2011年11月4日星期五

淫棍末路

上帝要你滅亡,必先使你瘋狂!

我一向覺得西人講嘅嘢都唔係多可信,不過上面嘅名言就真係唔到你唔信,因為啱啱就有嗰咁嘅真人騷。弊嘞,又講錯嘢添,開騷嗰個都唔係人,又點叫得做真人騷呢!其實我係講緊淫棍蔥,就算佢唔係死物或者植物,極其量都只可以係一隻鴨,點都唔講唔上係人!

淫棍蔥簡直係貪錢貪到癲咗,滾咗老甜甜廿幾億,本來下半世打跛腳都唔使憂,但係佢竟然大貪到想謀埋人地成副家產。最近佢單爭產官司終極敗訴,睇嚟好快會被起訴偽造遺矚。我都批死佢要入冊架啦,真係大快人心。本來佢應該洗乾淨個八月十五,做定啲通櫃嘅心理同生理準備,點知條友居然黐線到上電台嘅烽煙節目接受訪問,企圖爭取輿論支持。都話人蠢冇藥醫架啦,結果咪俾啲聽眾鬧到狗血淋頭囉,仲封埋做面懵膏代言人添。

條友都算懵到上心口喇,唔通佢真係以為大話講咗一百次就會變成真理?可能佢已經自我催眠咗,根本就唔覺得自己講緊大話,但係我地呢啲睇熱鬧嘅觀眾又點會受佢呢套呢。佢話自己唔貪錢,係真心鍾意老甜甜喎,真係揾鬼信咩。如果條友係對老甜甜真心,就唔會爆晒佢地啲不倫嘢出嚟啦。連老甜甜條姨媽底褲都要留番嚟做愛的證據,話佢唔係早有預謀就打死都唔信囉。如果佢真係懷念老甜甜,條姨媽底褲就唔應該攞嚟做呈堂證據。咁有紀念價值嘅驅風極品,梗係要留番嚟做私人珍藏啦,得閒攞出嚟索吓都不知幾爽!

雖然佢講大話當食生菜,幾乎乜嘢都係假,但係我傾向相信有一樣係真嘅,就係嗰份遺矚嘞。條友嘥咁多錢打官司,輸咗又上訴再上訴,睇嚟佢真係好有信心。當然啦,咁可以話佢係洗濕咗個頭,點都要頂硬上。不過佢喺單官司開始之前,竟然用咗十幾億買架豪華版嘅空中巴士A350,一定係諗住實食冇黐牙先會咁做啦。不過咁,我又唔係話相信老甜甜自願俾晒成副身家佢。嗰份可能係風水遺矚,亦有可能係老甜甜病到懵咗,根本唔知自己做緊乜。

點都好啦,而家呢個結果絕對係人人最樂意見到嘅。除咗告佢偽造遺矚,仲要追佢稅,等佢破埋產先入冊。就算證明唔到佢收老甜甜嗰廿幾億係風水費,咁係做鴨嘅肉金就一定走唔甩,總之都係要納稅啦。

唔好質疑我點解咁憎條友,我承認我係妒忌。其實阿茂慈善基金贏咗,我都唔會有任何得益。我就係唔抵得條友,以佢咁嘅劣等質素,竟然可以淘到個超級古井。如果佢有蠱天樂咁靚仔,又或者郭褲城咁好身材,我都唔會咁唔順。除非佢證明到自己真係有啲過人之長啦,否則我相信全港男士都會好似我一樣咁憎佢!

8 則留言:

  1. 你張相,我最初以為係皮條,睇真D原來係蔥蔥。

    佢D野,都唔好話個個男人都做得呀,果D其實係非常厭惡性嘅野泥架,可能係佢先哽得落架咋!

    條友以為執到金,最後只係執到屎,佢都幾慘架^^

    回覆刪除
  2. Ebenezer,
    哈哈,唔出辛苦力,又點得世間財呢!莫講話有廿億啦,就算得二億,我都絕對肯制架,咪當俾鬼責囉!

    回覆刪除
  3. 喂,係你責鬼喎 XDDD

    我諗好多男士都有你尾段文章嘅諗法,尤其條件好過滛葱 N 倍嗰啲 .....

    但我冇架,我都冇咩過人之長, kakaka~~

    回覆刪除
  4. 所以呢,唔使羨慕人地中六合彩咁好彩,因為可能係惡夢嘅開始至真。。。
    Derek

    回覆刪除
  5. laulong,
    哈哈,其實我唔一定錯架,或者對方鍾意用坐蓮式呢!校長你又唔使咁謙喎,睇你嗰張雪山相,俊朗中帶點不羈,不羈中帶點野性,野性得嚟不失浪漫,浪漫得嚟又穩重可靠,肯定殺女無數啦,仲要係秒殺嗰隻添!

    Derek,
    哈哈,直頭係酸葡萄呀!雖然係酸,不過有得食就點都好過冇囉!

    回覆刪除
  6. 條友點解咁變態,皆因佢啃佐一件咁惡啃既野!這個陰影從此就揮之不去!千錯萬錯,係小鹹鹹既錯!如果小鹹鹹好似李+殷咁!佢食佐二十幾億,就會覺得超值,唔會發爛渣架喇!

    所以,Arm!唔好為兩億去啃件咁既野!到時,你都會變佐條友咁,覺得物無所值,應該要哂小鹹鹹成副身家!

    行為心理學: 刺激(小鹹鹹)<->反射(貪得無厭)!嘻嘻!

    回覆刪除
  7. >>不過佢喺單官司開始之前,竟然用咗十幾億買架豪華版嘅空中巴士A350

    後來有報導話佢其實只付了小小訂金,打官司而裝腔作勢的。

    回覆刪除
  8. 佛爺:
    哈哈,邊有咁大隻蛤乸隨接跳啫!如果有李小姐咁嘅水準,睇怕要俾廿億嘅係條淫棍囉!

    Coffee,
    之前喺壹仔睇過,條友買飛機落咗幾千萬訂,睇嚟最終都會以撻訂收場。不過我就唔覺得佢會高到用買飛機嚟做打官司嘅策略,法官根本唔會理呢啲嘢啫!

    回覆刪除