2011年11月29日星期二

無鹽煮食

今日又考吓大家嘅智慧,俾條低能IQ題你地估吓。謎面係「麥燕停開鑊」,估一種四個字嘅健康烹調方式。俾些少提示,謎面中嘅「麥燕停」其實唔一定要係「麥燕停」,用「何獸蘭」、「魚若微」、「陳惜吱」、甚至任何一個你地睇唔順眼嘅女子代替都可以,但係用麻甩佬就唔得。要聲明一點,我絕對唔係性別歧視,因為咁係劇情需要啫。仲有,唔好質疑個謎面合唔合理,究竟上述奇女子會唔會有鑊開囉!

相信大家都已經有答案,而且全部答中晒添。話係低能IQ題,並唔係表示謎面出得有問題,更加唔係低估大家嘅智慧。而係謎底已經出現咗喺文章標題,根本就唔使估。至於點解謎底會係咁,相信唔使多講啦,我絕對信得過大家嘅國學常識囉!

講到無鹽煮食,我已經奉行咗幾年,絕對稱得上忠實信徒。不過我唔好似啲營養師提倡嗰隻,用天然香料代替鹽囉,而係轉咗用雞粉調味。諗起都覺得搞笑,唔知啲人點解會覺得可以用青檸汁、黑胡椒、或者香草之類嘅嘢代替鹽做調味料呢?如果要我將「雞汁炒菜心」轉成「黑椒檸汁迷迭香炒菜心」,睇怕想唔得到厭食症都幾難囉!

而家除咗煲湯,我煮嘢根本就唔落鹽,淨係會用雞粉同其他醬料。轉用雞粉係因為幾年前喺報紙睇到一單花邊新聞,某米芝蓮星級餐廳主廚爆料,話佢煮嘢咁好食嘅秘訣係用咗雞粉,仲要指定係家落牌嗰隻添。我當然知單嘢好鱔吓,不過試吓都冇壞啫,結果之後就同鹽講咗拜拜囉。

近排成日喺電視睇到某雞粉廣告,話雞粉比鹽健康。呢個廣告有冇誤導消費者,我就唔敢講嘞,費事俾人告啦。當然,如果同等體積嘅雞粉,含鈉量一定比鹽少。不過如果要達到同樣嘅鹹味效果,雞粉肯定要用多啲。而且雞粉仲含有其他添加物(例如色素)添,係咪健康啲就自己諗嘞。我用雞粉代替鹽嘅唯一原因,就係煮出嚟嘅嘢好味啲。可能有人會覺得我好cheap,唔識得欣賞食材嘅真味。我只係覺得,味覺係一種好個人化嘅原始感官,冇必要向人學習,亦唔需要其他人認同。

提到調味,我都知食得太鹹唔健康,世衛就建議成人每日唔可以攝取超過6克鹽(或2300mg鈉)。究竟6克鹽有幾多?我都唔識形容喎,所以就影咗張相俾大家參考吓。總之好肯定,我每日攝取嘅鈉都爆硬燈啦。事實上,想唔爆燈幾乎係冇可能。一包即食麵嘅鈉含量,已經達到每日攝取量嘅上限。而且我煮親即食麵,都會加埋啲鹹到出汁嘅配料,例如泡菜、魚片、牛丸。不過咁,我都已經好克制架喇,啲湯就一定唔會飲埋,雖然真係好好味囉。

講開即食麵,呢排我食緊嗰兩隻(膿心石鍋拉麵同三癢泡菜風味拉麵)都好正,多多鹹,少少辣,啱晒我口味!不過三癢嗰隻就要扣少少分,因為營養標籤有誤導消費者之嫌。驟眼一睇,鈉含量只係佔每日攝取上限47%,即係一日可以食兩包。不過再睇清楚啲,原來數字係以per serving計,而一包麵就有兩個servings。真係有冇搞錯,咁嘅nutrition facts有乜意義呢,唔通預咗人一包麵分兩次食?抑或係,即食麵應該同至愛分享,你一啖,我一啖?其實玩埋晒呢啲陰招有乜用啫,而家啲消費者好精明架喇,點會唔知即食麵係高鹽食品喎!

我自己就唔係「又要威又要戴頭盔」嗰隻,總之鍾意食就食,話知佢鹽份高到爆晒燈啦。好彩我本身唔係太好動物內臟,又唔係咁鍾意食肥膩嘢,只係口味偏濃啫,所以先敢講得咁口響。我只係覺得,任何嘢都要攞個平衡,所以唔會為咗健康而放棄晒鍾意食嘅嘢。如果食而不喜其味,就算有一百歲命又有乜意思呢?!



5 則留言:

  1. 識得煮嘢食嘅好男仔好搶手個喎,出街小心!

    (我唔識煮嘢食架^^)

    回覆刪除
  2. Ebenezer,
    哈哈,最弊識煮嘢嘅阿伯唔搶手呢!如果真係想食嘢,啲人唔會去茶仔咩!

    回覆刪除
  3. 6克鹽有咁多?我都唔知自己有冇爆燈!

    唔計咸,即食麵真係好肥人,我諗我都要撳一撳咯!

    回覆刪除
  4. 出前一丁嘅係我一向所愛,辛字辣麵同膿心石鍋拉麵,亦由當初的新歡變成而家的舊愛了(愛了很久的意思),仍愛。

    回覆刪除
  5. laulong,
    即食麵其實都唔係咁邪惡嘅,最緊要唔好飲埋啲湯。如果唔想肥,一定要戒零食就真!

    Coffee,
    出前一丁我就麻麻地嘞,尤其是日本版嗰隻,一煮就淋。都係韓國麵好啲,比較彈牙。

    回覆刪除