2013年7月28日星期日

沐猴而官

今日忽然校長上身,想同大家講吓一句成語。

「沐猴而冠」,字面解作馬騮戴帽,係用嚟形容啲人面草包,意思同「金玉其外」差唔多。其實唔難理解,就算馬騮戴咗頂帽扮成人咁樣,內裏當然仲係一隻馬騮啦。據聞呢句成語有個典故,被形容為「沐猴而冠」嘅竟然係「力拔山兮氣蓋世」嘅楚霸王,都唔知堅定流。諗落又有啲似喎,雖然成敗不足以論英雄,但係項羽話「富貴不歸故鄉,如衣錦夜行」,咁又真係膚淺咗啲囉。

至於呢句成語嘅用法,可以參考以下例句:

「明明係沐猴而冠,癲狗、長毛、大舊之流竟然可以循民選途徑晉身議會,你話係咪好得人驚?如果聽日就有雙普選,大家好即刻做定壽衣喇!」

話時話,用「沐猴而冠」嚟描述現今政壇眾生相又真係幾貼切吓架。

另外,「沐猴而冠」嘅讀音亦有啲特別。如果知道呢句成語點解,反而會更易讀錯。雖然同帽有關,但係詞中「冠」字唔係音「官」,而係要讀成「灌」。因為「冠」字喺呢度係動詞,指戴帽嘅動作。

記住喇,同「醫錦還鄉」一樣,講「沐猴而官」會俾人笑架!

不過咁,香港係一個黑白顛倒嘅地方,幾荒謬嘅嘢都可以變成理所當然。話「沐猴而官」錯咩,但係呢四個字偏偏就反映咗香港官場嘅現實情況。一眾高官嘅辦事能力有幾高,大家有目共睹。咁都算嘞,港府施政始終受制於社會大氣候,都唔怪得晒佢地。最頂唔順係班友闖少陣禍都唔得,係要踩屎踩鑊甘嘅先安樂。哈哈,咁仲唔係「沐猴而官」?!

睇吓近排好唔得閒嘅波叔,上任唔夠一年就接連爆出「劏房風波」、「啤酒事件」、「東北炒地」幾單大鑊嘢,可謂絕無冷場。首先,本人唔會評論波叔喺呢幾單嘢裏面有冇問題,亦無意質疑佢嘅誠信。法律達人張達明教授都發表過極具權威嘅闡釋啦,只要冇觸犯香港法例,無論做乜都唔會有問題囉。基於呢個觀點,波叔冇被起訴,喺現階段當然係處於白紙狀態,任何對佢嘅攻擊根本就唔成立。本人睇唔順眼嘅,反而係佢就外界質疑所作出嘅應對。我嘅評語只有一個字:蠢!

面對政客同輿論窮追猛打,波叔選擇用唧牙膏方式每日講啲,但係又前言不對後語,有乜理由唔俾人食住上先。呢種策略唐唐喺「地下宮事件」都用過,後果係點唔使我多講啦。枉佢仲係有識之士,連乜嘢叫前車之鑑都唔識。要講就應該事先全盤整理好,確保唔會出現前後矛盾,以免俾人覺得佢用大話冚大話囉。就算係事實,如果難以令人入信,咁就唔講好過講嘞。好似佢話嗰幾塊山卡啦農地係買嚟作休閒用途,連我都唔信啦,人地又有乜可能會收貨先。如果佢話十九幾年前已經睇好嗰幾塊地嘅發展潛力,我就唔覺得有乜問題嘞,仲會讚佢眼光獨到添,做乜係要令到人地覺得佢唔誠實先安樂呢?再唔係,佢亦可以用張教授嘅觀點據理力爭,起碼唔使搞到而家咁,連招架之力都冇囉。

如果唔係呢單嘢,大家都未必知原來波叔有咁多瓣數。又農地,又劏房,仲開咗九十幾間公司,你揸我,我揸你,關係複雜到冇人有。本人雖然睇唔明,但係都知道佢揾錢觸覺極其敏銳,而且財技玩到出神入化添。其實已經生活無憂架啦,都唔明佢點解硬係要走入政府呢個超熱廚房。

波叔之所以會執二攤坐呢個位,完全係因為前任局長老麥一上任就中伏,搞到周身蟻而被迫辭職。除非波叔真係覺得自己白過白紙(即係透明),否則就太睇小一眾傳媒同金手指嘅辦事能力喇。不過,所謂有危必有機,而家咁多嘢曝咗光,俾人睇到佢原來眼光咁獨到、財技玩得咁出色,一定可以吸引到好多潛在客戶,咁都未嘗唔係好事啫。我就建議佢即刻引退,俾啲心機揾真銀仲好啦!

