2011年3月11日星期五

蝗蟲天下

今日想同大家介紹一條近期喺youtube大熱嘅MV,叫做「蝗蟲天下」。條MV據聞係高登仔製作,首歌取材自陳奕迅嘅「富士山下」,而歌詞就俾人填過,用嚟唱衰中國大陸。

大家都知高登仔係乜人,本來我都唔敢得罪佢地,但係歌詞實在太過分嘞,真係忍唔住要講番幾句。我絕對唔係要幫大陸講好說話,事實上歌詞提到嘅部份衰亦唔係無中生有,問題係出喺態度上面。至於首詞點過份法,我又節錄幾句同大家分享吓。

「其實見這個國家 偷呃拐騙到家」
偷呃拐騙度度都有,並唔係中國嘅專利。如果話呢喺國內比較嚴重,我都唔會有異議。不過將部份人嘅不法行為入晒成個國家民族數,就係犯咗以偏概全嘅謬誤。好似我地唔可以因為班歌詞作者(高登眾巴打)寫咗首咁嘅詞,就話所有高登仔都係白痴。

「蟲國化名叫支那 一早醜遍東亞」
唔理「支那」一詞嘅起源係點,而家已經公認係對中國極度侮辱嘅叫法。除咗日本仔同部份台獨支持者會用呢個詞之外,基本上都冇乜其他人會咁叫法,而出自一班中國人嘅口就更係匪夷所思。班友當然唔認自己係中國人啦,不過佢地嘅列祖列宗係喇啩。我唔係愛國或者民族主義份子,但係我仲識得尊重我嘅祖先。班友要侮辱自己嘅列祖列宗係佢地嘅事,但係燒埋我嗰疊就真係佛都有火。而且仲拉埋「東亞」一齊講,好易令人聯想起日本侵華歷史。不過我又唔會叫佢地做漢奸,事實上日本仔亦冇可能咁嘅貨色幫佢地辦事。忽然有個諗法,班友會唔係喺石頭爆出嚟嘅呢,所以冇祖宗?

「一天一句普通話將我同化」
班友咁都覺得有問題,我只可以話佢地係井底之蛙。普通話係中國嘅法定語文,香港人絕對應該要識啦,如果班友唔識就真係蝕底喇。講到同化,根本就係人類社會嘅必然現象。如果班友有種嘅,咪同化番國內人囉。

「"如沒有中國關照 香港已經死了"」
呢句就切合現實嘞。就算唔講中央對香港嘅各種支持政策,淨係唔向香港供水都死得人啦。班友日日飲住東江水,唔知有冇覺得小便有唔暢順呢?大陸連水都有毒,隨時會飲到人腎結石架,唔好飲丫笨!

「誰都驚恐有天災 對匪國暴民又要捐送
這可算香港給中國的作用
財物盡獻奉害蟲 平民愈捐就愈窮」
班友之前講嗰,最多都係白痴、無恥、同無知啫,不過呢幾句就直頭係冇人性嘞。連天災都可以攞嚟借題發揮,更加令我相信佢地係石頭爆出嚟嘅。講到香港對中國嘅作用,又忍唔住要話班友無知嘞。香港係一國兩制嘅示範單位嚟架,對象係台灣呀,盲毛!仲有,香港人捐錢救災,會唔會愈捐就愈窮就唔知,不過可以幫到人,已經係一種心靈上嘅富足。班友肯定冇捐過啦,所以佢地係唔會體會到嘅。

「往日靠打拼
港英的繁華光景
再沒有保證」
真係笑死人,班友喺高登網打拼就叻啫,對於香港嘅繁榮,佢地又出過幾多力?講到尾都係掛住事頭婆啫,都幾念舊喎。睇番條片嘅留言,原來念舊嘅人仲有好多,其中一條最受到認同嘅就係話想英國繼續統治香港。其實好簡單啫,掛住事頭婆咪移民去英國囉,使鬼喺度日嘈夜嘈咩。哈哈,忽然諗起一個舊同事,情況真係有相似。條友日日喺度鬧,唔係話公司刻薄,就係話老闆PK,不過又唔見佢轉工喎,仲連老人牌都攞埋添。其實慳番啖氣暖吓肚好過啦,以佢嘅工作表現,唔俾人炒已經偷笑喇。唔知大家又有冇咁嘅同事呢?講得太明我就唔敢嘞,高登仔鬧人嘅功架我都略知一二,實在係招惹唔起。

其實我都諗到一個三贏嘅方案,就係英國即刻收容晒呢班友,唔好理乜計分方法嘞。對於英國,班友話晒都係前度海外子民,就算冇功都有勞。而且班友又誓死效忠,連正牌英國鬼都未必會啦,咁嘅子民真係去邊度呀。對於班友自己,可以親近到事頭婆,自然係死而無憾,連我都會慶幸佢地到個好歸宿。至於我地呢普通市民,就樂得耳根清靜。嘩,真係諗吓都開心呀!


