2011年1月31日星期一

仲有邊個會信一國兩制?

仲有邊個會信一國兩制?我信架,以前!

點解會唔信呢?年年幾次大遊行,又六四燭光晚會,個個月衝擊中聯辦同政府總部,日日都嗌結束一黨專政同平反六四,如果冇一國兩制,班友唔驚打晒入天牢咩!

但係自從發生咗王丹被拒入境單,民鼠陣營日講夜講,話一國兩制已經唔存在,連我都俾佢地講到有動搖添。又係嘅,點解港府嘅決定會同中央嘅立場咁一致嘅呢?

不過諗諗吓,又好似唔係喎。一國兩制、高度自治係指喺基本法嘅框架下,香港可以同大陸有唔同嘅制度,同埋喺某方面,香港享有高度決策權,唔使吓吓請示中央。咁點解港府唔可以喺自主決策嘅情況下,有同中央一致嘅立場呢?點解一定要跟足晒民鼠陣營嘅意願,處處同中央唱反調,先至算係體現一國兩制呢?喺邏輯上,咁係講唔通架!真係俾班民鼠友搞到我有混亂添。

如果班民鼠友想說服我,一定要攞證據出嚟,證明港府喺王丹事件中嘅決策係受中央指使。例如,佢地係咪勾咗特首條電話線,偷聽到佢向中央請示?又或者,佢地係咪hack咗入特首個email account,睇到佢同中央嘅通信?如果係嘅話,唔該拿拿林整番個民鼠解密網站,將呢破壞一國兩制嘅惡行公諸於世啦!空口講白話係冇用架,我夠話班民鼠議員吃裡扒外,出香港納稅人嘅糧,但係就替西方民鼠霸權同埋藏毒台毒疆毒勢力服務啦,有冇人會信我先得格!

不過點都好,講到一國兩制,就算你唔信、我唔信、個個都唔信,一定都仲有一班人會信,佢地就係嗰班賊喊捉賊嘅民鼠派嘞!哈哈,六長四短鐘聲?如果香港冇一國兩制,三長兩短分開兩次佢地都唔敢啦!咁大聲話一國兩制唔存在?班友唔驚抄家呀?如果一國兩制已經名存實亡,講咁嘅隨時係顛覆國家罪,次一等都係洩露國家機密罪,就算最輕都起碼係尋釁滋事罪啦,班友敢咩?

當然啦,以上嘅結論係基於一個假設,就係班友貪生怕死、膽小如鼠。不過班友叫得做民鼠派,膽小如鼠就梗係理所當然啦。就算退一萬步,當我以小人之心度君子之腹,係我冤枉咗班友,都起碼仲有一個「人」絕對信任一國兩制。

某「人」貪生怕死、膽小如鼠絕對係證據確鑿,冇得抵賴!話說呢位「人」兄好做唔做,居然學人做鏢師,押批黑錢返大陸,結果斷正。本來呢咁嘅濕碎,最多咪坐三幾碌,你慌使拉去打靶咩。睇吓王丹呢匪首都唔使死啦,今日仲大模「屍」樣喺台灣指手畫腳添。不過小「人」即係小人,呢條友珍惜佢個八月十五多於一切,莫講話要佢慷慨就義,就係想佢喺上面坐多日都幾難。條友即刻大筆一揮,簽咗張悔過書,拍拍個八月十五就打道回府,連肉都冇少到一兩(當然係八月十五部位啦)。條友返到落嚟就好似失咗憶咁,將份悔過書嘅內容忘記得一乾二淨,繼續也文也武,後尾仲做埋村代表添。話時話,村民都唔知係乜質素,竟然會選呢咁嘅小「人」做代表。以呢位「人」兄三刀兩面、貪生怕死嘅性格,如果唔係堅決相信香港有一國兩制,真係俾個尿兜佢做膽都唔敢喺度搞事啦!所以其他人講乜我都唔會信,只有呢條友先係一國兩制嘅指標性「人」物,如果有一日佢忽然收聲,就表示一國兩制已經壽終正寢嘞!

2011年1月30日星期日

A.I.?

A.I.代表乜?標準答案當然係「Artificial Intelligence」啦,譯成中文就係「人工智能」。

上篇寫到大陸嘅怪雞翻譯,我懷疑就係人工智能惹嘅禍。因為咁搞笑嘅,只有翻譯軟件先譯得出嚟。

不過睇網民嘅反應,絕大部分都係恥笑大陸人英文水皮。當然啦,我自己都有笑,因為真係譯得好搞笑,但係我嘅笑並唔係恥笑。首先,我相信翻譯係不經人手嘅。而且,我英文咁屎,有乜資格恥笑人地?嗰如果俾我譯,嚴格上嚟講我冇一個識譯。就算勉強譯咗出嚟,俾鬼佬見到都肯定會笑到反艇。當然啦,以我嘅英文程度都仲可以睇得出譯得有問題,因為實在錯得太離譜。

就算真係人自己譯嘅,都唔使恥笑佢地,因為中國人英文差絕對係好正常。睇番香港,做咗英國殖民地咁耐,我地由幼稚園開始已經要學ABCD,不過係咪個個英文都叻到識飛呢?咪睇人每一句都會有幾個英文字,其實未必個個英文都係咁醒,有部分係「見到唐人講番話,見到鬼佬口啞啞」嗰隻嚟架。以前公司鬼多,所以我請馬都只係請嗰浸完鹹水返嚟嘅,因為就算唔做得都起碼講得。話我唔支持本地貨都冇法,點都好過麻煩到自己。當然,我都從來唔會請鬼賓差,費事搞到自己啦。

喺香港,要學好英文真係唔易。我以前間中學已經係全英語授課(當然除咗中文同中史),但係自問英文程度其實好渣吓。不過咁,以前公司所有文件都要用英文,勉強用英文寫張memo或者覆個email我都可以嘅,鬼得閒check你grammar有冇錯咩。哈哈,我都係嗰「見到唐人講番話,見到鬼佬口啞啞」嘅人嚟架。反而呢,有人讀書唔算好多,讀得又唔係好叻,但係蒲得老蘭多,英文就講到嘞嘞聲。

問題係,我地根本冇一個英語環境,而學校教嘅英文又唔得生活化。英語環境唔使講啦,冇得練習自然就唔會學得好。生活化嘅英文都好緊要,有時仲性命尤關添。好多年前,有個留學美國嘅日本仔喺萬聖節扮鬼,結果俾人一槍了結咗。就係因為佢冇學好生活化嘅英文,唔知道freeze係「咪郁」咁解。

連喺香港都唔係咁易學好英文,喺大陸就更加唔使講啦,所以我覺得冇必要恥笑大陸人英文渣。香港都有人將「牛柏葉」譯做「Albert Yip」啦,都係唔好恥笑人地喇。

咁係咪即係話大陸搞笑翻譯可以原諒?又唔係喎,當時搞咁多英文翻譯,主要係為咗迎接京奧,萬一俾鬼佬睇到,真係俾佢地笑到面都黃啦。其實笑吓都冇乜所謂,又笑唔死嘅,而且中國人根本就係面黃架啦。老實講,搞笑材料只係表象,值得深思嘅係背後嘅一啟示。

喺大陸,唔識英文唔係大問題,因為總會有人識。將翻譯嘅交俾識英文嘅人做咪得囉,我相信大陸大把人做得到。係管理層唔重視呢樣,定係基層以為有翻譯軟件就乜都掂呢?就算翻譯軟件真係掂,做好咗都要人覆核吓啩,呢個動作我絕對相信有初中英文程度已經做得到。最恐怖嘅係連政府機關同大型商業機構都有份搞笑,真係吾不欲觀之矣!

