2011年9月23日星期五

山姆叔叔三事

琴日睇到幾單同山姆叔叔有關嘅新聞,對呢個喺民主、人權、法治幾方面都傲視全球嘅國度,又有更深一層嘅認識。

有民間組織喺網上發起名為「佔領華爾街」嘅示威行動,雖然參與者堅稱示威係和平進行,不過紐約警方就拘捕咗十幾人。警察拉人嘅名目可謂千奇百趣,絕對唔係我地呢啲化外之民可以想像。有個男人喺遊行中俾前面嘅人塞住,冇辦法依照警察命令向前行,結果俾人拉咗,理由係佢「擾亂秩序」。有個女人喺行人路用粉筆寫字,之後以塗鴉罪被捕。有用大聲公嘅示威者俾人拉咗,罪名係「未經許可使用擴音器」。又有人用防水布保護攝影器材,結果俾人拉埋,因為佢「違反公共衛生條例豎立帳篷」。最搞嘢係警方仲引用百幾年前嘅舊例,「公眾場所舉行集會時禁止兩人或以上戴上面具」,拉咗幾件V煞。香港啲廢青成日大嗌「警權無限大」,真係未見過大蛇疴尿!當然啦,井底蛙始終係井底蛙,冇得講!

爹親娘親不及山姆叔叔親嘅民主聖鬥士,你地以後仲敢唔敢要香港同美國睇齊?

喬治亞州啱啱處決咗一個黑人死囚,引起國內外人權組織極度不滿。個黑人係因為22年前一單槍殺警員案被判死刑,但係佢自己就堅稱無辜,不斷要求翻案。事實上單案又真係疑點重重,警方一直都揾唔到涉案兇器,有多名證人改口話供詞係受警方壓力影響,更有陪審團成員表示自己當時嘅判斷犯咗錯。事件引起國內外人權組織關注,強烈要求翻案,連教宗都開口聲援。不過有關當局睬你都有味,堅決拒絕翻案,仲如期執行死刑。美國仲未廢除死刑,一向為人權組織所咎病。而家仲搞單咁嘅嘢,更加俾世人睇到美國佬有幾剛愎自用。事實上,又真係好難令人唔懷疑單嘢當中有冇種族歧視。如果個疑犯係白人,結果會唔會都係一樣呢?

爹親娘親不及山姆叔叔親嘅人權戰士,唔知你地又點睇呢?

審計報告揭發,美國司法部開會大花筒,會場要揀高級酒店,茶點更係天價極品。當美國納稅人要勒緊褲頭過日子,司法部嘅公職人員就連開會都要享用$130(港紙)一件嘅鬆餅同$40一罐嘅可樂,真係唔嬲就有鬼啦!算唔算浪費公帑我唔知,不過就肯定係官門酒肉臭!

爹親娘親不及山姆叔叔親嘅尊貴大狀同司法人員,你地又有冇乜嘢高見呢?

哈哈,呢條問題我就識幫佢地答嘞。從事司法界嘅都係社會上嘅精英,待遇自然唔可以同一般人相提並論,唔通要人地食啲茶餐廳貨色咩!想要法治,社會當然要付出代價啦!百零蚊一件鬆餅都喺度阿吱阿咗,香港人真係唔會咁小家!


6 則留言:

  1. 嘿嘿,嗰班狗主聖鬥士、滛(滛者濫也)權戰士、黐根大狀同司法人員唔會出聲架喇,佢地只會話睇唔到睇唔到我睇唔到!

    人性本賤,美國喺某啲地方更是賤中之尤,只是太多香港人只是崇洋之犬,不見彼邦之醜而已!

    回覆刪除
  2. 香港班攪攪震份子,要求人同要求自己是完全唔同的準則!

    回覆刪除
  3. laulong,
    唔啱睇嘅就睇唔到,唔啱聽嘅就聽唔到,可能好多人都得。不過仲要喺公眾面前扮到大義凜然,真係少啲演技都唔掂,其中代表人物相信都非李柱X莫屬喇!

    Coffee,
    嚴人寬己,已經係香港人嘅通病。好似燒巴士單嘢,就有涉案小人渣嘅家長話啲細路只係貪玩。如果唔係嗰位師奶個仔有份,我就打死都唔信佢會咁講!

    回覆刪除
  4. 香港其實好寬鬆,只係班友想搞到變佐無政府狀態,任由佢地魚肉!

    回覆刪除
  5. 外國警察,唔理三七廿一,噤住你嚟打㗎。
    仲有呢,如果你捉咗個入屋偷嘢嘅賊,「唔小心」整親佢,你要負責㗎,分分鐘會比佢告番轉頭!

    回覆刪除
  6. 佛爺:
    其實打殘警察對邊啲人最有利呢?唔使講啦,一定係啲蠱惑仔啦!所以我好明白癲狗之流點解要咁做。但係班學生廢青都打埋一份,就點諗都諗唔明嘞,唯一解釋係班友根本就冇腦!

    eric,
    南韓警察先勁呀,對啲示威韓農同學生真係扑狗咁扑架!我就相信香港警察嘅斯文程度肯定居於世界前列嘞!當然啦,外國嗰啲旅遊警察都好nice嘅!

    回覆刪除