2011年2月17日星期四

國民身分

新聞話公民教育委員會做咗個意見調查,發現國歌短片可以增加香港人嘅國民身分認同。其實都幾荒謬吓,國民身分認同有乜好調查?自從回歸以後,香港已經再冇主權爭議,亦唔存在要求獨立嘅聲音。香港公民自然都係中國人,呢個係毫無疑問嘅事實。

撇開無政府主義者唔講,每個人都需要有個國籍。當然,未必每一個人都會認同自己嘅實際國籍,例如藏獨疆獨份子就唔會承認自己係中國人,但係呢個情況喺香港根本就唔存在。照理對於香港人嘅中國籍身分,認唔認同或者有幾認同都係毫無意義嘅問題。不過就真係有部分香港人唔肯承認自己係中國人,你都咪話唔荒謬。咁如果佢地唔係中國人,又可以係乜人呢?

有人好搞笑,淨係肯認自己係香港人。雖然我地有本特區護照,不過香港係中國嘅一部分,並唔係一個獨立國家,所以喺國籍上嚟講,我地都只可以係中國籍。話自己係香港人而唔係中國人,根本就唔合邏輯,我只可以話呢人係自欺欺人。

另外有人攞住本BNO,就當正自己有英國籍,呢人唔止可笑,仲好可悲添。人地大英帝國根本就從來都冇當過你係子民,你又試吓攞住本BNO返祖家,入唔入到境都未知。難為人仲日夜掛念住事頭婆,以大英遺民自居。哈哈,係遺民呀,不過係遺棄個遺囉。

我當然明白有好多人不滿中國政府或者鄙視國內同胞,因而唔想做中國人。不過唔認自己係中國人,只係一種心靈上嘅自慰,唔會起到任何實質作用。夠薑就搞革命,推翻中國政府,呢個係積極嘅做法。不過我就打死都唔信香港有人夠膽咁做。嗰班所謂民主鬥士,其實同門口狗冇乜分別,淨係識得喺屋企吠。搞革命呢預咗要犧牲嘅,當然係冇佢地份啦。消極嘅就學吓古人風骨,隱居深山,採薇而食。如果班友真係做到不食共粟、不飲共水,我都會欣賞佢地有吉屎。講到尾,最可行嘅辦法都係搞移民。香港勝在夠自由,要走嘅話絕對唔會有人阻止你。移民去英美加澳紐呢民主國家自然就一天都光晒啦,成日匿埋喺屋企自慰有鬼用咩,咪盞搞到自己腎虧!

唔認自己係中國人都算嘞,友仲要喺度指手畫腳,成日話中國要點要點,呢樣我就最睇唔過眼。如果唔係中國人,中國點衰都唔關你事啦。再講,既然唔係中國人,根本就冇資格干涉中國嘅內政。呢班友真係有病,準確嚟講係思覺失調。一方面認為自己唔係中國人,而另一方面又要盡中國人嘅義務去促進中國民主,咁唔係思覺失調係乜?

最後,我想俾個忠告呢班人,有病就要即刻睇醫生,唔好俾個病惡化成為妄想症。如果思覺失調變成妄想症,後果真係可大可小架。以為自己係救世主都仲好,最多係俾人笑吓啫。萬一妄想自己係超人,以為披住張床單就識飛,隨時會連命仔都冇埋架!




6 則留言:

  1. 對對!香港認賊作父的人真的不少。我也常說人是要有風骨的,厭惡共產黨的就不要接受共產黨給香港的好處,東江水不要喝了,大陸給香港的種種優惠也不要享了,乾脆移民了罷!

    回覆刪除
  2. 班友好似係精神分裂,精神就鬧內地,肉體就取盡好處!

    回覆刪除
  3. laulong,
    香港人以利益為先,總之有奶便是娘,所以認賊作父一都唔出奇。不過自從回歸以後,大英帝國根本就冇任何益過香港,反而掠水就有份,睇吓本天價BNO就知啦。奇就奇在仲有咁多人誓死效忠,你都咪話香港人唔念舊!

    佛爺:
    哈哈,呢班友真失敗!佢地注定一世都唔會明白乜叫做愛嘅最高境界,即係靈肉一致!

    回覆刪除
  4. BNO最冇用。其實英國政府好鬼衰,拿加拿大護照都要申請工作簽證,就算加拿大嘅head of state喺英女皇都冇用!

    回覆刪除
  5. 我覺得呢個係“國民身份”危機至真,回歸前我話自己係“香港人”,因為我明明唔係“英國人”,回歸後我想話自己係“中國人”,但又冇資格拿中國護照,真係唔知點算好!

    不過,而家填啲乜表物表,我都係填“中國”(雖然我只得特區護照),咁多年之後,我已經習慣。

    回覆刪除
  6. eric,
    又唔可以話英國政府衰喎,佢都係保障番自己國民嘅就業機會啫。至於BNO,我都覺得冇鬼用,免簽證嘅地方唔夠特區護照多,仲要鬼死咁貴!

    SKII,
    哈哈,其實特區護照都係中國護照嘅一種啫,係特殊中國人嘅身份象徵嚟架!

    回覆刪除