2012年12月22日星期六

十月懷胎

閉關三個禮拜,今日終於可以出關喇,因為我個私伙麻雀game嘅phase 1已經完成咗。所謂phase 1,係指流程部分,即係由洗牌開始,跟住摸牌、打牌、上牌、碰牌、槓牌、食糊、到最後計番,全部都搞掂晒。

唔係賣花讚花香,小弟嘅麻雀game比坊間產品更有彈性,可以提供到更多唔同選項。例如,用家可以自己揀由幾番起糊同最大打到幾番、可以選擇打唔打花、打唔打jackpot、可以揀傳統香港麻雀或者加入咗台灣牌元素嘅混合模式,甚至連每種牌幾多番都可以自訂添。為咗方便數牌,打咗出地下嘅牌又可以用唔同排序顯示。如果連排好嚟數都嫌太麻煩,仲可以㩒一個掣就睇到每一隻牌剩番幾多隻,唔使好似坊間啲麻雀game咁,數牌數到頭暈眼花。

當然啦,呢啲只係花巧嘢,並唔係一個麻雀game嘅核心部分。其實最難做係AI嗰part,即係點樣令到電腦識打牌。如果以需要花嘅時間嚟計,而家做咗嘅連十分一都唔知有未。不過作為一個programmer,見到自己嘅產品已經出咗個雛型,點都會覺得好興奮囉。就好似大肚婆走去照超聲波,個胎照出嚟明明似舊叉燒多過似人,但係就完全唔會影響到女人將為人母嘅喜悅。哈哈,而家本人嘅心情就係咁嘞!

講真,如果要同市面上嘅麻雀game比,鄙人嘅手作仔淨係graphics同animation已經輸九條街啦。不過咁,嚴人寬己係人類嘅天性,幫自己嘅出品打分自然會鬆手好多。又好似啲女人咁,明明生咗舊叉燒出嚟,都會覺得自己生嗰舊係世上最可愛、最美味嘅叉燒囉。

講返轉頭,雖然話最難搞嘅AI部分仲未開始做,但係咁並唔表示電腦只有捱打冇還手。而家電腦就好似初學打牌嘅人咁,有得上就上、有得碰就碰、冇黐冇搭嘅就打,基本上冇策略可言。不過如果手風順,一樣會有糊食囉。要靠運氣先有糊食就梗係唔掂啦,我嘅目標係要令電腦做到攻守俱備,仲要識睇牌路添。咁當然唔易做,而且,就算做到都會出現另一個問題。如果電腦變得太聰明,打親都贏,咁我自己就唔過癮啦。其實女人都係一樣,既希望阿仔聰明伶俐,但係又擔心如果佢太精叻就會唔聽教,下下駁嘴駁舌棧激死自己。

事實係,搞呢壇嘢真係有啲似十月懷胎,既辛苦又期待。話時話,十個月搞唔搞得掂,其實連我自己都唔知架。如果最後變咗石胎,又或者生出嚟嘅係鈍胎,咁就嘥心機捱眼瞓啦!

基本排序

另類排序

另類排序

一眼睇晒

加入台灣牌元素

電腦都有糊食

2012年12月1日星期六

求人不如求己

上回講到Recax無啦啦reset咗我喺雀王會館嘅積分,雖然經過多番交涉,仍然徒勞無功。對方明明理據欠奉,不過就手握生殺大權,完全冇佢辦法。今次真係秀才遇著兵,有理說不清。啲咁樣對待客戶嘅公司,本人當然唔會用佢地嘅產品啦,所以唔會再玩雀王會館架喇。

不過冇得打又有啲手痕,咪諗住食回頭草,玩番Yahoo麻雀囉。點知摷極都摷唔到,原來呢隻game已經冇咗,簡直係屋漏兼逢夜雨呀!

谷鬼氣,市面啲麻雀game又唔係寫得好,仲要揾極都揾唔個啱玩嘅,真係自己寫過個冇咁嬲啦。哈哈,一於就咁決定,等我自己寫番個私伙麻雀game先!

要做就要做到最好,一定要針對市面啲麻雀game嘅弱點,做得比佢地優勝。初步構思已經有咗,主要係針對以下幾方面。

首先,啲麻雀game嘅人工智能實在做得太差,電腦淨係識得顧住自己副牌,完全唔理出面乜嘢環境。舉個例,明明已經最後一隻牌,竟然有安全牌唔打,係都要打隻高危牌俾人食。諸如此類嘅屎章例子實在太多,真係講極都講唔晒。而且,電腦牌路千篇一律,好容易俾人睇通。喺我個私伙麻雀game,就希望電腦可以做到攻守兼備,仲要有唔同類型,例如強攻型、防守型、當然亦會有神經刀啦。

另外,我會為打咗出地下嘅牌提供不同排序,仲可以隨時轉換添。排序會有三種選擇,分別係跟時序、分開邊個打出再跟時序、同埋跟牌序。咁樣數牌就易得多啦,哈哈!

最後,使唔使由電腦幫我砌好副牌都有得揀。我打慣花章,最憎電腦幫我砌到副牌整整齊齊囉。

哈哈,咁就絕對係我理想中麻雀game嘞!唉,不過講就易,做起上嚟肯定難過登天,真係諗吓都想死呀!今日搞咗成日,都只係做咗張麻雀檯嘅layout,都唔知會唔會寫到老夫駕鶴西征都未寫完囉!

2012年11月29日星期四

東家唔打打西家

哈哈,本人唔再玩雀王會館喇!

本來琴晚已經打到接近3萬6千分,排名去到19位。點知食完一鋪自摸8番,check吓雀王排行榜,積分竟然得番千幾分,排名跌到17萬幾!以為只係系統出錯,咁咪即刻send咗個email俾Recax囉。真係估佢唔到喎,當時已經係夜晚12點幾,竟然好快就收到回覆,問我用乜系統同埋註冊日期。

再估佢唔到,今朝又收到回覆,效率絕對冇得彈。不過回覆內容更估佢唔到,對方竟然話我個幾月內打咗3萬幾分好唔正常,俾系統偵測到,所以reset咗我嘅積分喎。真係火都嚟埋,如果我每日打七百幾分都算唔正常,咁排行榜上嗰幾位異能人士每日打五六千分又算係乜呢?

上次我舉報咗榜上嗰幾位異能人士,Recax話就話會密切觀察,但係多日嚟一啲行動都冇,班友嘅積分每日繼續以幾千分增長,其實我已經有啲唔順。而家竟然向我開刀,真係是可忍孰不可忍啦。咁我咪直斥其非,話佢地非但對榜上嘅大老虎視而不見,反而針對我呢啲一等良民。我仲付上排行榜眾人由10月22號到琴日嘅每日進帳數據,睇佢仲有乜嘢可以講。一如所料,對方好快就有回覆,內容如下:

「包括陳主任在內的這幾位用戶,暫時確未能確定他們的積分有異樣,因他們的系統是IPHONE的,而IPHONE除了一般版本外,亦有付費的黃金版,黃金版的用戶可以透過使用跑馬地會館而享有免抽佣的權利。Android直至11月27日為止也沒有推出跑馬地會館,跑馬地會館的開放時間是在11月28日伴隨2.44版本發佈後才增加的,這是兩天前的事,因此android 用戶要做到以前每天7000分,系統會將其視為不可接受範圍。請你見諒。」

講嚟講去,都係話我嘅得分有問題,真係俾佢激死。以下係自我嘅回覆,亦係最後回覆:

「謝謝回覆,但你的解釋實在讓人難以信服。抽不抽水的分別只是25%,就算沒有抽水,本人每天進帳也只折合大約一千分。為什麼這算不正常,而「陳主任」他們每天五六千分的進帳竟然沒有異樣?而且之前說過,本人每天玩十多小時,平均每小時進帳也只是幾十分而已,這又有甚麼不可能呢?要把每天玩十多小時的忠實擁躉拒諸門外,這是你們的選擇,本人無話可說,以後也不會再打擾你了!」

至此,本人已決定同雀王會館一刀兩斷。唔打雀王會館,仲有好多其他選擇,可以打番Yahoo麻雀,或者試吓神來也都得。其實,打麻雀game同打工一樣,東家唔打咪打西家囉!

後記:

以為Recax唔會再理呢單嘢,點知佢地竟然仲肯回覆。內容如下:

「感謝你一直以來的支持。雀王會館的ai設定一直都是較一般人腦稍弱(贏出次數不一定比玩家少,但總番數一般比玩家少),所以會透過抽佣的方法去取得平衡(這亦是為什麼不同會館抽佣的數字不一樣的原因),一般用戶在抽佣後,分數增長不會明顯,但如果是進入免佣會館的話,分數增長確實是可以很多。這方面android版本現已開放免佣會館,你其實可以嘗試去體驗一下。」

哈哈,終於露出狐狸尾巴喇!居然氹我用嗰個要收費嘅黃金版,真係睬佢都有味呀!