咪以為翻譯只係小事,所謂見微知著,小小嘅一件事好多時都會反映咗一普遍存在嘅問題。講到尾,問題癥結係態度,係無知同苟且!中國要成為真正強國,硬件只係門面,軟件(國民質素)提升先係當前急務!

又講番人工智能,究竟呢樣係萬能定無能呢?其實兩樣都唔係,主要係睇人點用嘅啫。人地話盡信書不如無書,其實人工智能都係咁話。如果人仲係咁無知苟且,A.I.就唔會係「Artificial Intelligence」,而係「Artificial Ignorance」同「Artificial Idiocy」!

2011年1月28日星期五

Translation of the history of the cattle

Translation of the history of the cattle?好翹口啫,咁即係乜呢?正確嚟講,即係「牛的歷史的翻譯」。如果想精簡,可以叫做「牛史翻譯」。

最近喺網上睇咗幾篇標題都係叫做「史上最牛翻译」嘅文章,覺得幾搞笑吓,所以稍作整理,希望同大家分享吓。不過大部份都係舊料,可能好多人已經見過。

所謂最牛翻譯,其實係國內一指示牌、告示牌、或者廣告嘅英譯部份,都係譯得錯到離晒譜,非常搞笑。其中有仲係政府部門或者大型商業機構嘅出品,都咪話唔得人驚!

其實錯得咁誇張,都係因為過度自動化。一睇就知,翻譯係不經人手,用翻譯軟件做嘅。為咗驗證吓,我就將「史上最牛翻译」呢句喺Google翻譯成英文,結果就得到標題嗰句怪雞嘞,不過點都冇網上嗰咁離譜。以下就係一例子:

中国工商银行
对公业务 = to male service

中国海事局
有错必纠 = have mistake surely Jiu
接警迅速 = receive Jing quick
畏葸不前 = fear on no account Xi not before
排忧解难 = throw You unite disaster

其他
本公厕为免冲式,请您便后离开即可 = This WC is free of washing, Please leave off after Pissing or shitting
贵阳乘警支队 = The expensive sun multiplies by a duty a police to pay a brigade
警(路)风监督电话 = Police road breeze the hurl tell a telephone
垃圾在此投放,烟头切勿投入 = The garbage throws in here, The cigarette butt throws in absolutely not to
请您带好随身物品 = Please take good personal luggage
严禁向窗外抛扔物品 = Strictly forbid toward window to throw to throw a product
请小心衣服弄花您的口红 = Please the careful clothes mishandle flowers you the lipstick
先下后上 文明乘车 = After first under on, do riding with civility
开封公交进站口 = Kaifeng Bus Stop Jin mouth
小可乐 = Small may be happy
小雪碧 = 20th solar term blue
小芬达 = The small fragrance reaches
带好孩子,小心落水 = Take the child, Fall into water carefully
餐厅 = Translate server error
一次性用品 = a time sex thing
干果区 = Fuck the fruit area
散干果 = spread to fuck the fruit
干货 = Fucking goods
芳草萋萋 踏之何忍 = Fangcaoqiqi riding the Heren
不出合肥,逛遍世界 = No Hefei, Guangbian World
一旦失窃要报警 = If you are stolen, call the police at once

唔計文法,主要問題係軟件逐隻字譯,冇照顧到字與字之間嘅關係。我又試吓人肉模擬呢翻譯軟件,睇吓會點。當然啦,我個腦基本上運作正常,絕對唔會出現「Translate server error」嘅。以下就係我嘅出品:

性能 = sex ability
性質 = sex quality
普遍性 = common sex
專業性 = professional sex
幹部 = fucking department
幹練 = fucking practice
能幹 = can fuck
實幹 = real fuck
貴幹 = expensive fuck
公幹 = public fuck / male fuck
公交 = male intercourse
公審 = male trial
公事 = male affairs
大公無私 = huge male without privacy
貴人 = expensive people
貴賓 = expensive Pinoy
貴客光臨 = expensive guests arrive naked



2011年1月27日星期四

巴魯坦上身

有跡象顯示,巴魯坦星人已經入侵地球,仲潛伏喺我地身邊,試圖控制人類思想!

有睇過鹹蛋超人嘅都知道,巴魯坦星人識得上身。冇錯嘞,就係好似鬼上身咁,可以控制晒一個人嘅思想同行為。

琴日講開嗰個「向地產商說不」嘅光頭仔,我已經懷疑佢係巴魯坦星人嚟架嘞。再經過不斷推敲,我更加肯定呢個想法係正確嘅。不過有一點要稍為修改,光頭仔應該唔係巴魯坦嘅化身,而係俾巴魯坦上咗身。因為條友有家姐有姐夫,又有親戚俾層樓佢住,絕對冇可能係無啦啦爆出嚟嘅一個人,所以唔會係化身。而睇條友嘅行徑,又有充分理據顯示佢同巴魯坦有關,所以一定係上咗身。

首先,睇吓佢手字,簡直同外星文冇分別。而且隻隻字都要唔同顏色,呢個絕對唔係地球人嘅習慣。唔好問我有冇見過外星文,我只係唔相信一個三十幾歲土生土長嘅香港人可以寫到咁鬼五馬六啫。如果話唔係出自外星人嘅手筆,我就真係諗唔到其他解釋嘞。

條友對人情世故、人心險惡、以至人類發展都一無所知,好難想像一個地球人會咁樣。三十幾歲人,閱歷都應該唔少啦,唔通佢嘅日子真係活咗喺豬身上?唯一合理解釋就係佢俾巴魯坦上咗身。

巴魯坦要控制地球人嘅思想。而光頭仔寫blog、開記招、仲上埋電視,無非係要宣揚自己嘅理念,企圖影響所有人。好明顯,條友係實現緊巴魯坦嘅計劃。

巴魯坦係靠個體複製繁殖,隻隻都係一模一樣,思維亦只得一種。佢地冇辦法理解人類,因為唔同嘅人類個體會有唔同嘅思想。光頭仔喺呢方面就同巴魯坦似到十足十。佢唔知道唔同嘅歷史文化背景,會產生唔同嘅社會結構,因而導致唔同地方嘅人會有思想同價值觀上面嘅分別。佢覺得凡係人地好都可以照搬過嚟,完全冇考慮到每一個地方都有自己嘅獨特性。佢又唔知道第人嘅觀點會同佢有分別,所以就大模斯樣喺繁忙嘅馬路踩單車。至於其他司機點解會覺得佢討厭,條友當然理解唔到啦。

不過講咗咁耐,似乎有一個好大嘅破綻冇提到喎。巴魯坦星科學好發達,比地球先進好多,如果唔係都整唔到隻飛船嚟地球啦。咁巴魯坦人應該有好高嘅智慧先啱格,但係橫睇掂睇,光頭仔嘅IQ都唔似會超過50喎!哈哈,呢點我當然有考慮到啦。巴魯坦次次嚟到地球,都俾鹹蛋超人打鑊甘嘅,咁打打吓咪打到腦殘囉!

最後,我要收番琴日講過嘅一句。我話地球好危險,叫光頭仔快返巴魯坦星。經過仔細思量,我發覺有危險嘅唔係光頭仔,而係其他地球人。睇吓條友嘅忠實fan屎,即係嗰個27歲嘅宅男,受咗佢薰陶都唔算好耐,IQ就已經跌到得番50咁上下,都咪話唔恐怖!條友仲話有教通識添,如果小朋友個個俾佢教到得番IQ50就大鑊喇!你地話地球而家係咪好危險?

