2011年3月8日星期二

瞓街老鼠

過街老鼠,人人喊打!呢句相信大家都聽過。但係有一種動物比過街老鼠更加乞人憎,你地又知唔知係乜?呢條問題當然係好無聊,睇見個標題都已經估到啦。冇錯,瞓街老鼠的確勁討厭,簡直係人人得而誅之!

話說星期日,有班疑似民鼠嘅動物,發起咗個「反財政預算案大遊行」。本來乜乜大遊行早就成為假日嘅大眾娛樂,已經見怪不怪。而且所有動物都有表達意見嘅權利,如果淨係乖乖地過吓街,本人絕唔會反對。不過桐油埕始終係裝桐油,如果唔搞破壞嘅,根本就唔係老鼠啦。

一如所料,班鼠輩果然嫌齋過街唔夠癮,仲要佔據埋成段德輔道中,玩集體瞓街。結果搞到中環交通大混亂,有巴士同電車乘客被迫中途落車。單是但台新聞都有報導,但係就居然唔訪問吓受影響嘅乘客,了解佢地有乜睇法。都話是但台是但架啦,佢地點敢得罪班瞓街老鼠啫,一陣班鼠輩走去電視城瞓覺,咁就大鑊嘞。唔知呢又算唔算自我審查呢?

後來警方清場,抬走班瞓街老鼠,條路先至通番。一如既往,班鼠輩事後都係譴責警方使用暴力,話佢地冇預先警告就用胡椒噴霧。真係鼠口長不出象牙,班友講都語無倫次嘅,警方嘅警告,佢地又有邊次聽得入耳呢?不過咁,其實我都唔贊成警方用胡椒噴霧架,最好就係出動警棍,當扑咁扑濕班鼠輩。據報喺混亂中,有一個八歲嘅塞竇窿中咗椒,而被拘捕嘅鼠輩之中,最細嘅竟然只得十二歲!究竟點解班友要帶埋細路上前線呢,唔通佢地冇擔心過小朋友嘅安全?其實佢地咁做都係基於安全理由,不過係自己嘅安全啫。咪好似喺恐怖主義盛行嘅地方,恐怖份子利用婦孺做擋箭牌一樣囉。所謂虎毒不食兒,估唔到班鼠輩會無良成咁,真係令人髮指!咪住,攞老虎嚟同班鼠輩比較,簡直係對百獸之王嘅莫大侮辱,我要收番「虎毒不食兒」呢句。

期間仲發生咗一段小插曲,瀉民連現任幫主桃君痕曾經勸諭班鼠輩移屍遮打花園繼續瞓,但係就冇人(或鼠)搔佢,真係瘀到爆!我都講過架啦,自從前任癲狗幫主反出之後,瀉民連嘅聲勢江河日下,摺埋只係遲早嘅問題。

講番班瞓街老鼠,佢地唔止喪心病狂,簡直係冇埋作為動物嘅本能添。因為就算係禽獸,都唔做埋損人不利己嘅,咁係天性使然。損人就唔使講啦,班鼠輩剝奪咗其他人使用道路嘅權利。如果有人等住去救命,咁就俾佢地害死啦。至於點解會不利己呢,又等我同大家分析吓。首先,瞓馬路好危險,隨時會俾人踩親,甚至俾車車死。咪以為車一定會停,如果遇著個酒後駕駛嘅司機,鼠輩就實聽變鼠餅都得嘞。而且馬路無險可守,一旦警方清場,話咁易就一網成擒啦。不過都難怪嘅,一班烏合鼠輩,又可以有乜高明嘅諗頭呢?不如等我點醒佢地啦。

如果要瞓,垃圾站先至係最佳選擇。一來,垃圾站係鼠輩最熟悉嘅地方,喺嗰度瞓一定會有賓至如歸嘅感覺。而且,一旦防治蟲鼠組嚟清場,班鼠輩可以即刻匿埋喺垃圾堆裏面,話唔出就唔出,想捉到佢地都幾難。最重要嘅一點係,如果班鼠瞓瞓吓見肚餓,嗰度有大把垃圾醫肚,絕對有利於佢地作長期抗爭。

班瞓街老鼠無勇無謀,又累人累物,真係唔死都冇用!如果話屯門瞓街男陀衰晒男人,咁呢班鼠輩就直頭係陀衰晒全世界嘅鼠類!咪以為所有鼠類都係討厭嘅動物,其實有都好可愛架,例如白老鼠、倉鼠、葵鼠、同龍貓等等。如果呢可愛嘅鼠類唔想受到牽連,就應該即刻同瞓街老鼠劃清界線,搞番個「全球鼠類反瞓街老鼠大遊行」!

4 則留言:

  1. 成班瘟神,生害街坊,死害鬼!

    回覆刪除
  2. 最理解唔到個二孩子的家長點解捨得讓孩子去受罪!該閃人時就應當機立斷嘛!

    仲有,原來龍貓都是鼠類!

    回覆刪除
  3. hahaha, 張鼠照好有創意,點影架?

    >>如果要瞓,垃圾站先至係最佳選擇。

    哩句到肉,哩班民煮垃圾,真係唔堆填無用!

    回覆刪除
  4. 佛爺:
    哈哈,話我自私都冇法,我都係想班友快死,雖然會害到先人,不過點都好過搞到我地啫!

    Coffee,
    咁嘅家長真係冇資格為人父母,佢地根本完全冇考慮過細路嘅安全!至於龍貓,橫睇掂睇都係老鼠樣架喎!

    laulong,
    哈哈,張相完全唔係影架!隻老鼠係喺網上嘅,而射燈效果就係用Photoshop整架!

    回覆刪除