基督城

豆腐渣學校、毒奶粉、一黨專政獨裁統治，呢紐西蘭一樣都冇，咁點解又會遭到天譴呢？

基督城早幾日發生6.3級地震，造成廣泛破壞同嚴重傷亡。基於前兩年發表嘅地震天譴論，有理由相信紐西蘭政府或者人民梗係做咗傷天害理嘅事，先會受到咁嘅懲罰。不過紐西蘭又真係冇乜把柄俾人捉到喎，咁地震天譴論咪要破產？咪住，好似話遇難者當中有中國公民喎，會唔會係佢地累街坊呢？各位地震天譴論嘅支持者，你地又有得發揮喇！

廢話講完。據我推測，地震可能係同紐西蘭嘅地理位置有關。紐西蘭位於火環上面，地殼活動比較活躍，發生地震嘅機會自然大。其實我地都算好幸運架喇，香港基本上冇乜特大天災，最多都係打吓風。

呢幾年唔知點解，全世界天災頻仍，睇新聞都睇到麻木晒。不過早幾日喺電視睇到基督城地震，就覺得有震撼，主要係因為一個畫面。喺電視睇到，Christchurch Cathedral個尖塔冧咗一半。基督城冇乜景點，雖然間教堂其實好屎吓，不過就已經係當地嘅地標。連地標都冧埋，都咪話唔得人驚！

第一次去基督城，住嗰間酒店就喺教堂隔籬，間房仲係對到正添。雖然嗰時枝鏡唔夠闊，影唔晒成間教堂，不過都勉強影咗兩張，估唔到而家已經成為絕響。

第二次去基督城係兩年之後嘅事，嗰次係同兩個舊同事自己揸車玩南島。自己玩就梗係住平價旅館啦，不過位置就好偏僻吓。同個老闆傾開，問佢基督城有冇得夜遊。佢竟然話有喎，仲離旅館唔遠，行路只係大約十五分鐘。原來基督城真係咁細，由一個山卡啦區去夜遊區行路都搞得掂。既然咁近就梗係要去見識吓啦，不過越行越唔對路，行咗超過十分鐘都仲係靜英英，都唔知係行錯路定係個老闆老點。好彩雖然係靜，但係感覺上都幾安全，始終都係紐西蘭南島，如果係南美或者南非就唔同咁講喇。再行多幾分鐘，卒之到咗夜遊區嘞，不過就靜到鬼影都冇隻，真係勁冇癮。咁都算夜遊區，簡直同Am屎爭天共地，就算同香港都爭九條街啦！

人成日彈香港呢樣唔好，嗰樣唔好，又話空氣污染嚴重，住喺度隨時命都短幾年。咁紐西蘭夠正啦，風景靚，空氣又好，不過要我移民去嗰度就真係咪搞嘞。就算地震震唔死，悶都悶到死啦！