2012年12月22日星期六

十月懷胎

閉關三個禮拜,今日終於可以出關喇,因為我個私伙麻雀game嘅phase 1已經完成咗。所謂phase 1,係指流程部分,即係由洗牌開始,跟住摸牌、打牌、上牌、碰牌、槓牌、食糊、到最後計番,全部都搞掂晒。

唔係賣花讚花香,小弟嘅麻雀game比坊間產品更有彈性,可以提供到更多唔同選項。例如,用家可以自己揀由幾番起糊同最大打到幾番、可以選擇打唔打花、打唔打jackpot、可以揀傳統香港麻雀或者加入咗台灣牌元素嘅混合模式,甚至連每種牌幾多番都可以自訂添。為咗方便數牌,打咗出地下嘅牌又可以用唔同排序顯示。如果連排好嚟數都嫌太麻煩,仲可以㩒一個掣就睇到每一隻牌剩番幾多隻,唔使好似坊間啲麻雀game咁,數牌數到頭暈眼花。

當然啦,呢啲只係花巧嘢,並唔係一個麻雀game嘅核心部分。其實最難做係AI嗰part,即係點樣令到電腦識打牌。如果以需要花嘅時間嚟計,而家做咗嘅連十分一都唔知有未。不過作為一個programmer,見到自己嘅產品已經出咗個雛型,點都會覺得好興奮囉。就好似大肚婆走去照超聲波,個胎照出嚟明明似舊叉燒多過似人,但係就完全唔會影響到女人將為人母嘅喜悅。哈哈,而家本人嘅心情就係咁嘞!

講真,如果要同市面上嘅麻雀game比,鄙人嘅手作仔淨係graphics同animation已經輸九條街啦。不過咁,嚴人寬己係人類嘅天性,幫自己嘅出品打分自然會鬆手好多。又好似啲女人咁,明明生咗舊叉燒出嚟,都會覺得自己生嗰舊係世上最可愛、最美味嘅叉燒囉。

講返轉頭,雖然話最難搞嘅AI部分仲未開始做,但係咁並唔表示電腦只有捱打冇還手。而家電腦就好似初學打牌嘅人咁,有得上就上、有得碰就碰、冇黐冇搭嘅就打,基本上冇策略可言。不過如果手風順,一樣會有糊食囉。要靠運氣先有糊食就梗係唔掂啦,我嘅目標係要令電腦做到攻守俱備,仲要識睇牌路添。咁當然唔易做,而且,就算做到都會出現另一個問題。如果電腦變得太聰明,打親都贏,咁我自己就唔過癮啦。其實女人都係一樣,既希望阿仔聰明伶俐,但係又擔心如果佢太精叻就會唔聽教,下下駁嘴駁舌棧激死自己。

事實係,搞呢壇嘢真係有啲似十月懷胎,既辛苦又期待。話時話,十個月搞唔搞得掂,其實連我自己都唔知架。如果最後變咗石胎,又或者生出嚟嘅係鈍胎,咁就嘥心機捱眼瞓啦!

基本排序

另類排序

另類排序

一眼睇晒

加入台灣牌元素

電腦都有糊食

2012年12月1日星期六

求人不如求己

上回講到Recax無啦啦reset咗我喺雀王會館嘅積分,雖然經過多番交涉,仍然徒勞無功。對方明明理據欠奉,不過就手握生殺大權,完全冇佢辦法。今次真係秀才遇著兵,有理說不清。啲咁樣對待客戶嘅公司,本人當然唔會用佢地嘅產品啦,所以唔會再玩雀王會館架喇。

不過冇得打又有啲手痕,咪諗住食回頭草,玩番Yahoo麻雀囉。點知摷極都摷唔到,原來呢隻game已經冇咗,簡直係屋漏兼逢夜雨呀!

谷鬼氣,市面啲麻雀game又唔係寫得好,仲要揾極都揾唔個啱玩嘅,真係自己寫過個冇咁嬲啦。哈哈,一於就咁決定,等我自己寫番個私伙麻雀game先!

要做就要做到最好,一定要針對市面啲麻雀game嘅弱點,做得比佢地優勝。初步構思已經有咗,主要係針對以下幾方面。

首先,啲麻雀game嘅人工智能實在做得太差,電腦淨係識得顧住自己副牌,完全唔理出面乜嘢環境。舉個例,明明已經最後一隻牌,竟然有安全牌唔打,係都要打隻高危牌俾人食。諸如此類嘅屎章例子實在太多,真係講極都講唔晒。而且,電腦牌路千篇一律,好容易俾人睇通。喺我個私伙麻雀game,就希望電腦可以做到攻守兼備,仲要有唔同類型,例如強攻型、防守型、當然亦會有神經刀啦。

另外,我會為打咗出地下嘅牌提供不同排序,仲可以隨時轉換添。排序會有三種選擇,分別係跟時序、分開邊個打出再跟時序、同埋跟牌序。咁樣數牌就易得多啦,哈哈!

最後,使唔使由電腦幫我砌好副牌都有得揀。我打慣花章,最憎電腦幫我砌到副牌整整齊齊囉。

哈哈,咁就絕對係我理想中麻雀game嘞!唉,不過講就易,做起上嚟肯定難過登天,真係諗吓都想死呀!今日搞咗成日,都只係做咗張麻雀檯嘅layout,都唔知會唔會寫到老夫駕鶴西征都未寫完囉!