選擇性聾啞盲

一場突如其來嘅茉莉花革命，迅速席捲北非同中東，簡直睇到人眼花撩亂。同時亦令人驚嘆，呢類民主運動嘅傳染性，比瘟疫更有過之而無不及。今日睇報紙，話內地都加強咗防疫措施添。

講番呢場茉莉花革命，到而家為止，突尼西亞同埃及已經變咗天。話就話係人民力量嘅勝利，不過呢個結果係好係壞，都仲要放長雙眼睇清楚。總之軍人掌權都唔會係乜好事，因為班友個個都係屎坑三姑，易請難送。

有一樣好奇怪，就係疫區國家之中，竟然有幾個係美國嘅盟友。眾所周知，美國係民主、自由、人權嘅超級典範。所謂物以類聚，照計佢嘅盟友冇理由會搞到俾人民唾棄格。以美國佬勇於伸張正義嘅作風，如果見到呢國家有違反民主人權嘅情況，亦都冇理由唔出聲啫。而且嗰係盟友，美國一定可以運用到佢嘅影響力。唔通真係老虎瞌眼瞓，一時睇漏眼？但係又講唔通啫，穆巴拉克上台三十年，冇理由咁耐都睇唔到格。而且佢對其他國家嘅民主人權狀況，都不知睇得幾仔細，簡直好似出動埋顯微鏡咁。唯一嘅解釋係，美國佬選擇性咁視而不見、聽而不聞！

嗰所謂盟友，其實只係美國扶植出嚟幫佢做嘅政權，講得難聽就係馬仔。美國要執行佢嘅中東政策、要控制中東石油資源，冇咗呢班馬仔又點得呢？作為龍頭大佬，美國當然唔會阻住馬仔著數啦。總之就你幫我辦事，我替你撐腰。

早幾日就輪到巴林爆大鑊，軍警開槍鎮壓示威，造成平民傷亡。美國佬當然唔可以再扮啞啦，不過都只係好溫和（或溫柔）咁呼籲當局要克制同埋以對話解決問題。欺拉里就曾經讚揚過巴林政府「步向民主改革的承諾」，仲話民主改革「需要時間」。 點解美國佬嘅講法會同姜瑜小姐嘅一貫口吻咁不謀而合嘅？分明係執人口水尾啦，難為佢地竟然唔面紅。又睇番08年西藏騷亂，美國佬選擇性咁睇唔到藏獨份子打砸搶燒嘅行為，朝野一致強烈譴責中國暴力鎮壓。對比番今次事件，係咪覺得美國佬好雙重標準呢？

持雙重標準，係因為出發點唔同。對於中國，美國採取嘅係圍堵政策。至於巴林，美國當然唔想冇咗呢隻馬仔，所以一定唔會迫死佢。而美國佬一向掛喺嘴邊嘅民主、人權、公義，根本就從來都冇考慮過。所謂人不為己，天誅地滅，站喺自己國家嘅立場嚟講，美國並冇做錯。不過如果有人以為美國係主持公道嘅正義朋友，我就只可以話佢地係盲毛！

好不幸，香港嘅盲毛真係多如天上繁星。人地選擇性聾啞盲，係為咗自己嘅利益。班盲毛對明顯嘅事實視而不見，跟住班為求私利不擇手段嘅政棍搞風搞雨，究竟又對自己有冇任何好處呢？

班友而家仲話要聲援國內嘅茉莉花革命，真係唔知佢地個腦生咗喺邊度。首先，就憑幾條盲毛喺香港叫囂，又可以搞得乜出嚟？好，又當革命成功，中國好似巴林咁，成為美國嘅盟友（或馬仔）。不過到時都係民主欠奉，最終得益嘅又係邊個呢？講真，我絕對相信呢個所謂革命連開始嘅機會都冇。中國吸取咗六四嘅教訓，自然識得防範於未然。就算喺好唔可能嘅情況下，單搞到一發不可收拾，最終結果只會係六四嘅翻版。喺咁混亂嘅情況，如果有軍方野心家乘機奪權，中國仲可能會再度鎖國添。如果係咁，又有邊個會得益呢？

中國改革開放衍生出嚟嘅社會問題，絕對唔係一朝一夕可以解決。過激嘅對抗行為只會令中國政府產生戒心，收緊控制，結果拖慢改革步伐。事實上，喺大部分國民未有足夠民主同公民意識嘅情況下，所謂革命只會造就新一批嘅貪官。要有真正民主，先要將民主意識滲透入社會每一個階層，包括建制，絕對冇其他捷徑。一夜變天只係個美麗嘅神話，淨係嗰不食人間煙火嘅人先會相信。睇吓菲律賓，人民力量趕咗馬可斯落台，到而家已經廿幾年，咪一樣個個總統都醜聞纏身！

又講番香港，淨係睇吓有咁多盲毛，已經知道推行西式民主會係一場大災難！我都打定輸架喇，不過相信阿爺點都唔會見死不救嘅。我最唔想見到嘅係中國搞到亂晒龍，到時阿爺自顧不暇，香港就真係PK嘞!