2011年1月14日星期五

饑寒交迫

救命呀,好凍呀!呢幾日直頭凍到想長眠不起!我唔係話想死,不過咁凍嘅天氣,匿埋喺被竇實在係太舒服喇。

唔知點解,年紀越大就越怕凍。曾經試過有一年,全年都係沖凍水涼,完全頂得住。嗰年冬天都唔算特別暖,都試過十度以下架。嗰陣二十出頭,瘦到成隻蜢咁,一可以禦寒嘅脂肪都冇。而家脂肪多咗,反而會怕凍,真係好奇怪。

講開又講,近年唔止體能差咗,仲開始有耆英風範添,就係鍾意想當年嘞。話說當年大學啱啱畢業,就一條友孭住背囊返大陸玩。其實講得正確,係啱啱考完試,畢唔畢到業都仲未知。出發前當然有做過資料蒐集,大概行程路線亦一早設計好。原本只係諗住玩個幾月,結果返到屋企已經係五個月之後嘅事,基本上係玩到身無分文先捨得躝返屋企。一個人嘅自由行真係好正,鍾意去邊就去邊,臨時改變行程完全冇問題。覺得一個地方正就攤長玩多幾日,唔需要趕喉趕命。天氣唔好或者心情唔好又可以匿埋喺旅館玩閉關,呢種隨遇而安嘅玩法真係啱晒我性格。當然啦,嗰時住嘅旅館好平,床位只係一個幾毫,如果唔係點可以咁樣豪玩。出咗嚟做之後就冇呢支歌仔唱喇,去旅行多數係跟鴨仔團,就算係自由行亦有時間上同金錢上嘅限制,玩都玩得唔盡情。

隨心而行雖然過癮,但係就難免會有甩漏。好似嗰次畢業旅行咁,就試過淪落到饑寒交迫嘅田地。話時話,細個時屋企雖然好窮,都未使咁淒涼。

話說八月中去到烏魯木齊,當時已經喺大陸玩咗超過兩個月。天池梗係要去睇吓啦,中國嘅瑞士風光喎。講開又講,我到今時今日都仲未去過瑞士,真失敗!原本諗住天池一日遊,所以買咗即日來回嘅車飛。估唔到新疆原來係咁細嘅,竟然喺天池撞到熟人,係六個HKU學生。其實話熟都唔算好熟,只不過識咗兩三日,之前喺吐魯番識嘅,仲同佢地夾份包車玩咗一日,跟住就分道揚鑣嘞。不過咁,能夠喺天池撞到都算有緣啦。佢地話打算第二日上博格達峰雪線,仲嘍埋我添。上雪線真係冇諗過,不過聽落就好吸引。但係我當時只係得件薄如蟬翼嘅短袖T-shirt同埋條喺雲南買嘅的確涼軍褲,莫講話上雪線,淨係喺天池過一晚夜都唔掂啦。所謂天無絕人之路,原來天池同峨嵋金頂一樣,都係有衫租架。不過好搞,佢地淨係得羽絨背心,著咗之後對手臂都仲係涼浸浸,叫做好過冇咁啦。

第二朝食完早餐就開始上山,響導係一個十六歲嘅哈薩克少年。佢連普通話都唔係好識講,要行幾耐我地又唔知,唯有一直跟住佢尾。嗰日天氣唔係幾好,朝早已經天陰陰,後來仲落住毛毛雨,其實都幾凍吓。行咗幾粒鐘,開始覺得有肚餓嘞,弊就弊在完全冇人諗過要準備食物。再行咗好耐,越上越高,莫講話人煙絕跡,真係連草都唔多條。就喺呢個時候,竟然出現咗一個哈薩克包。原來係當地人為咗賺外快,起嚟俾遊客休息嘅地方。等我地仲鬼咁開心,以為有食,點知嗰度淨係供應熱奶茶。同蒙古奶茶一樣,哈薩克奶茶都係落鹽嘅,真係勁難飲。都係嗰句,好過冇啦,鬼叫自己冇帶水咩。嗰時先知道,原來香港嘅絲襪奶茶真係天下之美味。好在響導仔仔都算有良心,請我地食佢嘅私伙酸乳酪。Yogurt都OK啦,最好就有士多啤梨味嗰隻。真係發夢冇咁早,哈薩克乳酪係固體架,一舊舊好係石仔咁,而且只係得原味,即係酸味。乳酪仲硬過石頭,咬到牙都崩,而且酸到盲公都開眼,真係越食越肚餓。又係嗰句,好過冇啦。

