2011年11月15日星期二

戀花

鬧人鬧到悶晒,今日不如睇吓相啦!

咪以為「戀花」係蝴蝶嘅專利,喺呢輯相裏面,除咗蝴蝶之外,「戀花」嘅仲有蜜蜂、飛蛾、烏蠅、草蜢、毛蟲、蜂鳥、珍珠雞、同埋人類。

影呢類相話易又得,話難又得。難處在於焦點要放喺主角對眼度,通常十張裏面會有七八張對焦唔準確。如果拍攝對象係啲冇時停嘅小動物就更難,好似飛蛾同蜂鳥咁,都係一路飛一路採花,莫講話唔容易到對焦,淨係用鏡頭追蹤已經有難度。

特別講吓最尾嗰張,主角當然係我自己啦,而且仲係用腳架自拍嘅添。其實我從來都唔用腳架,因為怕麻煩。不過嗰次一條友返大陸玩,又想影番啲到此一遊相,冇辦法啦。事實上,嗰次係我唯一嘅一次帶腳架,因為除咗嗰次,我都未試過一個人去旅行。

話時話,其實我都唔係咁鍾意啲花花草草。男人老狗,邊會有咁嘅雅興喎,嫖賭飲吹我就啱啫。不過我對啲漫山遍野嘅小花就硬係有啲情意結,見親都要走埋去影番張相。唔理啲花靚唔靚,只要夠大堆頭就得。我諗呢啲係性格問題,我影相都係咁架,總之就貴多不貴精啦!









12 則留言:

  1. 我最喜歡虫虫食花芯嗰張,有說不出的矛盾之美的味道!

    回覆刪除
  2. 真係咩野昆蟲都有喎~

    最後果張係邊度黎呢?

    回覆刪除
  3. laulong,
    蟲蟲採花我都係第一次見咋,感覺好詭異囉!

    回覆刪除
  4. minor,
    嗰度係新疆嘅巴音布魯克。其實只要將個mouse pointer移到張相上面,就睇到簡短說明架喇。

    回覆刪除
  5. 路邊的野花不要採,同佢影吓想好喇。

    回覆刪除
  6. Ebenezer,
    哈哈,我好循規蹈矩架,既唔採花,又唔摧花!

    回覆刪除
  7. 虫虫採花,可能是一場誤會!

    回覆刪除
  8. 見到戀花呢個term﹐發左神經﹐諗起花之戀...

    回覆刪除
  9. 嘩!同志,無論近睇遠睇,你都係咁靚仔!
    Derek

    回覆刪除
  10. 嘩!加埋背後個咁靚嘅景,簡直係無敵!!
    Derek

    回覆刪除
  11. 你的人物特寫好掂,又一直唔見你貼花草照,我真係以為你不喜歡影花花草草的。

    回覆刪除
  12. 佛爺:
    哈哈,咁又係喎!蟲蟲只食固體食物,所以佢應該係食緊啲花蕊。咁就唔係採花,而係摧花啦!

    文少:
    花之戀唔止外型靚,仲幾好食添,提起都流口水!

    Derek,
    哈哈,唔好講得咁誇張啦,其實相中人只係普通麻甩仔一個啫!

    Coffee,
    其實我唔係冇影啲花花草草,只係影得唔好,比較少放出嚟啫!

    回覆刪除