雀王排行榜

2012年11月25日星期日

感覺好似打怪獸

過咗幾日,雀王排行榜又有變動。「不動明王」LO FAI早兩日已經被踢出排行榜,比我估計仲要快。跟住太極人又出埋局,代之而起嘅就有九龍麻雀王同蘭婆兩位。至此,排行榜嘅舊人(以我開始打雀王會館計)只係剩番陳主任、Wongfanny、同埋屯dee。曾經最有機會問鼎雀王寶座嘅屯dee,自從10號開始就毫無進帳,睇嚟已經放棄咗。估計佢會步LO FAI後塵,好快消失埋添。

新上榜嗰兩位,蘭婆仲未知,而九龍麻雀王又係勁到無倫嗰隻。現任雀王陳主任就繼續遙遙領先,每日更以超越人類極限嘅速度累積分數。分析形勢,排行榜上嘅異能人士已經七佔其四,而隱藏喺榜外嘅異人,數目更係難以估計。我輩凡人,就算日日24小時磨爛蓆都冇可能會追得到,睇嚟真係上榜無望囉。

同呢班異人爭上榜,直頭係蝣蜉撼樹。感覺就好係細個睇日本超人片集,地球防衛隊用人類嘅低能武器打怪獸,啲怪獸簡直當係R痕。唔同嘅係,呢度唔會有超人,班怪獸嘅對手,根本只有其他同類。

講番本人,今日已經打到3萬幾分,不過仲係排緊23位。其實16號已經打到22位,點知打咗9日,攞多咗7千幾分,竟然仲跌咗1位,真係冇天理呀!

不過咁,呢幾日都算有啲收穫,就係食咗一鋪極其罕見嘅奇牌:全么九。以本人浮沉雀海多年,呢種牌都係第一次食咋。講到難度,同天糊或者十八羅漢唔知點比,但係就肯定難過坎坎糊。

講開坎坎糊,校長早排就食過一鋪,仲要有埋混一色添,真係奇中之奇。不過本人都唔輸蝕,早幾日亦食咗一鋪。雙番東、白板、混對、加埋門清,打出都已經夠10番。而家仲自摸埋,就算唔計坎坎糊都已經食到盡晒。哈哈,贏咗校長一個馬鼻添!

順帶一提,喺雀王會館,門清對對糊叫單吊,就算打出都算坎坎糊架,我都係食過一次先知道咋。嗰次我以為只係門清加1番,仲考慮咗好耐先食添,結果真係喜出望外囉。不過記住,如果叫對碰,食打出就只係得門清,唔算坎坎糊架!

突發直擊報導:

啱啱寫完blog,打第一鋪就有料到。開牌已經11隻么九番子,跟住仲連摸白板同北,打出3隻牌就叫十三么喇!唔知食唔食得出呢,好緊張呀!

再直擊報導:

Update完個blog,再摸多一個轉,上家就打一萬俾我食,真係超快呀!不過可惜唔係自摸,有少少遺憾囉!

雀王排行榜

全么九

坎坎糊

超快叫十三么

超快食十三么

2012年11月17日星期六

奇牌

以本人嘅定義,奇牌係指少見嘅牌。大牌唔一定係奇牌,好似十三么咁,根本一啲都唔奇,琴日我就連續食咗兩鋪。

至於點至係奇牌,以下係三個實例:



呢鋪係傳說中嘅十八羅漢!呢種牌好罕見,莫講話食,之前就連叫糊都未試過,卒之琴日俾我遇到一鋪嘞。鋪牌嘅四個槓,有啲係先碰後槓,有啲係人地打俾我槓。其實最初我都冇留意,不過睇睇吓,見幾隻反轉嘅牌間得好整齊,先發覺係十八羅漢。鋪牌都算順利,中局開始已經碰晒叫單吊。碰完最後隻三萬,手上剩番東同紅中,諗咗一陣,都係打隻紅中出去。因為成鋪牌嘅主調係藍色,留番隻東比較順眼啲。點知隔咗兩轉,竟然摸番隻紅中(見圖),真係激到我彈吓彈吓。本人最唔信邪,諗都唔諗就飛走隻紅中。結果又揀錯,下家即刻跟紅中。最後鋪十八羅漢都係食唔出,俾下家食咗3番雞,原來佢揸住一對東做眼。算啦,唯有發揮吓阿Q精神,十八羅漢呢啲奇牌,叫到糊其實已經好難得架喇!



呢鋪牌只係清一色平糊,打出得8番,本來冇乜特別,奇就奇在過程順利到冇人有。鋪牌我做莊,開牌有9隻筒子,已經算幾靚吓。點知上家打得仲靚,佢打一隻我上一隻,過咗四個轉,已經單吊一筒。跟住下家仲即刻出埋隻一筒,結果一隻牌都唔使摸就有糊食。其實順利並唔係必然,如果揀錯牌上,就唔一定接得晒上家4隻牌架喇。始終,打牌除咗講運氣,牌章都好緊要囉!



清一色對對糊雖然有10番,不過都唔算係乜嘢奇牌。做牌過程亦冇乜特別,開牌8隻萬子,有3對。以本人作風,有3對就會做對對糊。其實打法唔係好正路,有牌唔上,生章牌死扣爛扣,熟章牌就算有黐都照打,總之不成功便成仁啦。結果幾經辛苦打到單吊,最後對家出銃。咁當然唔算好特別,奇就奇在竟然截埋下家鋪3番雞。都唔知點解,電腦特別鍾意玩截糊,3番雞截我10番都試過幾次。如果同下家叫埋同一隻牌,電腦就會玩自摸,真係俾佢吹漲!呢鋪截番電腦轉頭,你話係咪奇牌?!

2012年11月14日星期三

一念天堂,一念地獄

首先報告吓雀王排行榜嘅最新形勢。前度雀王kkpang已經跌到落第4位,而頭3位就分別係陳主任、Wongfanny、黃Sir。至於本人,4日內只係微升8位,排行29。

本來仲有一位耀目新星Kingqueen,上榜唔夠一日就已經打到第5位,簡直令人眼前一亮。不過佢嘅成績實在太耀目,一粒鐘竟然打咗2763分(相當於48鋪自摸10番),引起有關方面懷疑,結果上榜唔夠一日就連戶口都俾人鏟埋。

其實榜首幾位忽然發威,仲勁過食咗偉哥,都係11月先開始發生。Kingqueen短短幾日就可以打到咁高位置,相信佢喺發飆之前,其實都已經唔少嘢,極可能係銀雀士。而家一鋪玩完,以前付出過嘅努力全部付諸流水,都咪話唔慘囉。

相信佢都係一念之差,一心想快啲登頂,催谷十成功力,結果走火入魔,落得屍骨無存。好似陳主任佢地幾位就唔同嘞,識得韜光養晦,每日係咁意打五六千分,自然可以長期佔據排行榜。只要得分冇超越「運氣」範圍,又真係奈佢地唔何囉。人地係要日日咁好運,鋪鋪食大牌,你班友吹咩!

雀王排行榜

2012年11月10日星期六

雀王?千王!

雀王排行榜真係日日新鮮日日堅呀!長期佔據榜首位置嘅kkpang已經跌到落第三位,越戰越勇嘅Wongfanny就上到第二位,啱啱仲喺粒半鐘內打咗3000分,真係勁到無倫!至於早幾日先上榜嘅黃Sir,勢頭亦唔差,已經進佔第四位。

雖然冇上述幾位咁勁,但係自從上次公布過成績,本人亦稍有進帳,排名微升13位,去到37。而且積分已經突破20000大關,都算係一個小小嘅里程碑。

不過硬係有啲唔順,我已經好努力喺度磨爛蓆架啦,冇理由會同佢地爭咁遠啫。要解開呢個謎團,就要做少少數據分析嘞。費盡九牛二虎之力,卒之整咗個由10月19號到琴日嘅「每日進帳」列表。

從列表所見,陳主任、Wongfanny、黃Sir三位大發神威,分別係由11月1號、11月7號、11月6號開始。除咗黃Sir冇往績可尋,其餘兩位喺發威之前,每日進帳都冇乜突出之處。再對比番列表中其他人,就更顯得上述三位喺呢幾日嘅成績勁得異乎尋常。為咗揾出真相,本人做咗一樣好無聊嘅嘢。

冇錯,的確好無聊,我坐定定10分鐘,不停進出雀王排行榜,實呢三位嘅積分變化。哈哈,果然有驚人發現,佢地一鋪牌嘅進帳竟然可以超過100分!

事實上,喺雀王會館食到盡都係自摸10番,扣除抽水,每鋪進帳最多都只係得57.6分。好明顯,佢地嘅佳績已經超出咗運氣同技術嘅範圍。我可以好肯定咁講,呢個game已經俾人hack咗囉!

本來仲諗住轟轟烈烈咁參與呢場雀王爭霸戰,班友而家竟然出埋超技術,唔通真係要眼白白睇住人地上演一場千王群英會?

哈哈,本人疾惡如仇,當然唔會任由老千橫行啦,我已經寫咗封信俾Recax舉報佢地喇!


後記:

琴晚已經收到Recax回覆,佢地效率真係相當高,抵讚!回覆內容如下:

「我們將會對有關戶口作出觀察,另外亦跟你說明一下,雀王會館的分數並不是每局上傳,而是當分數差超過100,而又網絡許可的情況下才上傳,所以這幾位玩家可能在你觀察的時候已經玩了超過一局。」

關於分數上傳方式,本人當然冇得同佢拗,不過咁都絕對釋除唔到我對上述玩家嘅懷疑。舉個例,琴日先上榜嘅Kingqueen就喺4分3秒打咗202分,相當於3鋪自摸10番加一鋪自摸8番,如果話佢冇出術,我就真係打死都唔信囉!

