2011年3月27日星期日

加價熱潮

你怕!我怕!個個怕!
煙加!酒加!屋租加!
巴士加!的士加!多士芝士乜都加!
加!加!加!加!加!

知唔知上面嗰堆係乜?如果你知就大鑊喇,因為你已經係一個老餅!阿Sam嘅「加價熱潮」係收錄喺佢嘅「79夏日之歌集」專輯裏面,有成廿幾年歷史架喇!不過咁,就算而家聽番都唔會覺得out,仲應晒景添。

家陣人人都話通漲猛於虎,但係又有邊個比我呢煮飯男更清楚個中嘅苦況呢。話就話每年通帳只係幾個巴仙,不過以PK超市為例,我成日買嘅就起碼比舊年同期貴咗超過一成。其實PK超市都唔算太PK架喇,街市嘅價錢先加到嚇死人。以一袋三個蒜頭為例,舊年呢個時候仲係賣緊三蚊,而家就要賣到六蚊,足足貴咗一倍。當然啦,我唔會蒜頭當飯食,實際影響都唔算好大,魚蝦蟹海產先係真正重災區。早排連赤米(一種蝦仔)都賣到一百蚊斤,真係唔知乜世道。白蟹同大花竹就喺兩三年內貴咗一倍有多,而家已經好少買喇。事實上,有直頭貴到負擔唔起,好似龍蝦咁,最近就賣到成四百蚊斤,你話點會買得落手?冇辦法啦,唯有轉食十蚊三隻嘅重金屬帶子,係咪有損健康都唔考慮得咁多架喇,鬼叫我鍾意食海產咩!

聽魚佬講,海產係俾大陸佬搶到貴晒,佢地有錢又捨得食,香港人根本就冇招架之力。衣食住行都係基本生活需要,而家食者冇其魚,政府係咪應該企出嚟做呢?首先,政府可以立法禁止香港漁民將漁穫賣俾大陸佬,違例者一律判監十年。又或者向呢類交易徵收百分之三百懲罰性稅項,用有關收入成立一個海產價格穩定基金。作為短期紓困措施,政府應該即刻向有需要嘅市民發放每月六百蚊嘅海鮮津貼。如果庫房有盈餘,仲可以向全港市民派發一次過六千蚊嘅海鮮消費卷,咁就皆大歡喜嘞。

要做到食者有其魚,眼光當然要放遠,確保漁產供應穩定至為重要。為咗打無良擊魚販借供求關係吊高嚟賣,政府有必要介入。方法係擴充漁農署嘅編制,成立屬於政府嘅捕魚隊。漁穫可以參考市場水平,以半價賣俾有需要嘅市民。為咗防止有人轉售圖利,呢種行為應該列為刑事罪行。

最算做晒以上動作,都未必一定可以保證每一個香港市民都可以食到心儀嘅海鮮。長遠嚟講,政府應該俾決心,訂立海鮮最高售價,任何人以高於呢個價錢售賣海產即屬違法。至於海鮮最高售價嘅制訂,應該參考最低工資同綜援水平,確保香港最窮嘅一群都同樣享有食海鮮嘅權利。有人可能會有咁嘅疑問,到時會唔會因為無利可圖,令到冇人肯去捉魚同賣漁呢?其實呢個根本唔係問題,而係最理想嘅情況。到時由捉魚到賣魚都係政府一手包辦,售價完全唔受市場影響,可以因應經濟環境作出適當調整。例如通漲高企嘅時候,政府可以減價,甚至將海鮮免費派俾市民,自然人人受惠啦。同時政府又可以展示到對民生問題嘅承擔,民望肯定即刻升到爆晒燈,咁仲唔係一個雙贏局面?!

咪以為咁已經好理想,比理想更理想都仲有,就係將呢種模式推展到所有民生範疇。政府應該用立法手段控制一切民生項目嘅價格,如果做唔住或者冇人願意做嘅就由政府接手。而且政府仲要趁機吸納晒所有N失嘅老中青年,到時人人有做,又唔使俾無良僱主剝削。咁就人人都可以安居樂業,活得有尊嚴啦!

有人可能會問,政府究竟有冇足夠資源做咁多呢?呢個問題根本就係無中生有,冇咗奸商從中剝削,社會上嘅資源梗係用之不盡啦!提出呢個問題嘅人分明就係想轉移視線,為官商勾結護航!呢人直頭係奴才、共狗、五毛黨!

哈哈,原來將思維年輕化真係好過癮架,乜困難都可以迎刃而解,直頭正過索K揩天隊草呀!奉勸所有聽過「加價熱潮」嘅老餅,你地都要學吓我喇!




6 則留言:

  1. Arma, 哩排有一兩間酒家推出特價龍蝦,平過自己煮好多,趁勢去過飽先喇!

    平準均输,哩班廢官全部唔讀中史,唔會識架喇!佢地依家等落庒,哇,仲有十幾個月,即係 hea 住黎乾,真係令人憤怒髮指呀!

    回覆刪除
  2. laulong,
    係囉,都唔知點解會麵包貴過麵粉,屋企附近就有個燒臘檔,買十蚊叉燒仲大舊過喺街市買十蚊瘦肉。而家政府弱勢已成,就算下屆換乜人上場都只會係一個悶局!真係希望雙普選快嚟,到時就有睇嘞!

    回覆刪除
  3. 魚都係政府一手包辦,售價完全唔受市場影響

    哈哈!到那個時候,成個海D魚、蝦、蟹都中哂福島D核幅射啦!


    而且政府仲要趁機吸納晒所有N失嘅老中青年,到時人人有做,又唔使俾無良僱主剝削。咁就人人都可以安居樂業,活得有尊嚴啦!

    哈哈!到那個時候,全世界四佰幾個核反應堆,都一齊爆炸佐喇!個個都去佐西方極樂世界囉!世界大同喇!人人平等囉!

    回覆刪除
  4. 提起許冠杰真係有些巧合,昨晚見校長貼阿sam,我已覺得巧合架啦,因為R昨日買了本許冠杰金曲鋼琴譜,我睇緊校長篇文時,佢正在彈「鐵塔凌雲」!!昨晚在校長處留言時,已很想講了。

    至於海產,我雖然都鍾意食,但唔食又得,食我好簡單。不過從麥當勞密密手加價,就知咩都應該加了!

    回覆刪除
  5. (舉手)我未聽過呢首歌,證明我係百分百90後.(之後應該會被人打/掟番茄……)

    回覆刪除
  6. 佛爺:
    哈哈,就算到時一鑊熟都唔使驚,總之政府要負責生養死葬,真係死都死得有尊嚴呀!

    Coffee,
    講起阿Sam,以前真係好鍾意聽佢歌同睇佢戲架!不過佢早排出番嚟開演場會就嚇死人嘞,著到成個豹小子咁,直頭係晚節不保囉!

    婉兒:
    唔緊要喎,我呢度係冇年齡歧視架!不過你可以喺youtube摷嚟聽吓,首歌都幾過癮架!

    回覆刪除