斷指故事

警告：本文內容涉及血腥情節，可能引起讀者不適，敬請留意！

前日喺日月報睇到單花邊新聞，血腥之餘仲幾搞笑添。話說長沙有一對80後小夫妻，半夜三更因為啲瑣事嗌大交。男嘅激動起上嚟居然攞刀斬咗自己隻手指尾，而女嘅亦不甘示弱，即刻用刀切咗自己隻食指，一於大番個死佬。跟住佢地齊齊送咗去醫院做接駁手術，仲住喺同一間病房，瞓喺隔籬床，不過就互不理睬。事後佢地竟然冇為自己做嘅傻事感到後悔，女方仲落力數臭男方呃佢添。

家暴事件香港日日都有，本來冇乜特別，不過多數都係攞刀斬對方，自殘就比較少見。就算有自殘事件，對方嘅反應通常都係報警或者叫白車，用同樣方式嚟鬥大，真係少之又少。好玩唔玩，竟然玩斬手指，唔知嗰對男女有冇諗過，冇咗隻手指有幾大鑊。其他唔講，淨係打字已經夠麻煩。冇咗左手尾指，AQZ呢三個字母就打唔到嘞！冇咗左手食指仲大鑊，FGRTV都打唔到，比冇咗尾指多兩個添！

斷手指呢家我都試過，唔止唔好玩，更唔止係一時之痛，影響可以係一世咁長架！當然啦，我隻手指唔係自己切，更唔係俾人斬，其實係喺廿幾年前一次單車意外撞斷嘅。斷嘅地方係左手食指指尖嗰節中間，基本上係半隻指尖甩晒咁滯，只得一邊有少少皮肉連住。人地話十指痛歸心，不過好奇怪，撞嗰刻竟然唔覺得痛。之後去到急症室，都只係有啲隱隱痛，而啲血又冇吧吧聲咁流，相信同一般人對於斷手指嘅想像有好大出入。姑娘幫我檢查傷口嘅時候掂到喺斷口凸咗出嚟嘅指骨，就問我痛唔痛。咁我唔覺得特別痛咪話唔痛囉，點知佢細細聲同隔籬個姑娘講話我梗係痛到short咗，真係俾佢激死！

真正痛嘅係做手術嗰時，唔係，應該話之前。手術前要先喺手指兩側根部各打一枝麻醉針，要拮到入骨裏面，真係痛到入心入肺！仲有，醫生喺麻醉藥未完全生效之前就開始搞我隻手指，嗰時先體會到乜叫做十指痛歸心！

因為指尖嘅骨碎開咗幾塊，要打枝鋼針入去固定，等啲骨慢慢生番埋。枝鋼針一直打到指根嗰節，搞到成隻手指唔可以屈曲。而喺指尖就凸咗兩三mm出嚟，真係鬼死咁唔方便，一來驚碰到會痛，又驚會拮親自己。後來過咗一排先發覺原來枝針碰到係唔會痛架，咁就開始用枝針四圍拮人，隻手指無啦啦變成攻擊性武器添！

除咗枝鋼針，煩嘅仲有其他。傷口唔濕得水，醫生又話盡量唔好垂低隻手，真係勁唔方便！而且頭嗰幾日隻手指隱隱作痛，好難瞓得著。不過咁，好彩瞓著咗又唔會痛醒。

過咗幾個月，啲骨已經生番埋，可以掹針嘞。初初我仲驚會痛，正喺胡思亂想之際，醫生已經掹咗枝針出嚟，完全睇唔到佢點出手。只見指尖有個無底深洞，感覺好怪異，再過幾秒啲血先湧出嚟。再睇清楚啲，指尖嗰節短咗成四分一，而且出現明顯變形添。因為甲床受損，新生出嚟嘅指甲變成凹凸不平，相當肉酸吓。仲有，從側邊睇，指尖竟然成45度角上翹，令到我之後成日俾人笑蘭花手！不過咁，我都冇去諗係咪個手術做得唔好，其實駁得番隻手指已經好好架喇！做完手術醫生已經同我講，雖然節手指係駁番，但係如果供唔到血去指尖，啲組織就會壞死，到時就要切咗佢。

之後再去覆診，醫生見新生出嚟嘅指甲咁肉酸，竟然建議我切咗節指尖。呢個黃綠，講都唔知經唔經大腦架！煩咗幾個月隻手指先生番好，有乜理由又走去切咗佢喎，而且諗起嗰兩枝麻醉針都怕怕啦！最重要嘅係，節指尖喺度，起碼可以保住隻手指嘅功能，肉酸啲又有乜所謂啫！個黃綠都唔知係咪嫌公立醫院啲醫生唔夠忙！

雖然話隻手指嘅基本功能保得住，不過指尖嘅感覺就差唔多冇晒，因為大部分神經線都斷咗。神經線可以再生，但係速度就好慢。就算過咗幾年，指尖都仍然感覺唔到尖同鈍嘅分別。雖然掂到冇乜感覺，但係如果大力撞到硬物就特別痛，而且痛得特別耐，都唔知點解。一直要到大約二十年後，指尖嘅感覺先大致恢復。其實到今日，嗰隻手指嘅感覺仍然同正常嘅手指有些微分別，可能永遠都係咁架喇。

又講番嗰對鬥大夫妻，我當然唔知佢地因乜嗌交，不過點都好，用自殘嚟鬥大就肯定蠢到無倫！就算佢地嘅手指生得番（呢樣其實唔一定），功能上嘅損害唔多唔少都實會有。仲有，手指上嘅疤痕，手指嘅遲鈍感覺，會一世跟住佢地，令佢地日日都記番起發生過一件咁唔開心嘅事，永遠冇辦法忘記！咁又何苦呢！