鹹蛋超人,你喺邊度呀?快返嚟打走隻巴魯坦啦!

後記:
啱啱去網上討論區睇過吓,原來光頭仔嘅人氣都不知幾勁,好多人仲封咗佢做香港英雄添!弊喇,腦殘症好似瘟疫咁極速蔓延,世衛話唔定就快會對香港發出旅遊警示架喇!鹹蛋超人,你快出現啦!


2011年1月26日星期三

向地產商說不

怪人度度有,香港特別多!早兩日睇星期日檔案,又發現咗一個嘞。

節目主角係一個37歲嘅光頭仔,佢話因為不滿地產商操控香港經濟,決定由十月中開始,一年內唔幫襯地產商有份經營嘅所有項目,實行「向地產商說不」!佢要抵制嘅有好多,對於正常人嚟講,都係生活中避無可避嘅,包括大地產商發展嘅私人物業同商場、電力、交通工具、通訊網絡、連鎖超市、連鎖快餐店等等。

香港係一個自由社會,人人都有權選擇自己嘅生活方式。當然啦,大前提係唔可以侵害到其他人嘅自由。要向地產商說不,完全係光頭仔嘅個人選擇,雖然係騎呢,不過起碼唔係時下流行嘅暴力抗爭,應該受到尊重。但係條友諗住要影響全港七百萬市民,唔止將自己嘅事蹟放上網,又開埋記者招待會,而家仲上埋電視添。既然佢咁樂於做公眾人物,寫吓佢都唔算過份啫。

首先,條友俾我嘅印象係自我中心而不切實際、鍾意自我陶醉、喜歡表現自己、做我行我素而欠缺長遠計劃。37歲人,自從大專畢業就一直只係做兼職,鍾意就揼低晒,去南美流浪九個月,體驗當地生活。佢又搞到寫封信寄俾一年後嘅自己,咁都算嘞,最頂唔順係每隻字都要用唔同顏色嘅筆嚟寫,換筆換到手軟。當然,呢只係佢嘅個人風格同生活態度,不過如果個個都好似佢咁就米都有得乞啦,實聽攬住一齊死!

條友嘅思維好奇怪,令人難以理解。講到經濟壟斷,所有大財團都有份,點解淨係針對地產商呢?而且香港嘅大地產商多數都係上市公司,佢係咪都應該同揸住新鴻基、長實、恆基股票嘅親戚朋友斷絕關係呢?佢話自己淨係幫襯舖頭仔,但係佢喺幫襯之前,又有冇問過個老闆係咪上市地產公司嘅小股東呢?

佢唔幫襯地產商旗下嘅大型連鎖超市,如果只係因為同地產商有不共戴天之仇,咁都仲可以理解。但係聽完佢一番關於大型超市同舖頭仔貨品質素比較嘅偉論之後,我只係想同佢講:光頭仔,地球太危險喇,唔啱你架,快返巴魯坦星啦!佢話大型超市唔會認得客,所以就肆無忌憚咁擺過期出嚟賣。而舖頭仔,因為個老闆識得佢,賣俾佢嘅當然係正啦。條友仲話佢係香港土生土長,我就打死都唔信嘞。我話佢一定係由巴魯坦星嚟嘅新移民,如果唔係點會將倒轉晒嚟講!人鍾意去大型超市買,除咗因為夠方便,更係因為對貨品質素較有信心。首先,人地唔會來路不明,而且管理制度化,買到次貨嘅機會其實唔係咁大。再者,有班好似光頭仔咁嘅人成日實超市,一發現有問題嘅貨品就會即刻公告天下,超市點敢亂咁嚟啫。反而舖頭仔就唔同嘞,有冇賣假貨、老鼠貨、過期貨,根本就冇人知。而家好嘞,光頭仔上咗電視,係人都認得佢,知道佢有幾咁天真無邪,有乜假貨、次貨、過期貨,都可以隊晒俾佢,橫掂佢都唔會懷疑架啦。外星嚟嘅新移民,當然唔會知道乜叫做唔熟唔食。

條友又鍾意自說自話,一陣話要抵制電力公司,一陣又話用電避無可避,只會盡量用少。有邊方面係避無可避佢就冇講明,淨係話唔會開洗衣機同冷氣。真係俾佢笑死,由十月中到而家,唔開冷氣根本完全冇難度。呢排咁凍,我反而想問佢有冇開暖爐。跟住佢又示範喺星盆洗床單,呢樣就真係超高難度嘞。不過咁大件嘅,點解唔喺浴缸洗呢?雖然只係企缸,點都好過星盆啩,擺明係做show啦。做show唔緊要,高官政客有邊個唔係日日做緊,但係做都要做得有sen屎好喎。節目裏面見到佢搭落樓,乜而家部唔使用電嘅咩?我唔認為搭係避無可避嘅,行幾級樓梯唔使死啩。可能喺佢嘅定義,唔係自己直接交電費嘅就唔算違規。如果係咁,張床單攞落街洗都得啦,使鬼喺全港觀眾面前做場大龍鳳咩。

佢話所有巴士都同地產商有關,唔搭得。但係佢又搭港鐵喎,唔通佢唔知道港鐵都有發展好多大型物業?大圍樓都賣到過萬蚊呎,真係好過份!條友應該多留意吓地產廣告,搞清楚香港有邊大地產商先啦。因為唔搭巴士,所以條友就買咗架摺疊式單車代步。嘩,富貴到佢丫!佢話喺馬路踩單車好激氣,成日俾司機不禮貌對待。有一次佢停咗喺個燈位,後面有個巴士司機砵佢,嫌佢阻住晒。佢條氣好唔順,覺得單車都係車,都有權用條馬路,冇理由要受咁嘅對待,結果返到屋企就寫咗封信投訴個巴士司機。呢種人,覺得自己有權利就去做,就完全唔會理其他人嘅感受。香港市區嘅馬路有幾繁忙大家都好清楚,根本就唔適宜踩單車,自己危險唔在講,又阻住晒其他人。條友有冇諗過,因為自己嘅個人喜好,浪費咗馬路上其他人幾多時間?呢咁嘅人,真係自私到冇朋友!

以為條友冇朋友就錯喇,佢都不知幾多fan屎。所謂冤豬頭都有盟鼻菩薩,有個27歲嘅宅男就封咗光頭仔做偶像。受到光頭仔影響,宅男喺網上成立咗個「支持小本經營大聯盟」群組,叫人支持舖頭仔,唔好幫襯連鎖經營嘅店舖。本來呢只係個人取向,冇乜好評論,但係宅男嘅理據就難以令人信服。佢話連鎖店舖嘅產品賣得咁平,係要頂死舖頭仔,到舖頭仔俾人趕絕晒,連鎖店舖就可以任意加價嘞。佢仲舉咗個例,話連鎖快餐店雖然平兩蚊,但係佢都寧願幫襯大排檔,要用俾多咗嗰兩蚊嚟買將來嘅選擇權。

27歲都唔算細架啦,點解諗仲可以咁天真嘅呢?正常人選擇消費模式嘅時候,都會考慮同平衡唔同嘅因素,好似貨品價格、貨品質素、買方唔方便、店舖環境舒唔舒適。而喺商舖方面,貨品定價主要係睇供求關係,再考慮可唔可以獲得合理利潤,如果條數計唔掂就隨時要摺埋。香港係自由經濟社會,汰弱留強係必然定律。如果宅男要私人資助缺乏競爭力嘅行業,我絕唔會反對,始終佢係用緊自己嘅錢,與我何干?不過佢講到冇晒舖頭仔之後,連鎖店舖會任意加價,我就覺得係危言聳聽嘞。如果真係出現咁嘅情況,舖頭仔就會有番生存空間,必然會再出現。喺香港,有錢賺嘅就自然有人會做,又冇法例規定話舖頭仔執咗唔可以開番。而且唔同集團連鎖商店本身都存在住競爭,宅男講嘅情況根本就唔會出現!

