2011年2月26日星期六

基督城

豆腐渣學校、毒奶粉、一黨專政獨裁統治,呢紐西蘭一樣都冇,咁點解又會遭到天譴呢?

基督城早幾日發生6.3級地震,造成廣泛破壞同嚴重傷亡。基於前兩年發表嘅地震天譴論,有理由相信紐西蘭政府或者人民梗係做咗傷天害理嘅事,先會受到咁嘅懲罰。不過紐西蘭又真係冇乜把柄俾人捉到喎,咁地震天譴論咪要破產?咪住,好似話遇難者當中有中國公民喎,會唔會係佢地累街坊呢?各位地震天譴論嘅支持者,你地又有得發揮喇!

廢話講完。據我推測,地震可能係同紐西蘭嘅地理位置有關。紐西蘭位於火環上面,地殼活動比較活躍,發生地震嘅機會自然大。其實我地都算好幸運架喇,香港基本上冇乜特大天災,最多都係打吓風。

呢幾年唔知點解,全世界天災頻仍,睇新聞都睇到麻木晒。不過早幾日喺電視睇到基督城地震,就覺得有震撼,主要係因為一個畫面。喺電視睇到,Christchurch Cathedral個尖塔冧咗一半。基督城冇乜景點,雖然間教堂其實好屎吓,不過就已經係當地嘅地標。連地標都冧埋,都咪話唔得人驚!

第一次去基督城,住嗰間酒店就喺教堂隔籬,間房仲係對到正添。雖然嗰時枝鏡唔夠闊,影唔晒成間教堂,不過都勉強影咗兩張,估唔到而家已經成為絕響。

第二次去基督城係兩年之後嘅事,嗰次係同兩個舊同事自己揸車玩南島。自己玩就梗係住平價旅館啦,不過位置就好偏僻吓。同個老闆傾開,問佢基督城有冇得夜遊。佢竟然話有喎,仲離旅館唔遠,行路只係大約十五分鐘。原來基督城真係咁細,由一個山卡啦區去夜遊區行路都搞得掂。既然咁近就梗係要去見識吓啦,不過越行越唔對路,行咗超過十分鐘都仲係靜英英,都唔知係行錯路定係個老闆老點。好彩雖然係靜,但係感覺上都幾安全,始終都係紐西蘭南島,如果係南美或者南非就唔同咁講喇。再行多幾分鐘,卒之到咗夜遊區嘞,不過就靜到鬼影都冇隻,真係勁冇癮。咁都算夜遊區,簡直同Am屎爭天共地,就算同香港都爭九條街啦!

人成日彈香港呢樣唔好,嗰樣唔好,又話空氣污染嚴重,住喺度隨時命都短幾年。咁紐西蘭夠正啦,風景靚,空氣又好,不過要我移民去嗰度就真係咪搞嘞。就算地震震唔死,悶都悶到死啦!



7 則留言:

  1. 我諗唔明,點解教堂會在地震中塌下來?因耶穌基督會保佑教堂的!

    回覆刪除
  2. 第一張影得好有氣勢喎!第二張啲燈光效果下嘅基督城都好靚!

    回覆刪除
  3. 佛爺:
    嘩,陷阱呀!有關宗教嘅唔可以隨便講架,如果我手快快答咗你就大鑊喇!

    Coffee,
    哈哈,第一張相嘅氣氛係執出嚟架!至於基督城,其實好普通吓,只係一個中途站。

    回覆刪除
  4. 係喎!我都唔記得佐添!

    回覆刪除
  5. 佛爺:
    係呀,一講到宗教就冇理性可言架喇!

    回覆刪除
  6. 哇,第一張相超靚,好有氣氛!

    我又係有震緣,我去雲仙,後來火山爆發,成個市無咗;去過汶川,結果大地震。huh,等我踩上去社民連、民主黨、公民黨嘅總部先 XDDDDD

    回覆刪除
  7. laulong,
    嘩,咪住呀!等我打聽吓呢班友嘅總部喺邊度先啦,如果喺我屋企附近咪會殃及池魚?!

    回覆刪除