Crowned crane, Arusha, Tanzania

雀王排行榜

每日進帳

2012年11月5日星期一

神奇主任

呢排忙於開檯,搞到連鬧人都唔得閒添。不過班港毒騎呢怪咁Q樣衰,唔鏟吓又硬係周身唔舒服。班友都唔知乜嘢心態,咁唔鍾意做中國人就死去移民啦!賴死唔走已經夠樣衰,仲要喺度搞事累街坊,因住生仔冇咕咕呀!

言歸正傳,喺雀王會館打咗大半個月躉,今日終於叫做小有成就嘞。啱啱已經打到排名50位,晉身銀雀士行列。雖然距離上榜目標仲有好遠,但係點都起到啲鼓勵作用囉。其實琴日朝早已經打到51位,本來諗住好快可以晉級,點知最後打咗成日,攞多七百幾分先上到一位,真係辛苦過擔泥。

當然啦,我都知爭取排名位置會越嚟越難。不過之前做咗個數據分析,本人嘅每日進帳多過晒榜首嗰7位,要上榜理論上都只係時間問題囉。但係早兩日喺排行榜見到啲異動,唔止俾佢嚇親,仲連信心都打殘埋添。原本排第二嘅陳主任,喺一日內竟然攞到八千幾分,取代咗kkpang嘅榜首位置。喺其中一個58分鐘嘅時段,陳主任就有972分進帳,都咪話唔得人驚。

雀王會館最大打到10番,而且食糊要四抽一。如果食自摸10番,扣咗抽水就會有57.6分進帳。即係話,陳主任喺58分鐘嘅進帳,竟然相當於食咗17鋪自摸10番,你話得唔得人驚?

一直以為,同榜首嗰幾位爭咁遠,只係輸喺起步點。完全冇諗過,原來真係有咁嘅絕世高手。莫講話追,就算想跟佢尾食塵都冇可能。究竟陳主任點解可以咁勁呢,唔通副牌係佢「挑」嘅?

雀王排行榜

頭銜:銀雀士

2012年10月27日星期六

Mission Impossible

早排睇到校長嘅鴻文,話喺雀王會館大有斬獲。本人一於唔執輸,即刻由Yahoo麻雀轉會過嗰邊。雖然Yahoo麻雀都有積分,但係就不設排名,打喺嚟始終冇咁刺激。結果打咗半個月,排名由最初嘅16萬幾,上升到今日嘅120,已經晉級到「銅雀士」嘞。

講到排名,淨係自己知當然唔夠,梗係要上埋「雀王排行榜」先滿足到本人極其無聊嘅虛榮心啦。排行榜只列出頭7位,我開始打嘅時候,排第7嗰位雀友已經有3萬幾分。打咗幾日,發覺排名爬升得好快,不過積分同上榜雀友仍然爭好遠,距離好似冇乜拉近到咁。為咗睇吓有冇機會打入雀王排行榜,9日前開始記錄低有關數據,今日就做咗個簡單分析,得出以下列表:

 

10/18/2012

10/27/2012

 

積分

排名

積分

排名

進帳

日進帳

要追幾日

kkpang

51537

1

54642

1

3105

350

97

陳主任

45786

2

48565

2

2779

314

78

LO FAI

42337

3

42337

4

0

0

40

dee

35589

5

42353

3

6764

763

1119

Wongfanny

37731

4

40121

5

2390

270

56

傲風

33993

7

39102

6

5109

557

130

太極人

34398

6

37486

7

3088

348

60

Armadillo

5003

770

12005

120

7002

790

 





























淨係睇積分同排名,根本唔會有太大意義,最具參考價值嘅其實係「每日進帳」。如果每日進帳根本唔夠人地多,咁即係話呢世都唔會追到上去啦。好彩,鄙人嘅每日進帳多過晒榜上嗰7位,咁仲有啲機會囉。再根據積分同每日進帳嘅差距,就可以計出要幾多日先追到佢地嘞。

從表面睇,最易追肯定係LO FAI,只需要40日。但係呢位仁兄9日以來都冇郁過,可能已經金盆洗手,我諗追到佢嗰時都已經跌出排行榜囉。所以比較合理嘅估計係,想打入排行榜,起碼要用56日追Wongfanny。如果想登上榜首,咁就要用3年追屯dee嘞。

不過日日係咁不停打,莫講話要3年,就算係56日都死得人啦。講真,打雀王會館真係好辛苦吓。地下啲牌鬼死咁細隻,睇到眼都盲。嗰把語音女聲又極其惡頂,聽到人好煩厭。而且除咗打牌,本人仲有好多嘢要做,根本好難一直維持住呢個進度。睇嚟想打入排行榜,真係一個不可能的任務!

頭銜:銅雀士

雀王排行榜 as at 10/18/2012

雀王排行榜 as at 10/27/2012

2012年10月20日星期六

小學雞V煞

報載資深傳媒人兼專欄作家屈穎妍收到封別開生面嘅恐嚇信,睇完笑到我趴街咁滯!

封「恐嚇信」其實係一張相,影住一個戴咗V煞面具嘅正面全裸肥佬。報紙有登埋張相出嚟,不過喺重要部位打咗超大格仔,睇唔到相中人究竟有冇過人之長。相片背面仲手寫一首搞笑打油詩同埋一行涉及恐嚇嘅字句,內容如下:

學民思潮氣勢勁
公民黨精明引領
新界東北亦收兵
睇你CY點施政

我班同學都支持你同我性交,我已準備了,你呢?


屈女士覺得人身安全受到威脅,所以去咗報警,而警方就將案件暫列「刑事恐嚇」。由於封信係直接寄去報館,並要求編輯轉交,屈女士相信恐嚇動機係同佢喺報紙寫嘅專欄有關。

據屈女士講,自國民教育科引起爭議後,她曾遭受網友以電郵批評,指她未有就國教科表態,有網民甚至以粗口謾罵她,她則在專欄寫了〈沉默的自由〉回應,慨嘆「幾時開始,香港變得連沉默的自由都沒有了!」,「如今社會奇怪地撕裂,我在報紙爬格子十多年了,忽然有感,今天,是最沒言論自由的時代」。

屈女士又表明佢對國民教育議題嘅立場:自己「都反對國民教育獨立成科,但我反對『反洗腦國民教育』這命題。跟許多家長聊起,大家都說,如果這世上真有一種方法可洗腦,實在求之不得,唔該順便幫忙洗洗孩子的腦,叫他們比心機讀書、上少點網、多看點書……」

屈女士從來都唔係建制派支持者,可能佢覺得自己嘅諗法有別於主流犯民粉屎,所以選擇唔就國民教育單嘢表態。但係相信連佢自己都估唔到,唔講啲討好犯民粉屎嘅違心之言,竟然都會俾人產到上天花。

表面上睇,正如屈女士所言,香港已經進入「最沒言論自由的時代」。但係睇真啲,班友根本係干預緊別人嘅思想自由,只要諗法唔同,就要抽出嚟鬥垮鬥臭。咁其實比洗腦更可怕,由於洗腦只係單方向嘅思想傳遞,試圖透過不斷重複嘅信息影響別人,但係受者並唔會因為冇被成功洗腦而受罰。所以本人覺得,屈女士嘅評語都係未能夠反映現實情況,其實香港已經進入文革時代就真!

講到嗰位寄出裸照嘅V煞,只可以話既無聊又搞笑。無聊,係因為唔值得為咗啲自己睇唔過眼嘅嘢,而做出要負上刑事責任嘅行為。至於搞笑,就係因為張裸照同首打油詩。

首先,相中人肉騰騰嘅身形,再加埋明顯嘅背心印,睇到只會令人發笑,一啲驚嚇效果都冇。用張咁嘅相嚟恐嚇人,未免太睇低當事人嘅膽量囉。

至於首打油詩,句句押晒韻,條友梗係以為自己作得好醒啦。但係首詩每句都係以四三格局分隔字義,咁第二句就會被理解為「公民黨精 明引領」。哈哈,唔知公民黨係乜精呢,蜘蛛精、白骨精?仲有,打油詩呢家嘢,時下啲細路根本唔會有興趣,咁亦間接涉露咗發件人嘅身分,條友起碼已經係阿叔級別囉。再睇番啲字,簡直肉酸到無倫,本人好肯定小學三年級已經寫得好過佢。大家可能會諗,寫得恐嚇信,自然唔會用番平時嘅字跡。事實係,字跡呢樣嘢好奇怪,就算你點刻意要改變都好,筆劃嘅比例同布局仍然會喺番度。我自己就試過嘞,真係點寫都唔會覺得肉酸囉。而且睇番恐嚇信裏面幾個重複嘅字,形態都相當統一,刻意改變字跡嘅可能性其實唔係咁大。哈哈,忽然變咗字跡專家添!

弊嘞,阿叔嘅心態,小學雞嘅字跡,好似好矛盾喎,咁究竟V煞係阿叔定小學雞呢?哈哈,我可以相當肯定咁講,條友係一個思想行為停留喺小學雞階段嘅阿叔囉!

