2011年3月19日星期六

食鹽多過食米

「相信有常識嘅人都唔會做呢樣!」

究竟「呢樣」係乜呢?又係邊個咁大言不慚,話做「呢樣」嘅人冇常識呢?

周一鑊局長就係咁樣公開回應早兩日出現嘅搶鹽潮。如果唔係親眼喺電視新聞睇到,絕對唔敢相信有政府高官會用呢種態度對全港市民講。無可否認,周局長真係好有拮屎。試問喺芸芸高官政客之中,又有邊個可以做到「我口講我心」呢?當然啦,我對周局長嘅健康常識絕對唔懷疑,不過佢嘅政治常識就似乎貧乏咗喇。

喺民主社會,公眾至係真正老闆;而喺民粹社會,公眾就係俺尖聲悶嘅顧客。無論係老闆抑或顧客,都有一個共通點,就係「永遠是對的」。而家周局長竟然公開批評佢嘅老闆或顧客,唔怪得政府嘅民望會咁低啦!

至於我地呢小市民,講反而自由好多,唔使好似高官咁注意修辭技巧。就算有人覺得唔啱聽,最多都係話吓我抽水,對我真係一影響都冇。

講番早兩日嘅搶鹽潮,睇見人十斤廿斤咁買,好肯定食鹽多過我食米,佢地嘅傳統民間智慧當然唔可以忽視。會唔會食多鹽真係可以預防輻射感染呢,我就唔敢評論嘞。你地知啦,傳統民間智慧嘅,有時連現代科學都解析唔到架。好似西醫冇熱氣呢樣,不過都唔知幾多醫生有飲涼茶嘅習慣。周局長話人冇常識,對於民間智慧爆棚嘅普羅市民嚟講,點會唔覺得係一種侮辱?

不過咁,就算食鹽真係可以預防輻射感染,大量進食都會帶嚟其他健康問題,例如腎衰竭。長期超量攝取亦會危害心血管健康。世衛話每人每日唔應該攝取超過6克鹽,咁計法,十斤鹽足足夠一個人食成三年咁滯。事實上大多數人都唔會喺屋企食晒三餐,而且調味亦唔會淨係用鹽咁單調,梗會配合埋其他含鹽嘅醬料。計埋呢因數,十斤鹽隨時夠一個人食足十年。雖然話鹽唔會變壞,但係如果儲存不當,鹽擺得耐就會硬化,甚至變成岩鹽。到時就要好似高級西餐廳咁,刨鹽出嚟用。咁都算嘞,最唔理解嘅係炒到貴成十倍都照搶。仲要一邊搶,一邊鬧奸商坐地起價。大家都知道,貨品價格係由供求關係決定,有人肯出到十蚊買,人地冇理由照舊賣番一蚊啫。睇嚟人雖然有傳統民間智慧,但係生活智慧就欠奉嘞。當然啦,我咁講絕對冇問題,但係政府就一定唔講得。

政府叫人唔好輕信謠言,咁就大錯特錯啦。係人都知謠言止於智者,香港嘅民智一早已經成熟到可以一人一票普選特首,又點會有人誤信謠言呢?政府咁講法,只會令市民覺得政府有心抹黑佢地,唔嬲就有鬼啦。睇嚟政府真係冇乜人才,就等我教佢地一條緩兵之計啦。政府應該呼籲人冷靜,仲要大派定心丸,話必要時會開倉派鹽,每人派6斤,鹽價肯定即刻跌番落正常水平。

事實上,我頭先去PK超市買,就見到餐桌鹽嘅供應都不知幾充足,而且仲係賣緊個三一包,完全冇加過價。唔知嗰個「向地產商說不」嘅光頭仔有冇少少領悟呢,嗰趁火打劫嘅奸商,正正就係佢最信任嘅街坊鋪頭仔!

後記:
琴日(三月二十號)睇報紙,話內地繼搶鹽潮之後,又爆發退鹽潮,有人仲因為退唔到貨而向物價局投訴添。哈哈,我又睇吓香港會唔會發生咁嘅先!




8 則留言:

  1. 我果日收工前,有個朋友講而家一窩蜂去搶鹽喎!我於是記起家中鹽用完了,回家前去惠康諗住買包鹽,點知真係賣晒。
    PS︰啲相好靚!

    回覆刪除
  2. haha, 殺光頭仔嗰句最應!

    第一第二張照片是鹽湖嗎?

    回覆刪除
  3. Coffee,
    哈哈,我就可以講得話係隔岸觀火嘞,因為我幾年前已經轉咗用雞粉煮餸,淨係煲湯先會落鹽,一包一磅裝嘅鹽可以用成一年有多!

    laulong,
    講真喎,我又真係成日都掛住個光頭仔,一有機會就會講吓佢!至於嗰兩張相,都係鹽湖嚟架。其實只要將個mouse pointer定喺張相上面,就會睇到簡單嘅description架喇!

    回覆刪除
  4. 好野,點樣將張相加個描述上去架?

    回覆刪除
  5. 佛爺:
    加描述要喺「修改 Html」嗰度做,要喺張相嘅"img" element加個"Title" attribute ,參考吓下面個例子就明架喇。
    <img style="cursor:pointer; cursor:hand;width: 320px; height: 214px;" src="http://3.bp.blogspot.com/-nyHukPEhTNE/TYKwroNgmcI/AAAAAAAAAfw/fObXnG9RgOQ/s320/Au10-T09-82.jpg" border="0" alt=""id="BLOGGER_PHOTO_ID_5585220751467780546" Title="Uluru, Australia"/>

    回覆刪除
  6. 謝謝你!html對我來說形同外星文,出了我理解範疇!陰公!

    回覆刪除
  7. 佛爺:
    唔使客氣!我都覺得Blogger嘅user interface唔係太好,喺Sina嗰邊,upload相嘅時候有地方俾人打description,唔使喺html搞。

    回覆刪除