Lake Manyara National Park, Tanzania

Ngorongoro, Tanzania

Chobe National Park, Botswana

2013年7月19日星期五

地獄走一回

大腸癌係香港第二號癌症殺手,每年新症超過四千宗。早期大腸癌冇乜特別徵狀,就算中咗招都好難及早發現。到出現病徵,好多時已經係中後期。

後期大腸癌病徵包括:
- 便便帶血、黏液
- 大便習慣改變
- 如廁後仍有便意
- 腹痛、腹瀉
- 貧血
- 體重減輕

高危因素有:
- 家族遺傳
- 肥胖
- 不良生活習慣,例如食煙、飲酒、少運動
- 不良飲食習慣,例如偏好高脂、高糖、低纖、或加工食品
- 年過五十

本人自問生活習慣唔多健康,大腸癌高危因素中咗一半。而後期病徵亦有一半出現過(有部分仲好頻密吓添),都咪話唔得人驚。雖然唔係咁like俾人搞後面,不過為咗求個安心,都係決定做次大腸內窺鏡檢查。話就話檢查,但係如果發現息肉都會順手割埋,不過要另外加錢。琴日先啱啱做完,感覺就好似去地獄打咗個轉,然後重回人間!

話就話要喺醫務所搞一粒鐘,但係照大腸鏡只係用咗十幾分鐘,因為仲有前戲,做完又要瞓番個事後覺。前戲係乜?哈哈,首先梗係要剝衫剝褲上床啦!會唔會好尷尬?咁又唔會喎,因為上床前要著番件有少少透視嘅特製開背睡袍。以本人咁厚面皮,呢啲當然唔算得乜嘢,跟住嚟嘅先惡頂。因為被插會好痛,真正埋牙前先要喺手背拮一針,注射止痛藥同鎮靜劑入靜脈。本人自問大膽,怕嘅嘢唔算好多,偏偏打針就係其中之一。點知拮完一針又一針,拮到第六針醫生就同我講,話我啲靜脈好扁,拮極都插唔正中間。好彩第六針終於搞掂,但係我已經想死咁滯囉。喺命懸一線之際,只感覺一股涼意由手背向上蔓延,跟住就迷迷糊糊咁瞓著咗,人事兩不知。

搞嘢過程幾乎一片空白,淨係記得醫生曾經叫我睇吓個screen,話係大腸裏面嘅現場直播。當時瘟瘟燉燉,望咗一眼就再瞓番,印象中畫面好似係一個無底深洞。到再醒番,已經俾姑娘推咗入更衣室。佢話藥力未過,仲未落得床,叫我瞓番個靚覺先。其實當時已經冇乜睡意,不過就有啲手軟腳軟嘅感覺。反正閒著也是閒著,不如check吓有冇插到開晒花仲好啦。首先凝神聚氣,繼而意守丹田,最後收腹提肛。好彩,既唔痕又唔痛,總算冇穿冇爛,應該唔會有啲乜嘢創傷後遺症啩。不過已經唔係完璧,惘然若失就點都有少少囉!

胡思亂想咗一陣,竟然覺得神完氣足,姑娘亦喺呢個時候叫我出去聽報告。聽完醫生講解,仲有隻大腸實景拍攝嘅DVD帶返屋企留念添。咁都好,可以填補番人生中一段十幾分鐘嘅空白。返到屋企,二話不說即刻開電腦睇片。唔睇都唔知,原來照大腸鏡係由大腸最末端(即係盲腸位置)開始,然後慢慢褪出嚟架。初初睇真係覺得好神奇,仲有啲感動添,做咗幾十年人,從來未試過咁清楚見到自己嘅inner self囉。但係越睇越唔對路,到臨近結尾,直頭恐怖過睇鬼片添,因為……我見到……屎呀!我已經跟足指引做架啦,估唔到仲會見到啲咁恐怖嘅嘢!

照大腸鏡只係十幾分鐘,但係事前準備就要早兩日開始做,確保大腸裏面嘅廢物可以排清。檢查前兩日唔可以食高纖食物,例如豆類、蔬菜、生果等。檢查前一日只可食流質食物,朝早要食兩粒細細粒嘅瀉藥(Dulcolax),夜晚要飲一樽仔瀉劑(Fleet Phospho Soda)。

其實好耐以前已經聽人講過嗰樽瀉劑難頂架喇。樽瀉劑勁鹹唔在講,飲完仲要大量飲水(三粒鐘內唔少於一公升)。跟住就會頻頻去廁所,痾水痾到腳都軟。講真,我又唔覺得嗰樽嘢好似啲人講得咁難頂囉。其實肚仔都冇痛,只係漲住漲住,成日要去廁所。痾水亦冇乜特別不適,唔會痾到腳軟,根本就同小便差唔多,只係出口唔同啫。

反而朝早食嗰兩粒丸仔先惡啃,雖然只係痾咗兩次,但係就辛苦到想死咁滯。本人肚仔一向唔聽話,肚痾可謂家常便飯,不過從來冇試過痛得咁厲害。嗰種攪吓攪吓、抽住抽住嘅痛法,真係非筆墨可以形容。一路痾一路痛,痾到全身軟晒,真係驚隨時會休克。而且猛標冷汗,唔止搞到成身濕晒,仲連滴到地下都濕埋添。痾完之後腳步浮浮,企都企唔穩,當時淨係想即刻瞓低,係長眠不起嗰隻囉!不過成身濕晒當然唔可以瞓上床,沖涼又驚會喺浴室暴斃,咁唯有坐低唞吓先算啦。結果坐咗半粒鐘先回到魂,直頭係死過翻生呀!呢隻藥我真係打死都唔會再食囉!

