2010年12月23日星期四

紅磚白磚

話說若干年前,喺遙遠嘅東方,有班好奇怪嘅人。佢地好憎白色嘅磚,凡係有人用白磚嚟起屋,無論起得幾靚、幾堅固都好,都一律要拆。佢地仲捉晒嗰起屋嘅人嚟批鬥,跟住趕晒去養牛。佢地自己就最鍾意紅磚,認為紅磚屋先係唯一建築規格。不過佢地對建築一竅不通,結果起出嚟嘅紅磚屋全部都係危樓,仲責死咗好多人添。有咁樣嘅,大家係咪覺得好荒謬呢?

不過咁,有人嘅地方就有荒謬,真係好正常。只要後人能夠以史為鑑,唔好重蹈前人覆轍就得啦。但係事與願違,同樣嘅荒謬竟然一再發生,唔通人類真係有荒謬DNA?

12月12日嘅星期日檔案,主角係中大新任校長沈祖堯。沈校長俾人嘅印象係理性、溫和、沉著、實務,佢喺沙士期間嘅表現大家有目共睹,亞洲英雄嘅美譽真係實至名歸。由佢出任中大校長,應該有助於舒緩某激進學生同校方嘅對立情況。不過江山易改,本性難移,要激進學生唔搞事,直頭係慘過要佢地受滿清十大酷刑。沈校長仲未正式上任,班友仔已經急不及待要搞事,自把自為咁恭迎咗個民主女神像返中大。據沈校長喺節目中所講,嗰單俾佢嘅壓力,可以同沙士相提並論。

講起嗰個所謂民主女神像,我火又嚟嘞。嗰班友仔開口民主,埋口民主,但係單嘅決策究竟有冇經過民主程序產生呢?佢地有冇諮詢過全體學生、校友、同校方呢?我都係中大校友,點解佢地唔問吓我先呢?唔通有佢講冇人講都叫做民主?呢一言堂式嘅民主,其實同大陸又有乜分別?如果個乜叉女神像有少少藝術價值,我條氣都順。不過件偏偏要係粗糙低俗嘅劣品,點睇都只係一件大波版A貨自由神像。總之求其有人整件出嚟,俾個冠冕堂皇嘅名佢,人就當做神咁拜。咁同四人幫裏面某水鬼升城隍嘅腳色又有乜分別?

喺節目裏面,有個肥仔學生會會長大發偉論,解釋點解要將個乜叉女神像放喺火車站廣場。佢話嗰件唔係屬於中大或者中大學生嘅,放喺火車站廣場係要俾多香港市民同國內同胞接觸到。真係唔知肥仔個腦生咗喺邊度,想俾多香港市民同國內同胞接觸到就將件擺喺星光大道啦,攞返嚟中大把X咩!如果突首唔肯,咪攻佔禮賓苦囉,做乜要為難沈校長啫。講起呢隻肥仔,又真係想打鑊佢。當然,我唔係話要同佢講手。一來打人犯法,而且佢咁肥,同佢郁手直頭係以卵擊石,責都俾佢責死啦。我係話想去鵝頸橋打佢小人啫。

隻肥仔嘅偉論當然只係得啖笑,不過佢另一就令人好不滿。佢同一班黨羽係都要迫沈校長表態,對於沈校長嘅中立態度完全唔肯接受,死咬住唔放。睇嚟如果沈校長唔表態支持班友嘅民主,佢嘅命運就會同前任校長差唔多。

沈校長喺節目裏面都講,大學係冇政治立場嘅,但係就會包容所有唔同嘅政見。作為大學校長,點解唔可以保持中立呢?如果可以專注發展大學嘅品牌,唔係對學生更有利咩?而家又冇人話唔俾學生講民主,如果大學個名夠響,學生講都大聲啦。點解係都要將校長拖落水呢?班友咁嘅取態,同以前嘅紅磚人又有乜分別?

中大有今日嘅地位,唔通係因為呢班學生對「民主」鍥而不捨嘅追求?所謂前人種樹後人乘涼,班友今日可以咁風涼,都係前人努力嘅成果,睇怕佢地都唔知道做二等大學生係乜滋味。睇見佢地將中大搞到七國咁亂,作為中大校友,我真係覺得好心痛!