16 則留言:

  1. 嘩!夠膽批評班蝗蟲,你真係夠勇!你可以去精神病院做院長,因為黐線佬你都夠膽刺激佢地!

    回覆刪除
  2. 佛爺:
    講真,我又唔係太擔心喎。班友一日到黑匿喺屋企,上高登網自慰,根本就唔會睇到我篇blog,其實我只係向住空氣鬧啫。死嘞,可能黐線嗰個係我喎!

    回覆刪除
  3. 呵呵,首歌全部歪理,都係俾啲像「我要有權選特首」之類嘅低B老師教出黎嘅低B仔!

    不過冇架喇,哩班低B仔只會變成低B佬,他日會在香港自我沉淪裏吃盡苦頭!

    回覆刪除
  4. 上Youtube的第二天我有聽過。
    樓上幾位,當歌仔聽嘛,《富士山下》旋律唔錯,新歌詞比現今好多歌曲的詞都有過之而無不及吖:)

    回覆刪除
  5. laulong,
    哈哈,班友低B就梗係啦,如果佢地有料到,一早就移民返咗祖家啦,仲使鬼喺度日嘈夜嘈咩!

    Coffee,
    嘩,你嘅時事觸角好犀利呀,我都係早兩日睇報紙先知道有條咁嘅片咋!

    回覆刪除
  6. 純粹天災當然無問題,但原來天災背後係豆腐渣,捐錢比佢到底係救人定係幫人補鑊,真係唔捐唔知。

    回覆刪除
  7. 匿名君:
    其實捐錢救災都係表示一點心意啫,你估冇咗香港人嘅捐款,大陸自己搞唔掂咩!捐唔捐都唔係問題,如果捐完又要鬧就無謂喇!話時話,我都唔記得自己有冇捐添!

    回覆刪除
  8. Armadillo, agree with you, good points

    回覆刪除
  9. 香港真係多得你呢D自以為公平ga人唔少,無料扮四條。好心你做下資料收集先罵人,香港買水要俾成30釔憶俾中國,仲要規定左一定要遵守,就筫算我地多到飲唔哂,倒返入咸水海度,都要買咁多水俾咁多銭!幫我地?中國根本係耓搶劫囉!
    一D自己恩思想都無,又唔識分辯是非。你咁幫中國,有日你自己或你老婆要生仔,都要提早預約三年先有房個時唔好喊!因為D房俾唒D煌蟲霸唒!onq9g9

    回覆刪除
  10. 我用電話上所以有D問題,有D字刪5刾到。希望你可以認真思考下,再咁落去香港會變成點。雖然高登仔改歌係過分左,但做得好岩!唔通見到香港俾!人侵犯,都笑笑口話歡迎光來瀶,有日獮你覺得排隊俾人打尖係正常,出街見到人放金係𤴓正常,D人蹲係地下吐痰係𤴓正常,你唔好後悔點解香港變成咁。

    回覆刪除
  11. 10樓匿名君:
    我幾時有講過大陸向香港供水唔使收錢呀,睇清楚先講啦,盲毛!都話咗東江水有毒,叫你唔好飲架啦,而家搞到尿道閉塞,谷尿上腦,影響埋視力嘞,係咪自己攞嚟賤呢?!大陸會唔會希罕賺香港嘅買水錢我唔知,我淨係知道香港嘅問題係冇足夠嘅穩定水源。如果改用其他方法保證穩定食水供應,例如用海水化淡,啲水會貴到你唔捨得飲,到時一樣會搞到你腎結石囉!

    11樓匿名君:
    激化族群矛盾,鼓吹閉港自守,如果你認為香港咁樣先有前途,我就真係要祝福你喇!

    回覆刪除
  12. 唉~
    少少不同意見就錦火,出埋「激化族群矛盾,鼓吹閉港自守」=.= 都唔知你點諗出黎=.= 閱讀能力有問題就讀多D書啦=.= 對住你呢D真係講多都哂口水~~
    (P.S: 「激化族群矛盾」=.= 其實你係唔係大6人HAHA=.= 強國FEEL到呢~)

    回覆刪除
  13. 匿名君:
    又話「講多都哂口水」,又喺度咁多廢噏,睇嚟你都係一個思覺失調嘅膠登仔!唉,有病就即刻睇醫生啦,嚟呢度嘥時間只會延誤病情囉!至於我嘅觀點,唔好意思,如果淨係為你一個,我就唔嘥時間解釋嘞,橫掂點講你都唔會明!

    回覆刪除
  14. 我懷疑佢係蝗蟲,聽落唔舒服,唱衰香港

    回覆刪除
  15. 匿名君:
    歡迎光臨!班友自暴其醜,其實佢地係喺度唱衰自己囉!

    回覆刪除