宅男唔知係咪上得網太多,搞到有妄想迫害症。我建議佢多落街行吓,可能會有幫助。如果情況冇改善,就一定要睇醫生架喇!

而家後生仔真係難明,一方面享受住資本主義城市發展帶嚟嘅富裕同方便,但係又拒絕接受嗰必然會出現嘅副產品。摺疊式單車?WiFi上網?飛萬幾公里去體驗異國生活?南美貧困地區嘅人真係諗都唔敢諗!光頭仔,唔該你自己諗清楚,如果要你喺嗰度長住,你制唔制?

我又打個比喻,如果有人好鍾意食,但係又唔想製造臭臭,咁佢可以點做?哈哈,唯一辦法就係移民去西方極樂世界,嗰度有元寶蠟燭香食,副產品只不過係縷縷輕煙,一都唔臭架!

2011年1月24日星期一

我愛垃圾

垃圾都愛,一定係喺青山偷走出嚟架嘞!

咪住,聽我講埋先啦。我都知而家一提起垃圾,就個個都嬲到想殺人咁滯。想殺邊個?之唔係邱局長囉。早排擴建堆填區單已經搞到滿城風雨,跟住又話要起焚化爐,肯定有幾個區嘅居民想將佢凌遲處死。而家又話要源頭減廢,研究垃圾徵費,以後連掉垃圾都要俾錢。得罪晒全港幾百萬人,就算一人一刀已經可以將佢剁成肉醬啦。如果佢順應民意,取消呢個計劃,環保人士又會話佢辦事不力,要將佢生劏祭旗。人地條條大路通羅馬,佢就條條大路通地府,而家做局長真係唔容易!

其實除咗垃圾之外,有垃圾兩個字嘅都好令人反感,好似垃圾堆填區、垃圾焚化爐、垃圾電郵、垃圾電話、垃圾傳真,當然仲有尊貴嘅垃圾會議員啦。唯獨有一樣垃圾例外,唔止唔討厭,仲廣受大眾歡迎添,就係垃圾食品嘞。

叫得做垃圾食品,當然有原因啦。呢多數係冇乜營養價值,而且仲高熱量、高脂、高鈉,又可能含有防腐劑、色素、反式脂肪之類唔係咁好嘅,食得多會對健康有害。連垃圾都咁多人食,當然亦有原因,而且仲好簡單,就係因為呢好食。

我自己就最鍾意食零食類嘅垃圾食品,例如薯片、牛肉乾、雪糕、汽水。我已經冇將即食麵當做垃圾食品,因為我將佢歸咗入主食類,通常都係一餐飯,一餐即食麵。

我當然知道垃圾食品冇益,衰就衰在我成日肚餓,一肚餓就周圍摷食,一摷到就食到唔停得口。我就試過一次過消滅晒成盒兩公升嘅家庭裝雪糕。哈哈,有時真係懷疑自己係咪金魚托世!

講到零食,我嘅至愛都係薯片。細個時最鍾意珍珍辣薯片,後來轉咗食Pringles同卡樂B熱浪。Pringles一次過食一筒,啱啱好。而同卡樂B熱浪開咗就一定唔會有得剩,早排買咗兩包200g超大裝,都係兩日內消滅晒。有一樣好奇怪,唔知點解硬係覺得而家薯片冇以前咁好味,係淡咗好多,唔通連垃圾食品都注重健康?我從來買零食都唔會睇營養標籤,所以無從比較。唔係話睇咗營養數據就唔敢食,而係食都食得冇咁安樂啫。哈哈,最近發現咗隻叫做菓子本舖嘅牌子,薯片夠厚身、好口感,而且味道濃郁又夠辣,超正!

你地又唔好以為我好縱慾(食慾)喎,其實我都好識節制架。雖然我唔算好注重健康(鬼叫自己又煙又酒咩),但係我怕肥同骨質疏鬆(咪以為男人唔會骨質疏鬆),所以我從來都唔會踏足超市嘅零食區同汽水區,見唔到就唔會買啦。最衰係PK超市成日都將特價薯片同汽水擺喺當眼位置,真係想避都冇得避!

而家擺明係奸商喺度荼毒緊我地呢小市民,而無良超市又助紂為虐,點解我地個政府竟然可以袖手旁觀嘅呢?政府應該即刻立法禁止出售垃圾食品,對已經受到垃圾食品毒害嘅市民作出賠償,仲要資助市民買健康食品!乜話,香港係自由經濟社會,買唔買垃圾食品係市民嘅選擇,而且市民應該睇清楚營養標籤先買?嗱,我都係學班雷曼苦主同等住結婚又唔夠錢買樓嘅80後架咋,連垃圾會議員都支持架,咁都仲有錯?!

2011年1月23日星期日

碧湖小景

是碧波蕩漾的湖面,還是繁星點點的夜空?是溫馨的碧湖泛舟,還是浪漫的星空漫遊?但這些還重要嗎?此刻,一葉輕舟已是他倆的全世界!



碧湖暢泳,真係睇到都覺得爽!不過都只係得個睇字,因為我唔識游水。

唔係話冇學過,但係點都學唔識。咁又係落水即死,我仲識浮嘅,不過只限於風平浪靜嘅海面。如果係淡水就差喇,因為我脂肪含量比較低,浮力唔夠。我主要問題係手腳協調唔到,游極都原地不動。而且我唔識呼吸,大浪就實會飲水。

雖然唔識游水,但係我都唔算怕水。去親旅行,如果有機會嘅話,我都會玩水。有救生衣我就乜都敢玩,如果冇就喺淺水玩,只要唔過人頭就得。激流、浮潛、水上電單車、揸快艇都試過,全部都超級好玩。如果我識游水,肯定會玩埋潛水添。

唔識游水真係少咗好多樂趣,起碼玩浮潛嘅時候,見到魚都唔敢潛落去追。試過有一次喺海邊玩,邊度就唔記得嘞,浮吓浮吓就浮咗出深水嘅地方,對腳掂唔到地就嚇到騰晒雞,飲咗幾啖水。好彩當時風平浪靜,撥吓撥吓又去返淺水,唔係今日都冇機會喺度寫blog喇!

2011年1月22日星期六

你幾時死?

環保團體同尊貴議員話香港空氣污染嚴重,影響港人肺功能。反吸煙人士同尊貴議員力斥政府控煙不力,令市民減壽。病人權益組織同尊貴議員批評公營醫療千瘡百孔,事故頻生,令人心寒。

原來香港危機四伏,聽落真係好得人驚。成日吸埋晒廢氣同二手煙,個肺遲早出事,要入廠大修。入到醫院,如果唔好彩發生醫療事故,隨時就係咁大。我啱啱先知道天命咋,仲想對耳可以順吓架。

真係越諗越驚,等我上網摷吓香港人嘅平均壽命有幾歲先。嘩,簡直令人難以置信,原來香港人好長命架,平均有超過八十歲!香港人嘅平均壽命竟然位於世界前列,比英美呢民主國家仲長,只係僅次於日本,真係天理何在!香港樣樣都差,又冇民主,人居然會咁長命。乜民主唔係靈丹妙藥,有咗就連命都可以長嘅咩?而蘿蔔頭作惡多端,居然仲會係世界最長命,你地話係咪冇天理丫!