哈哈,其實又唔使講得咁死嘅,醫生話我一粒息肉都冇,下次再照大腸鏡都應該係十年後嘅事喇!

Halong Bay, Vietnam

Halong Bay, Vietnam

2013年7月14日星期日

三單新聞-論消費者權益

啱啱先睇番早兩日嘅報紙,見到前日有三單同消費者權益有關嘅新聞,覺得幾過癮,雖然同近日熱議嘅「商品說明條例」修訂冇乜關係,不過都想攞嚟講吓。

第一單。話說有件17歲金毛去一樓一叫雞,趙完竟然唔夠錢俾,鳳姐懷疑佢想食霸王雞,結果要揾警察叔叔幫忙。金毛無計可施,唯有硬住頭皮打電話俾老豆,叫佢帶埋肉金上嚟贖身。

單嘢真係幾搞笑,不過本人思維一向比較與眾不同,所以即刻上網摷吓有冇同我一樣嘅觀點。結果喺某親子網站揾到相關討論,一眾C9唔係狂插件金毛17歲學人叫雞,就係猛批個老豆好幫佢贖身,話咁係變相認同阿仔嘅行為。本人又唔係道德重整會會長,當然唔會評論17歲叫雞啱唔啱、或者佢老豆應唔應該幫佢贖身。我只係覺得奇怪,都17歲人啦,有乜理由消費前唔問清楚價錢先呢,尤其是幫襯呢類服務性行業添。諗嚟諗去,唯一合理解釋係,金毛其實知道價錢,不過諗住做完會收番封利是,應該夠填番個差額。根據香港習俗,青頭仔叫完雞係有利是收架!

忽然又諗,政府修訂「商品說明條例」,其實係咪都應該考慮埋啲行之以久嘅不成文規定呢?如果金毛可以收番封利是,就未必會搞到見報咁尷尬啦。又例如,買魚尾搭魚頭、買豬肉搭豬骨,好明顯唔乎合法例要求。不過呢啲唔止係香港嘅傳統街市文化,更係港人嘅集體回憶,其實我地係咪都應該盡公民責任,企出嚟誓死捍衛呢?

第二單。報載禽流黨阿輕姐(流胃輕)有好嘢食,發咗一張「意大利香草焗龍」嘅相上飛屎卜同人分享,仲話「它的味道將長存我的腦海」添。估唔到咁都會俾人插,有網民留言辱罵,話「爛必」因為絕食不適送院,問輕姐係咪需要食得咁「揚」喎。

哈哈,個婆娘巴渣潑辣,一向只有佢鬧人,永冇人鬧佢,估唔到佢都會有今日囉!話時話,連輕姐都夠膽鬧,相信係淫民力量粉屎嘅所為。不過咁,亦唔可以抹煞保皇派插贓嫁禍嘅可能性。點都好啦,呢個根本唔係重點。

雖然本人對輕姐冇乜好感,但係無啦啦由消費者變成被消費,我就覺得好有問題嘞,忍唔要講番幾句公道話。琴日報紙話爛必絕食期間瘦咗15磅咁多,仲登埋張相出嚟,但係就仍然見到個大肚腩。絕食云云,睇嚟係公私兩便囉。一方面可以做吓show,爭取政治本錢。而且又可以減肥,順手清埋啲宿便,如果唔係,以佢咁嘅身形點出嚟揾食先!而家入廠啫,又未死得,使唔使全城默哀呀!

不過咁,我最睇唔順眼嘅都唔係呢啲,而係輕姐嘅反應。佢居然冇駁嘴,反而刪咗張相,仲話衷心問候爛必添。哈哈,話時話,唔知輕姐有冇暗中喺心裏面問候埋爛必嘅親朋戚友呢?言歸正傳,作為消費者,輕姐竟然冇捍衛自己應有嘅權益,真係令人好失望囉。消費者評價用過嘅消費品,根本就天經地義嘅事。本人認為平基會應該引入反消費評論歧視法,確保港人評價消費品嘅時候唔會受到無理滋擾!

第三單唔係本地新聞。引述日月報報導:「法國餐館協會一項調查發現,有三分一的法國餐廳已不再即場烹製食品,而已將工廠生產的冷凍食品加熱奉客以減省成本,增加利潤……有主廚批評,餐廳採用工廠預製的冷凍菜式不但有欺詐之嫌,還違背法國精緻用餐的傳統,有損法國身為全球熱門觀光勝地的聲譽……法國餐館協會建議,應為堅持傳統的業者保留「餐廳」(restaurant)稱號,使用微波食品的連鎖食肆、咖啡店等,則不能稱為餐廳,以免消費者受騙。法國政府正推動修改消費者保護法,要求餐廳在菜單上標明哪些菜式是「自製」,沒標記的菜式就是冷凍食品。

法國佬又玩嘢嘞,其實佢地想踢啲快餐店出局以減少競爭,利用啲人對品牌嘅迷信增加利潤就真。保障消費者云云,又未免太睇低啲客囉,講到人地個個都五味不分咁。如果消費者根本食唔出預製食品同即製食品嘅分別,應該檢討嘅係啲「餐廳」本身。如果啲客食得出有分別,而仍然選擇幫襯,當然亦有佢地嘅理由。與其糾纏喺「餐廳」呢個稱號,不如諗吓點改善服務同出品質素仲實際啦。

話時話,我都贊成法國政府嘅建議,增加透明度對消費者嚟講一定係好事。本人相信,就算法國都一樣有我呢類味盲囉!

