2011年2月28日星期一

喪屍Facial

成日收到討厭嘅冷叫電話,唔係叫你借錢,就係話有超值美食會籍益你,真係煩到想掟電話。友呢排又有新搞作,最近就有幾個垃圾電話都係美容中心打嚟嘅。有冇搞錯,男人老狗做乜美容啫。第一次接到呢電話,我第開始就講明自己係男人,美容呢唔啱我。對方當然唔會就咁收線啦,佢話其實而家好多男人都做美容架喇。我跟住就話我係一個老人家,根本就唔需要做美容。佢仲係唔肯放棄,話美容無分性別,年紀大就更加需要。真係俾佢吹到啤一聲,唯有使出我嘅殺手鐧,即刻收佢線。以後收親呢電話,都費事講咁多,直頭話冇興趣就算。

其實何止冇興趣呀,簡直覺得係虐待添啦。無無聊聊瞓喺度任人擺布,我就會聯想到人體解剖嘞。聽講話做mask嘅時候唔可以笑,又唔可以講,真係比死更難受。不過又唔好以為我冇做過facial喎,其實我仲做過兩次添。

第一次係喺約旦,做死海泥facial。話時話,嗰次全身搽晒死海泥,唔知仲可唔可以叫做facial呢?我當然唔會無聊到特登走去約旦做facial啦,只不過係去約旦旅行,有一日住喺死海邊,有得做又唔使錢,咁唔做咪好嘥?

死海泥我一早就聽過,淨係知道好貴,有乜功效就唔係太清楚嘞。個日去到死海邊,其實都想見識吓死海泥,不過海邊只有沙灘,根本就見唔到黑掹掹嘅死海泥。後來見人喺沙灘度挖吓挖吓,居然挖到死海泥出嚟,於是又學人挖埋一份。原來真係禾稈冚珍珠,沙灘下面幾吋就係成個黑色寶藏。咁貴嘅,自己買梗係唔捨得啦,而家唔使錢,唔搽到成身都係就蝕底喇。不過搽完就知道大鑊嘞,死海泥唔止黑掹掹,仲勁臭嘅添。拿拿林影完張相,就落水洗白白。都話貪心實有報應架啦,結果就俾超鹹嘅死海水嗱到對眼鬼死咁痛。其實又黑又臭嘅泥,城門河大把啦,使鬼去死海咩!

第二次做facial係喺冰島,不過事前就完全唔知有咁嘅。話說有一日去到藍湖(Blue Lagoon),聽女團友講話嗰度白泥好正,簡直有起死回生嘅功效。有冇咁誇張我就唔知,不過對於好多女人嚟講,塊面有條皺紋都想死咁滯,梗係當美容產品係至寶啦。

藍湖其實係一個人工溫泉,白泥係咪嗰度出產嘅我都唔係太清楚,不過就擺咗喺度任人搽。咁我梗係冇蝕底,搏命撻晒上塊面度啦。同死海黑泥唔一樣,冰島白泥冇乜黏性,黐唔實皮膚,結果就流晒入眼同口,真係攞苦嚟辛!後尾喺紀念品商店見到,白泥美容產品原來貴到無倫,咁辛苦吓都算值得喇。

做咗兩次facial,事後都冇對比過皮膚係咪靚咗。不過成面搽晒泥個樣就好核突吓,點睇都係似隻喪屍多過似個人!



5 則留言:

  1. 最後一幅似非洲土人!哈哈!

    回覆刪除
  2. kakaka, 笑死我!做嘢做到頭瘟腦脹都要寫番句!

    但係 Arma 好 fall sa 喎,打得兩咀,我同你一齊去摧花 -- 中國茉莉花 XDDDD

    回覆刪除
  3. 佛爺:
    嗰時我剪咗個平頭,咁咪即係非洲和尚?

    校長:
    哈哈,而家摧花唔使用暴力架喇!早兩日睇報紙,話有間花店俾人突襲,個摧花狂徒用通渠水淋落一棵價值三十萬嘅羅漢松度。真係慳力之餘又有效!

    回覆刪除
  4. 咁正嘅嘢你都試過,聽講做完皮膚好滑,又可醫小小皮膚不適。

    好好笑!特別係黑色果張。

    ps︰而家男人facial都平常喇!不過講開,我又好耐冇去做facial喇!

    回覆刪除
  5. Coffee,
    其實我都知而家好多男人有做facial,不過自己就硬係接受唔到。而且美容產品咁貴,就算想做都負擔唔起啦!

    回覆刪除