2012年3月31日星期六

阿老阿土,我唔想住嘅地方

故老相傳,唐門暗器獨步天下,用毒功夫舉世無匹。本來江湖傳聞嘅嘢,十居其九都係啲好事之徒憑空杜撰,實在不足為信。不過睇番凸首決戰前後,狼鷹民望由峰頂直插谷底,唐門毒功有幾犀利,終於大白人前嘞。

唐家大少一招口沫橫飛,篤爆狼鷹曾經喺絕密會議講過,香港始終有一鑊要出動裝甲車、防暴隊、催淚彈對付啲示威者。雖然狼鷹最後以低票慘勝,但係民望極速插水,真係唔死一身潺。唐大少都算勁喇,連口水都餵有劇毒,而且向住狼鷹兜口兜面噴,令對方避無可避。呢招無疑係歹毒非常,不過要喺口水餵毒,自己亦難免身受其害。其實咁同七傷拳並無二致,都係先傷己後傷人嘅招數。結果當然係兩敗俱傷啦,仲令原本只係坐山觀虎鬥嘅犯民變成坐收漁人之利添,阿爺有乜理由唔睇到眼冤呢。唐大少想五年後又一條好漢,似乎係太樂觀咗啲囉。

雖然鎮壓論仲未得到證實,犯民班友已經急不及待走出嚟抽水,長毛就送架坦克俾狼鷹做凸首賀禮。所以話呢,犯民最叻就係無中生有。就算狼鷹真係有講過,最多都係話出動裝甲車啫,又何來坦克呢?套用文革術語,呢啲就係上綱上線嘞。

有咁嘅主子就有咁嘅奴才,犯民班打手嘍囉當然唔會錯過呢個搞事嘅機會。有網民就發起全民著草,話要移民去阿老阿土喎。真係好搞笑,班友成日要香港同西方民主社會睇齊,咁對傳聞中狼鷹嘅鎮壓論又使乜大驚小怪呢?唔通班友唔知道,喺歐美呢啲民主國家,出動裝甲車、防暴隊、催淚彈對付示威者,根本就係家常便飯。早幾日西班牙警察就發射橡膠子彈,對付上街示威嘅工運人士嘞。嘍囉即係嘍囉,簡直未見過大蛇痾尿,中兩嘢胡椒噴霧就鬼殺咁嘈,咁錫身就咪學人去搞事啦。

不過有樣嘢好奇怪,照理班友要著草,都應該去歐美澳呢啲先進民主地區啦,點解會揀喺邊忽都唔知嘅阿老阿土呢?喺好奇心驅使下,我又走去摷吓資料,原來阿老阿土真係不可多得嘅好地方,因為有以下嘅七大優點:

-)有民主。一句講晒,人地有普選。

二)居住環境一流。嗰度雖然地少,不過人更少,住house完全冇難度,仲要係無敵海景嗰隻添。

三)夠環保。車都唔多架,路又唔多條,更冇屏風樓阻住晒,空氣自然清新到無倫。喺當地生活仲可以為減排出一分力添,直頭啱晒啲環保人士啦。

四)保育做得好。當地非常重視文化保育,好多人仲係過住世世代代傳落嚟嘅生活方式。例如男男女女都仲係著緊草裙,而女人亦未受到西方文化污染,冇戴胸圍嘅習慣。各位香港男士,係咪覺得呢個地方好吸引呢?尤其對於嗰啲只要集體回憶,唔要經濟發展嘅保育鬥士,咁嘅地方簡直係天堂添啦。

五)示威零風險。當地冇坦克、冇軍隊,絕對唔使驚屠城,示威自然冇有怕。

六)有機會陸沉。咪當我忽然癲咗,連陸沉都話係優點。事實上,如果移咗民去嗰度,求神拜佛都望佢快啲陸沉啦。阿老阿土鄰近澳紐,又同呢兩個先進民主國家關係相當好,如果真係陸沉,佢地當然會義不容辭咁收留晒啲災民。無啦啦升呢做澳紐國民,真係爽到無倫啦。