Kalimpong, India

2012年10月15日星期一

發雞瘟

琴日有鋪牌真係激死!我手揸住以下萬子:

二三三四四五六七八八八八九

雖然本人連16隻嘅台灣牌都打花章,但係呢鋪牌都要睇咗好耐先知道叫乜。最衰打麻雀game係眼看手勿動,冇得將啲牌砌嚟砌去。不過呢度咁多雀林高手,話唔定有人已經一眼就睇得出鋪牌係叫三六七九萬。

當時只係去到中局,食糊嘅機會都相當大吓。果然,轉個頭就摸隻七萬,真係開心死,因為只有食七萬先係平糊。清一色平糊門清自摸,加埋啱啱夠10番。個game只係打到10番,食鋪打出十三么仲冇自摸十番咁實際囉。

都摸咗上手,咁當然係實食冇黐牙啦。點知好衰唔衰,都唔知突然發乜嘢雞瘟,明明想食糊,但係竟然㩒錯咗食糊掣隔籬嗰個開槓掣,無啦啦攞咗4隻八萬去槓。拆散咗鋪牌唔在講,如果槓隻返嚟出銃俾人就PK啦!

好彩都有少少運,槓返嚟嗰隻係九萬,起碼唔使輸先,因為我係獨家萬子。再睇真啲,原來打隻七萬出去仲可以叫番二五八萬添,雖然食糊機會細咗好多,但係點都好過連糊都冇得叫囉。更好彩嘅係,對家跟手就打隻五萬俾我食埋。雖然有得食,不過得打出7番,同自摸10番爭咗幾倍,就算唔係打真金白銀都激死啦!

話時話,類似嘅發雞瘟事件其實都發生過唔少。試過想delete一張相,結果就成個folder都鏟埋。又試過沖完涼諗住放啲底衫褲入廚房嘅洗衣籃,點知竟然掟咗落垃圾桶。就算係行入房,有時都會無啦啦撼頭埋門框。

本人好有自知之明,明知自己有時會發吓雞瘟,所以有啲高危嘢我係永遠唔會做。例如處理食材,我就只會切而唔會斬。就算真係非斬不可,我都一定唔會用隻手傍住。萬一發起雞瘟上嚟,連隻手都斬埋咪大鑊?總之就博唔過啦!

話時話,唔知其他人有冇類似嘅慣性發雞瘟問題呢?

Kars, Turkey

2012年10月14日星期日

請勿侮辱文學與藝術!

內地作家莫言獲得諾貝爾文學獎,本人真係啞口無言。千祈咪誤會,我絕對唔係要質疑評審結果。「無言」係因為唔知講乜好,以本人嘅文學修養,根本就冇資格評論。況且喺莫言嘅作品之中,我淨係睇過「紅高粱家族」一篇咁大把,仲要係九十幾年前嘅事,內容已經唔記得晒,想評都冇得評。

無啦啦摷呢單嘢嚟講,係因為睇報紙見到內地「藝術家」艾未未大發高論(「高」字要用普通話發音),話莫言獲獎「是對人性和文學的侮辱,是諾獎委員會的恥辱。」

條友都黐孖筋,作為一位「藝術家」,竟然踩過界批評諾貝爾文學獎嘅評審標準。人地嘅作品冇傳遞到佢認為正確嘅政治信息,就話人冇資格獲獎,都唔知係乜嘢理論。

以李杜為例,李詩明顯比杜詩少咗一份憂國憂民嘅情懷,但係後世並冇因此而貶抑李白。事實上,詩仙詩聖得以齊名,正正說明咗文學領域容納到唔同嘅題材,有空間自由發揮先係硬道理。

以艾未未嘅主張,文學作品只可以有一種聲音,咁同大陸鉗制言論自由又有乜分別呢?公然提出要扼殺作家嘅創作自由,唔知邊個先係喺度侮辱緊文學呢?!

講開艾未未,又忍唔住要提吓佢嘅「藝術創作」嘞。鄙人對藝術一竅不通,本來都冇資格評論啲乜嘢。不過有一樣嘢我起碼知道,令人覺得嘔心嘅就點都唔講得上係藝術品囉。

就以大「藝術家」嘅名作「一虎八奶圖」為例,據聞內裏深藏玄機、隱喻甚多。不過橫睇掂睇,我都只係見到一個肥到爆晒膏嘅裸男,再加埋四個其貌不揚嘅裸女。咁核突嘅嘢,真係望一眼都想嘔,仲邊會有興致探討佢嗰啲所謂嘅隱喻呢?

講真,呢件所謂作品,分明就係一個不知羞恥為何物嘅男人同四個博出位嘅女人喺度玩即興露肉!如果咁都算藝術品,根本就係對藝術嘅極大侮辱囉!

本人絕對支持言論自由,但唔可以對文學同藝術肆意侮辱!艾未未,唔該你收皮啦!

哈哈,最緊要嗰樣唔記得講添!大家千祈唔好摷「一虎八奶圖」嘅原裝版嚟睇,否則後果自負!如果閱後令大家對異性(或同性)喪失興趣,本人概不負責!

一虎八奶圖

2012年10月10日星期三

行船三分險

國慶日發生嚴重海難,令人震驚同難過之餘,亦帶出咗一個我地以前好少注意嘅問題,原來坐船都可以好危險!

事隔兩日,越南下龍灣亦發生撞船事件,令到五名台灣遊客魂斷異鄉。事實上,涉及觀光船嘅嚴重事故,喺下龍灣並唔罕見。舊年二月就有觀光船因為船身入水而迅速沉沒,導致十二人死亡。單嘢喺半夜發生,啲遊客喺船艙瞓晒覺,直頭死咗都唔知乜事。據聞事發後有關當局禁止觀光船提供夜宿安排,但係過咗一日就解禁,都咪話唔搞笑。梗係啦,多數遊客去下龍灣都唔止玩一日,而且通常會選擇喺觀光船過夜,如果禁止夜宿,當地旅遊從業員肯定要食穀種囉。

事實上,又真係有好多遊客唔怕死,本人就係其中之一。單嘢發生咗兩個月,我就去下龍灣玩嘞,仲喺船上過咗一晚添。喺船過夜有好多好處,黃昏可以睇日落,朝早可以睇日出,又可以慳番一晚酒店,真係何樂而不為。講真,話唔怕死就假嘅,所以當晚臨瞓前,我一直提醒自己要醒瞓啲。不過事與願違,一瞓就瞓到隻死豬咁,到第二朝鬧鐘鬧先識醒。好彩冇嘢發生,仲睇到相當唔錯嘅日出添。

話時話,都唔知點解去親旅行都會有遊船河,就算係去內陸地方,都會安排遊河或者游湖。玩緊嘅時候當然唔識驚,不過而家諗番,其實真係要揾命博架。因為如果有乜意外,就算有救生衣都未必救到命。

有次去巴西玩,行程包括亞馬遜森林探險,其中重頭戲係遊河釣食人䱽。叫得做探險,坐嘅當然唔係大船,而係又窄又長嘅機動艇仔。呢類艇仔本身就唔係咁安全,因為比較容易反。而我自己又成日企起身影相,其實咁都幾危險吓,一失平衡就會跌落水。如果跌落水就大鑊喇,浸就未必浸得死,不過喺幾分鐘內就會俾啲食人䱽到得番棚骨囉!

咁都未算最恐怖,起碼都叫做有得剩。今年去博茨瓦納嘅Chobe Delta,就有坐船遊河環節,提供唔同角度睇番兩岸野生動物。不過見到最多嘅動物,並唔係羚羊水牛河馬,而係食人唔𦧲骨嘅大鱷,估計應該仲有好多喺水裏面冇蒲到頭添。鱷魚唔識咀嚼,只會將獵物撕開一大塊一大塊,連骨帶肉咁吞。如果跌落水,隨時會落得屍骨無存,都咪話唔得人驚。不過隻船都算大,坐到幾十人,應該比較安全,當時係咁諗囉。

咪以為水裏面冇食人怪物,而又著住救生衣就冇有怕。好多年前去紐西蘭,就坐橡皮艇玩過Tasman Glacier嘅Terminal Lake。個湖同冰川連接,由剛融化嘅雪水形成,水溫接近零度。喺水裏面浸幾分鐘,就有可能死於低溫症,所以就算有救生衣都冇用。

古語有云,行船跑馬三分險,不過當玩到興高采烈嘅時候,又有幾多人會察覺到當中隱伏嘅危機呢,起碼我自己就冇嘞。見到今次咁嚴重嘅海難,先知道世事無常,乜都可以隨時發生,咁係咪要審視吓應唔應該再玩啲有潛在危險嘅活動呢?不過諗深一層,既然乜都可以隨時發生,真係想避都未必避到啦。落街可能俾人跳樓責死,留喺屋企又有機會俾隔籬開煤氣自殺炸死。所謂該死唔使病,邊驚得咁多啫!趁而家仲行得走得,都係有得玩就玩,一於馬照跑船河照遊!