哈哈,卒之俾我諗通喇!蘿蔔頭喪盡天良,死咗梗係要落地獄啦,所以佢地咪唔敢咁早死囉。而歐美人士熱愛民主,佢地肯咁快移民天國,當然係因為嗰度比人間更民主啦。咪住,諗落又唔係好通喎,都冇聽過話天父係普選出嚟嘅。

點都好啦,總算放下心頭大石,睇嚟唔止耳順,連從心所欲都有可能添呀。不過又奇怪嘞,點解進步人士同尊貴議員又講到香港咁差呢?究竟佢地係危言聳聽定身在福中不知福呢?唔通真係要等到香港人個個都長命百歲,佢地先覺得合格?

講開又講,進步人士又真係好怪雞吓,有連八十幾歲命都唔滿意,而有又嫌命長喎。有班友就最鍾意搞埋晒高危動作,好似瞓馬路、擒高擒低、同埋衝擊警方防線。意外嘅真係好難講,一陣樂極生悲,無啦啦做咗烈士就唔好啦。琴日就有單咁嘅嘞,進步人士小頭目豬凱迪硬闖菜園村港鐵施工地盤,結果俾個保安撻咗一,搞到要入廠維修。嗱,係咪樂極生悲呢!

事後條友竟然話人地暴力襲擊佢,又批評警方見到佢俾人撻都唔理。真搞,都唔知佢想點,最好就隊G4貼身保護佢!我唔知其他人點睇,我就當佢係一個暴民小頭目,真係人人得而撻之。講到個保安,防止外人闖入地盤係佢嘅職責。受到暴徒正面衝擊,最佳方法當然係推開佢,同佢糾纏可能連自己都會受傷。個保安後來冇補多兩腳,就證明佢並唔係蓄意襲擊條友啦。

條友嫌命長,真係佢死佢賤。但係佢成日做埋晒危害他人安全嘅,我就睇唔過眼嘞。人地都有阿媽生架,淨係你班進步人士先係人呀?

豬凱迪,你搞埋咁多,乜唔覺得攰嘅咩?快息勞歸主,往生極樂啦!嗱,問多你一次,你幾時死呀?


2011年1月20日星期四

懶得我騰騰震

懶得我騰騰震,真係震到入心呀~~~

我雖然係懶,但係都未至於懶到震。其實我係想話呢幾日真係好凍,之不過特登將「冷」講成「懶」啫,呢就所謂懶音嘞。點解要講懶音?因為潮囉,你地唔見個個𡃁仔都係咁嘅咩?唔講懶音,人地會覺得你好老餅架!

早排去飲,新郎係一個細我接近二十年嘅舊同事。開席之前例牌係新人發表感想,佢同佢老婆都不知幾合拍,兩個懶音鬥懶音。其實懶音真係好普遍,四十歲以下嘅,十個有九個都係咁。呢幾年睇電視,無論係新聞、新聞透視、抑或係星期X檔案,稍為後生嘅受訪者,個個都係滿口懶音。

不過又好奇怪,懶音似乎係近年嘅產物。喺我仲讀緊書嘅年代,根本就冇人提到呢樣,亦唔覺有人滿口懶音。唔知點解,呢幾年懶音問題突然浮咗出嚟,引起好多人關注。

懶音係一唔正確嘅發音,其實聽起上嚟同正確發音只係有少少分別,之所以叫做懶音,據講係因為發音嘅時候會慳力,所以會俾人覺得懶。至於邊字會出現懶音情況,相信大家都好清楚,我就可以慳番口水嘞。唔知懶音呢個叫法係邊個諗岀嚟,又真係幾傳神吓。不過有懶音人就好反對呢個叫法,覺得有歧視成份。佢地話講懶音唔係因為自己懶,而係冇辦法講到正確嘅發音。哈哈,衰梗係唔會有人認啦。你地話丫,有邊條淫蟲會認自己鹹濕,又有邊個潑婦會認自己巴喳?係唔係懶就真係要研究過先知喇。

我同一個懶音人做咗個好簡單嘅實驗,試吓佢聽唔聽得出懶音同正確發音嘅分別。個結果好有趣,原來佢真係分唔到。佢唔係嗰聽障人士,喺語言溝通方面冇乜問題,除咗英文同普通話比較屎之外。如果唔係同佢做咗個實驗,根本唔會諗到佢會有呢方面嘅聽力問題。咁就簡單嘞,如果聽得唔正確,自然冇可能講得正確啦。

不過問題又嚟嘞,點解近年懶音人嘅數目會突然激增呢?我敢肯定,以前就算有懶音人,都係少到我地根本察覺唔到。聽力出現問題,好有可能係遺傳嘅,當然亦有可能係基因突變所導致。不過如果係因為呢兩個原因,根本就冇可能出現懶音人突然激增嘅情況。唔通仲有其他原因?會唔會係懶音都有得傳染呢?你地咪以為我講笑,我真係覺得呢個係原因之一。不過講到尾,我都係相信懶至係主因。

𡃁仔學講,開始嘅時候梗會有音發得唔準,尤其是懶音比較慳力,講錯都係好自然嘅事。我唔係因為咁樣話佢地懶,事實上初時可能連佢地自己都唔為意,但係如果長輩(家長同老師)唔及時糾正,講慣咗就好難改。喺呢個階段,懶嘅係家長同老師。隨住年齡增長,聽力正常嘅懶音人應該可以分辨到點至係正確嘅發音,而佢地又冇嘗試去改正,咁亦係懶。而𡃁仔最鍾意有樣學樣,如果身邊出現好多懶音人,就自然會懶埋一份,所以話懶音係有傳染性。講開又講,我都好似開始傳染咗懶音毛病添。

我當然明白語言係有生命嘅,會不斷自然蛻變。但係好明顯,懶音嘅出現並唔係自我完善嘅現象,因為咁會令到同音字嘅數量大幅增加,容易引起混淆。希望家長同老師可以正視呢個問題,唔好俾佢惡化落去。

最後一提,其實懶音呢個叫法真係好貼切,亦都唔使覺得有歧視成份。好似「懶猴」咁,只不過係個名,根本就冇人要歧視呢種動物!又例如喺台灣,有樣叫做「懶叫」,台灣男人都冇投訴話係歧視啦!




2011年1月19日星期三

饑寒交迫後記

明月出天山,蒼茫雲海間。
長風幾萬里,吹度玉門關。
漢下白登道,胡窺青海灣。
由來征戰地,不見有人還。
戍客望邊邑,思歸多苦顏。
高樓當此夜,歎息未應閑。

李白嘅關山月,頭兩句寫景真係正,最後兩句寫情又係一流!唐詩之中,我最鍾意邊塞詩,覺得好有氣勢。讀緊U嘅時候已經好想去新疆玩,唔多唔少係受到邊塞詩嘅影響。當然,最主要都係因為新疆夠特別。喺中國省份之中,我相信新疆都算係最唔似中國地方嘅一個,由山川景物到風土人情都特別,連人都唔係中國樣。嗰陣根本冇條件去外國旅行,但係又想見識吓異國風情,新疆自然係最佳選擇。