而今之計,要力挽狂瀾於既倒,睇嚟只有由學生一人一票普選校長。最理想就係選到癲狗、長毛、或者小淫蟲之流出嚟,將中大搞到越亂越好。到時班友就可以試吓做二等,甚至三等四等大學生嘅滋味,咁佢地先會知道一個好校長應該係點樣。我一直相信,有樣叫做置諸死地而後生!

2010年12月20日星期一

人形小強

哈哈,忽然有個好無厘頭嘅想法,如果再過五億年,小強會進化到點樣呢?

據我嘅推測,首先,佢地會進化到有個人樣。而且生活習慣亦都同人類冇乜分別,單憑外表根本就分唔出佢地係人定係小強。不過佢地仲會保留住一昆蟲嘅習性,例如有頑強嘅生命力,真係想佢地死都幾難。佢地仲有超強嘅適應能力,喺任何惡劣環境都可以處之泰然。佢地又好食懶做(當然除咗做愛),食飽飯就匿埋生仔。生埋一竇二竇又唔理,由得仔女自生自滅。當然啦,你地又幾時見過昆蟲會湊仔啫,呢樣就係昆蟲同哺乳類動物嘅最大分別。係咪覺得好抽象呢?星期五睇報紙就見到有類似咁樣嘅人(或生物),不妨同大家分享吓。

話說有個已經生咗三件嘅大肚婆,因為個老公夜晚返上大陸,就懷疑佢去咗尋歡。根據一般新聞情節,個女人梗係攬住三個仔女燒炭,嚟個四屍五命啦。如果你係咁諗就大錯特錯喇。個女人即刻掉低三個由一歲至九歲嘅細路,自己過大海搏殺,實行你做出一,我做十五。個男人凌晨返到屋企,知道老婆過咗大海,又即刻揼低三個細路,過大海老婆。計我話,老婆只係藉口,條友想搏殺埋一份就真。當然啦,呢只係我嘅推測,如有雷同,實屬不幸。言歸正傳,第二朝因為兩個細路缺課,學校叫社工上門睇吓,先至揭發事件。

其實以上嘅絕對唔係單一事件,類似嘅新聞都唔知睇過幾多次。有理由相信,冇被揭發嘅可能仲有好多,我地見得到嘅只係冰山一角。真係唔明人,唔想湊就咪生啦,唔通佢地唔知道有叫做domdom?生埋一竇二竇又唔理,直頭係累己累人!喺咁嘅環境長大,細路第日好可能會好似佢地父母咁,變埋人形小強!

喺生物紀錄片都有得睇啦,動物為咗保護仔女,對住老虎獅子都冇有怕,就算犧牲自己都在所不計。所謂虎毒不食兒,真係唔明點解咁多人會連禽獸都不如!

咪住,等我發揮吓逆向思維嘅威力先。會唔會香港有部分人根本就係由五億年前嘅小強進化而嚟嘅呢?

2010年12月18日星期六

不死小強

小強當然唔係打不死,不過就硬係冇辦法將佢地徹底消滅。借用陳巧文嘅名句:打死咗一隻小強,廚房仲有千千萬萬隻小強!

唔知點解,呢幾年已經見唔到大大隻識飛嗰小強,但係廚房就出現咗細細隻嘅小小強。呢款小強都唔知係乜品種,最大隻都係同粒摩登瓜子咁上下,而最細嘅就仲細過粒米。呢小強都有對翼,但係就未見過佢地飛。咪睇佢地細細隻,其實身手都不知幾敏捷,速度快到無倫。佢地仲鬼死咁精靈,有乜風吹草動就即刻捐窿捐罅,直頭係神出鬼沒。

而家幾乎晚晚喺廚房都會見到幾隻小強,真係唔得佢死。其實我一早就為佢地準備咗幾間曱甴屋,但係就完全起唔到作用。都唔知係佢地唔肯幫襯,定係佢地百毒不侵。我個廚房又多濕星,所謂投鼠忌器,殺蟲水自然唔用得。所以我都係用最原始嘅方法對付佢地,就係用手拍嘞。以前我會用張廁紙隔住隻手先拍落去,不過好多時摷得張廁紙嚟,隻小強已經唔見咗,所以成功率好低吓。後來唔理得咁多,污糟就污糟啦,一於同佢地徒手搏擊,成功率就提升到七八成。不過話時話,徒手拍到小強爆晒肚,又真係好核突吓架!