Halong Bay, Vietnam

Amazon River, Manaus, Brazil

Piranha, Amazon River, Manaus, Brazil

Crocodile, Chobe National Park, Botswana

Terminal Lake of Tasman Glacier, New Zealand

Terminal Lake of Tasman Glacier, New Zealand

2012年10月6日星期六

刁民社會

刁民係乜?以本人嘅中文程度,恐怕好難講得清楚。而且網上有大把現成資料,信手拈來就用得,又使乜自己獻醜呢?!以下係節錄自百度百科有關「刁民」嘅條目:

刁民
翻开字典,“刁”,是狡猾的意思,从原始意义上讲,“狡猾”应该是一个中性词,不具有褒贬意义。“刁民”绝对不是愚民。它是民众中的聪明人。 “刁民”,是与官员相对应的,是官员对一些难对付的民众的专用称呼。“刁民”就是对官员刁难,很难对付的一类百姓。“刁民”的称呼是官员赐予的,“刁民”的贬义也应该是官员赋予的。自古以来,官员是不大喜欢“刁民”的。“刁民”多了,工作难做,官员难当。

基本信息
“刁民”带有无赖,狡猾,奸诈特征的人被称为刁民。也可以说是蛮不讲理的人,狠毒心肠的人。

由来
一是百姓享有一定的人权。中国之所以“刁民”历史悠久,是与中国的“民本”思想占主导地位有关系的。民众享有基本的人权,才会有“刁民”出现! 在生存权力随便可以被剥夺的社会中,是没有“刁民”的,只有“顺民”或者“暴民”!曾国藩在衡阳练兵时,对抢粮的饥民,一次性砍下二十多颗血淋淋的人头。曾的解释是乱世要用重典。在这种重典下,谁还敢作刁民呢?在日本统治的中国满洲,是没有人敢同“皇军”使刁的,所以那时只有“良民”和抗联战士,而没有“刁民”。

對於上述解說,本人並唔完全認同。首先,“狡猾”一詞肯定係帶有貶義。而且要做刁民,其實門檻好低,根本唔需要乜嘢聰明才智。再講,刁民所「刁」嘅對象,亦唔一定係官員。被「刁」者可以係任何個人、私人或公共機構、甚至整體社會。不過有一點我就非常同意,就係「百姓享有一定的人权」,先會有刁民出現。今日睇報紙,就見一單人肉示範嘞。

報載有私家醫院清潔女工,因為喺工作時間瞓覺,俾上司用手機拍低短片,最後被迫辭職。事後女工「不滿被侵犯私隱,向私隱專員公署投訴,但未獲受理,日前她入稟高院申請司法覆核。」據醫院解釋,該女工「曾多次偷懶,院方每次與她對質時,她均否認,反向院方要求證據」,所以先拍低佢嘅睡姿。報導仲話,該女工「原於瑪麗醫院工作10多年,後來因為薪金較高而轉工,一直以來跟部分新同事關係不太好,懷疑遭上司針對。」

眾所周知,喺公營機構做嘢,基本上係捧住個鐵飯碗。除非導致嚴重事故,對於一般輕微失職(例如偷懶),主管都會隻眼開隻眼閉,費事搞咁多嘢。私營機構講求成本效益,莫講話主管對下屬偷懶唔會視而不見,就算係同級同事都會睇唔過眼,因為隨時要做埋佢嗰份。所以當事人話俾同事針對,根本就係正常不過。

至於話侵犯私隱,更係荒謬絕倫。喺工作地點偷懶瞓覺都算係私隱?俾人影到,自然唔係匿埋喺廁格之類嘅隱蔽地方瞓覺。明目張膽偷懶,斷正咗仲反咬人一啖,呢位女工都算「刁」得緊要喇。喺公家醫院hea過世咪好囉,佢偏偏要貪多少少人工轉去私家醫院。去到私家醫院,又要好似喺公家醫院咁hea,唔俾人兜都冇天理啦!

單嘢絕對唔係單一事件,呢類將社會核心價值無限放大、甚至肆意扭曲嘅行為,根本已經成為風氣。例如次次示威遊行,最後都演變為暴力衝擊警方防線、或者強佔馬路。唔通為咗表達意見,就可以破壞社會安寧、甚至剝奪公眾(道路使用者)權益?

又好似某名店阻止港人喺店外影相,網民就發起萬人圍堵,搞到附近嘅舖頭都做唔到生意。認為店方冇權唔俾人喺店外影相,咁咪報警囉,唔通班友又有權對人地作出滋擾?呢種近乎任用私刑嘅行為,究竟又係咪切合文明社會嘅核心價值呢?

另外,小號喺店內用簡體字做產品說明,又得罪咗某啲民主派人士,結果一樣受到圍堵。你可以抗拒簡體字,不過絕對冇權干涉我用邊種文字嘅自由。唔鍾意就咪幫襯,但係走嚟小店搞事,阻住晒我做生意,咁就佛都有火嘞。最得人驚嘅係,帶頭搞事嘅竟然係候任民選垃圾會議員嚟添!

由此可見,呢種將個人權利無限放大、肆意扭曲嘅刁民行徑已經深入民心。毫無疑問,香港正逐步走向刁民社會,安定和諧嘅日子將一去不返!

弊嘞,冇將上面引述百度百科嘅一段文字轉番繁體添,會唔會俾人鬧我係五毛黨呢?

Great Zimbabwe, Zimbabwe

2012年10月4日星期四

Wine-Colored Days and Deep Velvet Nights

呢幾日喪聽Andy Williams,聽得最多嘅除咗Love Story,當然仲有教父嘅主題曲Speak Softly Love。

講到教父,經典二字絕對當之無愧。除喺係奧斯卡最佳電影,更喺IMDb得到史上第二高分,而男主角馬龍白蘭度亦奪得金像影帝榮銜。

套戲喺香港上畫,我應該係讀緊初中。嗰時仲係鄉下仔一名,根本唔識出城睇戲,要到後來電視播先有得睇,不過都係咸豐年代嘅事喇。到而家已經唔記得晒劇情講乜,淨係對首主題曲同馬龍白蘭度有印象。

首歌咁正,我一直都有聽,當然唔會唔記得。至於馬龍白蘭度,演成點已經冇晒印象嘞,不過就好清楚記得佢塊面。正確啲嚟講應該係話兩邊腮,唔知點解無啦啦腫咗,好似生炸腮咁,都不知幾詭異。

話時話,首主題曲係love theme,即係話套戲應該有愛情線,唔通要老馬玩枯木逢春?唔得,揾日等我班隻碟返嚟睇吓先!

Vineyard, Casablanca Valley, Chile

Vineyard, Casablanca Valley, Chile

Tbilisi, Georgia

Tbilisi, Georgia

2012年10月2日星期二

致哀

願逝者安息、傷者早日康復!亦望死難者親友節哀順變,走出傷痛陰霾!

2012年9月29日星期六

Love Story

琴日上youtube摷Andy Williams嘅Love Story,打咗lov三個字母已經彈個list出嚟,頭一行就係love story andy williams,可謂得來不太費功夫。隨手揀咗置頂嗰條片,點擊率有成四百幾萬,斷估應該係音效唔太差嘅版本。點知聽咗半句(Where do I),已經發覺俾人揾咗笨,嗰把聲根本就唔係Andy Williams!

老實講,雖然係冒牌貨(title明明寫住Love story - Andy Williams),但係條友真係唱得幾好,同Andy Williams嘅版本可謂各有韆鞦。不過咁,唱得好唔好係一件事,上載者點都唔應該用其他人嘅版本嚟冒充Andy Williams囉。我就相信唔係無心之失嘞,Andy Williams把聲咁易認,聽開舊歌嘅人有乜理由會搞錯呢?

再由頭睇番,原來第一個畫面已經寫住演唱者係Broce Twain。乜水嚟呢,真係唔知喎。上網摷吓,雖然資料唔多,但係就有驚人發現。有人話呢個至係Love Story嘅原唱者,直頭顛覆晒我對首歌嘅認知。

冇所謂啦,係唔係原唱其實都唔係咁緊要,鍾意咪得囉。好似Andy Williams唱飛哥跌落坑渠,我覺得仲好過Frank Sinatra添。佢又唱過Simon and Garfunkel版本嘅Scarborough Fair,雖然風格唔同,但係一樣咁好聽。當然啦,Andy Williams並唔係天下無敵,佢唱The Exodus Song就唔夠Pat Boone咁有氣勢嘞。

除咗上面提過嗰幾首,Andy Williams仲有好多正歌,例如Speak Softly Love、Alone Again (Naturally)、An Old Fashioned Love Song、A Time for Us、Aquarius、The Impossible Dream、Tonight、Moon River、Love is a Many Splendored Thing等等,真係百聽不厭。鍾意Andy Williams,究竟係因為佢唱得好,定係啲歌本身正,其實連我自己都唔係好搞得清。

講真,Andy Williams把聲唔算好靚,有啲沙沙地,唔係好夠厚,又唔算有磁性。至於唱功,亦唔覺有乜太特別。不過佢嘅歌令人聽得好舒服,最啱我呢類冇乜內涵嘅人。聽歌都係為咗消閒啫,如果咁嘅嘢都要學習同思考,咪仲辛苦過返工?

Andy Williams香咗,個個都話好可惜,又話好懷念佢,我反而冇乜特別感覺。佢都成八十幾歲先去賣鹹鴨蛋,喺中國人嘅角度,已經算係笑死啦。而且呢個世界有啲嘢叫做CD同MP3,就算佢唔喺度,我仍然會繼續聽佢嘅歌,可能直至我自己都香埋為止。所以佢有冇走到,對我而言真係一啲分別都冇!或者換一個角度,以冇咁冷血嘅方式嚟講,我根本唔覺得佢已經走咗!

