是碧波蕩漾的湖面，還是繁星點點的夜空？是溫馨的碧湖泛舟，還是浪漫的星空漫遊？但這些還重要嗎？此刻，一葉輕舟已是他倆的全世界！
碧湖暢泳，真係睇到都覺得爽！不過都只係得個睇字，因為我唔識游水。
唔係話冇學過，但係點都學唔識。咁又係落水即死，我仲識浮嘅，不過只限於風平浪靜嘅海面。如果係淡水就差喇，因為我脂肪含量比較低，浮力唔夠。我主要問題係手腳協調唔到，游極都原地不動。而且我唔識呼吸，大浪就實會飲水。
雖然唔識游水，但係我都唔算怕水。去親旅行，如果有機會嘅話，我都會玩水。有救生衣我就乜都敢玩，如果冇就喺淺水玩，只要唔過人頭就得。激流、浮潛、水上電單車、揸快艇都試過，全部都超級好玩。如果我識游水，肯定會玩埋潛水添。
唔識游水真係少咗好多樂趣，起碼玩浮潛嘅時候，見到魚都唔敢潛落去追。試過有一次喺海邊玩，邊度就唔記得嘞，浮吓浮吓就浮咗出深水嘅地方，對腳掂唔到地就嚇到騰晒雞，飲咗幾啖水。好彩當時風平浪靜，撥吓撥吓又去返淺水，唔係今日都冇機會喺度寫blog喇！
大冷天時講碧波盪漾，你真係識得苦中作樂哦！
回覆刪除佛爺：
回覆刪除哈哈，學吓你都好喎，不如下次試吓寫Big波盪漾，一於房中作樂！不過自問喺呢方面絕對未夠班，要向你多多學習，睇怕要十年八載先寫得出！
我識游水，但有次著好晒救生衣玩浮潛，但落水前一刻都係縮沙了！
回覆刪除coffee,
回覆刪除冇理由喎，你識游水，又有救生衣，應該冇好驚架啦！哈哈，我諗到喇，驚鯊魚！上次喺大堡礁玩浮潛，我都驚會有鯊魚。如果真係有鯊魚出現，而我又游得咁慢，肯定實食冇黐牙！
噢，一葉輕舟已是他倆的全世界....
回覆刪除好正呀，Arma !
兩幅相都好特別呀。
回覆刪除我從小已學游水，但學極都唔識，放棄咗喇！
laulong,
回覆刪除呵呵，亂寫一通，見笑喇！
SKII,
係呀，我諗學游水都要講天份架！我成日擒高擒低，身手不知幾敏捷，不過游水就學極都學唔識！