2011年11月7日星期一

自嚐惡果

今屆區選真搞笑,癲狗長毛班友話要狙擊禽流黨,結果自己幾乎全軍覆沒,淨係得淫民力量攞到一席。連佢地幾個重量級人馬,包括長毛、大舊衰、同桃君痕,都以大比數輸俾對手。學阿姐話齋,真係「超低能,超搞搞震」!

最核突都係件大舊衰,點名話要狙擊何俊男,點知反而輸對方九條街。原來癲狗講「票債票償」都好有道理,因為真係有人俾選民用選票懲罰,不過要償嘅佢地自己啫。其實班友嘅狙擊行動,根本就係一敗塗地。正如高達所講,佢自己同狙擊手嘅得票加埋,都仍然要輸俾建制派對手。咁嘅所謂「票債票償」行動,完全係得啖笑囉!

當然啦,班友嘅狙擊行動,根本就唔係為咗乜嘢民主理念,其實佢地係想搶禽流黨客啫。搞到泛民一鑊泡,對班友絕對係好事,因為實會有一啲燒壞腦嘅廢青轉投佢地陣營。至於會唔會對泛民整體形勢有不利影響,咁就真係話知你喇,橫掂班友從來都冇諗過要做執政黨。癲狗長毛嗰幾隻嘢,喺垃圾會議員當中民望長期包尾。咁又點啫,喺比例代表制,其實要當選都唔一定要好多票。只要班友箍得實少數嘅激進廢青,佢地嘅尊貴議員就肯定長做長有啦。

癲狗長毛嘅思維,其實一啲都唔難理解。反而狀棍黨呢,我就完全唔知佢地諗乜。一個以專業人士為骨幹嘅政黨,走嘅竟然會走激進路線。如果要爭廢青客,佢地根本唔係癲狗長毛嗰皮。最近嗰兩單嘢又連基層都得罪埋,真係唔知佢地想點。所以就即刻現眼報嘞,三個核心成員都齊齊出局,真正體現咗乜嘢叫做「票債票償」。

嗰件劏家驊,喺狀棍黨裏面都算比較正派,本來我都唔算太憎佢。不過佢今次就真係做得好肉酸喇,一陣話人抹黑佢,輸咗又賴對手嘅動員能力強。其實佢一早就應該退黨啦,話退又唔退,都抵佢有今日。至於嗰件陳熟莊,又發揮佢嘅演藝潛質嘞,輸咗就扮喊博同情。佢話今次輸得好意外喎,都唔知佢係咪真係咁白痴,其實佢上次跑出先至係意外囉。不過有一點值得注意,佢今次得票仲多過上次,但係就仍然比豉油黨嘅對手遠遠拋離,都唔知無啦啦喺邊度走咁多選票出嚟。

事實上,今次區選真係令好多學者跌晒眼鏡。個個都估今次嘅投票率會低過上次,結果投票人數反而創埋新高添。啲學者又認為高投票率對泛民有利,咁咪估錯晒囉。啲學者同傳媒硬係要將民意量化,「量」係指音量,總之邊啲人嗌得最大聲就最能夠代表民意。其實沉默嘅一群絕對唔係少數,而且唔一定係傾向泛民陣營。我相信好多人係睇過眼泛民嘅所作所為,忍唔住走出嚟,用選票懲罰佢地。

泛民一向堅持偏激路線,將和諧等同河蟹、妥協等同出賣,拒絕用協商方式解決問題。班友搞到香港七國咁亂,我就唔信咁係大部分市民想見到嘅嘢。可能而家已經去到一個臨界點,令到原本沉默嘅一群覺得忍唔可忍,要用選票表態。事實上,最近又真係有網民自發組織遊行,同泛民打對台。咁係代表社會已經嚴重分裂,連只求安穩嘅一群都覺得唔可以坐以待斃!

以今次區選為例,有四成人投咗票,而另外嗰六成人嘅取向就根本冇人知。如果連從來唔投票嘅人都走出嚟投票,變數可以好大,話唔定六四黃金比例都會逆轉。奉勸泛民見好就收,否則遲早會自嚐惡果!


5 則留言:

  1. 今次嘅選過程好睇好過癮,因為見到好多黨好多參選議員真係估佢唔亂Q嚟;另一樣好好睇好過癮嘅,係去睇果d所謂專家友仔嘅分析,又係估佢唔亂Q嚟。

    回覆刪除
  2. Ebenezer,
    哈哈,班友直頭亂Q嚟啦,話大舊衰會隊冧何俊男,又話黃迫暈會砌低鼠王芬,真係信佢地一成都死得人啦!

    回覆刪除
  3. 新聞公民黨係咪話輸咗係因為有中央暗中操控了選民呀?

    回覆刪除
  4. 販民從來都姓賴的,哩班卑鄙怪那會有光明磊落的骨氣?其中訟棍黨嘅梁黨灰更是無恥之尤,觀其敗後的悻悻然咀臉黎橫折曲說詞我就想升佢兩巴!

    回覆刪除
  5. Coffee,
    弊嘞,咁我咪好蝕底!橫掂都係投俾建制派,我都希望中央可以派人嚟操控吓我,起碼會有啲著數先啦!

    laulong,
    我睇人好憑直覺,一見到梁黨灰個衰樣就把幾火,硬係覺得佢非常面目可憎!事實上,我覺得佢比癲狗長毛討厭得多囉!

    回覆刪除