小野貓

聲明：本文立場偏頗，言論有欠理性，跡近貓身攻擊，敬請愛護動物及維護貓權人士立即離開！

勾魂奪魄嘅smoky eyes、性感迷人嘅tube top、肉香四溢嘅超短米你裙，真係睇到麻甩佬流晒鼻血。如果唔係見到佢拎住枝雪山獅子旗，仲以為又係嗰為咗博上位乜都敢死嘅𡃁模添。原來呢隻性感小野貓係新一代民主鬥士，仲係名牌大學高材生，的確一都唔簡單。

不過係名牌大學高材生又點？咪一樣係冇腦，好學唔學，學鬼佬支持藏獨。唔通佢唔知西藏從來都冇民主？係要支持藏獨都等達賴同班禪可以由普選產生先啦。不過又真係幾搞笑，佢後尾又話展示雪山獅子旗唔係要支持藏獨，而係要挑戰禁忌，彰顯言論自由。即係話我都可以兜口兜面向佢講句四字真言，然後話我絕對冇意圖冒犯佢或者佢嘅親貓，而只係示範緊我嘅言論自由啫。建議佢去公認最民主自由嘅花旗國，喺白宮門口展示阿爾蓋達枝旗（其實我都唔知阿爾蓋達有冇旗），睇吓會點？包保佢即刻貓間蒸發，到時佢就知道原來自己一直身在福中不知福。
仲有，全世界都知道雪山獅子旗係代表藏獨架啦，事後否認有叉用咩。都唔知佢係咪食得太多重金屬超標嘅外國貓糧，搞到思覺失調。

咪睇佢細細粒粒，原來發起爛渣上嚟絕對唔係貓咁品，搞到裙拉褲甩都在所不計。早排佢就因為涉嫌襲擊防治蟲鼠組人員俾人拉咗。真係好搞笑，網上傳聞話佢係set靚個頭，化行晒妝咁等人拉架。不過更搞笑嘅係佢俾人拉咗之後講嘅一番說話：「今日捉咗一隻小野貓，出面仲有千千萬萬隻小野貓」。哈哈，唔知佢當自己係秋瑾定係孫中山呢？

雖然佢講到自己好偉大，但係我就打死都唔信佢搞咁多唔係為咗博出位。如果唔係，點解鑊鑊示威遊行都要化行晒妝，仲要著到令人噴晒血？咁講真，佢身材都OK嘅，但係個樣就好普通吓。如果佢真係想上位，睇怕都要去韓國執執先掂喇。