特別提到關山月,係因為明月出天山呢句勾起我好多回憶。記得嗰時初到天山,就喺天池買咗件短袖T-shirt,上面就係印住呢句詩。我就係著住呢件薄如蟬翼嘅短袖T-shirt,勇闖博格達峰雪線。喺唔夠衫、冇帶水、冇帶食物嘅情況下,上接近4000米嘅雪線,都咪話唔勇。經驗話俾我地知,越係勇嘅人就越會英年早逝。當然啦,我今日仲可以喺度寫blog,即係話我冇早逝到。不過搞到好狼狽就少不免喇,早幾日先寫過嗰次雪線行折墮。睇番laulong兄喺嗰篇blog嘅回應,先知道原來大家都係喺同一年上博格達峰雪線,又係同樣喺一個哈薩克包過咗一晚。不過我相信大家係喺唔同日子上雪線,應該冇撞過。以laulong兄咁儀表出眾,如果喺新疆見過,實會有印象。

所謂久罕逢甘雨,他鄉遇故知,喺旅途中撞到熟人當然係一大樂事。不過喺嗰個年代,自由行返大陸玩嘅香港人根本就唔係咁多,莫講話熟人,就係連撞到香港人都唔容易。尤其是孤身獨行,有時真係會幾寂寞吓,所以見到香港人會好開心,就算遇到同聲同氣嘅人(例如廣東人),都會覺得好親切。

而家世界唔同喇,人經濟條件改善咗,隨時一年去幾次旅行。莫講話返大陸,就算去到山卡啦都會撞到香港人,不過就冇咗以前嗰種親切感。近年又有唔同嘞,就係外遊時遇到好多大陸人,數目仲一年多過一年。親切感當然唔會有,反而仲會覺得有煩厭添。去得外國旅行嘅大陸人,當然係有錢啦,不過有錢都唔使話晒俾全世界知啫。有大陸遊客嗰種財大氣粗、頤指氣使、旁若無人嘅態度,真係令人好反感。你當我自卑又好,妒忌又好,我就係覺得唔順超!不過咁都未算最難頂,最討厭係去到景點就當自己包起晒成個場咁,阻住其他遊客影相。真係唔明白點解人可以喺同一個位置影十幾張相,笑又影一張,唔笑又影一張,換個姿勢又影一張,戴番副黑超又再影多張。如果係快槍手都冇乜所謂,最弊係明明擺好姿勢,揸定相機,都要等成兩三分鐘先肯㩒制。我唔係話要干涉人地影相嘅自由,但係見到有人等緊就識做、快手啦。

真係唔明,以前返大陸玩,接觸過嘅人絕對唔係咁架,嗰純樸親切嘅老鄉究竟去晒邊呢?



2011年1月18日星期二

反官商勾結

糖糖唔知黐咗邊條線,竟敢公然與社會上嘅新興正義力量為敵。佢喺一個Roundtable舉辦嘅青年學術論壇發表咗一番對80後嘅睇法,呼籲佢地唔好「搞思想壟斷」,要識得妥協。又話年輕人將複雜問題簡單化,凡係涉及政府同商界嘅,都當成係官商勾結。佢仲告誡80後唔好「剛愎自用」,否則好易會「車毁人亡」。

一如所料,呢番言論引嚟好多正義之士嘅嚴詞譴責,其中當然包括垃圾會議員李X人。佢話糖糖不惜抹黑80後,擺明係要討好中央同商界,擔心如果佢當選特首會帶領政府與民為敵。對於李議員,本人一向都係佩服到五體投地。佢早喺八十年代已經獻身中國嘅民主大業,可謂鞠躬盡瘁。最佩服嘅係佢忍辱負重,能屈能伸,不惜一再打倒昨日的我,留住有用之身,繼續為中港民主大業發光發熱。都係唔好講李議員嘞,一講起佢我就激動架喇。

都係講番糖糖嘅言論,個個都知香港嘅80後係社會良心,佢地嘅仁義智勇真係令人肅然起敬,糖糖公然抹黑佢地,擺明係要與港人為敵。仲講話乜車毁人亡,分明係靠嚇。要知道我地嘅80後,個個都心口掛住個勇字,點會咁易俾佢嚇到。睇吓而家香港經濟蓬勃,商業暢旺,而喺歐美國家呢真正民主體制下,經濟反而好似一潭死水,話香港冇官商勾結,真係打死都唔信!

當今急務,當然係要全力打擊官商勾結,咁先可以令到每個港人都分享到香港嘅繁榮成果。睇吓香港而家嘅社會問題,好似貧富懸殊、物價高漲、居住環境惡劣、生活質素下降、醫療事故頻生、青少年濫藥嚴重、網上色情氾濫,真係多到講唔晒,有邊樣唔係官商勾結嘅惡果?要有效打擊官商勾結,先要認清兩個事實,就係逢官必狗同逢商必奸。當然亦唔可以忘記兩大原則,就係逢民必挺同逢中必反。

要杜絕官商苟合,應該由整頓狗官做起。為咗防止紅灣半島事件重演,所有高官退休或離職後,一律都唔可以任職商業機構。高官亦唔可以有商界背景,連有親戚係商人都唔得。如果有親人中途從商,高官亦應該即刻辭職,以防瓜田李下。咁就唔會再有類似慳電膽事件發生。

香港人嘅頭號公敵當然係嗰肥到襪都著唔落嘅地產奸商啦,跟住就係要對付佢地嘞。政府應該即刻復建居屋,仲要大規模咁搞。地產商推出幾多個私人單位,政府就推出雙倍數量嘅居屋單位,一於頂爛市。而且居屋仲要豪過私人樓,會所、露臺、空中花園、複式單位樣樣要有齊。定價策略亦要改革,唔可以同市價掛勾,要根據市民嘅負擔能力制訂。到時人人都有豪宅住,冇殼蝸牛成為歷史名詞,咁就皆大歡喜啦。不過咁搞法,樓價實會大跌,已經買咗樓嘅咪死得?哈哈,嗰班炒家就抵佢死啦。就算唔係炒家,明知地產奸商牟取暴利都仲要幫襯佢地,分明係助紂為虐,都唔抵可憐。

至於公共事業,而家行緊嘅「可加可減」機制亦要改革,應該改成「可減不可加,可蝕不可賺」。有關機構嘅年度除稅後利潤要全數撥入價格穩定基金,作為下一年減價嘅基礎。就算有關機構蝕錢都唔可以加價,因為虧蝕係經營不善嘅結果,冇理由要我地呢小市民承擔。

其他企業亦應該負起社會責任,以服務市民為宗旨,唔好諗住賺錢。不過叫得做奸商,佢地當然唔會覺悟,所以政府一定要做。首先政府要回購領匯,繼而收購全港各大商場,然後以象徵式一蚊租金租俾社企,等佢地可以頂冧無良嘅連鎖超市同快餐店。至於一慘遭迫害而導致式微嘅行業,例如米舖、雜貨舖、紙扎舖、有公仔書睇嘅飛髮舖等等,亦應該受到資助,到時唔止市民可以買到平,人情味仲返晒嚟添。

為咗打破一般商業機構肥上瘦下嘅局面,唔止最低工資要大幅提升,更要引入最高工資,等尸位素餐嘅高層唔可以蠶食基層員工嘅辛勞成果。當然啦,最高工資對公務員同問責高官同樣適用。可以為人民服務已經係一種榮幸,佢地實在冇理由要求高人一等嘅酬勞。長遠嚟講,最低同最高工資應該續步拉近,咁樣有助於減少貧富懸殊。我地當然唔可以忽略領取綜援人士嘅貢獻(唔好問我佢地有乜貢獻,總之就係有啦),綜援金亦都要跟住最低工資水平同步提高,咁樣仲可以照顧埋佢地嘅尊嚴添。驚唔驚綜援金太高會令到更多人寧願攞綜援而唔做呢?咁咪仲好,有助舒緩基層勞動力過剩嘅壓力,可以令草根階層收入增加,真係皆大歡喜。

不過咁喎,呢措施對一般小市民梗係有百利而無一害啦,但係奸商大鱷絕對唔會坐以待斃,佢地有手有腳,會帶埋資金走架。哈哈,就係想佢地走!少咗呢班咁無良嘅人,香港即刻變成良心港,而且貧富懸殊問題仲可以完全解決,深層次矛盾就消失得無影無蹤啦。唔使擔心咁多喎,經濟發展唔係一切。人地話有情飲水飽,計我話,到時香港有良心同民主,真係齋呼吸都會飽呀!