Van, Turkey

Harare, Zimbabwe

2012年9月27日星期四

呃秤?

有啲覺得我個blog要改名添,可能改成「十萬個點解」會更貼切,嚴重考慮中。因為我真係有好多嘢唔明,成日要問點解。

最近睇完一單新聞,我又唔明嘞,點解香港人硬係要覺得自己俾人呃先安樂,唔通佢地有「受騙情意結」?

引述明報報導:
【明報專訊】米芝蓮一星中菜館新斗記,其佐敦分店早前遇海關放蛇時被指「呃秤」,稱該店出售兩隻共重14両的厴仔蟹,其中綁蟹水草重逾6両,新斗記因而被票控。店方反駁,顧客購買時已知悉蟹重連同水草計算,裁判官亦同意本案無欺詐成分,控方後來修改控罪,店方改認罪名較輕的無按淨重量供應貨物,罰款2000元。

大家睇完段新聞,有冇覺得涉案食肆好離譜呢,用嚟綁蟹嘅超級無敵大水草,竟然同蟹本身嘅重量差唔多。冇錯,可能好多人會將焦點放咗喺條大水草度,而忽略咗單嘢嘅關鍵所在:究竟店方有冇呃秤呢?

正如法官所講,顧客一早就知道用嚟計算價錢嘅重量係包括埋條大水草,咁話店方呃人當然講唔通啦。而且店方係當住客人面前秤蟹,秤完唔鍾意可以唔要,完全合乎公平交易嘅原則。難得個官咁明白事理,真係要讚吓。大家知啦,香港絕大部分法官都好似不食人間煙火咁,基本上係同民眾生活脫晒節囉。

我反而覺得海關冇嘢揾嘢嚟搞,簡直係嘥時間兼擾民。不過又唔怪得晒佢地嘅,據聞海關係接到舉報,所以先採取放蛇行動。究竟係邊啲人咁得閒,食飽飯冇嘢做就玩投訴呢?從陰謀論角度嚟睇,我會懷疑係行家使嘅橫手囉。

去開街市買餸嘅朋有都知,大水草厴仔已經出現咗好幾年,根本唔係乜嘢新鮮事物。就曾經有傳媒報導過呢種咁有創意嘅綁蟹方法,都係話商販呃秤呃到離晒罩,竟然呃足一半咁滯。亦有消費者覺得冇理由要用真金白銀買條大水草,狂插啲無良商販。

講真,我自己都好少買大水草厴仔,不過就完全唔關呃秤事,只係唔鍾意呢種咁嘅包裝啫。問過相熟魚佬,佢話入貨時已經係咁,都係連埋水草秤。事實上,魚販只係根據來貨價mark up若干嚟賣,根本就冇諗過要呃任何人。至於供應商方面,用大水草綁蟹,背後又有冇不良意圖呢?

有人認為,因為條大水草夠重,所以單位價(斷斤計)可以定得低啲,令消費者產生錯覺,以為啲蟹好抵買。究竟實情又係咪咁呢?

事實上,直接幫供應商入貨嘅係街市魚販,佢地邊有咁易俾人誤導啫。至於消費者,相信會俾條大水草嚇怕多啲囉。我自己就好少買呢啲大水草厴仔,因為就咁好難睇得出蟹同水草嘅重量比例。如果揀著啲蟹細水草大嘅貨色,咁咪蝕底晒?所以條大水草基本上係打擊咗消費者嘅購賣意欲囉。

我就估條大水草真係有實際作用,因為可以幫啲蟹保濕。呢類鹹淡水蟹唔可以用水浸住,但係太乾又唔掂,所以啲膏蟹肉蟹好多時都要用濕麻包袋冚實。如果可以用水草保濕,咁就解決咗呢個問題啦。當然啦,呢個只係我嘅猜想,絕對唔係要幫啲無良奸商開脫。

要用真金白銀買條大水草,好多人都覺得唔抵,甚至有人話係明搶添。但係佢地有冇諗過,如果厴仔用番啲幼水草或者尼龍草綁,會唔會仲係賣番同樣價錢一斤呢?

事實上,大水草厴仔已經出現咗好幾年,到而家都仲有得賣,證明唔係所有人都覺得咁係呃秤或明搶。總之計過條數,覺得抵嘅就買,認為唔抵咪唔好買囉,做乜硬係要話人地呃秤呢?

講咗咁耐,大家知唔知厴仔係乜呢?其實厴仔同膏蟹一樣,都係鹹淡水蟹乸,但係膏蟹已經成年,而厴仔就仲係待字閨中。雖然未成年,不過厴仔一樣係爆晒膏,而且同膏蟹相比,仲有佢優勝之處,就係啲膏熟咗都唔會硬到石頭咁。如果單講啲膏,同黃油蟹真係有得揮架。當然啦,啲肉就少咗黃油蟹獨有嘅油香,始終爭咗少少。不過咁,價錢都同黃油蟹就爭好遠嘞。如果鍾意食蟹嘅話,厴仔真係相當唔錯嘅選擇嚟架。

話時話,雖然我都鍾意食蟹,不過就好少買厴仔。一來係怕咗條大水草,更重要嘅係,啲厴仔實在太細隻,唔係咁啱我呢啲懶人囉!

大水草厴仔

2012年9月25日星期二

賤內

無意中喺網上睇到以下呢單娛樂新聞:

大S自稱「賤內」網友轟沒讀書

中國時報【宋志民╱台北報導】

大S和汪小菲到雲南捐贈「希望廚房」,她在微博說「賤內與有榮焉」,被網友轟沒讀書,賤內是舊時男性對妻子的謙稱,並非女性自謙用語,「這詞也代表了古代女子的低微,在現代用這個詞語很不恰當」,她對此沒回應。

大S在微博說「老公的餐飲服務業能往這樣美好的方向發展,賤內與有榮焉」,阿雅也發現有誤:「呵呵,賤內是老公稱老婆的,自己醬說真可愛。」網友酸「突然想起《流星花園》裡道明寺稱自己母親為令堂。」有人批:「回學校再出來賣弄古文吧,沒知識要有常識,沒常識要懂得閉嘴。」


講真,大S唔知賤內點解,其實一啲都唔出奇。中國人嘅謙稱可謂五花八門,但係大部分都已經過晒時,咁嘅老八股嘢,睇怕要我地呢啲已經晉身古董級別嘅老人家先會識囉。台灣我唔知,不過嘅香港,呢啲嘢學校應該冇教。我自己就因為睇得粵語殘片多,所以先識得一啲。而家呢輩人事事不求甚解,又唔識觸類旁通,就算接觸過呢類老餅嘢,都未必分領會到其中細微分別。好似大S咁,就錯誤自稱賤內,其實呢個詞只適用於男人對第三者提及自己老婆囉。

除咗賤內,男人對老婆嘅老餅謙稱仲有拙荊、荊妻、內人、內子。至於女人要提到自己,亦有另一套用語。一般嚟講,可以用奴家或奴奴。上咗年紀嘅就用老身。唔想太老土嘅可以用小妹或小女子。已婚女人就用妾身,如果好似大S咁,對個賤字情有獨鍾,當然可以用賤妾啦。

大S用錯稱謂,本來都好平常。我自己寫嘢就成日白字連篇,根本冇乜資格批評人地。我睇唔順眼嘅,唔係佢用錯詞,而係喺呢個年代,居然仲有女人會自甘作賤。

嗰啲對妻子嘅所謂謙稱,全部都係男尊女卑時代嘅產物,都帶有性別歧視成份。就算係比較中性嘅內子同內人,都係建基於男主外女主內嘅傳統觀念,已經不合時宜。至於拙荊同荊妻,亦帶有卑微含義,不過聽起嚟都起碼文雅啲。最頂唔順係賤內,個人覺得,呢個詞已經超出咗謙遜嘅範疇,根本就帶有侮辱性。賤字令人聯想到嘅冇一樣係好嘢,例如淫賤、下賤、賤格、賤種、賤精,要謙都唔使謙得咁過火啫。

講番大S,等我醒吓佢啦,以此女子智慧,自稱愚妹就最適合不過嘞。又或者,以佢嘅年齡,用老身亦未嘗不可囉。

講真,大S只係一個以美貌為賣點嘅藝人,對佢嘅要求自然唔可以太高。反而某啲揸筆揾食嘅所謂才子,都犯咗同樣嘅低級錯誤,咁先至令人側目。有本地金牌填詞人,喺歌詞寫男人向女人求婚,竟然用咗「做我內子」。首詞仲有唔少其他騎呢地方,之前已經寫過,喺呢度就唔再提嘞。欺世盜名之人多如天上繁星,本來都冇乜特別。奇就奇在首詞竟然人人讚好,仲獲獎無數添。

咪住,諗諗吓,才子首詞可能真係冇問題,話唔定係我自己嘅理解能力唔掂喎!上面段新聞有句嘢好精警,「沒知識要有常識,沒常識要懂得閉嘴」,睇嚟小弟都係及早封筆為妙喇!

補充:圖中女子並非拙荊,實乃他人之賤內也!