七)低門檻。呢點先最殺食,想移民去阿老阿土,廿萬就搞掂。就算窮到連廿萬都冇,借大耳窿都得啦,總之過咗海就係神仙。講真,廿萬就買到個民主國家嘅公民身分,直頭抵到無倫。對於啲淨係識日嘈夜嘈同埋上街搞事嘅廢物,呢條肯定係投奔民主國度嘅捷徑囉。當然啦,鬼唔知移民去歐美澳呢啲先進地區好啲咩,不過要人地肯收先得格,熱愛民主係冇分加架。

雖然阿老阿土有咁多優點,不過我就唔會考慮嘞。既然班有破壞冇建設嘅廢物話要大舉移民去嗰度,如果我又跟埋去,咁咪棧搞到自己?!而且班友走咗,香港就一天都光晒啦,仲使乜移民喎!

廣西旅遊紀念品

2012年3月26日星期一

偽科學

我一向唔係好信啲學者,尤其是啲所謂法律學者同埋專做民調嗰啲。對於我呢啲草根階層嚟講,班學者嘅學術範疇簡直係高深莫測,根本冇能力理解,真係俾佢地呃咗都唔知。

好似法律界知名學者張達明教授,就將溫總對凸首選舉嘅評語「嚴格依照法律辦事,香港一定能夠選出一個為多數香港人所擁護的特首」作出非常精闢嘅解讀。張教授寫咗篇文章,用「3月25日流選正正符合溫總及多數港人的意願,這亦是筆者過去多個星期的禱告所祈求的。阿門。」作總結。溫總係咪支持流選我當然冇資格評論,不過最令我招架唔住嘅係連「阿門」都出埋,簡直將學術領域提升到神級境界。我呢啲凡夫俗子又點會明呢,唯有任佢講啦。話時話,唔知法律算唔算係一門科學呢?

另外,港大學者鍾庭耀早兩日搞咗個「3.23民間全民投票」,俾全港市民一人一票選凸首。結果有超過22萬市民投咗票,比原先預計高出3倍有多。不過鍾教授話唔會分析結果,留番俾市民自己判斷喎。呢樣嘢我就有得講嘞,因為我一直相信民調(其中包括統計學)確實係一門科學。

鍾教授果然係聰明人,呢啲咁嘅公投,就算佢唔親自分析結果,自然有其他學者會義不容辭咁走出嚟解讀,而傳媒亦會大肆報導,又使乜自己做醜人呢。琴日明報頭版就登咗呢單嘢,雞乸咁大隻字話「22萬人公投 逾半白票」、「唐梁何均不足兩成 學者:新特首難管治」。

相對於700萬港人,22萬呢個sample size係咪好有代表性我就唔敢講,因為我對統計學真係冇乜認識。不過小弟做咗幾十年人,對於人情世故點都有啲體會,對於呢個民調係咪有廣泛代表性,我就真係好懷疑嘞。問題係出喺取樣方法,呢個民調唔係隨機抽樣,而係要啲「選民」長途跋涉走去「票站」,一係就透過網上或手機短訊投票。不過用手機投票,費用就要「選民」自己承擔。咁大家諗吓,啲投咗票嘅有心人,會唔會真係代表到廣泛港人,抑或係以某啲特定取向居多呢?

睇番公投結果嘅數據,投咗梁、何、唐、同白票嘅百分比分別係17.8%、11.4%、16.3%、同54.6%。而喺另一個由有線贊助嘅港大民調,截至23/3,上述單位嘅得票率就分別係35%、14%、19%、同32%。喺兩個民調之中,揀震鷹哥同投白票嘅百分率都有極大差異。究竟係忽然民意大逆轉,定係其中一個民調出咗問題呢,大家不妨諗吓。

又睇吓另一樣嘢,每年各大小示威遊行,幾乎全部都係反建制嘅,而反泛民政棍嘅就少之又少,如果單講人數,肯定少過1比99。不過根據大型選舉結果,泛民同建制派嘅得票率一直都維持住64黃金比例,咁又係點解呢?