三杯雞

香草芝士番茄焗龍脷柳

2013年7月12日星期五

神仙企唔穩

三六滾幾滾,神仙都企唔穩!如果冇聽過呢兩句,咁就證明你仲未晉身耆英行列嘞。

呢兩句意思係狗肉非常和味,煮嘅時候香氣四溢,連神仙聞到都把持唔住。因為香港好早已經將食狗肉列為違法,所以用三六代替狗肉。

細個住喺木屋區,村口就有個狗肉檔,次次行過都聞到勁香嘅煮狗肉味,忍唔住大力索多幾索。嗰時喺新界仲好興食狗肉,雖然話違法,但係警察都好少干涉。可能係收咗片啦,反正又唔殺人放火,都無謂深究嘞。話時話,狗肉我當然食過,聞起嚟的確勁香,但係食落就麻麻地,炆羊腩正好多囉。

講到食狗肉,喺中國可以話源遠流長,而且無分南北添。荊軻嘅老死高漸離,據聞就係屠狗輩。而劉邦嘅得力馬仔樊噲,聽講都係劏狗佬。照咁睇,中國人食狗肉最起碼都有兩千幾年歷史囉。九十幾年前喺一本國內旅遊雜誌,睇過一篇介紹沛縣風歌狗肉罐頭嘅文章。連罐頭都有,可見狗肉係當地人嘅日常食品。沛縣係劉邦鄉下,而風歌就係指大風歌:「大風起兮雲飛揚,威加海內兮歸故鄉,安得猛士兮守四方!」題外話,我就比較鍾意垓下歌:「力拔山兮氣蓋世,時不利兮騅不逝。騅不逝兮可奈何,虞兮虞兮奈若何!」

喺中國某啲地方,狗肉唔單止係食物,甚至係一種文化。正如我地端午食粽、中秋食月餅,廣西玉林亦有一年一度嘅狗肉節,早排先喺報紙睇過相關報導。不過好搞嘢,篇幅最大嘅報導竟然係喺娛樂版發現。啲傳媒真係難以理解,凡係有乜新聞,地震又好、狗肉節又好,都硬係要走去問吓啲明星藝人,當正佢地係民意代表咁。唔使睇都知,班藝人梗係一致插爆嗰個狗肉節啦。又話野蠻、又話變態、又話冇人性,講到人地好似食人咁。最搞嘢係,班友仲話要抵制人地添。講真,連人地喺邊忽都未必知,咁又點抵制呢?始終,香港人都有食狗肉嘅傳統,可能啲傳媒諗住冇得大搞,所以先揾班藝人為單嘢增添些少娛樂性。相對於本地傳媒,西方媒體可能報導得更多添。單嘢喺國內亦引起好大回響,有網民甚至喺白宮網站請願,要求美國介入。

只要喺網上搜尋吓狗肉節三個字,就會揾到鋪天蓋地嘅相片,有啲係狗狗喺籠裏面展示可憐兮兮嘅眼神、有啲係劏好嘅狗冧到山仔咁高、有啲係烚熟狗頭嘅大特寫。睇到呢啲相片,相信好多人都會覺得好反感,認為應該堅決禁止食狗肉。但係佢地又有冇平心靜氣咁諗吓,究竟反對理據何在呢?

狗狗好可憐!凡係待宰嘅動物都可憐架啦,聽講話啲牛喺被殺之前仲會流淚添。乳豬又夠可憐啦,出世冇幾日就要烈火焚身。

狗屍堆到成座山仔咁,好嘔心、好殘忍!呢種場面喺街市成日見啦,都唔知有乜問題。西方一樣有,一條條開邊牛屍掛晒喺雪房,場面只有更震撼囉。講到殘忍,點都殘忍唔過法國佬生產鵝肝啩。

狗狗好可愛,係人類嘅朋友!兔仔夠可愛啦,仲有好多人養嚟做寵物添,啲西人咪一樣鍾意食兔肉批。而且中國人養嘅係菜狗(一種專供食用嘅狗),根本就唔係寵物,同養豬養牛其實冇乜分別。講真,如果由細養大,相信大部分哺乳類動物都可以成為人類嘅朋友囉。

如果反對嘅人係素食主義者,咁我都無話可說。不過自己食鵝肝、和牛就高級品味,人地食狗肉就禽獸不如,分明係雙重標準啦。嗰班要求白宮介入嘅人仲好笑,唔通佢地真係唔知啲西人有幾偽善?美國有農場就俾人揭發將啲初生雄性雞仔集體磨成肉醬處死,因為佢地唔會生蛋,長肉又長得慢,養都嘥米飯。

啲人硬係鍾意將自己嘅價值觀強加於別人身上,完全唔會尊重人地嘅文化傳統。伊斯蘭教徒夠認為豬肉污穢啦,唔通佢地又可以要求全世界都唔食豬肉咩。唔好同我拗,而家唔係講緊食人,而且菜狗亦唔係頻危物種,唔食狗肉只係個人選擇,並唔算普世價值。

不過咁,我都贊成中國人戒食狗肉。呢個唔係對與錯嘅問題,亦唔係道德方面嘅考量。喺而家全球化嘅大趨勢,冇人再可以做獨家村,如果唔能夠同國際主流接軌,蝕底嘅始終係自己。唔食狗肉都有其他肉可以食啫,前面都講過,其實炆羊腩仲正啦!

