2011年2月1日星期二

山寨版夢露

有時睇番舊相都係一種樂趣,因為每張相背後都有一個故事。一路睇一路想當年,點都好過無無聊聊對住部電視。又真係奇怪,只要睇住張相,就算係九十幾年前嘅舊事都會浮番上嚟,連細節都記得好清楚。近期發生嘅反而冇乜印象,有時連前一日做過乜都記唔起。都唔知係咪腦退化症嘅先兆,有驚添!

啱啱睇番希臘相,其中有張係同一個金髮女郎嘅合照。不過隔籬仲有一個唔識嘅女人,究竟係乜水嚟嘅呢?即刻開罐啤酒,點番枝煙,故事情節就浮晒出嚟嘞。哈哈,原來情節同Coffee早排爭取加餸嗰篇有類似,咁就要寫喇!

話說九十幾年前跟團去到希臘,喺一個陽光燦爛嘅日子,上到雅典Acropolis對面嘅一個小山頭。離遠見到一班女團友圍住一個金髮女郎影相,咪行埋去睇吓囉。題外話,唔知點解跟親團都係陰盛陽衰(泰國團除外),影相比較麻煩。女士鍾意影人,又較為姿整,本來呢都唔關我事,最弊係有時要等個位影相,真係等得嚟都夠鐘上車啦。

言歸正傳,原來個金髮女郎係麻豆,喺個廢墟前面影緊輯相。睇真,真係成個山寨版夢露咁樣喎,不過係健碩版嚟架,而且仲有埋腹肌添!班女團友見到佢就好似執到寶咁,個個都要同佢影合照。不過到我行到埋去,「夢露」已經嫌班團友阻住佢開工,唔肯再影合照。嗰陣雖然已經幾十歲人,不過就未試過同金絲貓合照,如果錯過咗呢個機會就實在太可惜喇。冇錯,為咗我嘅幸福,一定要努力爭取!咁咪行埋去同佢講囉,就算佢唔肯,最多都係食個大檸檬啫,又唔使打一身嘅。

哈哈,唔知靚仔係咪著數呢,佢居然肯喎。嗱,我一向唔敢自認靚仔架,係Coffee話架咋。都已經企好晒位,準備影架嘞,點知有個女團友走過嚟,話佢都未影,問可唔可以一齊影喎。都行到埋嚟嘞,唔通我話唔得咩,咁冇風度嘅我又真係做唔出。咁佢就企咗喺「夢露」另一邊,好彩唔使我左右逢源啫。真係嬲佢又唔知,話佢又唔好意思。佢為咗爭取自己嘅幸福,竟然要犧牲我嘅幸福。本來係浪漫嘅二人世界,而家變成不倫不類嘅三人行!

好彩,有個物理定律叫做異性相吸,「夢露」忽然主動黐咗埋嚟,都算有番少少補償啦。不過張相出嚟嘅效果就好怪,明明我同「夢露」係一對,無啦啦隔籬多咗個第三者,破壞晒意境!而且個團友另外有人幫佢揸機,佢係望咗去另一邊嘅。同樣道理,喺佢自己嗰張相裏面,我同「夢露」都唔係望住鏡頭,咁嘅合照影嚟又有乜意思呢?當然,我唔係記仇記到而家,我真係冇咁小器,只係睇到張相就記番起啫。

以前用菲林機,影出嚟嘅相都覺得珍貴,背後嘅回憶都多。呢幾年轉咗用數碼機,去旅行一影就幾千張,返到嚟都係睇一次就算,根本就唔會得閒再摷番出嚟睇。不過咁,如果要我轉番用菲林機,我又打死都唔制喎。人就係咁奇怪架喇,成日講乜集體回憶,話嗰至係真正嘅財富喎。如果可以時光倒流,又睇吓佢地願唔願意返去嗰個集體回憶嘅年代?

後記:
本來呢篇嘅標題係叫做「A貨夢露」,但係個「A」字可能會令人聯想到成人情節,容易引起誤導,所以改為「山寨版夢露」。


10 則留言:

  1. 嗨!哩張竟然又變咗似莫少聰!(都話呢個世界有靚人歧視架啦!)

    嗱,我忍不住要評頭論足添,首先,你個look,哈哈,絕對經典嘅集體回憶,束褲,淺藍色牛記,有啲似紀律部隊中人,笑ing!邊個而家想穿出街吖?

    再睇A版「夢露」,下面果張,叉大對腳,大殺風景!又笑ing!

    回覆刪除
  2. A版夢露著咁多衫既?

    回覆刪除
  3. A貨夢露,但真貨靚仔噃!

    Arma, 越睇你個樣越面熟,該是那年頭名滿中大,令一眾師姊姐妹們迷倒嘅俊男一號,勁!

    回覆刪除
  4. coffee,
    哈哈,潮流嘅,唔使幾耐就一個循環,話唔埋再過多三五十年,薯碌會變番型碌呢!至於個「夢露」,何止健碩呀,仲巾幗不讓鬚眉添!

    佛爺:
    哈哈,個「A」字的確容易令人聯想到成人情節,有誤導成份,所以個標題改咗做「山寨版夢露」喇。

    Laulong,
    哈哈,取笑喇!嗰時薯仔一號就有份!

    回覆刪除
  5. 好正經喎雙手繞喺後面!

    回覆刪除
  6. eric,
    哈哈,你睇「夢露」成個女殺手咁,我點敢輕舉妄動喎!

    回覆刪除
  7. 你個 look 令我想起「新札師兄」阿梁朝偉佢地!但唔駛驚喎,潮流真係會循環㗎,我對 "pretty woman" boots 同呢萬興啲嘢差唔多!

    可惜我唔係中大出品,無緣見識你當年的風采!

    回覆刪除
  8. 祝你春風得意!龍馬精神!

    回覆刪除
  9. Arma:

    祝你兔年旺相,萬事可樂;下筆驚風雨,宵小猛迍逃;政棍俱下馬,宇內復澄清!

    呵呵,這祝福由內至外啊,望笑納笑納!

    回覆刪除
  10. SKII,
    可能係年紀太大,已經接受唔到新事物。睇見家陣𡃁仔,著埋晒吊腳褲、瀨屎褲,仲要成日玩甩褲,真係吾不欲觀之矣!潮流嘅,絕對唔啱我呢老餅!

    佛爺:
    我都祝你春色盡享,虎虎生威!

    Laulong,
    哈哈,講到我要降魔捉妖咁,唔通我個樣真係有似鍾馗?

    回覆刪除