小強食飽就匿埋生仔,繁殖得超快,就算每日打死幾隻,都冇可能打到佢地絕種。不過唔打又唔得,容乜易連睡房都俾佢地佔據埋架。而家日日要做人肉殺牠死,都唔知要搞到何年何月,真係煩死!

2010年12月16日星期四

萬能?萬惡?

有人話金錢萬能,究竟金錢係咪有咁大威力呢?

事實上當然冇咁誇張啦,如果唔係,小甜甜都唔使咁快去賣鹹鴨蛋。不過咁,雖然唔係萬能,其實都相差無幾架喇。我就會話,如果有錢,真係能人所不能。早排就有單搞笑,唔知大家有冇印象?

話說有個讀中二嘅𡃁仔,帶咗四萬蚊現金同八部iPhone返學校派俾同學,條件就係要叫佢一聲「軒哥」。結果反應都不知幾熱烈,學生個個爭住叫軒哥,搞到要排晒長龍。最後因為搞得太揚,俾學校知道咗,即刻叫停,連收咗錢嘅都要嘔返出嚟。

聽講話條𡃁仔仔搞壇咁嘅係為咗溝女,想喺心儀嘅女同學面前威吓。而錢就係佢阿嫲俾佢買食嘅零用錢喎。

事件究竟反映咗乜?當然係金錢嘅威力啦!試問一個中二嘅戇居仔,有何德何能可以令到同學(包括高班同學)對佢咁恭維?俗語話有錢使得鬼推磨,而家叫聲軒哥就有錢收,實在太簡單喇。莫講話叫聲軒哥,就算係叫十聲軒爺我都制啦。

不過咁,錢可以買到人地嘅恭維,但係買唔到人地嘅尊重。事實上,收咗錢嗰人有邊個喺背後唔笑佢傻仔?單又一次證明咗錢唔係萬能嘅,起碼錢就買唔到尊嚴嘞。

講開又講,條𡃁仔又真係好戇居吓。如果佢心儀嘅女同學會覺得佢咁做好威,即係話條女都係信奉拜金主義啦,咁將錢直接俾條女肯定更加有效。我唔知條𡃁仔屋企係咪好似李+x咁有錢,如果係嘅話,幾萬銀當然小意思,就算日日派都冇所謂。如果唔係,佢過多幾年就會知道錢幾咁有用,到時就會後悔架喇。

至於收咗錢又要嘔返出嚟嘅學生,就肯定會覺得好唔抵。一來見財化水,二來無啦啦叫咗條戇居仔做軒哥,真係有貶自己嘅身份。雖然呢單只係小事,不過就證明咗錢可以令人做出一違背良心嘅。所以呢,又有人話金錢萬惡。

對於呢個講法,我絕對唔同意。以派錢單為例,其實雙方都係抱住不勞而獲嘅心態,而錢只係作為交易嘅媒介啫。就算係返到去以物易物嘅年代,呢咁嘅咪一樣會發生。其實話金錢萬惡,只不過係啊Q嘅精神勝利法。如果世界上有樣係萬惡,我就會話係人心,而唔係金錢!


2010年12月12日星期日

企跳

琴日講開自殺,我又真係有體會喎。當然啦,呢家我自己未試過,不過就有兩個中學男同學都係自殺死嘅。

嗰陣仲讀緊大學,不過係第幾年就唔記得嘞。有日喺報紙見到一個中學舊同學自殺嘅消息,真係震撼到難以形容。到而家仲記得,佢係喺油麻地政府合署跳落嚟嘅。覺得震撼係因為點都諗唔到佢會自殺,真係完全冇可能。佢係班長同head prefect,雖然讀書成績普通,不過性格樂觀好動,人緣又好,絕對唔係一般人想像中會自殺嗰隻。佢冇留低遺書,而當時嘅傳媒又比較少炒作感人故事,所以一直都唔知道佢點解要自殺。

隔咗冇幾耐,有個死黨打電話俾我,約埋我一齊送一個舊同學最後一程。嗰個同學係隔離班嘅,其實唔算太熟,係喺走廊撞到至傾兩句嗰隻,印象中個人好隨和吓。佢用乜方式自殺我都唔係太清楚,不過就救得返,送咗入醫院。但係佢死意已決,半夜掹甩條氧氣喉,無聲無息咁走咗。我一向覺得,自殺嘅人只係一時諗唔通,如果死而有知,佢地一定會後悔。唉,唔通我一直都諗錯咗?

