飲樣

前日（星期六）有個親戚娶老婆，夜晚喺深灣遊艇會擺酒。最怕一條友戇居居去飲宴場合，所以就約埋細佬同弟婦一齊喺銅鑼灣搭車入去。點知見到細佬，當堂俾佢嚇親，佢竟然著咗件披。講真而家去飲，個個都著得好casual，我就一向都係牛記笠記上陣，基本上同落街買餸冇乜分別。細佬話嗰度係高級地方，都係著番套西裝穩陣。其實我都有考慮到呢一點，原本諗住著條爛牛仔褲去，後來都係換番條冇穿窿嘅。一向好少著西裝，除咗因為嫌打呔麻煩，更主要係覺得自己著西裝唔係咁適合。

言歸正傳，嗰晚一入到宴會廳，就即刻暗叫一聲：大鑊嘞！主人家啱啱舉行緊雞尾酒會，現場衣香鬢影，女嘅高貴大方，男嘅衣冠楚楚，連嗰班影相嘅都斯文過我。但係都冇辦法，唔通即刻掉頭走咩，唯有頂硬上啦。

仲有一樣更弊嘅係，我從來未見過個新郎。喺婚宴上唔識得對新人，只有細個時跟老豆去飲先會發生架咋，今次真係戇居嘞。其實同個新郎係乜親戚關係，我都唔係好識得。我阿爺同佢阿嫲係兄妹，如果話佢係我表弟，又好似仲要再疏，唔知可唔可以叫做表表弟呢？而家係咁架喇，現實世界中嘅人際關係好疏離，反而喺虛擬嘅網絡世界，人與人嘅接觸就親密得多！

近年嘅婚宴，通常都會將對新人嘅大頭相擺喺當眼位置，方便盲毛賓客進行認人手續。不過前晚就冇呢樣，真係比較難搞。仲有，而家人又唔會好似以前咁，帶住個搶眼嘅新郎襟章。唯有周圍，睇吓有邊個著得最似酒樓部長啦。不過咁都唔係好可靠，因為單憑衣著，其實唔一定分得出邊個係新郎，邊個係伴郎。如果恭喜錯人，就真係瘀到爆啦。好彩最後見到姑婆（即係新郎阿嫲），由佢介紹，先至知道邊個係表表弟。

除咗衣著格格不入，個婚宴嘅氣氛亦令到我覺得好唔自在。通常去飲都會見到嘅，例如麻雀、啤牌、瓜子、大白兔奶糖等等，一樣都見唔到。又見唔到細路滿場飛，事實上，幾乎係一個細路都冇。新郎新娘都係喺外國長大，喺大型跨國財金機構做。賓客當中有好多鬼，就算唔係鬼，都多數係滿口英文嘅青年才俊，相信大部份係對新人嘅同事或者朋友。對於我呢草根階層，咁嘅場合實在太高級嘞，真係唔多習慣。

無可否認，香港以前係重英輕中。無論係鬼，抑或係飲鹹水大嘅人，都俾人覺得高級。本來諗住回歸之後，呢個情況會有改變。就算係駐港嘅跨國公司，都會本地化，甚至國內化。以前間公司有好多鬼，我自然知道鬼有英文方面嘅優勢，但係工作能力其實唔一定比本地人高。但係而家睇嚟，鬼同鹹水人嘅特殊圈子，依然係牢不可破。本地化，可能根本就冇發生過。淨係睇吓家長幾希望仔女可以入到英文中學，就知道好多香港人係乜心態。我唔敢話佢地係崇洋，不過大細超就實係架嘞。

以前去飲，最尾梗有餅仔同橙，而且多數都食唔晒。通常都會有人打包攞走，有時人仲會搜羅埋其他檯嗰。有人對於呢種做法好鄙視，覺得係中國人貪心嘅劣根性。我自己就唔同意呢種睇法嘞。食唔晒都係掉架啦，攞走又有乜問題，其實絕對係珍惜資源嘅做法。前晚嘅婚宴就有類似情況，不過唔係餅仔或者橙，而係玫瑰花。當晚每張檯都有個白玫瑰嘅插花擺設，散席嘅時候，有個鬼婆將玫瑰花打包攞走，而且仲連附近幾張檯嗰都搜刮埋，唔知又有冇人覺得佢貪心呢？我自己當然唔覺得啦，相信嗰鄙視人地打包餅仔同橙嘅人都唔會覺得。事實上，當鬼同人都做同一樣，好多人竟然會有唔同嘅觀感，真係唔知點解嘞！