2010年4月17日星期六

跳樓

天匯跳樓事件終於有定案,政府決定規管樓層數字,唔准地產商任意跳層。本來係一單得啖笑嘅鬧劇,估唔到有扮民議員會無聊到大事炒作,分明係食飽飯冇做。更估唔到嘅係政府會認真處理,正一好做唔做。

係人都知地產商創意爆晒燈,樓盤名要幾騎呢有幾騎呢,甚至連一特定樓層都起個名,好似乜"天際獨立屋"咁,真係笑死人冇命賠。其實樓層避開某唔吉利嘅數字,根本就唔係乜新鮮事物,天匯只係將呢種做更加法發揚光大啫。但係騎呢還騎呢,關一般市民乜事,又關政府乜事?

誤導公眾?樓盤係私人地方,人地喺自己地方發揮創意,關公眾叉事咩!天匯88樓實際上即係第幾層,又對你同我有乜影響?

欺騙買家?你當人地傻嘅咩!發展商肯定有提供詳細樓層資料,買家亦唔可能乜都唔知就扑槌,依家講緊七萬蚊一呎嘅豪宅,你當喺街市買斤菜呀!事實上人地真正買家都冇嘈,唔明扮民議員喺度嘈乜。

造成信息混亂,發生緊急事故時會影響救援?只要容許跳層,就會有咁嘅機會,跳一層同跳十層根本冇分別。如果真係覺得對公眾安全有威脅,不如再玩大,建議完全唔俾跳層,連跳咗嘅都要改返晒。

有人諗得出呢咁嘅屎坑橋又有人肯buy,都唔知仲有乜好嘈。講到尾,議員都係想證明俾人睇自己係挑戰巨人嘅大衛啫。有咁無聊嘅議員,又有個咁無能嘅政府,真係唔知點算好!



2010年4月15日星期四

示範單位

由於有市民投訴地產發展商喺示範單位做手腳,製造空間感嘅錯覺嚟誤導消費者,政府繼永利街原汁原味保育事件後,又再順應民意,出手做。

今次又係鄭汝樺局長出招,首先要求發展商唔好喺示範單位搞咁多花樣誤導消費者。唔知鄭局長係咪好少睇示範單位,見到牆身鑲鏡,玻璃間隔,床或書檯放埋上窗台,同埋小人國傢俬就大驚小怪。其實睇示範單位係好多人嘅假期消遣,呢咁嘅花招根本就呃唔到佢地。相反嚟講,仲有一定嘅參考價值添,好多人屋企都有類似嘅裝修。喺發展商嚟講,搞靚個示範單位係樓盤推廣嘅一部分,對於銷售好重要。只要示範單位喺尺寸方面冇作大,根本就唔需要規管。如果咁都話有問題,相信市面上大部分產品嘅廣告都要禁。而且售樓書裏面有單位平面圖,可以睇到真實間隔同尺寸,示範單位誤導消費者云云,真係講唔通。依家唔係喺街市買幾蚊一斤菜,係講緊郁吓都幾百萬嘅一層樓,消費者梗係要自己睇清楚啦。

另外一招仲搞笑,就係要求發展商提供樓盤嘅正確區域同地址。首先,售樓書冇可能冇正確地址。如果有條友連地址都唔知就大拿拿攞幾百萬出嚟買層樓,咁就真係冇講嘞。至於正確區域,有時又真係好難講喎。你話半山一號係屬於何文田定土瓜灣丫?發展商就梗係話何文田啦。佢咁講啫,你絕對可以唔同意。始終,買唔買係自己嘅決定,冇人可以迫到你。講到尾,買樓係重要嘅投資,事前應該做功課。最好係親身去地盤附近睇吓,再唔係,Google Earth同Google Map一樣幫到手。

依家人又唔用腦,又唔肯做功課,吓吓都話俾地產商呃咗,呢態度真係唔要得!至於政府,呢次真係好做唔做!



2010年4月13日星期二

長腿姐姐

對腳夠長, 真係行步路都好睇! 所以個個女仔都想好似陳慧琳咁擁有一對42吋長腿. 如果可以好似下面嗰位長腿姐姐咁, 一次過擁有四對又長又纖秀嘅美腿, 女仔仲唔開心死?!!