2011年3月4日星期五

柱男柱女

唔知點解,香港真係好多冇腰骨嘅人。好似李某人咁,明明已經悔咗過架啦,都仲好意思坐吱聯會主席個位,呢係品格上嘅冇腰骨。而另外有人就係體格上嘅冇腰骨,喺任何地方都要挨挨凭凭先覺得舒服,例如成日喺火車地鐵見到嘅柱男柱女。

當然,有埃凭梗係舒服過齋企啦,不過大前提係唔可以影響到其他人。好似柱男柱女,將火車地鐵裏面俾人扶手嘅柱據為己有,就真係相當自私嘞。如果冇其他乘客企喺條柱附近,其實都冇乜所謂。但係好多時明明車廂企滿晒人,友仲係霸住條柱,咁就認真冇品喇。

如果係友發現條柱先嘅,基於先到先得嘅原則,都勉強講得通。不過好多時明明已經有人扶住條住,柱男柱女仲要挨落嚟,完全唔理其他人嘅感受。通常喺呢情況,一個二個都只係即刻縮手,而且唔會有人開聲話條友,真係估唔到香港人會咁禮讓。但係縮咗手又唔知扶去邊度好,扶高又驚會掂到個柱人頭髮,扶低仲衰,隨時會揩到條友個後庭。如果唔扶住,又好易會PK,真係好難搞吓。

我自己就最怕同陌生人有身體接觸,就算隔住件衫都係咁話。不過喺呢情況,我就一定寸土不讓,絕對唔會縮手。而且我仲會調整手指嘅姿勢,變成好似鳳眼拳咁,用個尖角位頂住條友個背脊。通常個柱人俾我頂到好唔舒服,就自然會知難而退。但係試過有一次遇到個死纏爛打嘅柱女,佢唔止冇縮開,仲起勢郁個背脊,用力磨我隻手。呢條八婆咁衰格,人之中佢都算極品喇!咁我當然唔會示弱啦,佢要玩我一定奉陪。我就跟住佢背脊移動嘅節奏調整手指嘅位置,將磨擦減到最低,但係就仍然一直頂住佢。最後當然係邪不能勝正啦,條八婆縮開之後竟然回頭報以一個兇狠嘅眼神。哈哈,我真係好驚呀!

雖然嗰次得到最後勝利,不過都只可以話係慘勝,因為隻手指俾條八婆磨到損咁滯。最衰我又冇戴戒指嘅習慣,搞到要同佢肉搏。如果我戴住隻凸起一大舊嘅戒指,睇條八婆仲點招架。

忽然諗起另一單,又係同柱女有關嘅,不過就唔係同佢爭條柱,而係我自己做咗人柱。話說九十幾年前去北京玩,上咗一架好迫人嘅公車。行咗冇幾耐,我就發覺背脊有壓力,回頭睇吓,原來係俾個女人用背脊貼到實一實。本來架車咁迫人,有身體接觸都好難避免。不過個女人直頭係成個人挨咗落嚟,根本就係當咗我做一條人柱。咁我咪將個身傾前少少囉,照計應該可以擺脫個柱女架啦。點知佢竟然咬住唔放,仍然係黐到實。最衰架車鬼死咁迫,想走位都唔得。後來停咗幾個站,落咗客,車廂裏面已經稍為鬆動,不過個柱女仲係唔肯放棄我呢條人柱,真係俾佢激死。

之前都講過啦,我最憎同陌生人有身體接觸架嘞。俾個柱女蹂躪咗咁耐,唔俾番顏色佢睇都對唔住自己啦。我就趁停車嘅時候,突然閃向一邊,咁佢實會失平衡啦,等佢挨得咁過癮。果然如我所料,只聽到一聲慘叫,跟住就見到佢向後跌嘞。好彩有人拉住佢,如果唔係就實PK鑊甘嘅。其實我事後檢討過,都覺得自己做得過份咗。雖然個柱女係討厭,但係如果佢跌傷咗,我實會覺得好過意唔去。人地話無毒不丈夫,睇嚟我都唔係做大丈夫嘅材料架喇!




7 則留言:

  1. 呵呵呵,你張柱男相真係好形喎!

    Arma, 我始終覺得啲女人揾你做柱係嗒你糖啫!

    回覆刪除
  2. laulong,
    嗒糖?千祈咪搞,嗰個柱女係阿嬋嚟架!

    回覆刪除
  3. 好好笑!
    講開呢個話題,我果日搭地鐡電梯(貪快),通常逼滿人嘅,但點都就到位唔使掂到別人身體,不過果日個女人貼到我後面實一實,我即刻擰頭去睥下佢架喇,當然睥唔到,佢又係背脊!
    我想講有啲女人可能以為掂到同性女人就無所謂,其實唔係架!

    回覆刪除
  4. 你應該大叫:「非禮呀!」

    回覆刪除
  5. Coffee,
    講到迫人,日本地鐵先至誇張。佢地仲有專人幫手塞乘客入車廂,好似將沙甸魚入罐咁。人就迫到貼實車門,塊面都壓到變晒形,真係勁搞笑!

    佛爺:
    哈哈,唔可以叫非禮架,因為「非禮勿言」丫嘛!

    回覆刪除
  6. 我都係最憎呢啲人,我都唔縮手㗎!你有冇發現,厚面皮點都唔縮的多數係“柱女”,男人反而好少少!

    回覆刪除
  7. SKII,
    哈哈,絕對同意你嘅睇法!據我嘅觀察,柱女好多時都霸道過柱男,不過我唔敢講,怕女網友會插我性別歧視!

    回覆刪除