又係題外話時間嘞。上文提到樊噲,我又諗起一副好絕嘅對聯:
兩船並行,櫓速不如帆快。
八音齊奏,笛清難比簫和。

絕妙之處係「櫓速」、「帆快」、「笛清」、「簫和」分別同「魯肅」、「樊噲」、「狄青」、「蕭何」同音(普通話)。

Shwenandaw Monastery, Bagan, Myanmar

Bayon Temple, Angkor, Cambodia

Hyena, Serengeti, Tanzania

Fresh market, Vientiane, Laos

2013年7月10日星期三

繼續唔好搞我後面

之前講開「唔好搞我後面症候群」,即係啲人雖然認同厭惡性公共設有需要,但係就堅決反對設置喺自己屋企附近。

自從回歸以嚟,政府民望不斷下滑,施政困難重重,差唔多乜都有人反對。面對反對聲音,政府無計可施,唯有實行「壞孩子獎勵計劃」。但係咁只會令情況不斷惡化,形成一個惡性循環。試想吓,阿A嘈得大聲政府就投降,咁阿B有乜理由唔有樣學樣先,只有嘈得更厲害囉。

話時話,又唔係只有厭惡性嘅嘢先有人反對,一啲造福廣大市民嘅嘢都會有人唔like,只要佢地認為影響到自己。舉個例,政府揾地起公屋居屋,就往往遇到極大地區阻力嘞。加快增建資助房屋,等有需要嘅人可以上樓,應該已經係社會共識。但係好諷刺,最大阻力竟然都係嚟自社會本身。另外,要攞走少少好處,啲人一樣會大力反對,唔理社會上整體要付出幾大成本都係咁話。例如巴士路線重組,傾極都傾唔埋欄,就係因為地區勢力嘅阻撓。明明一班車得五個客,啲人都話唔取消得,咁巴士又點會有減價空間呢?

講到呢度,可能有人會話「針唔拮到肉就梗係唔知痛啦」。我又唔解釋住,不過就有兩單嘢想同大家分享吓。

話說N年前,嗰時仲係住喺新界。有日喺信箱發現兩張好多字嘅紙,睇清楚啲,原來係業委會發俾住戶嘅函件。內容話反對政府喺屋苑附近設立庇護工場,要求住戶簽完名交番去管理處。函件唔係一份問卷,因為淨係附有反對嘅回條。本人即刻簽名,不過註明贊成。講真,人地只係個樣生得有啲唔同,行動可能有些少不便,根本唔會危害到任何人。咁就叫人唔好死埋嚟,分明係赤裸裸嘅歧視啦,我就真係點都做唔出囉。影響樓價?我唔知會唔會,未必人人都好似業委會班友咁諗啫。公義唔係用把口噏吓就可以得到彰顯,要每個人都身體力行先得架!

另外一單係最近發生嘅事。我住嗰座大廈對正條馬路,馬路兩邊分別有同一機構嘅兩棟建築物。啲人成日要過馬路兩邊走,真係好唔方便,點解唔整番條天橋呢?果然,早排見到施緊工,起緊條行人天橋連接兩邊建築物嘅平台。但係臨近埋尾,工程突然停晒,仲封埋圍板添。有日喺樓下大堂見到張通告,原來有人向區議會投訴,話條天橋影響景觀,業委會就要求住戶表達意見。結果過咗成兩個月,工程先繼續番。講真,條天橋距離我座大廈二百幾呎,又有幾影響景觀呢?因為唔想見到遠處有條天橋,就唔肯與人方便,又好似自私咗少少囉!

人性本自私,個人利益永遠凌駕社會整體利益,人人都寸步不讓,呢個先係問題所在。我就希望聽日即刻有普選,最好係選到嗰啲口口聲聲話為民請命嘅扮民政客添。咁當然解決唔到問題,不過起碼可以俾香港人知道,普選並唔係一服起死回生嘅靈藥。香港人嘅心態一日唔改變,就算邊個做凸首都冇用囉!

Bhaktapur, Nepal

2013年7月8日星期一

十評香港人之一:唔好搞我後面!

聲明:文中提及之「香港人」乃指部分香港人,本人絕無以偏概全之意。雖無確實數據支持,唯本人相信此等「香港人」絕非極少數。

政府申請擴建垃圾堆填區撥款,先有將軍澳居民強烈反對,連保皇黨都「順應民意」倒戈而觸礁。嚟緊輪到屯門同打鼓嶺嘅撥款審議,睇怕都係凶多吉少。屯門居民有樣學樣,又搞絕食抗爭。扮民議員唔使講,一定唔會拂逆民意,甚至連土皇帝都反對,你話係咪凍過水呢?

