚇。唔好唔記得,香港嘅外傭主要係嚟自菲律賓、印尼、同泰國。呢啲國家嘅政治環境係點,相信都唔使多講,有乜風吹草動,隨時會出現好多難民。如果啲外傭成為香港人,政府可唔可以唔俾佢地嘅家人嚟先!

言歸正傳,節目又訪問咗大班。條友講得好直接,話自己只睇平等同公義,唔理乜人口問題,話知你香港陸沉啦。呢條友,真係想鬧佢好耐架喇。喺電台開咪,大聲夾惡唔在講,仲要公然打壓言論自由。啲聽眾打電話入嚟,啱聽嘅就講幾耐都得,唔啱聽嘅就即刻收人地線。最經典嘅都係喺節目鬧人狗官,公然喺大氣電波示範乜叫做人身攻擊。除咗幫啲成日覺得自己被剝削聽眾隔空打飛機,等佢地得到少少心靈慰藉,真係諗唔到條友對香港有乜貢獻!仲有,聽到佢講「糠港」就火都嚟埋,不知幾刺耳,直頭想兜巴掌佢嘴!係呀,「糠港」人唔講公義架,死咗要落地獄,就等大班一個上天堂啦!不過喺天堂會好肚餓,因為嗰度唔會有元寶蠟燭「糠」食架!

差啲唔記得講添,條友仲提到釋法,話係法字頭上有把刀喎。講開釋法,又要拉埋大律屎公會班狀棍落水嘞。大家都知,班狀裩最憎釋法,話係破壞香港司法獨立,有損香港法治。咁又奇嘞,釋法條文明明寫咗喺基本法裏面,要睇住基本法做嘅狀棍又有乜理由可以反對呢?如果班狀棍覺得釋法條文有問題,點解又要為五斗米折腰,點解唔乾脆劈炮呢?講到尾,班友唔想釋法,其實係山頭主義,唔想自己嘅權威被挑戰啫。如果以時下流行嘅詞彙嚟講,呢啲就係法律霸權!而且,班友賺嘅唔係五斗米,而係五斗金,佢地又點捨得唔撈!班友呢排聲氣多多,狂插政府,但係對啲反政府嘅不法暴力行為就粒聲唔出,睇嚟佢地嘅法治精神都好有選擇性。其實講乜法治精神丫,班友自己咪一樣政治掛帥!

最後,唔該嗰啲人權公義大過天嘅人睜大雙眼,睇清楚佢地嘅偶像,身為國際人權警察嘅花旗國係點處理外傭居留權先啦!

補充:
節目本身只係中規中矩,談唔上有乜啟發性。不過是但台有樣好,就係內容唔會一面倒,通常會包括正反雙方嘅觀點,等觀眾自己判斷。唔似政府台,講親社會問題都有既定立場,資訊極其片面。通常都只係講出個現象,而唔會提問題背後嘅成因,更唔觸及解決問題要負出嘅代價,仲要拍得鬼死咁感性添!無可否認,以觀賞角度嚟講,政府台啲的確拍得唔錯,但係就成日都有引導性,會影響啲思想單純嘅人嘅判斷。其實我都想鬧佢好耐架喇,不過遲啲有機會先講啦。

2011年9月3日星期六

由演唱會講起

「我睇開陳逆迅演唱會, 你無啦啦叫我去睇林瘋!」

喺香港要極速爆紅,原來一啲都唔難,只要有創意就得。一個普通到唔恨嘅肥仔(跌個招牌落嚟都隨時責死十幾件嗰種),竟然可以一夜成名,就係因為講咗上面嘅警句。

話說肥仔睇緊陳逆迅嘅演唱會,點知佢偶像無啦啦發老脾,唱到一半竟然辭演。佢臨走前仲講話會開過另一場演唱會,叫啲粉屎一定要大聲啲encore。主辦單位為免出現冷場,又唔想勞民傷財,就建議由支持度僅次陳逆迅嘅林瘋頂上,此之謂遞補機制。

肥仔迷陳逆迅已經迷到short short地,完全唔理佢係因為中途坐地起價,同主辦單位傾唔掂數先至辭演。對於遞補機制嘅安排,肥仔覺得唔可以接受,係剝奪咗佢嘅選擇權利,一於要反對到底。其實佢都算斯文喇,只係遊吓街、舉吓牌啫。而另一啲粉屎就激得多,班友走去主辦單位嘅諮詢大會踩場,初則叫囂掟,繼而拆屋打人,絕對深得佢地偶像嘅真傳。

對於遞補機制,支持同反對嘅聲音都有。反對者只著眼於選擇權利,而支持者就主要考慮資源浪費同辭演人士嘅態度問題。其實雙方著眼點唔同,亦各有理據,並冇出現一面倒嘅情況。如果任何一方認為自己擁抱真理,唔肯坐低傾之餘仲要用武力威嚇對方,又點算係文明社會嘅應有態度呢?!

雖然我都覺得陳逆迅中途辭演係不負責任嘅行為,而且搞過另一場演唱會又浪費資源,不過我並唔認為遞補機制係治本嘅方法,真係唔搞好過搞。除咗會引起啲死硬粉屎激烈反彈,亦會令一啲人權大過天嘅教條主義者不滿。

偶像嘅不負責任行為,其實源自粉屎嘅不負責任態度。如果唔係有粉屎嘅支持,啲偶像想玩都冇得玩。單純針對辭演再演嘅措施,唔能夠解決根本問題之餘,仲會引起反效果,似乎係得不償失。

忽然又諗起另外一樣完全唔啦更嘅,但係就可以解釋到呢種不負責任嘅心態。試過任食火鍋嘅都知,好多人鍾意叫到成檯都係,但係最後食剩嘅仲多過落咗肚嗰啲。食剩嘅當然係送晒去堆填區啦,你地話幾浪費呢!以前好多火鍋店都會貼出告示,話剩番嘅火鍋料要逐兩罰錢。而家呢類告示已經少咗好多,亦未見過有人切實執行,因為根本執行唔到。

啲客俾咗錢,梗係認為自己有選擇權利,鍾意點叫都得。叫少咗只係會令火鍋店賺多啲,而叫多咗對自己又冇任何影響,梗係唔會益啲無良商人啦。至於話食剩要罰錢,一來惹人反感,同趕客無異。而且所有制度都有機會俾人鑽空子,只要將食剩嘅倒晒落鍋底煲湯,咁就罰無可罰啦。

至於啲火鍋店,梗係圍過條數,計埋食剩咗嘅都仲有得賺啦。喺任食制度下,個個都爭取自己嘅最大利益,結果就皆大歡喜。講到浪費,喺個人層面根本就唔適用,要從宏觀角度先睇到。對於地球資源嚟講,任食制度真係造成好大浪費!不過又有幾多人會為咗珍惜地球資源而犧牲個人利益呢?!

同樣道理,偶像要玩辭演再演,啲死硬粉絲一定支持到底。雖然話要嘥錢搞多場演唱會,但係主辦機構係大家夾份營運嘅,錢係已出之物,用剩又冇得回水。咁豈有唔搞之理,最好就搞多十場八場添。

講到尾,問題唔係要點防止或者懲罰啲偶像玩,而係點先可以令啲死硬粉屎明白,佢地嘅偶像係浪費緊整個香港嘅資源!好不幸,有啲人係永遠唔會講得佢地明,又或者,佢地根本就冇打算聽其他人講啲乜!