點都好,要自殺梗有原因,外人未必能夠了解。有一點可以肯定,如果真係要死,根本就唔會公告天下,外人亦都無從阻止。不過好奇怪,呢幾年香港嘅高調企圖自殺事件似乎多咗好多,真係唔知點解。早幾日就發生咗單企跳事件,都不知幾搞。

話說有個後生仔,因為不滿房署遲遲都唔幫佢清理屋企外牆嘅雀屎,一怒之下走咗上行人天橋玩企跳。條友不斷咁喺石壆欄河上面玩移形換影,班消防就喺下面抬住個氣墊走嚟走去,直頭俾佢玩到謝晒。最後條友俾人制服,送咗去醫院檢驗,場鬧劇先至結束。真係唔明條友嘅心態,竟然可以為咗一堆雀屎要生要死。唔通喺佢心目中,嗰堆雀屎嘅重要性可以同自己條命相提並論?

其實企跳嘅原因仲有好多,俾仔(或女)飛可以企跳,俾老闆炒魷又企跳,投資失利又企跳,同親人嗌交又企跳。究竟人係咪真係想死呢?抑或只係將自殺當成一種要脅手段?答案好明顯,睇吓高調企跳嘅成功率就知道。

我唔贊成自殺,但係對於有人作出咁嘅決定,我會抱「尊重」態度。幾時嚟我地冇得揀,唔通連幾時走都冇得自主?事實上,如果真係要死,亦冇人可以阻止到,事後譴責又有乜用?不過咁,如果以死作為要脅手段,我就一定反對,因為咁係侵害咗他人嘅選擇自由。而且,一個唔小心弄假成真就斃啦。死,一世人只有一次,絕對唔可以隨便攞嚟玩架!


2010年12月11日星期六

扯火

琴日喺報紙又睇到單扯火,雖然唔係乜新鮮事物,不過就真係睇到火都嚟埋。唔好估錯,唔係劉曉波嗰單,亦都唔係梁展文嗰單。

話說有對失業窮鬼夫婦,欠落人周身債,凌晨4點喺屋企淋天拿水自焚,結果一死一重傷。案發地點係新蒲崗一個大約400呎嘅住宅單位,上址間開4間房出租,涉案夫婦就住喺其中一間。

大約凌晨4點,有住客聞到天拿水味,就走去拍門問吓係乜事。當時有人話「唔關你事」,跟住就起火嘞。後來消防破門入房,除咗發現對重傷嘅夫婦,仲有兩罐天拿水,其中一罐已經用咗。最搞嘅係消防發現成地都係溪錢,連個女人嘅衫袋都有大疊溪錢。好明顯,對窮鬼夫婦梗係想升呢做富貴鬼。據聞佢地已經欠咗幾個月租添。

本來自殺真係唔關人事,不過放火燒屋就唔同咁講,絕對係累街坊。首先,欠人幾個月租,個業主已經多得佢地唔少。而家仲要燒埋人間屋,真係大整蠱。最離譜嘅係佢地仲要揀凌晨4點放火,嗰個鐘數個個都瞓到死豬咁架啦,分明係想一鑊熟。一個唔好彩,隨時燒死一百幾十件都唔出奇。上海沖天大火災單仲記憶猶新,都咪話唔得人驚。

真係唔知應該點講嗰對夫婦,話佢地蛇蠍心腸都唔足以形容佢地嘅惡毒,而且仲映衰埋蛇蠍呢兩種低等生物。連溪錢都準備埋,佢地搞壇咁嘅出嚟,好明顯係早有預謀,絕對唔係一時衝動。仲要揀凌晨4點落手,分明係想成座大廈嘅人陪佢地一齊死。如果香港多幾個佢地咁嘅人,就真係晚晚有得震冇得瞓嘞。

其實要自殺都有好多其他辦法,食老鼠藥又得,飲漂白水又得,再唔係就互劈啦,做乜要累街坊啫。咁惡毒嘅人,真係唔死都冇用!

