2011年2月12日星期六

新年伊始,梗係要寫吓同兔有關嘅啦。不過摷番舊相睇,先知道原來一張兔仔都冇影過,唯有求其隻Playboy兔頂住先,真失敗!

講到兔仔,印象中細個時好似養過,不過就唔係記得好清楚。後來唔記得係死咗定係劏嚟食咗,總之就係唔長命啦。哈哈,新年流流講埋咁嘅,真係大吉利是!

其實兔仔真係好可愛,不過就可望而不可即。我係講緊讀幼稚園嘅時候,如果功課做得好,先生就會俾隻兔仔做獎勵。雖然只係揼個兔仔印喺功課上面,都已經不知幾開心。不過好慚愧,我功課上面多數都係黑豬仔。唔知而家幼稚園仲有冇呢樣,照理咁白痴嘅,𡃁仔冇可能會受。

自從大個仔之後,兔仔就只係一種肉類,而且多數係去旅行先會食。講真,兔肉又真係麻麻地好食,主要係嫌佢鞋。忽然諗起一套法國片,叫做「戀戀山城」(Jean de Florette),個男主角無啦啦走去山區養兔,結果搞到命都冇埋,真慘情!

唔知點解,雖然兔仔人見人愛,但係就成日俾人抹黑。好似龜兔賽跑咁,直頭係明屈隻兔仔啦。仲有,用親個兔字嘅都唔係好,例如兔崽子、兔子、兔兒爺。

點都好啦,新年流流一定要講番好意頭嘅,我就恭祝大家:

兔氣羊眉 - 其實我都唔知羊究竟有冇眼眉,總之就食住兔年嘅旺氣,一路威到羊年啦
兔起骨落 - 即係由年頭開始,餐餐大魚大肉,有骨落地
守豬待兔 - 一句講晒,不勞而獲,錢無啦啦自己飛埋嚟
狡兔三窟 - 已婚男士包完二奶包三奶,未婚嘅就一腳踏三船,齊人都冇咁過癮

講開又講,我以前成日搞錯個兔字同免字,自從有咗電腦打字就一天都光晒。當然啦,以我呢半文盲,倉頡根本冇可能會用到。好彩呢兩個字我仲識讀,用拼音輸入雖然係慢,起碼唔會搞錯先。哈哈,電腦真係好偉大嘅發明!

6 則留言:

  1. 呵呵, Arma 過年去咗玩?

    包完二奶包三奶?其實唔係太過癮架,你睇賭王!

    回覆刪除
  2. laulong,
    係呀,啱啱喺非洲返嚟。狡兔三窟本來係好,不過賭王失敗在多咗一房,變成四面楚歌!

    回覆刪除
  3. >>狡兔三窟,四面楚歌!

    好好笑!笑咗好耐!

    話時話,非洲啲兔子係咪全部黑色架?

    回覆刪除
  4. Arm:

    我反而覺得拼音難學,結果我學了倉頡輸入法。可能是各人的潛質不同而已!

    回覆刪除
  5. 實驗室有幾隻好大嘅大白兔(要兩個人先至捧得掂),好可愛,我就一定唔忍心攞嚟做實驗喇。

    回覆刪除
  6. Coffee,
    哈哈,非洲兔仔係咪全部黑色我就唔知嘞,不過有一樣可以肯定,就係全世界嘅兔屎都係黑色架!

    佛爺:
    倉頡我就真係唔掂嘞,唔識個字點寫就自然打唔到,冇計!

    eric,
    係呀,超大嘅貓同兔仔都好可愛,不過超大嘅狗就好得人驚!

    回覆刪除