一瀉千里

自從財爺公布咗新一年嘅財政預算案，雖然係噓聲四起，不過就仲未見到有乜激烈行動，真係令人跌晒眼鏡。琴日瀉民連終於爆大鑊嘞，長毛同一眾嘍囉就喺一個公開場合伏擊突首。混亂中突首遭到胸襲，事後仲去咗醫院驗傷添。

喺電視新聞睇到，班嘍囉都不知幾好身手，個個好似識輕功咁飛身上台，撲向突首。不過好奇怪，平時最出位嘅長毛竟然冇乜行動。鬼咩，條友馱住個大肚腩，點玩飛身啫。但係最估唔到嘅反而係曾局長，咪睇佢奀挑鬼命，居然可以攔截到一個嘍囉，真係勇到無倫。而嗰班豬科特警，話就話係精英中嘅精英，點知就影都唔見，俾局長一個人攞晒威。

咁易俾人埋到身，明顯喺保安上有好大嘅漏洞。如果班友有武器，甚至身上綁咗炸彈，真係十個突首都唔夠死啦。好在班友只係博出位，根本就冇諗過要為公義而犧牲。我甚至懷疑連佢地自己都計算錯誤，完全冇預計到可以埋到突首身。

突首當然唔會放過呢個反擊機會，事後高調譴責班友嘅暴力行為。好明顯，班友今次係玩大咗。事實上，由瀉民連自己提供嘅錄影片段見到，班友預先準備嘅武器只係一個飯盒。哈哈，唔知係咪粟米斑塊飯呢？而咁就證明班友並唔係想對突首或隨行嘅高官造成實質傷害，而只係想搞到佢地一身都係啫。

唔理班友嘅原意係點，導致他人身體受傷就一定係衰咗。不過逃君行竟然話係突首小事化大，企圖轉移視線。真係唔知條友想點，如果佢係想走番條比較理性嘅路線，就唔應該包庇呢傷人嘅暴力行為。一係就死撐到底，話而家係官迫民反，係突首自己攞嚟衰。條友唔敢正面回應，完全唔係瀉民連嘅一貫作風。自從癲狗退黨之後，瀉民連嘅聲勢一瀉千里，真係一狗不如一狗，遲早實聽摺埋！