休息咗一陣又繼續起行,有兩個女仔頂唔順,自願做留守兒童。其實遠遠已經見到個雪山,不過就硬係行極都唔到。結果行到七點幾,終於到達雪線,原來已經行咗接近十二粒鐘。因為夏天冇新雪,雪線以上都係石頭咁硬嘅冰,等我仲諗住可以砌吓雪人添。點知話口未完,真係開始落雪。八月飛霜,會唔會係有乜冤情呢?點都好啦,停低咗就開始覺得凍,仲越嚟越凍。總之此地不宜久留,速逃為上。

一路落山,天氣就越嚟越差,直頭係風雪交加。嗰時先知道,原來羽絨背心加短袖T-shirt真係一個好白痴嘅配搭。風由袖口吹入去,個人就由心度震出嚟。唔止天氣唔好,地面情況一樣係咁差。石頭
又濕又滑,以我咁豐富嘅行山經驗,都要仆咗鑊甘嘅。一路跑住咁落山,都要成九點幾先返到個哈薩克包。新疆夏天成十點幾先天黑,不過以嗰日咁差嘅天氣,九點幾已經睇唔到路咁滯,真係行慢都死得。入到包裏面,原來個個都瞓晒,除咗兩個留守兒童,仲有幾個哈薩克人。我就喺包度等其他人返嚟,點知越等越肚餓,之前行緊唔多覺,一停低就嚟料嘞。好在包裏面點咗堆火,都唔算太凍。結果等到十二點幾,所有人先返齊嚟。有個女仔最慘,連鼻都仆到腫咗。齊人當然就瞓覺啦,不過嗰度枕頭被舖一概欠奉,仲要十幾人迫喺裏面,瞓得著先奇。最慘係去到半夜,連個火都熄埋,真係凍到人都僵。又餓又凍,結果成晚冇瞓,眼光光等天光。咁大個仔第一次感受到饑寒交迫嘅滋味,原來真係好難頂架!

後來同朋友傾開,佢話佢都上過博格達峰雪線,不過係騎馬上嘅,都不知幾過癮。吓,原來有咁筍嘅玩法,點解我地唔知架,真失敗!

不過咁,嗰次雪線之旅都有收穫嘅,就係摘咗幾個傳說中嘅武林至寶,有起死回生之功嘅天山雪蓮,基本上係途中見到嘅都俾我摘晒。我仲珍而重之咁帶咗返嚟,一直供奉喺我個飾物櫃度。聽講話而家天山雪蓮已經俾人摘到接近絕跡,今次仲唔奇貨可居?哈哈,罪過罪過!


8 則留言:

  1. 呀~相中個火柴瘦人一定係你啦!呢啲咁珍貴的回憶,唔係人人有架!都不知幾羨慕!
    原來天山雪蓮係咁架:P

    回覆刪除
  2. Coffee,
    係呀,以前食極都唔肥,真係羨慕死好多人架!

    回覆刪除
  3. 嘩!講得好精采,真係好似身歷其境咁!

    為何奶茶要落鹽?一定是有因由的。

    另外,我很喜歡看馬傑偉的文章,他又是什麼樣的?

    回覆刪除
  4. 我好似你以前咁瘦,又喺食極唔肥㗎。

    回覆刪除
  5. Arma:

    你边年去新疆呀?我 82 年,也有去天池上博峯,又有住哈薩克包,唔知係咪同一個?天山雪蓮我摘唔到,但導遊摘咗個比我,我帶到去洛陽就丟咗 lu.

    回覆刪除
  6. 佛爺:
    哈哈,可能係哈薩克人比較鹹啦!馬傑偉我就唔識嘞,不過有可能喺CU撞過,因為都算同期。佢個樣咁普通,就算見過都唔會有印象啦。

    eric,
    我以前真係懷疑過自己係咪生蟲架。不過冇所謂啦,以我嘅食量,肯定會營養過剩,有蟲蟲分擔吓都好嘅。

    laulong,
    哈哈,我又係82喎!上到過咗半山,根本就見唔到其它哈薩克包,應該係同一個嘞。至於天山雪蓮,掉咗就有可惜喇,聽講話而家好值錢架!

    回覆刪除
  7. 一個人真係好自由自在!

    你未去過瑞士,唔算失敗,我因為做嘢去過,但短短幾日,有三日半係被困咗喺一個在市郊的酒店,full day workshops,前後一日係交通時間,半日喺 office,之後就被送往倫敦,前後只有一個下午在 Zurich 叫做散吓步,就係咁多,你話係咪更失敗?

    回覆刪除
  8. SKII,
    旅行嘅,時間上同金錢上都有限制,梗係想去未去過嘅地方。如果去到一個地方,但係冇機會睇清楚,真係會覺得好可惜。再去過又唔係,唔再去又心思思。

    回覆刪除