我成日覺得生活有壓力,好多好難搞。不過一直都以為咁樣好正常,全世界都係咁。直至到我用80後嘅思維去諗,先發覺原來一切都變得好簡單、好易解決。所以話呢,年輕人真幸福!

2011年1月14日星期五

饑寒交迫

救命呀,好凍呀!呢幾日直頭凍到想長眠不起!我唔係話想死,不過咁凍嘅天氣,匿埋喺被竇實在係太舒服喇。

唔知點解,年紀越大就越怕凍。曾經試過有一年,全年都係沖凍水涼,完全頂得住。嗰年冬天都唔算特別暖,都試過十度以下架。嗰陣二十出頭,瘦到成隻蜢咁,一可以禦寒嘅脂肪都冇。而家脂肪多咗,反而會怕凍,真係好奇怪。

講開又講,近年唔止體能差咗,仲開始有耆英風範添,就係鍾意想當年嘞。話說當年大學啱啱畢業,就一條友孭住背囊返大陸玩。其實講得正確,係啱啱考完試,畢唔畢到業都仲未知。出發前當然有做過資料蒐集,大概行程路線亦一早設計好。原本只係諗住玩個幾月,結果返到屋企已經係五個月之後嘅事,基本上係玩到身無分文先捨得躝返屋企。一個人嘅自由行真係好正,鍾意去邊就去邊,臨時改變行程完全冇問題。覺得一個地方正就攤長玩多幾日,唔需要趕喉趕命。天氣唔好或者心情唔好又可以匿埋喺旅館玩閉關,呢種隨遇而安嘅玩法真係啱晒我性格。當然啦,嗰時住嘅旅館好平,床位只係一個幾毫,如果唔係點可以咁樣豪玩。出咗嚟做之後就冇呢支歌仔唱喇,去旅行多數係跟鴨仔團,就算係自由行亦有時間上同金錢上嘅限制,玩都玩得唔盡情。

隨心而行雖然過癮,但係就難免會有甩漏。好似嗰次畢業旅行咁,就試過淪落到饑寒交迫嘅田地。話時話,細個時屋企雖然好窮,都未使咁淒涼。

話說八月中去到烏魯木齊,當時已經喺大陸玩咗超過兩個月。天池梗係要去睇吓啦,中國嘅瑞士風光喎。講開又講,我到今時今日都仲未去過瑞士,真失敗!原本諗住天池一日遊,所以買咗即日來回嘅車飛。估唔到新疆原來係咁細嘅,竟然喺天池撞到熟人,係六個HKU學生。其實話熟都唔算好熟,只不過識咗兩三日,之前喺吐魯番識嘅,仲同佢地夾份包車玩咗一日,跟住就分道揚鑣嘞。不過咁,能夠喺天池撞到都算有緣啦。佢地話打算第二日上博格達峰雪線,仲嘍埋我添。上雪線真係冇諗過,不過聽落就好吸引。但係我當時只係得件薄如蟬翼嘅短袖T-shirt同埋條喺雲南買嘅的確涼軍褲,莫講話上雪線,淨係喺天池過一晚夜都唔掂啦。所謂天無絕人之路,原來天池同峨嵋金頂一樣,都係有衫租架。不過好搞,佢地淨係得羽絨背心,著咗之後對手臂都仲係涼浸浸,叫做好過冇咁啦。

第二朝食完早餐就開始上山,響導係一個十六歲嘅哈薩克少年。佢連普通話都唔係好識講,要行幾耐我地又唔知,唯有一直跟住佢尾。嗰日天氣唔係幾好,朝早已經天陰陰,後來仲落住毛毛雨,其實都幾凍吓。行咗幾粒鐘,開始覺得有肚餓嘞,弊就弊在完全冇人諗過要準備食物。再行咗好耐,越上越高,莫講話人煙絕跡,真係連草都唔多條。就喺呢個時候,竟然出現咗一個哈薩克包。原來係當地人為咗賺外快,起嚟俾遊客休息嘅地方。等我地仲鬼咁開心,以為有食,點知嗰度淨係供應熱奶茶。同蒙古奶茶一樣,哈薩克奶茶都係落鹽嘅,真係勁難飲。都係嗰句,好過冇啦,鬼叫自己冇帶水咩。嗰時先知道,原來香港嘅絲襪奶茶真係天下之美味。好在響導仔仔都算有良心,請我地食佢嘅私伙酸乳酪。Yogurt都OK啦,最好就有士多啤梨味嗰隻。真係發夢冇咁早,哈薩克乳酪係固體架,一舊舊好係石仔咁,而且只係得原味,即係酸味。乳酪仲硬過石頭,咬到牙都崩,而且酸到盲公都開眼,真係越食越肚餓。又係嗰句,好過冇啦。

休息咗一陣又繼續起行,有兩個女仔頂唔順,自願做留守兒童。其實遠遠已經見到個雪山,不過就硬係行極都唔到。結果行到七點幾,終於到達雪線,原來已經行咗接近十二粒鐘。因為夏天冇新雪,雪線以上都係石頭咁硬嘅冰,等我仲諗住可以砌吓雪人添。點知話口未完,真係開始落雪。八月飛霜,會唔會係有乜冤情呢?點都好啦,停低咗就開始覺得凍,仲越嚟越凍。總之此地不宜久留,速逃為上。

一路落山,天氣就越嚟越差,直頭係風雪交加。嗰時先知道,原來羽絨背心加短袖T-shirt真係一個好白痴嘅配搭。風由袖口吹入去,個人就由心度震出嚟。唔止天氣唔好,地面情況一樣係咁差。石頭
又濕又滑,以我咁豐富嘅行山經驗,都要仆咗鑊甘嘅。一路跑住咁落山,都要成九點幾先返到個哈薩克包。新疆夏天成十點幾先天黑,不過以嗰日咁差嘅天氣,九點幾已經睇唔到路咁滯,真係行慢都死得。入到包裏面,原來個個都瞓晒,除咗兩個留守兒童,仲有幾個哈薩克人。我就喺包度等其他人返嚟,點知越等越肚餓,之前行緊唔多覺,一停低就嚟料嘞。好在包裏面點咗堆火,都唔算太凍。結果等到十二點幾,所有人先返齊嚟。有個女仔最慘,連鼻都仆到腫咗。齊人當然就瞓覺啦,不過嗰度枕頭被舖一概欠奉,仲要十幾人迫喺裏面,瞓得著先奇。最慘係去到半夜,連個火都熄埋,真係凍到人都僵。又餓又凍,結果成晚冇瞓,眼光光等天光。咁大個仔第一次感受到饑寒交迫嘅滋味,原來真係好難頂架!

後來同朋友傾開,佢話佢都上過博格達峰雪線,不過係騎馬上嘅,都不知幾過癮。吓,原來有咁筍嘅玩法,點解我地唔知架,真失敗!

