2010年7月16日星期五

麻雀二三事

分手
唔經唔覺,同佢分咗手已經幾年。我都估唔到自己會咁有定力,竟然冇再過佢。曾經有一段時間,對佢嘅迷戀真係到達瘋狂程度,直頭係一日不見如隔三秋。不過同佢一齊真係開支好大,遲早會搞到破產。冇辦法啦,唯有忍著淚說goodbye。當時雖然有難受,不過總算係和平分手,冇發生血案,到而家我仲係十指齊全。佢係邊個?之唔係麻雀囉!

邂逅
我讀緊小學已經識打牌,係無師自通嗰隻。嗰時屋企成日有人打牌,睇得多就自然識,根本唔使人教。講真,廣東牌又真係幾簡單吓嘅。如果係台灣牌,齋睇冇人教嘅話就肯定睇十年都學唔識!

魔力
麻雀嘅魔力真係好大,有人為咗佢,幾大嘅犧牲都肯制。以前班雀腳當中,有兩三個師奶係唔食煙嘅,仲要係忍受唔到煙味嗰隻。但係其他雀腳就個個都係煙鏟,係打一晚牌可以食三包煙嗰種。如果唔係有麻雀賜俾佢地嘅神奇力量,嗰幾個師奶絕對冇可能忍受到漫長嘅煙燻過程。冇計啦,鬼叫佢地唔夠腳自己開一檯咩!

牌章
係人都知打牌要講章法,不過乜係牌章又真係幾抽象吓。咁點先算係高章呢?我覺得三樣最緊要:識計或然率,識睇牌路,同埋識捉心理。不過高章都唔係一定贏硬,仲要睇埋運氣。好多人話牌章同運氣嘅比重係一半一半,但係我就覺得三七會比較接近現實。有時老襯當旺,就算你牌章高到識飛都冇用,一樣俾佢打死。

3 則留言:

  1. 打麻雀計或然率,好攞命!那些雀友是「站長」!嘻嘻!

    回覆刪除
  2. 佛爺,

    我就唔係咁睇嘞,人成為站長有兩個主要原因:
    1. 優柔寡斷,揸唔定主意
    2. CPU轉數太慢

    回覆刪除
  3. 1. 優柔寡斷,揸唔定主意
    2. CPU轉數太慢

    係喎!你講落又似喎!

    回覆刪除