2011年3月21日星期一

聯趣

五百里滇池,奔來眼底。披襟岸幘,喜茫茫空闊無邊!看:東驤神駿,西翥靈儀,北走蜿蜒,南翔縞素。高人韻士,何妨選勝登臨,趁蟹嶼螺洲,梳裹就風鬟霧鬢;更蘋天葦地,點綴些翠羽丹霞。莫孤負:四圍香稻,萬頃晴沙,九夏芙蓉,三春楊柳。
數千年往事,注到心頭。把酒淩虛,歎滾滾英雄誰在?想:漢習樓船,唐標鐵柱,宋揮玉斧,元跨革囊。偉烈豐功,費盡移山心力,盡珠簾畫棟,卷不及暮雨朝雲;便斷碣殘碑,都付與蒼煙落照。只贏得:幾杵疏鐘,半江漁火,兩行秋雁,一枕清霜。

上面嗰一大段文字係好出名嘅大觀樓長聯,唔知有冇人會認真咁逐個字睇晒佢呢?老實講,我自己就冇咁好心機嘞。而家搜索器真方便,只要喺網上摷到嘅,唔使睇清楚就可以攞嚟用。

咪以為對聯淨係老餅先鍾意,我就見過有高登仔開貼講對聯,反應都不知幾熱烈,真係估佢唔到。我一向覺得對聯只係遊戲文字,好考IQ,相對於詩詞歌賦,更適合我呢有文學恐懼症嘅人。

其實好細個已經接觸到對聯,因為以前屋企有貼春聯嘅習慣,年年都係嗰副「花開富貴唐天寶,竹報平安晉永和」。嗰時當然唔清楚對聯係乜,只知嗰兩句係好意頭嘅說話。而家再睇番,呢副春聯只不過係行貨,唔算係乜精品。

講到對聯,其實我都只係略知皮毛,淨係知道最講究對仗,即係上下聯喺字數、平仄、字或詞性方面都要相對。我對長聯冇乜興趣,因為好難比較到上下聯係咪對得工整,尤其是平仄。好似大觀樓長聯咁,成百幾二百字,對得嚟都蚊瞓啦。好彩我對平仄一竅不通,慳番好多麻煩。

有人鍾情長聯,我就比較喜歡短小精悍嗰。短當然易對,不過要對得好,一樣好講心思。見過一副一字聯,上下聯分別係「墨」同「泉」。用「白水」對「黑土」,我嘅評語都只有一個字,絕!我又試吓用個「硃」字嚟對,唔知得唔得呢?

另外有一副兩字聯,背後仲有個故事添。話說乾隆要考吓紀曉嵐,就攞咗出自論語嘅「色難」二字做上聯,仲話呢兩個字好難對。紀大學士隨口噏咗「容易」兩個字,跟住就冇晒下文。乾隆等得唔耐煩,忍唔住追問,紀大學士就話:已經對咗啦。「容易」對「色難」,當然無懈可擊,有埋故事背景,就更加過癮嘞。

又話說有一個太監想取笑紀大學士,就岀上聯「小翰林,穿冬衣,持夏扇,一部春秋曾讀否?」要佢對。上聯有齊「春夏秋冬」,的確唔易對,不過當然難唔到紀大學士,結果梗係個太監自討沒趣啦。原來紀大學士嘅下聯係:「老總管,生南方,來北地,那個東西還在麼?」,至於「東西」係指乜,相信唔使講到明啦。

呢類同對聯有關嘅故仔仲有好多,真係講足一年都講唔晒。雖然故仔好過癮,不過我就好懷疑佢地嘅真確性,可能有好多都係穿鑿附會,冇理由鑊鑊都同紀曉嵐或者解縉有關啫。以下有個故仔,講一個少年戲弄老師。至於個少年嘅身分,竟然有幾個唔同講法,有人話係紀曉嵐,有人話係解縉,又有人話係蒲松齡,真係唔知信邊個先啱。

個故仔好長,我就唔詳細講嘞。大致上話有個私塾老師揑死咗學生隻寵物雀,然後收埋喺塊磚頭後面,仲要好串咁喺上面貼咗張紙,寫住「細羽家禽磚後死」。個學生發現之後梗係嬲到爆炸啦,就用下聯「粗毛野獸石先生」回敬老師。唔記得講添,個老師姓石架。如果淨係睇副對聯,直頭係絕到無倫。不過睇埋成單,我就覺得好堆砌嘞,簡直好似古龍嘅武俠小說咁,先諗咗個結局,然後再砌番巧妙情節出嚟。

講開解縉,又有一副同佢有關嘅過癮對聯。話說有個恃老賣老嘅大臣,因為唔順少年得志嘅解縉,就岀咗條咁嘅上聯嚟揶揄佢:「二猿斷木深山中,小猴子豈敢對鋸?」。唔使講都知,呢個大臣梗係自己攞嚟衰啦,解縉嘅下聯係:「一馬陷足污泥內,老畜生怎能出蹄?」。呢副對聯抵死之處在於「鋸」同「蹄」都各有一個同音字,至於係邊兩個字我就唔講明嘞,你地自己諗吓啦。

講咗咁多個故仔,我都驚悶親大家,不如玩吓猜謎啦。下面嗰副對聯其實係一個燈謎,上下聯各打一個字,睇吓你地估唔估到?事先聲明,估中冇獎!

黑不是,白不是,紅黃更不是;和狐狼貓狗彷彿,既非家畜,又非野獸。
詩也有,詞也有,論語上也有;對東南西北模糊,雖是短品,也是妙文。

其實都好簡單架咋,雖然答案係一個謎,不過包保一猜即中!



7 則留言:

  1. 我雖讀中文,燈謎哩家嘢最鬼白痴,從來都得個睇字。

    倒是那大觀園對聯,我第一次番大陸,就係同地理佬,仲有另兩個同學80年嘅西南遊,去到大觀園就見到這對聯喇!

    回覆刪除
  2. 首次光臨,我是從劉老師那邊過來的,覺得你寫的我都很有同感!:)

    噢,我中文不太好,對聯也不會作啊。反而高登對聯我是聽過的-輕輕鬆鬆鄧梓峰,滄滄桑桑吳浩康/英英俊俊陳奕迅 lol

    回覆刪除
  3. 嘩!咩事呢?我昨晚有在你呢度留言架喎!去咗邊啊?

    回覆刪除
  4. 嘩!乜突然咁有風雅?

    回覆刪除
  5. laulong,
    我去滇池玩嘅時候,反而冇留意到大觀樓有副咁嘅對聯,都係後來睇書先知道有。鬼咩,去到旅遊景點就搏命影相,乜都係透過鏡頭睇,有時都覺得係捨本逐末!

    婉兒:
    有失遠迎,恕罪恕罪!講到高登仔,有時佢地寫嘅都幾過癮吓架!哈哈,又等我試吓先:
    健健康康崔建邦
    聰聰明明郭富城
    大大鑊鑊古天樂

    Coffee,
    哈哈,網絡靠得住,豬乸都會上樹!所以我通常會喺notepad打咗先,然後再paste過去,就算出咗問題都唔使再打過。

    佛爺:
    哈哈,我唔係忽然風雅,而係附庸風雅!

    回覆刪除
  6. Arma 都要開估呀!

    黑不是,白不是,紅黃更不是;和狐狼貓狗彷彿,既非家畜,又非野獸。
    詩也有,詞也有,論語上也有;對東南西北模糊,雖是短品,也是妙文。

    答案係乜呀?

    回覆刪除
  7. laulong,
    哈哈,唔好咁冇耐性啦,我喺內文加咗提示架喇!

    回覆刪除