扮民議員會話政府唔理民意,闖關失敗係咎由自取。不過呢啲議員口中嘅「民意」,其實有乜嘢基礎呢?冇錯,嗰三區嘅居民一定係反對架嘞。但係如果問埋其他市民,結果又會係點呢?正如綠公胃所講,相信冇議員會認為唔需要有堆填區,其實絕大部分香港人都會認同啲厭惡性公共設施嘅存在必要。不過搞時搞,你搞第個好喇,千祈唔好搞到我!此之謂「唔好搞我後面症候群」。

「唔好搞我後面症候群」唔係香港獨有,亦唔係今日先出現,不過回歸之後特別嚴重,應該係同香港人嘅「維權」意識大大提高咗有關。舉幾個例,麗晶花園居民反對喺附近設置愛滋診所、梅窩居民反對正生書院遷入區內空置校舍、骨灰龕選址處處碰壁,相信大家一定唔會冇印象。講真,啲厭惡性公共設施冇人會鍾意,但你又唔搞得,我又唔搞得,咁究竟可以點收科呢?

以擴建堆填區單嘢為例,基本上只有三個「可行」方案。一,原區擴建。呢個方案最簡單,理論上阻力最細,所以政府揀咗。二,另覓新址。一來無中生有必然複雜好多,而且阻力肯定更大。揀有人住嘅地方,居民反對聲音實勁過原本嗰三區。揀冇人住嘅地方,基本配套有排搞,而且啲環保人士一定同你死過。三,放棄擴建。呢個方案嘅「可行」之處係反對聲音最少。不過現有堆填區就快爆滿,問題已經迫在眉睫,而家最需要嘅係實際行動。啲垃圾議員講乜嘢源頭減廢,只係乘機抽水,根本解唔到燃眉之急。

其實講嚟講去,都係原區擴建最實際。睇到呢度,應該已經有人懷疑我唔係住喺嗰幾區,所以先喺度講風涼話。冇錯,本人的確唔係嗰幾區嘅居民。不過我住嗰區都有啲極具厭惡性嘅公共設施,而且為數唔少添。如果唔係,隔籬區明明全部係豪宅,點解我住嗰區嘅樓價會平一大截先。

言歸正傳,話原區擴建最實際,係因為整體影響最少。佢地原本已經有堆填區,就算擴建咗,情況都唔會比而家更差啫。其實我都有少少懷疑,情況係咪好似啲居民講到咁惡劣呢?我細佬住喺康城(唔係法國嗰個),上佢屋企都聞唔到臭味。由佢屋企行去將軍澳站,沿路一樣聞唔到。我問過佢,佢話基本上冇乜。佢以前租開同一個屋苑,如果真係咁難頂,佢後來都唔會買啦。

有人話,要呢三個區承擔全港製造嘅垃圾好唔公平。咁我又反問一句,係咪要全港十八區都有垃圾堆填區先叫做公平呢?上面都講過,我嗰區亦有啲惡啃嘢啦,相信好多其他區都唔多唔少會有啲咁嘅嘢囉。又有人話,點解唔喺山頂都整啲厭惡性嘅嘢呢?嗱,呢啲就係仇富心態嘞。喺資本主義社會,有唔同階級係必然嘅事,如果夾硬將所有嘢拉勻,咁只會令人失去上進動力。如果喺豪宅區都整啲厭惡嘢,肯定會令樓價大跌,政府賣地收益亦會少好多,最終會影響埋低下階層嘅福利囉。講真啦,厭惡性設施嘅影響已經反映咗喺樓價,如果唔係有惡頂嘢,啲人邊有咁易上車先。自己上咗車就想將啲惡頂嘢踢走,過俾第個,咁係咪太著數咗啲呢?


補充:
講漏咗添,啲惡啃嘢始終都要有人啃,政府應該為受影響社區提供一啲補償,等啲居民條氣順番少少囉。

Garden Route, South Africa

Garden Route, South Africa

2013年7月6日星期六

怪雞諜變

霸權主義國家特工,因為睇唔過眼所屬情報機關嘅嗱喳手段,毅然決定投奔自由國度,仲帶埋大量機密資料出走,誓要將有關方面嘅惡行公諸於世。為咗令人估佢唔到,特工冇揀到西方國家做落腳點,而係去咗一個惡名昭彰嘅竹幕城市同接頭人會合,實行佢嘅爆料計劃。

以上疑似間諜電影橋段,相信冇人估到會喺香港發生。不過作為荒謬之城,香港又有乜嘢會冇可能發生呢?

斯諾登單嘢相信大家都好清楚,喺呢度就唔再詳述嘞。不過事件揭示咗一啲既荒謬又搞笑嘅怪雞嘢,又不妨攞嚟講吓。

話說斯諾登身分曝光之前,外交評論員Steve Clemons喺華盛頓機場偷聽到幾個特工討論洩密事件,仲話要令洩密者同爆料記者「消失」添。哈哈,真係笑死人,美國特工係咪低能成咁呀,居然俾人偷聽到!如果中情局長最後因為單嘢引咎辭職,奧巴馬絕對應該考慮揾呢位評論員頂上囉。

同樣搞笑嘅仲有奧巴馬。單嘢其實喺習近平訪美之前已經爆咗出嚟,但係奧巴馬仍然將網絡安全議題擺上檯,高調批評中國黑客入侵美國政商機構。結果斯諾登喺習奧會期間再爆料,話美國黑客曾經多次攻擊中國網絡,公然摑咗奧巴馬一巴。究竟奧巴馬係欠缺應變能力,唔識轉個話題避重就輕,定係自信爆棚,以為可以隻手遮天?點都好啦,此人面皮之厚,都可謂舉世無匹囉!

