2011年1月19日星期三

饑寒交迫後記

明月出天山,蒼茫雲海間。
長風幾萬里,吹度玉門關。
漢下白登道,胡窺青海灣。
由來征戰地,不見有人還。
戍客望邊邑,思歸多苦顏。
高樓當此夜,歎息未應閑。

李白嘅關山月,頭兩句寫景真係正,最後兩句寫情又係一流!唐詩之中,我最鍾意邊塞詩,覺得好有氣勢。讀緊U嘅時候已經好想去新疆玩,唔多唔少係受到邊塞詩嘅影響。當然,最主要都係因為新疆夠特別。喺中國省份之中,我相信新疆都算係最唔似中國地方嘅一個,由山川景物到風土人情都特別,連人都唔係中國樣。嗰陣根本冇條件去外國旅行,但係又想見識吓異國風情,新疆自然係最佳選擇。

特別提到關山月,係因為明月出天山呢句勾起我好多回憶。記得嗰時初到天山,就喺天池買咗件短袖T-shirt,上面就係印住呢句詩。我就係著住呢件薄如蟬翼嘅短袖T-shirt,勇闖博格達峰雪線。喺唔夠衫、冇帶水、冇帶食物嘅情況下,上接近4000米嘅雪線,都咪話唔勇。經驗話俾我地知,越係勇嘅人就越會英年早逝。當然啦,我今日仲可以喺度寫blog,即係話我冇早逝到。不過搞到好狼狽就少不免喇,早幾日先寫過嗰次雪線行折墮。睇番laulong兄喺嗰篇blog嘅回應,先知道原來大家都係喺同一年上博格達峰雪線,又係同樣喺一個哈薩克包過咗一晚。不過我相信大家係喺唔同日子上雪線,應該冇撞過。以laulong兄咁儀表出眾,如果喺新疆見過,實會有印象。

所謂久罕逢甘雨,他鄉遇故知,喺旅途中撞到熟人當然係一大樂事。不過喺嗰個年代,自由行返大陸玩嘅香港人根本就唔係咁多,莫講話熟人,就係連撞到香港人都唔容易。尤其是孤身獨行,有時真係會幾寂寞吓,所以見到香港人會好開心,就算遇到同聲同氣嘅人(例如廣東人),都會覺得好親切。

而家世界唔同喇,人經濟條件改善咗,隨時一年去幾次旅行。莫講話返大陸,就算去到山卡啦都會撞到香港人,不過就冇咗以前嗰種親切感。近年又有唔同嘞,就係外遊時遇到好多大陸人,數目仲一年多過一年。親切感當然唔會有,反而仲會覺得有煩厭添。去得外國旅行嘅大陸人,當然係有錢啦,不過有錢都唔使話晒俾全世界知啫。有大陸遊客嗰種財大氣粗、頤指氣使、旁若無人嘅態度,真係令人好反感。你當我自卑又好,妒忌又好,我就係覺得唔順超!不過咁都未算最難頂,最討厭係去到景點就當自己包起晒成個場咁,阻住其他遊客影相。真係唔明白點解人可以喺同一個位置影十幾張相,笑又影一張,唔笑又影一張,換個姿勢又影一張,戴番副黑超又再影多張。如果係快槍手都冇乜所謂,最弊係明明擺好姿勢,揸定相機,都要等成兩三分鐘先肯㩒制。我唔係話要干涉人地影相嘅自由,但係見到有人等緊就識做、快手啦。

真係唔明,以前返大陸玩,接觸過嘅人絕對唔係咁架,嗰純樸親切嘅老鄉究竟去晒邊呢?



8 則留言:

  1. 你好俊呀,Arma! 你個樣真係好熟,係咪喺大學碰見過呢?

    八十年代番大陸係黃金時候,嘢平、治安好、民風純樸。今時今日就真係爭好遠咯!

    呵呵,大家都係 82 同途人,份外親切, cheer !!

    回覆刪除
  2. laulong,
    哈哈,取笑喇!校長你至係豐神俊朗、玉樹臨風、潘安再世、宋玉重生、一表人才、儀表出眾!大家係同期中大人,當然可能撞過。不過我多數喺科學館出沒,而且又係走讀生,撞到嘅機會其實唔係咁大。諗番以前返大陸真係好好玩,人又純樸,治安又好,同而家爭好遠!

    回覆刪除
  3. 哇,我想揾個窿捐入去咯,我冇德冇才冇样冇貌呀!

    回覆刪除
  4. 你尾二果段講近年旅行所見,好認同!甚麼人都識同你講幾句普通話。
    近年我開始不大喜歡去旅行了,特別係趕鴨式五、六日團。

    回覆刪除
  5. 那些大陸暴發戶,行為真教人氣憤的。

    回覆刪除
  6. laulong,
    哈哈,仲有好多架:英俊瀟灑、英明神武、英姿颯爽、英風凜凜、英氣迫人、器宇軒昂、器度不凡、風流倜儻、風度翩翩、豪氣干雲、豪邁不羈、溫文爾雅、文質彬彬、龍精虎猛、虎背熊腰、虎虎生威、威風八面、神威凜凜、高大威猛、健碩偉岸。。。。

    coffee,
    係呀,以前去旅行,賣紀念品嘅小販見親亞洲人都會講konichiwa,呢幾年就唔同嘞,大部份都轉咗講nihao。哈哈,去旅行我就覺得兩個禮拜最適合,五六日真係唔夠喉!

    佛爺:
    係呀,呢幾年有條件外遊嘅大陸人真係好大架子!試過有一次跟團去旅行,同團有兩個疑似高幹嘅大陸人,都不知幾巴閉。去到佢地覺得冇興趣嘅景點,竟然可以叫領隊即刻拉大隊走,要成團人就晒佢地!佢地仲要係用命令式嘅口吻添,真係佩服到五體投地!

    回覆刪除
  7. kakaka, 我匿晒入地底喇,剩番隻脚趾公喺地面 XD

    回覆刪除
  8. laulong,
    哈哈,真係連腳趾公都有型過人呀!

    回覆刪除