2011年1月8日星期六

秘製花雕鍋

自問係一隻邊爐怪,雖然未至於無爐不歡,不過一個禮拜打足七日就完全唔係問題。喺香港,打邊爐根本唔使擇日,一年四季都打得。但係我就好少自己喺屋企打,因為洗洗切切實在太麻煩,辛苦過煮餐飯好多。所以一年只會整幾次,通常都係揀最凍嗰幾日。呢幾日凍到甩肺,喺屋企烚吓烚吓就最過癮嘞。

喺屋企打邊爐,鍋底都可以有好多花款,好似蘿蔔魚湯、番茄牛肋骨湯、大豆芽豬骨湯、椰汁紅咖哩、冬蔭功湯底等等。不過講到自己最拿手,同埋最鍾意嘅,就一定係花雕鍋底嘞。呢個湯底一都唔難整,而且好好味,配海產(尤其是貝類)真係一流。所謂獨食唔肥,就等我同大家分享吓呢個花雕鍋嘅獨門秘方啦。

首先,準備以下材料:
薑 - 切片
乾蔥 - 切片
蒜頭 - 切片
火腿 - 金華火腿或雲腿,切片
淮山
杞子
圓肉
當歸
花雕 - 起碼一碗
雞湯 - 當然可以自己買隻雞煲湯,不過我比較懶,會用現成,以前用開屎雲生,呢排轉咗用膿湯寶,貪佢儲存方便

而家可以開始嘞,先燒熱少少油,爆香薑、乾蔥、蒜頭、同埋火腿。跟住倒花雕落去,滾起之後落埋雞湯同其他配料就得嘞,係咪好易整呢?

搞掂咗個湯底,跟住就要準備另外一樣好緊要嘅,就係豉油嘞。求其倒生抽落隻豉油碟度就絕對係功虧一簣,要用埋我嘅秘製蒜茸辣椒豉油先算完美。話就話係秘製,其實都好易整架。首先將魚露溝蒸魚豉油,比例悉隨尊便,睇吓你想甜定鹹。另外用隻碗仔裝住蒜茸、蔥茸、同埋指天椒碎,淋滾油落去,撈埋魚露豉油就大功告成嘞。

個湯底我唔會打一次就倒,通常會用多一次。再用嘅時候,只要加水同埋花雕就得,如果唔夠味就可以落多粒膿湯寶同幾塊當歸。用過一次嘅鍋底會有一層泡,唔係咁好睇,自己喺屋企打就冇所謂啦。不過個湯底最多只可以用兩次,因為打完兩次之後,味道會變得好複雜,失去咗原來嘅個性!

7 則留言:

  1. 凍到咁耐才貼一篇文!

    飲食文化在你家廚房完全得到發揚光大!

    回覆刪除
  2. Coffee,
    呢排真係凍到甩肺,結果冷病咗。我又唔肯戒口,打咗幾日邊爐,而家咳到死死吓,好慘呀!

    回覆刪除
  3. 嘩!你應該整個飲食博客,一定客似雲來!

    回覆刪除
  4. Arma 果然係食神,厲害厲害!

    回覆刪除
  5. 咳呢樣嘢,基本上難有藥物斷尾,一定要戒口!
    保重!

    回覆刪除
  6. Coffee,
    哈哈,咳呢家我最有經驗!唔使理佢架,過得一個月就會自己好架喇!

    回覆刪除
  7. 佛爺:
    講飲講食,偶一為之就可以。如果要寫個飲食blog,自問真係未夠料!

    laulong,
    哈哈,食神真係唔敢當!睇吓電視節目食神,個個肥到豬咁,怕怕!

    回覆刪除