2011年2月23日星期三

戒煙宣言

人地話戒煙好難,我就唔係好同意嘞。我話戒煙好簡單就真,直頭話戒就戒,鍾意幾時戒就幾時戒!所以呢兩年來,我都大大話話戒咗十幾次煙!

其實我都算係一個老煙民,自從出嚟做就開始食煙,煙齡有九十幾年喇。開始食煙係因為覺得自己大個仔嘞,可以做大個仔先做得嘅。其實嗰時只係貪得意,食得唔多,一包煙可以食成幾日。後來愛上咗打牌就大鑊嘞,打親牌就煙駁煙,一晚可以煲成三包煙。有一次打完牌,發覺個喉嚨損晒,於是就的起心肝戒煙。嗰次都算成功架,足足有幾年冇食,直至轉咗工。

新公司同事個個都係煙鏟,而且又又鍾意飲酒,一個禮拜幾晚歡樂時光。大家都知啦,煙同酒根本係分唔開嘅,所以咪食番囉。除咗飲酒,班同事仲鍾意打牌,結果就越食越犀利。

以前好好架,喺office都可以食煙,當然只可以喺自己房食啦。後來公司搬咗,改晒做open office,而且仲全面禁煙,就唯有出後樓梯食。喺後樓梯食煙都有好處架,通常都係埋幾個煙鏟同事一齊去,順便講吓是非,都不知幾過癮!

到後來政府推行不吸煙運動,室內全面禁煙,就開始覺得好冇癮嘞。飲酒唔食得、唱K唔食得、連打牌都唔食得,咁仲有乜人生樂趣?於是兩年前又的起心肝戒煙,不過為咗留番條後路,只係戒買唔戒食。最初嗰兩個禮拜真係好難頂,成日心思思。後來堅持咗兩個月,都係頂唔順,就約咗個煙鏟朋友出嚟,我請佢食飯,佢請我食煙。戒咗兩個月再食番,嗰種感覺真係正,直頭係「久旱逢甘雨,他鄉遇故知」!

自從再食番之後,心裏面一直有條刺,硬係覺得自己冇理由戒唔到嘅,跟住就開始咗一連串嘅戒煙行動嘞。我會定一個特別嘅日子俾自己戒煙,好似元旦咁。元旦衰咗就定喺農曆新年,再衰咗就情人節,情人節都衰埋就清明節。如是者,勞動節,端午節、七一回歸、中秋節、十一國慶、重陽節,次次都衰晒,結果兩年內咪戒咗十幾次煙囉。最長嗰次戒咗兩日,最短就只係兩粒鍾。你地知啦,而家周街都係便利店,梗有一間喺左近,要買煙真係話咁易,結果一心思思咪走落街買囉。

啱啱做咗個統計,2010年買煙就用咗萬幾蚊。財爺又就嚟公布財政預算案嘞,煙草稅肯定會勁加。如果一包煙賣到成五十蚊,你話有乜可能再食得起?今次冇得傾,一定要戒架嘞,總之不成功便成仁!

話時話,其實呢篇係一路食住煙寫架!哈哈,加價前梗係要入定貨做儲備啦!


7 則留言:

  1. 哈哈!你戒煙的過程好似我嘅減肥史一樣,有多年經驗,有成功過,但大部分都以失敗告終。
    我昨天晚餐起又開始減肥了!

    回覆刪除
  2. Coffee,
    祝你減肥成功!不過美食嘅誘惑真係好難抗拒架,要努力呀!

    回覆刪除
  3. 預算案出咗啦,每枝加五毫,財爺話幫你戒煙喎,快啲多謝佢啦!

    回覆刪除
  4. Arma:

    戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙戒煙

    最終唔會有上高咁多次掛?

    真係要戒,我有兩個堂大佬五十幾歲就去咗,都係因為食煙,留下了好多遺憾!

    Arma 你才情洋溢,長命才可以充份發揮,去打殘啲民煮怪 :)

    回覆刪除
  5. SKII,
    財爺雖然係立壞心腸,不過都算做咗件好事(對我嚟講),因為我唔會買私煙(驚買到假),所以想唔戒都唔得!

    laulong,
    係呀,希望今次係最後一次戒煙啦!哈哈,講到好似就嚟香咁,真係大吉利是!

    回覆刪除
  6. 一包要五十幾,咦,同呢度差唔多喎。
    我唔食嘅,但喺因為時時要出國,就幫過好多人喺免稅店買,有時真喺覺得自己喺半個殺人凶手咁。
    煙同酒真喺分唔開㗎,我有個朋友就喺同你一樣,想戒煙但喺一飲酒就煙癮起,佢仲喺醫生嚟㗎!
    我支持你戒煙,希望你成功啦。

    回覆刪除
  7. eric,
    哈哈,咪以為醫生一定好健康。月初去旅行,同團有一個七十幾歲嘅醫生,煙癮仲勁過我呀!

    多謝你嘅支持!

    回覆刪除