兩個轉一條線

一轉人，二轉鬼，三轉馬騮仔，四轉閻羅王個仔。以上呢幾句，相信有番咁上下年紀嘅都會聽過，但係有冇根據就好有疑問嘞。事實上，我真係未見過頭頂有三四個轉嘅人。

一個轉好正常，相信大部分人都係架啦。兩個轉雖然少，不過都唔算罕見，起碼我自己就係嘞。但係好奇怪，唔知點解見親兩個轉嘅都係細路，而且多數係男仔。

其實兩個轉都幾麻煩吓，因為喺中間嘅頭髮會相衝，撐起變成一個雞冠頭。話時話，雞冠頭都幾型吓架。不過如果唔想咁punk，都有辦法嘅，一係就剪個平頭，一係就留到把頭髮好似長毛咁。我自己就冇呢個問題嘞，因為我頭髮生得唔貼，根本就條條都係棟起晒。當然啦，海膽頭又係另一個煩惱，頭髮長少少就撐到成個波咁。以前成日有人問我點解頭髮會豎起晒，係咪落咗gel。真係激死，你估我想嘅咩！

至於點解會話二轉鬼，我就唔知嘞。其實除咗個髮型難搞之外，咪又係人一個！

講到一條線，相信好多人都會即刻諗起事業線，當然係指心口嗰條啦。咪以為呢條事業線係女人嘅專利，其實如果男人有嘅話，都一樣咁殺食。睇吓某位有「童顏巨乳」之稱嘅男藝員，就係因為谷咗條事業線出嚟而忽然爆紅。講開又講，我以前用力夾，都夾到少少出嚟架。唉，俱往矣，而家冇喇。

都係廢話少講，費事趕客啦。我想講嘅係掌紋，本來係兩條線（智慧線同感情線），不過有人會黐埋，變成一條線，就係所謂嘅斷掌嘞。據聞斷掌好罕見，一千人先有一個。呢個講法我就真係好懷疑，冇理由得咁少嘅。我屋企四姐弟都係斷掌，以前班酒友之中又有兩個係。當然啦，如果唔係太熟嘅朋友，根本就唔會無啦啦叫人攞隻手掌嚟睇吓，所以我嘅統計唔一定好準，不過感覺上點都唔會係千份之一咁少。

喺性格方面，網上話斷掌人有以下特點：
（一）利己心重，好貪小利，喜弄權勢；
（二）主觀極強，不肯聽取別人的意見；
（三）適應能力和應變能力較差；
（四）愛惡分明；
（五）做事有責任感，不達成功不停止。

咁嘅講法我基本上唔係太認同，「主觀極強」有少少啦，只有「愛惡分明」先係中晒。

網上又話斷掌男人容易會有以下健康問題：
【1】支氣管炎或其他呼吸系統疾病
【2】神經過敏或神經衰弱
【3】高血壓
【4】膽固醇或中性脂肪過高
【5】肝炎
【6】便秘或下痢

又係中得少少，淨係得「膽固醇過高」講得準。話時話，「神經過敏」好似都有喎。

講到尾，掌相嘅，茶餘飯後吹吓水就可以，絕對唔可以當真。而家人整容整到連阿媽都唔認得，唔通整完之後連性格同命運都可以改變？