其實好簡單,會走出嚟搞事嘅,多數都係嗰啲不滿現狀、覺得民主大過天嘅人。好似我呢啲希望和諧穩定、社會繁榮嘅人,當然係多一事不如少一事啦。話時話,我相信香港唔係得我一個咁諗囉。

講番鐘教授搞嗰壇嘢,一聽到「公投」兩個字,我就肯定唔會騷佢啦。會積極走去「表達意見」嘅,自然係以反對小圈子選舉嘅人居多。結果嚟個民意大逆轉,根本就係意料中事。講真,走去投張白票,又起到乜嘢實質作用呢?今年仲係小圈子選舉嘅事實,根本就冇可能改變。學阿爺話齋,咁做只會添煩添亂囉。當然啦,對於癲狗長毛之流,呢個「公投」結果絕對樂於見到,因為又可以大條道理搞事。班友琴日就走咗去圍會展同中聯辦,話要即刻普選凸首喎,你話係咪搞笑呢?

或者有人會覺得,我冇參與呢個「公投」,只係自己放棄表達意見嘅機會,根本與人無尤。實情無係咁囉,如果係有法律效力嘅選舉,我一定會去投票。不過而家一個所謂學者,搞埋晒啲偽科學,目的只係爭取爆光,可能背後仲有某啲政治意圖添,我做乜要陪佢玩先!

廣西旅遊紀念品

2012年3月2日星期五

草包,又見草包!

隨住提名期結束,凸首選戰已經轉入大直路。葉瘤冇得參選,真係令人有啲失望,因為跟住落嚟嘅選戰肯定唔會有乜嘢睇頭。話就話有三個候選人,不過唐唐同震鷹根本就當俊男透明,都費事回應佢嘅言論,所以基本上係兩條友喺度鬥。而所謂嘅狼豬對決,除咗互爆陰毒,我就諗唔到仲會有乜嘢可觀之處嘞。

唐唐一直最怕嘅同場辯論,睇嚟都係避無可避,不過我又冇諗住睇喎。所謂冇眼屎乾淨盲,費事睇到眼冤啦。唐唐根本就係一個草包,大便佢就叻啫,要嚟場大辯論,真係攞佢條命啦。條友連照稿讀都都可以錯漏百出,仲讀到口窒窒添,要欣賞佢臨場發揮,我驚隨時會睇到心臟病發囉!

唐唐都算嘞,條友始終係小圈子選舉嘅產物,咁冇料到都居然可以去到呢個位,其實只係反映咗利益集團嘅私心。真正令我覺得恐怖嘅係另一位垃圾會議員,此人嘅草包指數仲高過唐唐,但係竟然可以喺直選出線,反映嘅係一個更嚴重嘅問題:香港選民嘅質素究竟可以低成點!

話說葉瘤開記招交代棄選,提到有選委同佢講唔夠票就可以揾佢地,仲指名道姓話當中包括淫民力量嘅大舊。事後淫民力量發表聲明,話從來冇承諾提名葉瘤。大舊又話自己係玩反諷,而葉瘤竟然當係承諾,講成得到淫民力量支持,咁係非常不負責任喎。

葉瘤喺記招講嘅嘢,我喺電視新聞都有睇到。首先,佢只係複述某啲選委嘅說話,根本就冇講過話大舊承諾支持佢。而且,葉瘤亦冇可能唔知,嗰啲選委咁講其實係敷衍佢。大舊嘅聲明唔止係多此一舉,仲暴露咗自己有幾廢添。條友正正經經講句嘢都唔掂啦,居然仲學人玩反諷,結果搞到俾人擺上檯,簡直係自己攞嚟衰啦!

喺垃圾會三醜裏面,我最討厭就係大舊。癲狗假假地都係學者,唔發癲嗰陣講嘢都算有紋有路,辯才亦相當唔錯。長毛以前係革馬盟成員,相信曾經有過理想同理念。同唔同意係另一回事,不過佢講嘅嘢都並非冇理論基礎。至於大舊,我只可以話佢係徹頭徹尾嘅草包,簡直一無是處!除咗喺垃圾會搗亂(例如爆粗、掟蕉、做馬騮戲),根本就冇其他嘢可以令人留低印象。條友講嘢內容欠奉,基本上係亂鬧一通,完全冇信息傳遞嘅功能。咁嘅人都可以由直選晉身垃圾會,我真係冇嘢好講嘞,唯有再引用Dr. Dylan嘅名句:The city is dying!

Somewhere between Pisa and Venice, Italy

Loen, Norway