希望重傷嗰件快死埋,等佢地可以喺地府做對同命鴛鴦。我誠心祈求,望佢地打落十八層地獄,永世不得超生,日日落油鑊,日日俾火燒!


2010年12月4日星期六

馬路如虎口

慢慢走,勿亂跑,馬路如虎口,交通規則要遵守, 安全第一,命長久。

有冇聽過呢隻歌仔呢?如果有聽過,就證明你已經有咁上下年紀,係阿叔或者阿嬸輩。以而家嘅標準嚟講,呢隻歌仔真係好老土。莫講話𡃁仔連聽都未聽過,就算聽過,都冇可能聽得入腦。

上禮拜有單新聞,一個23歲「壽星仔」亂過馬路,俾架的士撞到重傷。話說凌晨兩點幾,一班𡃁仔𡃁妹喺尖東同個壽星仔慶祝生日。班友(一行7人)貪方便,唔用冇幾遠嘅行人天橋,而爬過花槽同欄杆,橫過有8條行車線嘅梳士巴利道。咁啱有架的士駛到,壽星仔為咗英雄救美,推開身邊嘅女伴,自己就俾架的士撞到飛起。

本來呢咁嘅新聞真係冇乜好提,奇就奇在個壽星仔嘅老豆竟然責怪個司機,話佢冇理由見唔到咁大班人過馬路,要對事件負責。真係怪人度度有,香港特別多!個老豆自己都係職業司機,難為佢講得出咁嘅。如果易地而處,我估佢撞完人之後,可能仲會爆粗鬧個𡃁仔添。

凌晨兩點幾,無啦啦有人跳落條馬路,真係避到先至怪。我反而會諗,咁大架的士駛緊埋嚟,班友仔有乜理由會睇唔到。如果個司機為咗避佢地而搞到自己撞車,咁至係最唔抵。點解有人可以咁橫蠻無理,將責任推晒俾人地!

等我又講吓一單自己嘅親身經歷,都幾驚險吓架。

我過馬路一向都會睇燈,不過主要唔係睇行人燈,而係睇車燈。見到轉黃燈,如果有車嚟緊,我會睇吓佢嘅距離同速度,評估吓佢有冇機會衝到燈尾。如果係冇嘅話,就算係紅公仔我都會照過。當然啦,我都會計埋時間,行到出馬路中心,應該已經轉咗紅燈。我對自己嘅計算好有信心,從來都冇發生過意外,直至有一次....

好多年前,有一次喺舊公司附近過馬路。當時已經轉咗黃燈,見到有架的士駛緊埋嚟,不過以佢嘅速度,點都冇可能衝到燈尾,咁我咪照過囉。點知架的士竟然冇減速,一撞到我飛起。好彩個司機喺最後關頭仲識煞制,我先至冇撞到飛上車頂。雖然係咁,都仍然撞得好甘吓,成個人向前飛出咗成10呎,仲要凌空轉體720度先落地!

我好肯定架的士撞到我嘅時候已經轉咗紅燈,事後個司機嘅反應更加證明咗呢一點。佢都不知幾驚青,仲第一時間捉咗我上車,話要車我去睇醫生。當然唔係去醫院啦,佢點敢啫。不過我見又乜,就婉拒咗佢嘅「好意」,亦冇問佢攞湯藥費。始終自己都有錯,唔可以全部怪晒個司機。

講開又講,嗰次真係好好彩。撞到飛起,都只係手腳擦傷咗少少,被撞嘅地方瘀咗一撻。不過咁,幸運之神冇可能成世黐住,下次未必會咁好彩。所以自此以後,我過馬路都好小心,就算轉咗綠公仔我都會睇定先,一定要見到車減速或者已經停定,先會踩隻腳落馬路。始終有係冇得計嘅,如果有司機飲咗酒、索咗K、又或者踩錯油門當逼力,就真係跟燈過馬路都會死人。自己小心,先係保住條命仔嘅最佳辦法!

自己唔小心,攞條命仔嚟教飛,出咗事就將責任推卸俾人,真係唔要得。不過香港真係有好多咁嘅人,都已經見怪不怪。最奇嘅係輿論好多時都傾向同情呢人,唔通出咗事就大晒?總之呢,命仔只係得一條,連自己都唔珍惜嘅話仲怪得邊個?如果出咗事,就算博到賠償都冇用啦!


