2011年2月19日星期六

頤和園

最近唔知抽起邊條筋,忽然好有興致摷番九十幾年前嘅舊相睇。隨手抽本相簿出嚟,原來係頤和園。淨係計旅行,北京都去過三次。頤和園就去過兩次,一次夏天,一次冬天。

老實講,對頤和園嘅印象真係麻麻地,淨係覺得人多。雖然頤和園有山有水,又話係模仿西湖建造,不過橫睇掂睇,都係西湖靚好多。講真,其實西湖一樣係人頭湧湧,乜意境都破壞晒。冇計啦,中國有十幾億人口,想個少人嘅景點真係難過登天。

每次見到頤和園相,都會諗起一個人。唔知大家會唔會都係諗起佢呢?冇錯,就係慈禧嘞。以前會諗,如果唔係有慈禧呢個老虔婆,中國嘅近代史會唔會改寫呢?類似嘅問題,喺杭州都諗過。如果唔係有秦檜呢個奸臣,中國究竟又會係點樣嘅一番景象呢?當然啦,呢咁無聊嘅問題,已經冇諗好耐喇。冇秦檜,仲有高宗,就算連高宗都冇埋,岳爺爺亦未必一定可以直搗黃龍。同樣道理,就算冇慈禧,光緒都唔一定可以發圍。總之發生咗就係發生咗,「如果」根本就完全冇意義。

所謂天理循環,作惡多端嘅人遲早會有報應。秦檜受後世唾罵,喺杭州岳墳就有個供人吐口水嘅秦檜跪像。不過如果咁都算報應,就真係著數咗喇。而慈禧死後就俾人盜墓,折墮到連衫都俾人剝埋。不過盜墓賊只係求財,竟然冇將佢毀屍,都算益咗佢喇。所以話呢,報應呢家,只係呃到善良嘅人架咋。

揭吓揭吓,又見到嗰隻怪雞船嘞。隻船有個好文雅嘅名,叫做清晏舫,不過一般人都叫佢做石舫。清晏呢兩個字,我諗係嚟自海晏河清,有天下太平嘅意思。慈禧挪用海軍軍費修建頤和園,寧願要隻石舫,而唔要北洋艦隊。石舫當然唔會沉,不過北洋艦隊就梗係做咗砲灰啦。真係好諷刺,連國家都冇能力保衛,仲講乜天下太平呢?都唔知慈禧個老虔婆係乜心態,當時嘅中國已經係佢一個人嘅私產,而佢竟然完全冇諗過要保護自己嘅財產!

話隻船怪雞,除咗因為個名之外,仲係因為佢嘅型態。石舫係西式設計,根本就唔夾頤和園呢個中式園林。而且起喺岸邊,水淺到露晒底,睇嚟睇去都係似閣淺咗。慈禧嘅品味真係非一般平民老百姓所能理解。

又再揭吓揭吓,咁就去到一個比較冷門嘅景點,多寶塔。個塔起喺後山,而且唔算宏偉,根本就冇乜遊客會到。當時多寶塔仲維修緊,周圍搭晒棚。咁辛苦先到,真係好冇癮吓,唯有客串做住搭棚工友先啦。個塔雖然係細,不過睇真,其實都幾靚吓。塔身鋪晒琉璃磚,每塊磚上面都有個佛像,雕工仲好精細添。再睇真就發現咗一樣好怪嘅,每個佛像都係爛面嘅。根據園方嘅說明,破壞係八國聯軍嘅惡行。我都知道八國聯軍有幾衰格,佢地搶掠頤和園,珍寶攞得走嘅都攞走晒,搬唔郁嘅就打爛晒,絕對唔會留低益人。不過我又真係好懷疑,班友會唔會得閒到逐個佛像扑爛塊面呢?事隔九十幾年,相信爛面佛像都已經修復好,八國聯軍嘅一項罪證咁就湮沒咗嘞!






6 則留言:

  1. 頤和園我都去過兩次,感覺也只是普通的山水園林。

    照計若八國聯軍啲外國佬要破壞佛像,開槍係咁掃就得,逐個佛像頭去打,似紅衛兵所為多啲!

    仲有,第一張相好正,剪影好有味道。

    回覆刪除
  2. laulong,
    其實我都覺得爛面佛像係同破四舊有關,不過而家入埋八國聯軍數,我又冇乜所謂喎!講到第一張相,嗰時係冬天,昆明湖都結晒冰,直頭「冷得我騰騰震,真係震到入心呀」!

    回覆刪除
  3. 而家去內地旅行,真係去邊度都人頭湧湧,睇又睇唔到,聽又聽唔清,夏天一味聞到人啲汗味。

    回覆刪除
  4. 我記得個石舫附近好多垃圾浮下浮下。
    如果真喺八國聯軍就一把火燒哂啦。仲會逐個去鑿。

    回覆刪除
  5. 頤和園,人多過柱,無癮!

    回覆刪除
  6. coffee,
    好彩我九十幾年前已經去咗九寨溝同張家界,嗰時呢兩個景點都係啱啱開發,唔使同人迫,又冇吊車或者子彈之類嘅破壞景觀!

    eric,
    有中國人嘅地方就有垃圾嘛!咦,唔係喎,麗江古城裏面滿布水道,水又清又乾淨,真係一舊垃圾都冇架!

    佛爺:
    哈哈,又真係冇數過頤和園裏面有幾多條柱喎!

    回覆刪除