Sankaber, Ethiopia

2012年9月20日星期四

跌眼鏡

今屆垃圾會選舉第一次可以投兩票,點知命中率只得50%,真係有啲失望。不過咁都唔算跌眼鏡嘅,因為兩票都係參考民調,揀咗形勢落後嘅候選人。點知劉華喺超級區議會果然墮馬,所以咪冇得全中囉。

講真,選劉華係基於形勢判斷,其實我最想揀嘅係白姐姐。所謂爛佬怕潑婦,白姐姐正正就係癲狗長毛呢類議會垃圾嘅剋星。講嗌交,白姐姐牙尖嘴利,絕對唔會輸蝕。講暴力,班垃圾肯定無用武之地,斷估佢地點都唔敢打阿婆啩。不過白姐姐出線機會微乎其微,我當然唔會嘥咗手上神聖嘅一票啦。至於閒姐同李衛鯨,民調話佢地形勢大好,我亦唔需要幫人地錦上添花啫。諗嚟諗去都係投咗俾劉華,因為咁先最有機會阻止犯民攞到超級區議會第三席。雖然佢最後都係跑唔出,但係我仍然相信呢個策略係正確嘅。

好多民主派支持者俾人洗晒腦,以為民主選舉好完美,人人都可以揀到適當人選代表自己喺議會發聲。事實又係點呢,究竟有幾多人投票前真係有認真咁睇清楚啲候選人嘅政綱呢?相信好多人都係好似我咁,去投票嘅目的完全係唔想某啲人當選。至於所揀嘅候選人有乜政綱,反而唔係主要考慮因素。而且喺香港呢個極度分化又缺乏理性嘅環境,可能大部分選民都只會睇標籤同品牌,對候選人本身嘅能力同往績反而唔多理。好似國家旗喺新界西榮膺票王,究竟有幾多人係真心投佢一票嘅呢?如果唔係有魚弱微抬轎,啲人又會唔會捨國家旗而取高達呢?

弊嘞,越講越離題添,其實令我跌眼鏡嘅係另一個人囉。與其話一個人,不如話一條棍,因為條友的的確確係一條政棍兼搞屎棍。飯桶威可以當選,都唔知係天冇眼定人冇眼。而家乜嘢年代,條友竟然仲大搞文字獄,帶埋班嘍囉去我鋪頭搞事,真係忍得佢都食得蕉啦!

條友當選後好風騷咁接受電視台訪問,話自己成功當選係因為早著先機,識得喺中港矛盾呢個議題做手腳喎。冇錯,呢個問題確實值得關注,不過飯生究竟有乜對策呢?佢居然喺度火上加油,挑撥港人反中情緒,甚至無中生有,製造更多新矛盾,簡直唯恐天下不亂!好似我鋪頭用簡體字,條友都要管,竟然拖馬堵塞鋪頭門口,阻住人做生意。喺中國地方用中國法定文字,究竟何錯之有呢?咁都可以攞嚟搞,除咗話係一條搞屎棍,我都唔知仲可以點形容佢囉!

其實呢單嘢早前都寫過,我當時已經批死佢一定會參選今屆垃圾會。但係咁嘅貨色都可以跑出,我就點都估唔到囉。所以我喺文中講過,如果佢真係當選,我就俾個頭佢坐。所謂人無信不立,就算對啲政棍人渣,都唔可以講過唔算數。如果飯生嚟揾我算賬,我一定會大方咁亮出X頭,等佢舒舒服服坐落嚟!
Gangtok, Sikkim, India

2012年9月18日星期二

估佢唔到嘅票屎

上篇講完票王,今次自然係輪到票屎啦。喺地區直選67張名單之中,就有19張得票唔夠3%,令到參選人連選舉按金都攞唔番。咪以為得票率咁低係因為輸蝕名氣,原來喺芸芸票屎當中,竟然不乏大有來頭之人,真係估佢地唔到!

得票率最低嘅係鼎鼎大名嘅事旦男,只有0. 1%(343票)。此人騎呢無比,榮膺票屎之最可以話實至名歸,當然唔會估佢唔到,估唔到嘅係佢居然會參選。本來條友咁鍾意出風頭,成日博上鏡,參選垃圾會一啲都唔出奇。但係大拿拿5萬蚊就咁掟咗落鹹水海,佢冇理由唔肉痛啫。條友冇提供到任何個人資料,唔知佢撈邊瓣。不過睇佢成日咁得閒狙擊事旦台,好似唔使返工咁,極有可能係嗰啲攞綜援嘅全職社運人士囉。咪住,唔通領取綜援人士參選垃圾會,一切競選開支都可以實報實銷?咪講笑,等我得閒打電話去選舉事務處問吓先,以備不時之需呀!

同樣係咁騎呢嘅仲有爭取包二奶刑事化嘅林依例,得票率0.37%(859票)。佢嘅威水屎就唔提嘞,費事幫人免費宣傳啦。林小姐咁鍾意曝光,當然唔會錯過呢個4年至有一次嘅機會,而且以佢咁有米,幾萬蚊濕濕碎啦。所以林小姐本人係絕對predictable,估唔到嘅反而係跟佢隊嘅幾個大男人。咪以為呢幾個男人係一般跟班貨色,其實佢地個個都衣冠楚楚、相貌堂堂架。好跟唔跟,竟然跟個成日俾人非禮嘅奇女子反包二奶。一來呢家嘢由男人搞完全冇說服力,而且同呢位奇女子行得咁埋,唔通佢地唔怕遲早會惹官非?

另外仲有「向地產商說不」嘅光頭仔,得票率1.29%(6031票)。講到騎呢嘢,呢條友比起以上兩位實在不惶多讓。佢同地產商有不共戴天之仇,誓要打倒地產霸權,但係就走去選垃圾會,咁唔止騎呢,直頭係腦殘添。如果真係當選,佢嘅薪津就會由公帑支付,其中有好大部分正正係來自政府嘅賣地收入同地產商繳納嘅稅款。唔通佢收咗呢啲錢仲會食得落飯、瞓得著覺?我唔期望佢會識得「不食周粟」點解,但係乜嘢叫做不義之財應該知喇啩。條友腦殘當然唔使估都知,我估唔到嘅係佢嘅得票率竟然有1.29%咁高。由此推斷,佢喺全港嘅腦殘粉屎可能超過9萬,絕對諗起都覺得恐怖!講真,香港政客個個老奸巨猾,政治呢家嘢根本唔啱光頭仔呢啲咁天真無牙嘅小朋友玩。見佢俾人沒收咗5萬蚊咁慘,就等我點佢一條財路啦。既然佢咁鍾意去啲落後地區體驗生活,不如將有關見聞心得結集成書,出番本「腦殘遊記」。如果每個腦殘粉屎都買一本,咁就發達啦!

最後呢件就真係極品喇,唔止芳容令人不敢迫視,稱號更足以鎮慑一切牛鬼蛇神。有「民主女神」美譽嘅痰香聞,得票率1.91%(5440票)。對於痰小姐落選,我當然唔會感到意外,原因早排已經講過,喺呢度就唔再提嘞。不過點都估無到佢嘅得票率竟然會咁低,連2%都唔夠。九龍東只有9張名單參選,其中仲有一張係可以無視嘅騎呢女俠,所以按合理推算,要攞到接近12%先算合格。如果根據我地嗰代嘅評核標準,痰小姐嘅成績都應該屬於擔梯喇啩。佢係前度垃圾會議員,就算冇政績都起碼有名氣啦,但係參與直選竟然可以輸得咁肉酸,真係令人跌晒眼鏡。講真,都唔知當初佢個議員係點選番嚟嘅囉。咪住,唔通佢今次係忍辱負重,參選嘅真正目的係要證明俾全港市民睇功能組別選舉有幾荒謬?忽然諗起,其實國家旗同佢真係好相似。佢地都係前垃圾會議員,都係任內無政績可言,都係做咗一屆就俾人趕走。仲有最緊要嘅一點,佢地都係同狀棍黨有政治聯繫。但係點解喺今次直選,一個可以榮膺票王,而另外一個就淪為票屎呢?除咗話同人唔同命,應該仲有其他因素嘅。如果痰小姐冇退黨,而梁黨灰又肯幫佢抬轎,好可能肥雞都會變鳳凰囉。究竟荒謬嘅係功能組別選舉,定係民主嘅地區直選呢,咁就要留番俾大家自己諗喇!
 
