2011年3月10日星期四

由疏忽照顧兒童講起

琴日講開有隻肥鼠乸帶埋隻老鼠仔去參加瞓街派對,結果混亂中隻老鼠仔中咗椒,搞到樂極生悲。同朋友傾開,個個都話隻肥鼠乸唔知點做人阿媽,竟然會帶埋條塞竇窿去咁危險嘅地方。有人仲提出一個觀點,話應該告佢疏忽照顧兒童,因為個細路肯定危險過單獨留喺屋企。

其實我對呢個講法有保留,講真好多親子活定都有一定危險性,例如帶細路去踩單車咁。而且喺電視見到,事發前隻肥鼠乸明明拖住條塞竇窿,又真係唔可以話佢疏忽照顧喎。事後佢仲高調反擊,將所有責任推晒落警方度添。

不過咁,所謂天網恢恢,疏而不漏,有人就篤爆隻肥鼠乸嘅前科。原來佢之前都試過帶埋條塞竇窿去反高鐵,可能係反得太high,連唔見咗個仔都唔知。卒之要問人借個大聲公嗌仔,而警察同示威人士仲聯手幫佢仔添。喺youtube上面有片為證,今次佢應該冇得抵賴啦。

帶埋個仔去反高鐵,但係就自己有自己玩,完全冇理到個仔,咁仲唔係疏忽照顧兒童?!唔知警方可唔可以用條片做證據,告到隻肥鼠乸甩褲呢?既然佢已經有前科,今次單就可以循同一方向推敲嘞。佢會唔會又係瞓到high晒,連個仔中咗椒都唔知呢?母愛有幾偉大,真係唔使講都知啦,草食動物為咗保護仔女,連獅子老虎都敢衝撞。當然,我絕對唔係話隻肥鼠乸應該同警方對抗。不過見到個仔有危險,幫佢擋椒就肯定係作為人母嘅本能反應,除非佢當時根本就唔喺個仔身邊啦。

本來以為呢單,稍為有獨立思考能力嘅人都會譴責隻肥鼠乸。不過琴日睇日月報副刊,呢個黃日月樂竟然力排眾議,狂插政府。以下係節錄自佢嘅專欄:
「萬人上街,警方誤傷孩子,局長回應說,帶孩子上街是教壞細路。枉我們還天真地相信,跟孩子身體力行參與社會,薪火相傳,是最珍貴的教育。」

如果呢係無知婦孺講嘅,我只會一笑置之。不過既然登得喺日月報,作為長期讀者,我又忍唔住要講番兩句嘞。首先,李局長話教壞細路,係針對班友強佔馬路嘅不法行為。唔知黃小姐係有心斷章取義,定係覺得呢種不法行為值得細路學習呢?至於薪火相傳云云,講就好似好動聽咁,其實只不過係將自己嘅意志強加於細路身上。究竟黃小姐知唔知道,而家個個提倡嘅係培養小朋友嘅獨立思考能力,作為家長嘅只應該從旁輔助,而唔係將細路當成填鴨。況且幾歲嘅豆釘,又有乜能力去分析究竟高鐵應唔應該起、財政預算案有乜不足之處、衝擊警方防線係咪暴力行為、強佔馬路算唔算違法?!帶細路去示威(或搞事),當然唔會令佢地了解事件嘅來龍去脈,而細路嘅模仿性最強,佢地學到嘅只會係嗰不法嘅暴力行為。黃小姐,我求吓你放過班細路啦!

我當然明白香港而家已經極度分化,對立陣營互相攻訐在所難免。不過喺一大是大非嘅關節上,例如法治咁啦,係絕對唔容許顛倒黑白嘅!對於反政府陣營嘅人士,可以隻字不提肥鼠乸單,但係如果要幫佢塗脂抹粉,咁就一定要譴責嘞!而家連所謂文化人都係咁是非不分,仲要喺號稱全港最有公信力嘅中文報紙寫專欄,你都咪話唔得人驚!真係世風日下,人心不古!



7 則留言:

  1. 一個正常思維的人,點會讓稚子耳濡目染在激烈爭鬥爭吵中?他日孩子將成長為怎麼的人,這位母親竟然為孩子作這樣的教育!

    回覆刪除
  2. haha, 明報?講乜鬼公信吖!公信係有公平、信守之義,明報偏頗編採,自己友式的納稿,公義早已支離破碎。我十幾年前就俾明報記者跣過,結果要向辦學團體解話,所謂公信力第一,呃鬼而已!

    回覆刪除
  3. 呢嗰黃小姐好似有開班教小朋友通識㗎添!邏輯混亂,偷換概念,唔好教壞人啦。

    回覆刪除
  4. 有一種腦退化,出現在青中年,這些人生活正常,只在某方面邏輯有問題,所以很難察覺。

    黃小姐應該是開始發病了,所以,唔好怪佢呀!腦退化呢樣野,佢自己係唔知架!只有其他人至睇到架!

    回覆刪除
  5. Coffee,
    哈哈,俾你講中咗嘞,就係因為呢個女人唔正常囉!

    Laulong,
    係呀,明報真係比以前差咗,不過喺中文報紙之中,都仲算係比較中立。而且睇咗咁多年,點都有感情嘅。

    Eric,
    哈哈,呢位黃小姐同隻肥鼠乸都算係最佳拍檔喇,一個誤人子弟,而另一個就教壞自己個仔!

    佛爺:
    哈哈,所以我咪提醒佢囉,不過佢睇唔到啫。最衰我又唔慣去人地度踩場,冇喺佢個blog留言。

    回覆刪除
  6. 一次過睇晒你幾篇,我只係想講,正常嘅阿媽係有責任"行量"安全至帶自己的細路去,根本近年唔少次都係為攪事而攪事,次次都有不同程度的暴力的啦,佢係常客,點會唔知呀?

    佢咁教仔法,個細路只係睇到表面的激烈行為,得果八歲,點識分背後咁複雜的 issue 呀!

    回覆刪除
  7. SKII,
    咪係囉,受到佢嘅薰陶,個細路實會學識用暴力去解決一切問題啦,呢個女人真係累人累物!

    回覆刪除