美國人嘅反應亦相當出人意表。照理喺一個民主制度咁成熟、人權意識咁高漲嘅國度,對於政府大規模侵犯國民私隱,啲人冇理由可以容忍啫。事實係,美國人嘅反應竟然出奇咁冷淡。雖然有人喺白宮網站留言,要求特赦斯諾登,但係過咗好多日都集唔齊十萬個簽名。如果換轉單嘢喺香港發生,睇怕即刻五百萬人上街都有份。廿三條立法都係講吓啫,啲人就已經發晒癲嘞。香港人又知唔知,其實美國都有愛國法,而且比廿三條更辣添。只要你講錯一句嘢,隨時會未經審訊就俾人拉咗去屎塔那麼黑獄囉。咁點解美國人會容忍啲咁違反人權嘅法例呢?因為佢地願意為人身安全同社會穩定作出少少個人犧牲。有美國官方發言人為「稜鏡」辯護,話有關行動根本唔會對奉公守法嘅人有影響。廿三條壇嘢,港府都係咁講,點解又會冇人buy呢?香港人,如果要學美國佬,咁唔該你地就學足全套啦!

唔止美國人反應冷淡,香港人最初對單嘢亦唔多關心。平時將人權公義掛喺嘴邊嘅扮民政客,竟然冇一個走出嚟評論吓美國政府嘅做法。直到斯諾登再爆料,話香港亦係美國黑客嘅攻擊對象,長毛先帶埋班嘍囉操去美國領事館做場show。瘦田冇人耕,耕開有人爭,幾個建制派議員不甘示弱,跟住亦喺垃圾會開show。頭二啖湯都俾人飲晒,啲後知後覺嘅扮民議員先識跟風,咁就執輸啦。不過有幾個平時最多嘢講嘅扮民政客,豬如李柱男同人渣傑之流,到今時今日都仲未表過態,你話係咪好奇怪呢?其實一啲都唔怪,呢班友根本就唔敢得罪美國佬,唔通佢地唔驚下次入境美國,喺機場俾人通櫃咩。而且我相信如果香港將來有乜依郁,班友會第一時間走去美國囉,所以俾個尿兜佢地做膽都唔敢講美國佬半句壞話啦!

不過咁,啲扮民政棍又點會放過任何可以抽水嘅機會呢?斯諾登離開香港之後,何俊男就即刻走出嚟認屎認屁,又話代表人地,又話同人慶祝生日,講到不知幾friend咁。都算嘞,佢要黐人啲金糠係佢嘅事。最頂唔順係條友竟然學人玩爆料,話有代表政府嘅神秘中間人接觸過斯諾登,質疑中央介入香港事務,破壞一國兩制。雖然後來證實佢只係狗噏,但係就即時俾咗美國佬一個狂插香港嘅口實。講真,就算北京真係有派人游說斯諾登離開香港又點,咁做都只係屬於外交手段啫,點算介入香港事務呢,除非係派人夾佢走啦。其實斯諾登選擇離開香港,當然衡量過個中利害,對香港嚟講亦係最理想嘅事態發展。何俊男條狗屎狀棍無啦啦走出嚟噏三噏四,我只可以贈佢八個字:成事不足、敗事有餘!

至於港府係咪有心放生斯諾登,我就唔評論嘞。總之揸正手續嚟做,基本上係立於不敗之地。不過美國佬要轉移視線,自然會諉過於人,香港被插可謂在所難免。哈哈,插咪插囉,萬大有阿爺撐住,你慌插得死?!單嘢唔止揭示美國佬有幾霸道、無賴、同傲慢,更俾世人睇到美國司法機關有幾兒戲。美國佬指吓自己個鼻就要港府幫佢拉人,但係就連疑犯嘅全名都搞唔清楚,護照號碼又冇提供。更甚者,個疑犯都走咗九世,有關方面先通知港府話佢本護照已經被註銷。港府要求澄清一啲資料,美國佬就睬你都傻。事後仲質疑港府點解要咁多資料,話喺電視認樣拉人咪得囉。嘩,唔係兒戲得咁緊要啩!講真,咁嘅畸屎,幫你係人情,唔幫係道理囉!

話時話,斯諾登條友又真係幾頂癮,陰啲陰啲咁爆料,長爆長有,直頭好睇過連續劇。佢又爆美國佬連盟友都監聽埋,激到德國肥默扎扎跳,仲話要當面質問奧巴馬添。如果大家以為美國佬會眾叛親離,等住睇六國大封相,咁就大失所望嘞。肥默喺G8峰會見到奧巴馬,咪一樣笑面迎人,當乜都冇發生過。單嘢最多只係令美國政府尷尬吓,根本唔會有乜實質影響。話明係惡霸,又點會咁易俾你打得殘先!