Matopo Hills National Park, Zimbabwe

2012年9月15日星期六

無啦啦票王

今屆垃圾會選舉曲終人散,最觸目嘅係產生咗兩位票王。喺全港67張參選名單之中,只有兩張得票超過7萬,遠遠拋離其他對手同非對手,都可算鶴立雞群。

陳總舵主同國家旗分別喺香港島同新界西出選,結果雙雙高票當選,榮膺新一代票王。呢個賽果當然一啲都唔出奇,因為背後有兩位重量級人馬幫佢地抬轎。至於抬轎嘅陳熟妝同魚弱微雙雙出局,其實亦係意料中事,怪只怪班狀棍太大貪囉。今屆參選名單眾多,可謂七國咁亂,要喺一張名單有兩件出到線,根本就難過登天。再講,就算抬轎嘅係重量級人馬,都要睇吓坐轎嘅係邊個。如果係抬隻馬騮,咁就未必所有選民都會buy喇。而家好啦,兩個抬轎嘅都出唔到線,仲累到喺新界西出選嘅高達冚家墮馬添。

歸根究底,都係狀棍黨嘅策略太進取。陳熟妝嘅江湖地位同魚弱微始終爭好遠,由佢喺香港島抬轎,實在係力有不逮囉。如果倒番轉,由魚弱微喺香港島抬陳總舵主,贏面就高好多嘞。不過由陳熟妝喺新界西抬國家旗,雙雙出線嘅機會就幾乎等如零囉。

如果喺嗰兩區都分拆兩張名單出選,咁又會點呢?結果亦好肯定,只有魚弱微同陳熟妝可以當選。咁都係得兩席,不過高達就未必會出局嘞。

究竟有冇辦法可以提高贏面,而又唔使累街坊呢?其實都有嘅,但係就要某啲人犧牲少少嘞。由魚弱微喺香港島抬陳總舵主,陳熟妝喺新界西出一張名單,而國家旗就選番功能組別,咁幾乎係坐三望四嘅格局。當中最弱一環係國家旗,本來佢應該唔夠良家騮揮,不過近期反國教單嘢搞到咁激,唔多唔少都會對佢有啲幫助。好似莫奶光咁,都重奪公能組別席位啦。國家旗要喺醫學界組別勝出,雖然難度仍然好高吓,不過都唔係完全冇可能啫。

呢個策略嘅整體勝算真係高啲,又唔使傷盟友和氣,咁點解狀棍黨仍然要冒險玩兩區抬轎呢?唔排除係某啲人懷有私心,唔想打硬仗囉。結果坐轎嘅兩位男士無啦啦做咗票王,真係想問佢地有何德何能。而抬轎嘅女士就雙雙出局,都算死有輕於鴻毛喇。魚弱微都算嘞,我諗佢其實都唔係咁想玩。陳熟妝先慘,踏入剩女之年至為男人犧牲,真係好唔抵囉!

Gelada baboon, Semen Mountain National Park, Ethiopia

2012年9月7日星期五

美味晚餐

最憎一條友落街揾食,所以如果唔煮飯,我就會煮即食麵醫肚。雖然話係醫肚,不過絕對唔係求其食得飽就算。對於食,我仲有最基本嘅要求,就係要好味。琴晚就煮咗個泡菜三丸麵,影完張相仲係熱辣辣,加埋罐啤酒,真係人生一大享受!

雖然只係cheap嘢,成本不過大約10蚊(唔計燃料費),但係就絕對得來不易。所謂「不易」,當然唔係指烹煮過程繁複,以本人懶到出汁嘅性格,麻煩嘅嘢就咪搞嘞。事實上,呢件產品係經過無數次反覆試驗先得到最佳效果,真係算得上千錘百鍊囉!

材料其實好簡單,計有即食麵一個、泡菜適量、開邊牛丸、貢丸、花枝丸、豆腐卜各一粒。做起嚟亦相當方便,凍水落晒所有配料同湯粉,水滾落埋個麵,再煮兩三分鐘就掂。製作可以咁簡單而味道又好,完全係因為材料方面經過精心挑選同不斷嘗試。

首先,作為晚餐,植物纖維點都唔少得。呢樣先最難搞,因為雪櫃裏面唔可能隨時會有新鮮蔬菜,而啲急凍雜菜又鬼死咁難食,根本唔會考慮。咁啱有一年去泡菜國旅行,突然想起用泡菜就可以解決呢個問題。成罌泡菜放喺雪櫃可以儲存好耐吓,用起嚟又方便,完全唔使洗洗切切。只係齋食太鹹,用嚟煮麵就啱啱好嘞。

至於其他配料,方便處理同儲存亦係首要條件,新鮮食材自然諗都唔會諗。罐頭之類,因為一次過未必食得晒,所以亦唔會考慮。已經調味、個頭適中嘅預製食品,諸如腸仔肉丸就最適合嘞。腸仔因為太唔健康,而且唔煎唔好食,未經輪選就已經出咗局。本來魚蛋魚片我都好鍾意,但係喺冰格雪過就會變得粗鞋無比,嚴重影響食味,試過幾次都係無奈放棄。最後選定牛丸、貢丸、同花枝丸,好食之餘,雪喺冰格亦唔會影響口感。一次過成斤買,然後開邊儲存喺冰格,都不知幾方便。事先開邊可以省卻解凍程序,直接喺冰格攞出嚟煮都唔怕中心部份唔熟。後來再加埋豆腐卜,雖然本身冇乜味,不過吸收咗啲湯汁都相當唔錯架。

當然啦,上述丸類絕對唔算健康食品,所以每種都只會用一粒。少食多滋味,多食壞肚皮,呢個道理我梗係明啦。不過最緊要都係唔好飲埋啲麵湯,否則鈉攝取量一定嚴重超標,命都短幾年呀!

提起麵湯,先發覺原來唔記得講個麵底,呢樣其實最緊要。即食麵我本身就鍾意,喺超市見到有新嘢都會買嚟試吓。結果都係覺得泡菜國品牌最好食,其中又以農心最啱胃口,雖然都係喺中國製造。除咗口感好,唔會浸吓就淋晒,調味亦相當唔錯。無論係石鍋拉麵、咖哩味、香菇味、鮮蝦味、辣白菜、抑或最基本嘅辛辣味,都同我精心挑選嘅泡菜三丸配料夾到無倫。

不過咁,味覺呢樣嘢好奇怪,會受心態影響。賤物未必唔好食,但係如果食得委屈,咁當然唔會欣賞到個中滋味。我就從來唔會同人比較,人地餐餐山珍海錯自然食得開心,但係我都好享受呢碗10蚊嘅泡菜三丸麵囉!

泡菜三丸麵

2012年9月5日星期三

白色恐怖

好不幸,香港已經進入咗白色恐怖時代!23條都仲未立法,就已經有人用以言入罪嘅方式對異見者進行政治迫害,你話係咪好恐怖?!

琴日睇到單新聞,話有網民喺學民思潮召集人黃之鋒嘅facebook發咗條咁嘅留言:「你自焚吖,你自焚我就信你係真心為學童要撤回國民教育科」,之後仲對黃同學粗言辱罵添。跟住條友就即刻俾黃同學嘅粉屎起底,原來佢自稱由96年開始任職消防員。一眾黃粉屎除咗鏟到條友飛起,仲話佢咁講已經構成教唆他人自殺,「更稱已聯絡律師尋求進一步行動」。單嘢仲已經傳到消防處都知,條友可能會面對內部處分添。

首先,雖然本人唔認同黃同學嘅舉措,但係就絕對相信佢係真心,起碼喺呢一刻。再過多幾年,佢會唔會變成類似癲狗或者梁渣傑咁嘅政棍就唔知喇,不過我諗可能性都好大吓囉。

至於嗰位疑似消防員嘅言論,當然係難以服眾啦。不過好明顯,佢只係無聊同冇品啫。事實上,呢類人根本就無處不在,連鄙人微不足道嘅無聊blog都間中有啲蒙面人入嚟粗言辱罵。以黃同學近期咁勁嘅人氣,冇人踩場先怪啦。對啲咁嘅無聊留言者,認真嘅話,可以據理反駁。如果想展示量度,咪一笑置之囉,費事同啲人一般見識啦。換著係我,就一定會鏟到條友反艇為止嘞。但係要搞到人地受內部處分,甚至可能負上法律責任,咁又從何說起呢?

首先,無論你鍾唔鍾意都好,辱罵式言語暴力已經成為無可抗拒嘅本土文化。由大班嘅「狗官」開始,到顛狗嘅「不該」達至顛峰,言語暴力唔止深入民心,甚至已經等同言論自由,呢個係無可爭辯嘅事實。咁俾人鏟兩句又有乜大不了呢,都係意見表達方式啫,唔順咪鏟番轉頭囉。事實上,呢種言語暴力文化得以發揚光大,完全係因為某啲民主派政客同一班忠實粉屎能夠身體力行,將粗言謾罵帶到全港每一個角落,包括網上、街頭、甚至議會。自己鬧人就好地地,俾人鬧兩句就要打爛人地飯碗,甚至想搞到人地坐監,呢種究竟係乜嘢標準呢?

再講,對於一個三九唔識七嘅無聊網民,黃同學又有乜可能會認真考慮佢嘅自焚建議呢?教唆自殺云云,唔止係無限上綱,更係侮辱黃同學嘅智慧。如果咁都講得通,凸首同各高官、以至一眾保皇政客就真係好唔得閒,每日都唔知要俾人教唆自殺幾多次,叫佢地去PK死嘅人肯定唔會少囉。莫非只有黃同學可以享有人權,受到法律保護,而凸首、高官、保皇政客就個個抵死,所以教唆佢地自殺冇問題?

好明顯,單嘢根本就係以言入罪式嘅政治迫害!而由黃同學班粉屎搞出嚟,就更加得人驚,話就話爭取民主、捍衛言論自由,但係竟然講一套做一套!

報導冇提到黃同學有乜反應,唔知佢有冇參與粉屎嘅報復行動,但係佢肯定唔會對單嘢一無所知。希望黃同學可以制止班粉屎對嗰位疑似消防員嘅政治迫害,就算佢選擇袖手旁觀,咁都係等同幫兇!如果黃同學任由呢套鬧劇繼續上演,我對佢就真係好失望嘞,咁唯有對佢講聲:你yak jill啦!哈哈,如果我真係咁講,會唔會俾人話我教唆未成年人士進行不道德行為呢?

National Museum of Anthropology, Mexico City, Mexico