2011年3月12日星期六

入冊

入冊即係坐監,相信冇人會唔知。不過個中滋味係點,又有幾多人試過呢?自問係一等良民,監當然冇得坐,但係監獄就見識過吓。監獄陰森恐怖,而且仲有一陣怪味,要我坐監就真係人都會癲。呢碗皇家飯我就點都啃唔落架嘞,咁寶貴嘅社會資源應該留番俾以下幾位人士(或動植物),先至不枉我地每年交咁多稅!

膏太(或肥膏)
呢件肥膏成日帶埋個幾歲豆釘去示威(或搞事),我就覺得已經有虐兒成份嘞。嗰兵荒馬亂嘅環境,正常嘅八歲細路有乜可能會唔驚?而且個婆娘淨係顧住自己玩,竟然揼低個仔唔理。仲有,個仔中咗椒又唔肯第一時間幫佢治理,係都要等埋記者嚟影相。咁嘅行為,毫無疑問係疏忽照顧兒童啦,點解警察仲唔做架!

癲狗+長毛+大舊
呢三條友最鍾意掟,擾亂議事廳秩序,真係勁乞人憎。不過佢地又算好眼界,鑊鑊都爭少少掟唔中。鬼唔望鑊班友發雞盲,掟中高官,仲要係爆肛見紅嗰隻,到時就可以告佢地嚴重傷害他人身體啦。等班友試吓入冊通櫃桶嘅滋味,咁就真係大快人心嘞。獄警最緊要加多兩錢肉緊,通大力呀!

哨牙蔥
雖然條友單爭鏟官司同公眾利益冇乜關係,不過我最憎嘅就係佢。講起嚟有唔係好理性,憎佢嘅幾個原因都唔構成刑事罪行,不過就真係好想條友坐監。等我又數吓佢嘅三宗罪先。

貪心!條友刮咗小鹹鹹廿億都唔知足,仲想吞埋人地成副身家,真係大貪到離晒譜。如果安安份份,廿億都唔知夠佢食幾多世啦。話時話,廿億究竟有幾多個零我都唔係太清楚喎,不過我就知冥通銀行嘅銀紙都有好多個零,而且仲啱晒貪心鬼添。

無恥!其實貪心又唔係罪,不過條友就死都唔肯認爭鏟係為咗錢,仲要講到同小鹹鹹有真感情。而家當官白痴嘅咩,抵佢俾人狠批唔誠實。咁都算嘞,條友竟然核突到將小鹹鹹條姨媽底褲擺上檯,後來仲連老公豬錄影帶都出埋。人之中佢都算極品喇,講到無恥,直頭連嗰班民鼠政棍都唔係佢嗰皮。

妒忌!呢個至係我咁憎條友嘅主因。老實講,我真係好妒忌佢。條友要樣冇樣,要身材冇身材,要學識冇學識,佢究竟憑乜能耐可以收小鹹鹹廿億肉金?呢隻醜老鴨根本就一無是處,直頭映衰晒香港嘅鴨界。如果佢都值廿億,咁我咪起碼值一百億?點解結識到小鹹鹹嘅唔係我,而要係呢隻醜老鴨,我憎死佢呀!

不過咁,我而家條氣順番好多喇。早排睇壹仔,話佢已經窮途末路,而家只係苟延殘喘。條友揮霍無度,嗰廿億肉金已經所餘無幾。而且單官司對佢好不利,睇怕條友都要洗定個忽忽等入冊喇!





8 則留言:

  1. kakaka. Arma 你好鬼抵死呀!膏太同嗰三隻癲喪狂都唔駛點講喇,前者冇 heart, 後者喪 heart, 都係人中之賤。

    至於哨牙蔥,佢值廿億,你起碼值二千億喇!嗰條神棍根本唔入流。

    仲有,我越睇你越面熟,你係咪識 81 年畢業聯合地理嘅 YCM ,係嘅話我地分分鐘見過噃!

    回覆刪除
  2. 我原本要求自己盡量唔再係網誌或留言度「哈哈哈...」,留番些少淑女形象,但呢篇真係太好笑喇!我忍唔住要︰
    哈哈...哈哈哈...寫阿聰聰真係笑死人,佢值廿億,令全部男人如夢初醒!仲想寫多幾句回應嘅,但要趕住出去喇!
    哈哈...埋呢次咯:P

    回覆刪除
  3. 哈哈!小鹹鹹,個名係貼切過小甜甜。至於大鹹鹹,真係貪勝不知輸。

    回覆刪除
  4. laulong,
    哈哈,我有時都覺得自己好抵死吓架!至於個地理佬,我同佢好熟架。咦,你好似話以前做過廣告喎,會唔會我地係舊同事呢?

    Coffee,
    其實喺現實生活中已經要時時保持形象,真係好攰吓架,喺網上就算放鬆都冇所謂啦!

    佛爺:
    人死為大,小鹹鹹就唔批評咁多嘞。至於個大鹹鹹,貪又去到極點,賤又去到極點,如果唔使入冊就真係天冇眼喇!

    回覆刪除
  5. Arma:

    我記得地理佬有次帶咗個同學黎一齊參加某活動(但已忘記是乜活動),嗰個該是你了。

    至於廣告,89至90 我喺 O&M Direct 做過,你會係 Account Servicing 那邊?諗諗下啲印象又好似番緊黎噃!

    回覆刪除
  6. laulong,
    記得嗰時地理佬話佢有個老死都係喺OM做,原來就係你!我地喺公司肯定見過,不過個樣就真係唔記得喇。我係做IT嘅,通常都唔會親自服侍users,所以應該唔會見過好多次。至於某活動,真係一印象都冇嘞。

    回覆刪除
  7. laulong,
    呵呵,網上遇故知,一大快事也!

    回覆刪除