沙白

呢排唔知抽起邊條筋，好鍾意食貝類海產，琴日就買咗貴妃蚌同沙白。講起沙白就把幾火，買咗兩斤，竟然有超過一半係死嘅，仲要係死到發晒臭，肉已經半溶化嗰種。

買嘅時候睇唔出有問題，亦聞唔到有異味。梗係啦，街市魚檔本身已經係腥腥臭臭，而買呢又冇得逐隻揀，買到咁嘅貨色真係非戰之罪。返到屋企先聞到陣屍臭味，但係已經太遲啦。冇辦法啦，唯有逐隻聞吓，又試吓撬唔撬得開，結果揀完之後剩返唔夠一半。

最後沙白攞咗嚟白灼，肉睇起上嚟完全冇問題。點知試第一隻就覺得有異味，結果全部要報銷。都唔知係心理作用定係沙白浸得死屍水太耐，總之就博唔過啦。雖然唔係貴（30蚊兩斤），不過就真係好激氣。仲搞到我成晚形住形住，覺得周圍都係死屍味。

都唔知人乜心態，咁嘅貨色都可以攞出嚟賣。話明係街市，做嘅都係街坊客，來來去去都係嗰班人。賣埋咁嘅，人地下次仲會返嚟幫襯咩？唔通賣晒嗰幾十斤沙白就收夠籌，以後可以唔使撈？我就已經將嗰個魚檔剔出咗食品供應商名單，永不錄用！