惡霸究竟有幾惡,睇番幾日前發生嘅一單嘢就知嘞。話說玻璃維亞總統訪問完鵝羅斯,返歸途中取道歐洲加油。點知西葡意法等國唔俾總統專機進入領空,搞到人地差啲油盡機枯,最後被迫降落維也納。奧地利警方仲上機搜查,證實斯諾登唔喺機上先肯放行。單嘢好明顯係美國佬喺背後指使,玻璃總統呢鑊簡直俾人踩到上頭殼頂囉。講真,美國佬只係「懷疑」伊拉克擁有大殺傷力武器就打到人地冚包散,而家搜吓機咁小事,濕濕碎啦。講開又講,如果嗰架係鵝國總統專機,你估同樣情況會唔會發生呢?所以單嘢又一次印證咗一句名言:弱國無外交!

想像吓,如果香港仍然係英國殖民地,又或者97後獨立咗,咁斯諾登單嘢會發展成點呢?好肯定,香港會做小乖乖,將斯諾登交番俾美國。又或者更可能嘅係,斯諾登根本唔會揀香港做落腳點。人權公義、司法獨立?你諗都咪諗呀!抗拒香港回歸嘅香港人,你地幾時先肯醒呢?!

Vardzia, Georgia

Vardzia, Georgia

2013年7月3日星期三

開眼盲人

「43萬香港人,你找到自己嗎?」

無意中喺網上見到以上標題,即刻覺得好唔舒服,因為本人有5%機會俾人強姦咗。唔明?本人明明冇去遊行,如果夾硬將我都計埋喺裏面,咁仲唔係強姦?!都係唔明?咁就要聽我分析吓喇。

民陣公布今年71遊行有43萬人參與,警方話高峰期有6.6萬,而兩位港大學者(鍾庭耀、葉兆輝)嘅數字就分別係9.3萬同10.3萬。基於存在主觀政治立場,民陣同警方嘅數字都未必信得過,本人傾向相信兩位學者嘅統計。就當佢有10萬,即係話民陣報大咗33萬。以香港人口700萬計,明明冇去遊行又被屈去咗嘅機會就係33萬/690萬,接近5%。

琴晚是但台新聞就提到民陣同其他單位公布嘅數字存在極大差距,報導咗各有關單位嘅統計方法,仲有參與統計嘅學者接受方問。其中鐘庭耀同警方都係喺軍器廠街做統計,得出嘅數字分別係6.7萬同6.6萬,竟然出奇咁接近。鐘庭耀再做電話調查,根據中途加入同離隊比率作出調整,而警方就冇做呢樣嘢,所以最終數字差距大咗。葉兆輝就用咗唔同嘅統計方法,喺呢度就唔詳述嘞,反正人地講得清清楚楚。而一向唔肯公開點做統計嘅民陣,今次都提供咗資料。佢地話係點算銅鑼灣、灣仔、同金鐘嘅平均人數,再乘番1.5。至於1.5呢個參數究竟點得出嚟,佢地就只係話過往一直都係咁做,冇再進一步解析。是但台又問到喺嗰3個統計地點得到嘅數字,民陣竟然話唔可以公開。吓,呢啲統計數字都算係機密,唔公開得?咁樣提供資料,真係令人失笑(或爆笑)。難為班友仲成日插政府黑箱作業,其實佢地自己先係黑中之黑囉!

跟住就係葉兆輝接受訪問,佢話啲政治團體成日誇大遊行人數,意圖增加政治本錢,但係佢地背棄咗誠信同互相尊重,其實係虛耗緊香港嘅本錢就真。葉生又話數字多少唔係重點,最緊要係能夠解析到,同埋經得起驗證。

聽完葉生一席話,本人即刻對香港學者有啲改觀。呢幾年,香港啲所謂「學者」見到風頭火勢,紛紛調整策略,總之係政府嘅就插,冇人敢逆「民意」講番一兩句公道說話。久而久之,喺本人心目中,「學者」幾乎已經等同「牆頭草」。好似葉生咁敢言、咁有吉屎嘅學者真係近年少見,本人喺度俾100個like佢!

不過睇怕葉生呢幾日一定俾人插爆,如果佢有飛屎卜,肯定會受到洗版式轟炸添。香港實在有太多既盲目又是非不分嘅人,總之唔like就插,根本唔會同你講道理。好似民陣咁,遊行人數作到狗咁大,既解析唔到計算方法,又唔肯公開原始數據接受驗證,但係仍然有大把人信,你吹咩!咁係因為啲人已經俾人洗晒腦,冇晒獨立思考能力,唔識從多角度分析事物。

講到洗腦,除咗民陣之流,啲淨係識譁眾取寵嘅爛傳媒都要負好大責任。有啲新聞媒體報導71遊行,標題只係用民陣公布嘅43萬。呢種只求吸引眼球而罔顧資訊可信性嘅做法,根本就係違背傳媒道德。就係呢啲偽民主派同埋爛傳媒,喺香港散布用普世價值包裝嘅糖衣毒藥,製造咗一大班ABC眼撐到大一大、唯獨心眼不明嘅開眼盲人,真係唔得佢死!

Arequipa, Peru