2011年9月26日星期一

怪獸家長之奪命追魂call

早排講開怪獸家長,搞到有啲欲罷不能添。卒之問我個教書朋友攞咗啲料,一於再添食。

朋友間學校有個幾曳吓嘅細路,咁又唔係大奸大惡嗰隻,而係比較唔聽話。以我朋友咁老忽忽,呢啲細路當然難唔到佢,惡頂嘅係佢阿媽。

呢位師奶有鋪揾仔癮,一心血來潮就會打電話去學校揾仔,據保守估計,一個禮拜起碼都會揾兩次。要揾人上課室叫阿仔嚟校務處聽電話,鬼死咁麻煩,接電話嗰位妹妹當然唔係咁願意應酬佢啦。咁妹妹就同佢講:「X同學而家上緊堂,唔係咁方便聽電話喎。」本來咁答好正常,點知個師奶刻發爛渣:「我個仔喺你地學校讀書,點解我唔揾得佢,而家仲有冇人權呀!你唔肯叫就揾你地校長同我講啦!」估唔到妹妹又幾硬淨,竟然冇即刻就範:「校長而家開緊會,唔方便聽電話。或者你講低揾X同學有乜嘢事,落堂之後我地轉達俾佢知啦。」呢啲咁嘅太極花招,師奶真係睬你都有味啦:「我而家有好緊急嘅嘢要揾阿仔,如果出咗事,你擔唔擔當得起先!你叫乜嘢名?!」講到咁大鑊,妹妹想唔屈服都唔得啦,唯有揾人叫阿仔落嚟聽電話。

師奶講到咁大鑊,妹妹又想八卦吓,就留心聽住阿仔嘅對答。點知原來係叫阿仔放學順便買枝豉油返屋企,真係激到妹妹彈吓彈吓。以後師奶打親嚟揾仔,妹妹都唔敢逆佢意,一來係唔想俾佢鬧,而且又唔知佢係咪真係有啲死人冧樓嘅嘢,費事自己孭鑊啦。不過以妹妹聽到嘅,次次都係啲雞毛蒜皮嘅小事,最多嘅係師奶話去打牌,叫阿仔夜晚嗰餐自己搞掂。

其實唔止妹妹覺得呢位師奶討厭,連啲老師都好唔高興,因為成日上緊堂都俾佢打斷。不過冇辦法啦,鬼叫而家啲家長大晒咩!

後來師奶仲變本加厲,連放咗學都打嚟揾仔。妹妹就同佢講:「而家放咗學,X同學可能已經走咗,我地揾唔到佢架喇。」咁嘅回應,師奶當然唔會接受啦:「你唔識開咪嗌嘅咩,使唔使呢啲嘢都要我教呀!」妹妹雖然俾佢吹到啤一聲,不過都係照做。結果又真係俾佢揾到仔喎,原來阿仔仲同啲同學仔喺操場玩緊。如是者連續幾次放咗學之後揾仔,搞到連阿仔都頂佢唔順,就喺電話鬧佢:「你好煩呀!以後唔好再打電話嚟學校揾我呀!」跟住就掟佢電話。妹妹聽到都不知幾開心,仲差啲忍唔住笑咗出嚟添。

呢個師奶,橫蠻無理唔在講,仲蠢到冇人有添,竟然一啲都唔知細路嘅心理。啲細路上到中學,就以為自己已經大個仔,根本就唔鍾意阿媽打電話嚟學校揾佢地。上緊堂都算嘞,始終只係同班同學知道。後來仲要搞到嗌埋咪,你話個細路幾瘀呢!

我父母嗰輩,好多都冇受過乜嘢教育。仔女可以有書讀,佢地已經覺得好開心,所以對學校好尊重。除非真係死人冧樓,否則絕對唔會走去麻煩學校。而家唔同晒喇,啲家長只係將學校當成托兒所,自己就係至高無上嘅顧客。既然「顧客永遠是對的」,咁又使乜尊重學校呢?啲細路耳濡目染,自然唔會知道乜嘢係尊師重道啦!

以上面個師奶為例,斷估佢都唔會教阿仔乜嘢叫做禮貌、誠信、同責任,阿仔唔曳先至奇啦!而且萬大事都有阿媽出頭,阿仔喺學校又使乜聽教聽話呢?當然啦,既種惡因,必得惡果,第日臨老唔過得世,同傳媒哭訴話有仔等如冇仔嘅,就係呢啲人嘞!

10 則留言:

  1. 唉,哩啲無知婆點識做人阿媽吖?因為佢自己連做人都唔識,仲係喺佛洛伊德所講嘅口腔期同肛門期,另一個角度講根本就有人格障礙。

    一啤個細路就係家長,係家長就大晒,哩啲咪香港啲怪獸高官搞出黎嘅概念咯!

    回覆刪除
  2. laulong,
    我都唔明點解有啲家長可以野蠻成咁!第日佢地嘅仔女做埋家長就肯定仲大鑊,到時真係唔知乜嘢世界!

    回覆刪除
  3. 呢個家長好明顯有精神病,強迫性嗰隻!

    回覆刪除
  4. 吓,我從來都唔知可以打斷上堂㗎喎?超級同意個仔根本唔會鍾意阿媽咁樣搵佢,而家學校肯應酬佢,其實係幫緊佢破壞佢同自己個仔的關係,第日阿仔同佢反面,係佢自己攞嚟!
    btw,咁啱我剛寫的是“港太”,相信也是怪獸家長一族呀!

    回覆刪除
  5. Coffee,
    哈哈,你咪鬼咁衰啦!精神病就應該唔係,嗰位師奶係勁煩同使死人唔使本啫!

    SKII,
    我地做學生嗰時梗係唔得啦,而家啲家長有乜嘢做唔出喎!至於唔知啲細路點諗,其實好多家長都係咁架,呢個先係大問題!

    回覆刪除
  6. 我冇衰呀!你諗下,我話佢有病佢咪有得賴咯,我都冇話佢變態:P

    回覆刪除
  7. Coffee,
    哈哈,話佢變態就啱聽嘞!如果有精神病,即係話佢唔知自己做緊乜,唔使為自己嘅行為負責!

    回覆刪除
  8. 聽阿邊個講,香港其實有好多人有精神病,總有一個喺左近。

    回覆刪除
  9. 咁樣搵仔,同一日洗一百次手的愛潔癖一樣,係有精神情緒病。

    回覆刪除
  10. Ebenezer,
    哈哈,係都唔出奇架!我就覺得自己有些少強迫行為嘞!

    佛爺:
    嗰位師奶一個禮拜只係揾兩次仔,其實唔算離譜架喇,佢只係濫用自己嘅權利啫!每日call十幾次check住行蹤嗰啲先攞命呀!

    回覆刪除