不過咁,嗰次雪線之旅都有收穫嘅,就係摘咗幾個傳說中嘅武林至寶,有起死回生之功嘅天山雪蓮,基本上係途中見到嘅都俾我摘晒。我仲珍而重之咁帶咗返嚟,一直供奉喺我個飾物櫃度。聽講話而家天山雪蓮已經俾人摘到接近絕跡,今次仲唔奇貨可居?哈哈,罪過罪過!


2011年1月10日星期一

鳳閣恩仇未了情

睇咗日月報好多年,鍾意佢立場比較持平。曾幾何時,佢嘅副刊更係我嘅最愛。不過呢幾年,日月報嘅立場變得有搖擺不定,成日俾「民意」牽住走。佢嘅副刊都差咗好多,睇到好冇癮。

副刊最緊要嘅係趣味性,文章內容要精簡,作者文筆至為重要。呢幾年,喺日月報寫專欄嘅作者,鍾意嘅真係寥寥可數。林才女我從來都唔喜歡,真係唔知佢才喺邊忽。陳耀華寫嘅題材太嚴肅,冇乜趣味性,唔係咁啱睇。幾個大狀來來去去都係寫埋晒乜民主公義,睇到人都掹。仲有幾個跟貼民意嘅女人,成日喺度鬧政府,係又鬧,唔係又鬧,但係偏偏理據欠奉。另外又有新派文化人,根本就唔夠斤兩,睇完都唔知佢地想講乜。

而家我會睇嘅,除咗個醫生專欄之外,就係石琪。石琪有時寫吓影評,又有時寫吓香港掌故,都幾過癮。弊嘞,唔通真係有病?講咗咁耐都未入到主題添!

早兩日睇石琪嘅專欄,講到鳳閣恩仇未了情。佢話套戲好搞,非常鬼馬惹笑。對於我呢睇粵語殘片大嘅人,鳳閣恩仇未了情當然唔會陌生,不過講到劇情,就真係一印像冇。梗係啦,喺我嗰個年代,𡃁仔已經唔鍾意睇大戲架喇。不過咁,嗰首主題曲就真係好經典,無論鍾唔鍾意睇大戲嘅都會聽過。麥炳榮同鳳凰女唱得好唔好我就冇資格講嘞,我淨係覺得歌詞寫得好靚。

合唱:痴心化夢幻,耳畔聽風雪聲,愁和夢散,情無限,人自痛傷惜別,珠淚向檀郎泛,何日再會呀,永不復還,萬里關山,那孤雁長記在我心間,相思兩地夢更難。
生:異國情鴛驚夢散,空餘一點情淚濕青衫。
生:一葉輕舟去,人隔萬重山,鳥南飛,鳥南返,鳥兒比翼何日再歸還,哀我何孤單。
旦:休涕淚,莫愁煩,人生如朝露,何處無離散,今宵人惜別,相會夢魂間,我低語慰壇郎,輕拭流淚眼。君莫嗟,君莫嘆,終有日,春風吹渡玉門關。
生:情如海,義如山,孰惜春意早闌珊。虛榮誤我怨青衫。
旦:憐無限,愛無限,願為郎君老朱顏,勸君莫被功名誤,白少年頭莫等閒。
生:柔腸寸斷無由訴,笙歌醉夢閒,流水落花春去也,天上人間。
旦:獨自莫憑欄,無限江山,地北與天南,愛郎情未冷,情未冷。
生:一葉輕舟去,人隔萬重山。
合:鳥南飛,鳥南返,鳥兒比翼何日再歸還,
生:哀我何孤單,何孤單。

係咪寫得好靚呢?但係以而家嘅標準,呢首詞絕對係唔合格。點解?因為當今音樂界,原創性重於一切,而首詞有相當部分係出自古代詩詞,有仲係照搬添。對於古代文學,我絕對係有限公司,但係就連我都可以到以下呢:

萬里關山 - 木蘭辭
濕青衫 - 琵琶行(白居易)
一葉輕舟去,人隔萬重山 - 早發白帝城(李白)
人生如朝露 - 短歌行(曹操)
相會夢魂間 - 浣溪沙 (蘇軾)
春風吹渡玉門關 - 出塞 (王之渙)
春意早闌珊 - 浪淘沙(李煜)
白少年頭莫等閒 - 滿江紅(岳飛)
笙歌醉夢閒 - 阮郎歸(李煜)
流水落花春去也,天上人間 - 浪淘沙(李煜)
獨自莫憑欄,無限江山 - 浪淘沙(李煜)

以今日嘅標準,唔理整體效果係點,非原創嘅就係劣品,一定要踩到佢變地底泥。睇吓家陣金牌填詞人,個個創意爆棚,新詞層出不窮,通唔通根本就冇人理。只要打住原創旗號,就算係垃圾都大把人叫好。

其實何止填詞界係咁,社會上仲充斥住各式各樣嘅尚方寶劍,例如民主、人權、同環保等等。人手執尚方寶劍,真係做乜都理直氣壯。邊個敢有異議,就拖出午門斬首!

2011年1月8日星期六

秘製花雕鍋

自問係一隻邊爐怪,雖然未至於無爐不歡,不過一個禮拜打足七日就完全唔係問題。喺香港,打邊爐根本唔使擇日,一年四季都打得。但係我就好少自己喺屋企打,因為洗洗切切實在太麻煩,辛苦過煮餐飯好多。所以一年只會整幾次,通常都係揀最凍嗰幾日。呢幾日凍到甩肺,喺屋企烚吓烚吓就最過癮嘞。

喺屋企打邊爐,鍋底都可以有好多花款,好似蘿蔔魚湯、番茄牛肋骨湯、大豆芽豬骨湯、椰汁紅咖哩、冬蔭功湯底等等。不過講到自己最拿手,同埋最鍾意嘅,就一定係花雕鍋底嘞。呢個湯底一都唔難整,而且好好味,配海產(尤其是貝類)真係一流。所謂獨食唔肥,就等我同大家分享吓呢個花雕鍋嘅獨門秘方啦。

首先,準備以下材料:
薑 - 切片
乾蔥 - 切片
蒜頭 - 切片
火腿 - 金華火腿或雲腿,切片
淮山
杞子
圓肉
當歸
花雕 - 起碼一碗
雞湯 - 當然可以自己買隻雞煲湯,不過我比較懶,會用現成,以前用開屎雲生,呢排轉咗用膿湯寶,貪佢儲存方便

而家可以開始嘞,先燒熱少少油,爆香薑、乾蔥、蒜頭、同埋火腿。跟住倒花雕落去,滾起之後落埋雞湯同其他配料就得嘞,係咪好易整呢?

搞掂咗個湯底,跟住就要準備另外一樣好緊要嘅,就係豉油嘞。求其倒生抽落隻豉油碟度就絕對係功虧一簣,要用埋我嘅秘製蒜茸辣椒豉油先算完美。話就話係秘製,其實都好易整架。首先將魚露溝蒸魚豉油,比例悉隨尊便,睇吓你想甜定鹹。另外用隻碗仔裝住蒜茸、蔥茸、同埋指天椒碎,淋滾油落去,撈埋魚露豉油就大功告成嘞。

個湯底我唔會打一次就倒,通常會用多一次。再用嘅時候,只要加水同埋花雕就得,如果唔夠味就可以落多粒膿湯寶同幾塊當歸。用過一次嘅鍋底會有一層泡,唔係咁好睇,自己喺屋企打就冇所謂啦。不過個湯底最多只可以用兩次,因為打完兩次之後,味道會變得好複雜,失去咗原來嘅個性!