2010年12月1日星期三

義海豪情

義海豪情終於播完喇!已經好多年冇完完整整咁睇晒一套電視劇,義海係唯一例外。就算係巾幗梟雄都係零零碎碎咁睇咗,唔係套劇嘅問題,而係見到豬尾辮就唔想睇!

至於義海,作為一套師奶劇嚟講已經算唔錯架喇。不過都係秉承咗無線劇虎頭蛇尾嘅一貫作風,結尾部分比較鬆散,有欠力度。其實我睇呢套劇,都係為咗男女主角。講到演技,祥仔同雯女真係冇得頂,嗰班偶像派演員絕對望塵莫及。好似陳蠔、林蜂、同蛇獅鰻咁,根本就唔係嗰個級數。不過咁,祥仔同雯女想蟬聯視帝視后,睇怕機會就微喇。始終呢類選舉,結果都係令人莫名其妙嘅居多。

所謂牡丹雖好,都要綠葉扶持,其實對於一套戲嚟講,配角都好緊要。既然醒哥同九妹已經咁多人講過,不如就講吓配角啦。

軍爺
失敗!既冇知人之明,又冇容人之量,點睇都係一個老糊塗。後期黐埋麗華度,直頭變埋老淫蟲添。仲話統率三千門生,根本就一江湖大佬嘅氣派都冇,連死都死得鬼祟過人。不過最搞都係嗰個假髮,成個頭盔咁,好惡頂!

喜姐
過火!其實心姐完全演繹到呢個角色嘅奸同狠,我絕對唔懷疑佢嘅演技。佢關目、功架、做手、同埋腔調都好掂,不過可惜呢套係電視劇,而唔係大戲。

大鳳
樣衰!我一直都覺得魯振順好樣衰吓,佢做呢個角色簡直就係天造地設!

阿鐵
絕!個角色本來冇乜發揮,成日都只係行行企企,跟出跟入。最成功係咗馬海倫嚟做,無論係個髮型,抑或係件長衫,都同佢襯到絕,加埋硬梆梆嘅表情,真係不作第二人想!

麗華
討厭!根據非正式統計,麗華喺網民最討厭嘅角色之中排行第二。都唔使理佢做過乜衰,淨係見到佢個樣已經令人好討厭。除非天生樣衰,要做到人見人憎絕對唔易架,真係要讚吓胡定欣。

晴晴
超煩!無線今次真係計錯數嘞,諗住整條浪漫嘅感情線,仲加埋個靚女,咁就師奶同麻甩佬都可以通殺,點知事與願違,晴晴竟然榮登最討厭角色榜首。鬼咩,次次睇到最緊張嘅時候就跳咗去晴晴日記,真係俾佢激死。不過最煩嘅,都係佢把死唔斷氣嘅聲,最尾仲要死足兩集先死得去,真係難頂!

向山大佐
搞笑!唔係話個角色,而係講緊金剛。唔係話佢做得唔好,事實上,佢真係好用心去演呢個角色。搞嘅係佢個樣,一見到就想笑,就算係做緊個嚴肅嘅表情,個樣都係好搞笑。睇嚟佢都係冇得轉型,喜劇先係佢嘅歸宿!

黑木少佐
驚喜!呢個角色戲份唔多,只係出過幾集,冇乜發揮機會。作為一個新人,李嘉已經演得相當唔錯。尤其是九姑娘色誘佢嗰場,個鹹濕樣就做得好傳神!

非凡哥
過癮!成套劇裏面,呢個角色最頂癮。一方面勁衰格,睇到個個咬牙切齒。而另一方面又勁搞笑,對套劇嘅沉重氣氛起咗調劑作用。如果冇咗非凡哥,真係會少咗好多歡樂氣氛。不過咁,角色有得發揮,都要個演員演得好先掂。麥包真係做得好正,雖然有一兩場稍嫌誇張咗少少,但係瑕不掩瑜,佢絕對有資格攞最佳男配角。不過之前都講過,呢咁嘅選舉多數都會令人跌眼鏡。雖然我投咗佢一票(在心中),但係睇嚟都係排骨仔機會大。世事就係咁架喇,有實力唔表示一定會成功!